ARTIKEL WAMAHAʼÖ 4
SINUNÖ 30 Amagu, Awögu, ba Lowalangigu
Iʼomasiʼö Ndraʼugö Yehowa
”Safönu faʼomasi Yehowa ba sahakhö tödö.”—YAK. 5:11.
NITUTUNÖ
Faʼomasi Yehowa zamarou yaʼita enaʼö taʼaroʼö wahuwusada khönia ba tarasoi wa ilumöʼö, irorogö ba ibeʼe khöda waʼahono dödö.
1. Hadia zi tumbu ba gera-eramö na öʼangeragö sanandrösa khö Yehowa?
HADIA no irai ökhalaigö hewisa Yehowa andrö? Na fahuhuo ndraʼugö khönia ba wangandrö, hadia zi tumbu ba gera-eramö? Tebai taʼila höröda Yehowa, hizaʼi oya nitutunö Zura Niʼamoniʼö sanandrösa khönia. Yehowa andrö ”no amaedola luo hegöi baluse” ba ”amaedola galitö si manga hadia ia”. (Si. 84:11; Heb. 12:29) Iʼamaedolagö Yehowa andrö Hezekieli ba zi sambua angilata hulö ganaʼa safusi si takile, si dadao ba dadaoma waʼarazo si hulö gara safiro, ba no ifasui ia dumi. (Hez. 1:26-28) Na taʼangeragö fefu daʼö, tatu ahöli-höli dödöda mazui tola manö möi fametaʼuda.
2. Hadia zi tobali taha-taha irege so zi lö ahatö khö Yehowa?
2 Börö me tebai taʼila Yehowa, tola manö abua khöda ba wamaduhusi tödö wa iʼomasiʼö ita. So ösa zorasoi wa lö irai iʼomasiʼö ira Yehowa börö zi lö sökhi salua khöra ba zilalö. Te lö iʼomasiʼö ira amara si so ba gulidanö. Aboto ba dödö Yehowa hadia nirasoida ba iʼila hadia mbörö wa abua wangahatöʼö yaʼita khönia. Ba wanolo yaʼita, ifatunö khöda ba Zura Niʼamoniʼö hewisa ia sindruhunia hegöi bua-bua si sökhi niʼokhögönia.
3. Hana wa moguna tafahaʼö ita ba waʼomasi Yehowa?
3 Yehowa andrö no faʼomasi. Daʼö ngawua wehede sabölö tefaudu sanandrösa khö Yehowa. Imane Sura Niʼamoniʼö, ”Lowalangi andrö no faʼomasi.” (1 Yo. 4:8) Faʼomasi zi tobali dane-dane ba ngawalö nifaluania. Iforomaʼö waʼomasinia Yehowa ba niha si lö mangomasiʼö yaʼia. Daʼö dandra wa oböwö ba ebua sibai waʼomasinia. (Mat. 5:44, 45) Ba wamahaʼö daʼa dania, tatutunö sanandrösa khö Yehowa hegöi faʼomasinia. Na itugu oya waʼaboto ba dödö niʼokhögöda sanandrösa khö Lowalangida, itugu taʼomasiʼö göi ia.
IʼOMASIʼÖ SIBAI ITA YEHOWA
4. Hewisa dödömö ba waʼomasi Yehowa? (Faigi göi gambara.)
4 ”Safönu faʼomasi Yehowa.” (Yak. 5:11) Ba Zura Niʼamoniʼö, ifagölösi ia Yehowa simane ina safönu faʼomasi. (Yes. 66:12, 13) Khalaigö zi samösa ina sondrorogö ononia side-ide si fao faʼomasi. Ihagi ba ihaogö-haogö linia wahuhuosa enaʼö ahono dödö nononia andrö. Na meʼe mazui mofökhö nononia, ihaogö wondrorogö. Simane daʼö göi na göna ita abula dödö, faduhu dödöda wa itolo ita Yehowa börö me iʼomasiʼö ita. Imane sanura sinunö, ”Me ihawui ndraʼo faʼaombö dödö, örara dödögu ba öʼokafui.”—Si. 94:19.
”Simane ina sondrara tödö nononia, simanö göi ndraʼo ba wondrara tödömi” (Faigi ngenoli si 4)
5. Hana wa tohude sibai waʼomasi si lö faröi niforomaʼö Yehowa khöu?
5 Yehowa andrö Lowalangi si lö faröi. (Si. 103:8) Lö tebulö iʼomasiʼö ita hewaʼae tafalua zala. Asese sibai laʼafökhöiʼö dödö Yehowa iraono Gizaraʼeli. Hizaʼi, na lafalalini gera-erara ba laböhöli wamalua amuata si lö sökhi andrö, ifaduhuʼö khöra wa lö mamalö-malö iʼomasiʼö ira. Duma-dumania, imane khöra, ”Ebua mböliu fönagu, uʼalawaʼö ba uʼomasiʼö ndraʼugö.” (Yes. 43:4, 5) Lö irai tebulö waʼomasi Lowalangi irugi iadaʼa. Tola tafaduhusi tödö daʼö. Hewaʼae no tafalua zala sebua, lö iröi ita Yehowa. Na tafalalini gera-erada ba tafuli ita khö Yehowa, tola taʼila wa lö tebulö iʼomasiʼö ita. Ifabuʼu wa hasambalö ”ibeʼe wangefa soroi ba dödö”. (Yes. 55:7) Buania, tola tarasoi ’waʼohahau dödö nibeʼe Yehowa’.—Hal. 3:19.
6. Ba Zakharia 2:8, hadia wamahaʼö nihalöda sanandrösa khö Yehowa?
6 Baso Zakharia 2:8. Börö me iʼomasiʼö ita Yehowa, alio sibai iʼila nirasoida ba terou dödönia wolumöʼö yaʼita. Afökhö dödönia na iʼila afökhö dödöda. Börö daʼö, tola mangandrö ita si fao faʼafaduhu dödö, ”Rorogö ndraʼo simane ono höröu.” (Si. 17:8) Tohude sibai nono hörö andrö ba ndroto-ndrotoda ba tebai mugadu-gadu. Tobali, me ifaomagö ita Yehowa simane ono hörönia, hulö imane khöda Yehowa, ’Gofu haniha zamakao yaʼami, ono mbanuagu, eluahania no ifakao zi tohude sibai ba wamaigigu.’
7. Hana wa moguna taʼaroʼö waʼafaduhu dödöda ba waʼomasi Yehowa?
7 Omasi Yehowa na faduhu dödöda wa iʼomasiʼö ita. Hizaʼi, iʼila wa tola manö abua khöda worasoi daʼö börö zalua khöda ba zilalö. Mazui, te alua khöda gabula dödö iadaʼa sanandraigö faʼafaduhu dödöda ba waʼomasi Yehowa. Hadia zinangea tafalua ba wangaʼaroʼö faʼafaduhu dödöda? Datafahaʼö ita hewisa wangoromaʼö Yehowa faʼomasinia khö Yesu, niha nibayoini, hegöi khöda fefu.
NIFALUA YEHOWA BA WANGOROMAʼÖ FAʼOMASI
8. Hana wa faduhu dödö Yesu wa iʼomasiʼö ia Amania?
8 Amakhaita Yehowa khö Nononia, daʼö gamakhaita fondrege zara moroi ba danö böʼö. No töra miliar fakhe fao ira. Daʼö mbörö wa aro gamakhaitara ba faoma laʼomasiʼö nawöra. Ifatunö waʼomasinia Yehowa khö Yesu, simane nibasoda ba Mataiʼo 17:5. Sindruhunia tola manö ha asala imane Yehowa, ’Daʼa niha sangomusoiʼö tödögu.’ Hizaʼi, omasi ia na aboto ba dödöda hawaʼebua waʼomasinia khö Yesu, andrö wa iwaʼö, ”Onogu daʼa, niʼomasiʼögu.” Omuso sibai dödö Yehowa khö Yesu, töra-töra me no itehegö waʼaurinia. (Ef. 1:7) Lö irai aombö dödö Yesu ba waʼomasi Namania. Sindruhu-ndruhu wa irasoi daʼö. Asese sibai itutunö wa faduhu dödönia ba waʼomasi Namania.—Yoh. 3:35; 10:17; 17:24.
9. Hadia ngawua wehede sangoromaʼö wa iʼomasiʼö niha nibayoini Yehowa? Tutunö. (Roma 5:5)
9 Ifaduhuʼö göi waʼomasinia Yehowa khö ndra niha nibayoini. (Baso Roma 5:5.) Nehegö ngawua wehede ”no iʼamualagö”. So sambua kamus Zura Niʼamoniʼö samoʼeluaha ngawua wehede daʼa tobali ”ihawui”. Daʼö zangoromaʼö hawaʼebua waʼomasi Yehowa ba niha nibayoini! Tola larasoi wa ’iʼomasiʼö ira Lowalangi’. (Yud. 1) Itutunö nösi dödöra sinenge sotöi Yohane me imane, ”Mifaigi hawaʼebua waʼomasi Nama khöda irege tobali ita ono Lowalangi!” (1 Yo. 3:1) Hadia ha niha nibayoini niʼomasiʼö Yehowa? Löʼö. No ifaduhuʼö waʼomasinia Yehowa ba khöda fefu.
10. Hadia dandra waʼomasi Yehowa sabölö ebua khöu?
10 Hadia dandra waʼomasi Yehowa sabölö ebua? Yaʼia daʼö höli. Daʼö dandra waʼomasi sabölö tohude ba mbanua si yawa awö danö! (Yoh. 3:16; Rom. 5:8) Itehegö Nono niʼomasiʼönia Yehowa enaʼö mate salahi niha gulidanö maʼafefu irege teʼefaʼö horöda ba tobali ita si fahuwu khönia. (1 Yo. 4:10) Na itugu taʼangerönusi hawaʼebua mböli höli nibuʼa Yehowa hegöi Yesu, itugu aboto ba dödöda hawaʼebua waʼomasira khöda ero zamösana. (Gal. 2:20) Khalaigö, Yesu andrö okhöta si tohude sebua böli föna Yehowa. Hewaʼae simanö, itehegö Nononia andrö tefakao ba mate salahida! Ba daʼa taʼila wa mubeʼe höli andrö tenga ha ba woloʼö niʼandrö ba goroisa, hizaʼi daʼö mbuala sabölö ebua nibeʼe Yehowa börö waʼomasinia ita.
11. Hadia wamahaʼö nihalöda moroi ba Yeremia 31:3?
11 Simane si no taʼila, tenga ha asala iʼomasiʼö ita Yehowa, hizaʼi iforomaʼö göi hawaʼebua waʼomasinia andrö khöda. (Baso Yeremia 31:3.) Idöni ita Yehowa tobali tana khönia börö me iʼomasiʼö ita. (Faigi göi 5 Mo. 7:7, 8.) Lö si tola mamabali yaʼita moroi ba waʼomasinia andrö. (Rom. 8:38, 39) Hewisa dödömö ba waʼomasi niforomaʼönia andrö? Baso Zinunö 23, ba faigi hadia mbua waʼomasi niforomaʼö Yehowa khö Dawido ba hadia göi mbua si tola tatema.
HEWISA DÖDÖMÖ BA WAʼOMASI NIFOROMAʼÖ YEHOWA?
12. Hadia nitutunö Dawido ba Zinunö 23?
12 Baso Zinunö 23:1-6. Dawido zanura Sinunö 23 andre. Ba zinunö andrö, itutunö waʼafaduhu dödönia wa iʼomasiʼö ba lö tebulö irorogö ia Yehowa. Itutunö göi hewisa waʼaro gamakhaitania khö Gubalonia yaʼia daʼö Yehowa. Sindruhu-ndruhu iʼodaligö Yehowa soroi ba dödö. Aboto ba dödönia wa iʼohe ia Yehowa ba nahia si lö ametaʼuö. Iʼila wa lö tebulö waʼomasi Yehowa khönia sandrohu faʼaurinia. Hadia mbörö wa faduhu sibai dödönia?
13. Hana wa faduhu sibai dödö Dawido wa irorogö ia Yehowa?
13 ”Lö ambö ndraʼo hadia ia.” Irasoi Dawido wa irorogö ia Yehowa börö me teʼasogö fefu zoguna khönia. Iʼokhögö göi wahuwusa saro khö Yehowa ba iʼila wa iʼomasiʼö ia Yehowa. Daʼö mbörö wa faduhu sibai dödönia wa hasambalö ibönökhi zoguna khönia Yehowa gofu hadia zalua. Faʼafaduhu dödönia andrö mbörö wa lö khönia faʼaombö dödö, ahono dödönia, ba irasoi waʼomuso dödö.—Si. 16:11.
14. Hewisa wondrorogö Yehowa yaʼita?
14 Börö me iʼomasiʼö ita, lö tebulö irorogö ita Yehowa, mendrua manö ba ginötö alua khöda gabula dödö. Claire, a si no mangai halöwö töra 20 fakhe ba Mbetieli, lö aboto ba dödönia hadia zinangea ifalua ba wanolo ösi nomonia si göna abula dödö sabölö-bölö. Göna stroke namania, laʼefasi ba mbanua niha Keriso samösa dalifusönia alawe, ba aekhu ira ba waʼanumana irege mate ba gade nomora. Hewisa wangoromaʼö Yehowa faʼomasinia? Imane Claire, ”Iʼalui lala Yehowa enaʼö tebönökhi zoguna ba nösi nomogu ero maʼökhö. Itaria ibeʼe zoguna khöma Yehowa töra moroi ba zi no makhalaigö! Asese sibai uʼangerönusi waʼomasi niforomaʼö Yehowa khöma ba lö uʼolifugö daʼö. Daʼö fefu zanolo yaʼo enaʼö lö awuwu hewaʼae alua gabula dödö soya sibai.”
15. Hadia mbörö wa irasoi Dawido wa teʼokafui dödönia? (Faigi göi gambara.)
15 ”Iʼokafui dödögu.” Itaria fawuka gera-era Dawido börö ngawalö gabula dödö hegöi famakao salua khönia. (Si. 18:4-6) Hizaʼi, faʼomasi hegöi foʼameʼegö tödö niforomaʼö Yehowa möi fangokafu dödönia. Iʼohe Yehowa zi fahuwu khönia sowökhi tödö andre ba ”mbenua soduʼu” hegöi ”ba nahia wolombase soya idanö”. Buania, ifuli teʼabölöʼö Dawido ba iʼokhögö waʼomuso dödö ba wamosumange Yehowa.—Si. 18:28-32.
Hewaʼae irasoi Dawido waʼafawuka gera-era, faʼomasi hegöi foʼameʼegö tödö moroi khö Yehowa zi möi fangokafu dödönia (Faigi ngenoli si 15)
16. Hewisa wa möi fangokafu dödömö waʼomasi Yehowa?
16 Simanö göi, ”börö waʼomasi si lö faröi khö Yehowa, andrö wa lö tehori ita” ba ginötö tataögö gabula dödö hegöi fanandraigö. (Nge. 3:22; Kol. 1:11) Nehegö duma-duma salua khö Rachel. Afatö sibai dödönia me faröi khönia woʼomonia hegöi khö Yehowa sagötö pandemi COVID-19. Hadia nifalua Yehowa khönia? Imane, ”Iʼalui lala Yehowa enaʼö urasoi wa laʼomasiʼö ndraʼo. Ibeʼe khögu zi fahuwu sanehegö inötöra wefao khögu, laʼohe gögu, la-kirim khögu chat hegöi ayati Zura Niʼamoniʼö sameʼe famarou dödö, laboho mbawa khögu, ba lö tebulö lafasugi ba dödögu wa iʼomasiʼö sibai ndraʼo Yehowa. Lö aetu uʼandrö saohagölö khö Yehowa börö me no ibeʼe khögu nösi nomo sebua safönu faʼomasi.”
17. Hana wa iwaʼö Dawido ’lö ataʼu ia deʼala’?
17 ”Lö ataʼudo deʼala, börö me yaʼugö nawögu.” Asese sibai arakhagö teʼala waʼauri Dawido ba ato sibai nudunia sagabölö. Hizaʼi, irasoi waʼahono dödö hegöi folumöʼö börö waʼomasi Yehowa. Irasoi Dawido wa fao khönia Yehowa ba ngawalö zalua khönia, ba daʼö zameʼe khönia faʼafaduhu dödö. Andrö manunö ia, ”Iʼefaʼö ndraʼo [Yehowa] moroi ba waʼataʼu.” (Si. 34:4) Hewaʼae na itaria ataʼu Dawido, tola ilawa waʼataʼunia andrö börö me aboto ba dödönia wa iʼomasiʼö ba ilumöʼö ia Yehowa.
18. Hewisa waʼomasi Yehowa tobali fangabölömö ba ginötö örasoi waʼataʼu?
18 Hewisa waʼomasi Yehowa tobali fangabölömö ba ginötö alua khöu gabula dödö si möi fametaʼu? Itutunö si samösa perintis sotöi Susi hewisa dödönia hegöi foʼomonia me ibunu samösa ia onora, ”Na so zalua si hokha mbu ba waʼaurimö, ebua sibai lua-luania daʼö khöu, örasoi waʼataʼu sabölö-bölö, ba ömane tödöu ma alua dania zi töra moroi ba daʼö. Hizaʼi, tola tarasoi waʼahono dödö hegöi folumöʼö börö waʼomasi Yehowa.” Imane Rachel nitutunö moroi yawa, ”No irai ba zi bongi, afökhö sibai dödögu, ba urasoi waʼaombö dödö hegöi faʼataʼu. Börö daʼö, uʼebuaʼö ligu ba wangandrö khö Yehowa. Aefa daʼö urasoi wa ibeʼe khögu wondrara dödö irege ahono dödögu, hulö simane nifalua zi samösa ina khö nononia sawuyu. Aefa daʼö, alau manö hörögu. Lö irai uʼolifugö daʼö.” Samösa zatua sokubaloi sotöi Tasos, no öfa fakhe ia ba gurunga börö me lö omasi ia tobali saradadu. Hewisa worasoinia faʼomasi moroi khö Yehowa? Imane, ”Ahori ibönökhi zoguna khögu Yehowa, ba oya nasa danö böʼönia. Daʼa zangaʼaroʼö faʼafaduhu dödögu wa tola uʼodaligö ia. Baero daʼö, iʼodela gehehania niʼamoniʼö Yehowa ba wameʼe khögu faʼomuso dödö hewaʼae ba gurunga so ndraʼo, nahia sangaʼasogö faʼafawuka wangera-ngera. Daʼa zanolo yaʼo ba wangiʼila na itugu ufaduhusi tödö Yehowa, itugu urasoi wa iʼomasiʼö ndraʼo. Börö daʼö, uhalö halöwö tobali perintis biasa hewaʼae ba gurunga so ndraʼo.”
HATÖʼÖGÖ KHÖ LOWALANGI SAHAKHÖ TÖDÖ
19. (a) Hewisa zinangeania wangandröda börö me taʼila wa iʼomasiʼö ita Yehowa? (b) Moroi ba ayati sanandrösa ba waʼomasi Yehowa si no tatutunö, hadia zi no irai alua khöu samösa? (Faigi kotak ” Ayati Sanolo Yaʼita ba Worasoi Faʼomasi Yehowa”.)
19 Fefu waö-waö salua nitutunöda moroi yawa, daʼö zangoromaʼö wa lö tebulö fao khöda Yehowa, ”Lowalangi safönu faʼomasi”. (2 Ko. 13:11) Iʼameʼegö tödö ita ero zamösana. Faduhu dödöda wa ’ifasui ita faʼomasi si lö faröi andrö khönia’. (Si. 32:10) Na itugu taʼangerönusi waʼomasi Yehowa, itugu faduhu dödöda wa iʼameʼegö tödö ita ba itugu ahatö ita khönia. Lö si tobali taha-tahada na mangandrö ita khönia ba tafatunö wa moguna sibai khöda waʼomasinia. Tola tatutunö khönia fefu waʼaombö-aombö dödöda, börö me faduhu dödöda wa aboto ba dödönia zalua khöda ba omasi ia wanolo yaʼita.—Si. 145:18, 19.
20. Hewisa wa tola möi fangahatöʼöda khö Yehowa waʼomasinia?
20 Simane faʼaukhu na taleu ita ba zinga galitö, simane daʼö göi worasoida faʼomasi Yehowa ba ginötö alua khöda gabula dödö. Hewaʼae mofaʼabölö waʼomasi Yehowa, hizaʼi afönu faʼasökhi dödö. Börö daʼö, omusoiʼö dödöu börö me iʼomasiʼö ndraʼugö Yehowa. Yalötebulö tatemaʼö waʼomasinia andrö ba tamane, ”Uʼomasiʼö Yehowa”!—Si. 116:1.
HADIA WANEMAU LI?
-
Hewisa waʼomasi Yehowa andrö?
-
Hana wa faduhu dödömö wa iʼomasiʼö sibai ndraʼugö Yehowa?
-
Hewisa dödömö me öʼila wa iʼomasiʼö ndraʼugö Yehowa?
SINUNÖ 108 Faʼomasi Lowalangi si Lö Faröi
a So ösa nifaböʼöni töi.