BA LI sindruhunia, ngawua wehede nifoʼeluaha tobali ’kureta kudo’ ba Wamoʼeluaha Gulidanö si Bohou, tola göi daʼö geluahania ngawalö gureta kudo. (Hal. 8:​28, 29, 38) Hizaʼi kureta kudo niʼogunaʼö zalawa faka andrö, te abölö ebua ia moroi ba gureta kudo niʼogunaʼö ba wasuwöta mazui ba watandrisa. Nehegö hadia mbörö.

Niha Gaitiofia andrö samösa salawa faka si no manörö lala saröu. Yaʼia andrö ”niha salawa faka ba Gaitiofia, sohalöwö ba gödo ba samatörö okhöta Gandrake, ratu niha Gaitiofia”. (Hal. 8:27) Banua Gaitiofia me föna farahu ba daʼö Sudan ofeta ba mbalö Miserai tanö raya. Te faböʼö-böʼö gureta niʼogunaʼö zalawa faka andrö sagötö fofanönia. Hizaʼi börö me aröu lala nitörönia, tatu manö oya sibai gama-gama niʼohenia. Sambua gureta niʼogunaʼö me abad siföföna yaʼia daʼö kureta kudo nifosagö ba si öfa gaolo-gaolo. Imane buku Acts—An Exegetical Commentary ”Kureta kudo simane daʼö, oya noro si tola iʼohe. Ohahau göi dödö zanörö kureta daʼö ba tola fandröndröu lala nitörönia.”

Mombaso-mbaso niha Gaitiofia andrö me ifalukhaisi ia Filifo. Imane Sura Niʼamoniʼö, ”Fagohi Wilifo ba zinga gureta andrö, irongo-rongo me ibaso nisura Yesaya samaʼeleʼö.” (Hal. 8:30) Si toʼölönia, lö abölö-bölö na mofanö gureta kudo niʼohe ba lala saröu. Daʼö mbörö wa tola mombaso-mbaso zalawa faka andrö sagötö fofanönia ba tola ikhamö ia Filifo fagohi-gohi ba zinga gureta andrö.

Niha Gaitiofia andrö ”iwaʼö khö Wilifo weʼamöi yawa ba gureta ba fao ira wedadao”. (Hal. 8:31) Si toʼölönia, mozizio niha samofanö kureta kudo niʼogunaʼö ba watandrisa. Hizaʼi kureta kudo niʼogunaʼö ba wofanö ba lala saröu, tatu manö so naha wedadao irege iwaʼö niha Gaitiofia andrö khö Wilifo enaʼö modadao ia ba zingania.

Me mböröta, asese iʼamaedolagö ba publikasida wa no ide-ide gureta kudo niʼogunaʼö niha Gaitiofia simane niʼogunaʼö ba wasuwöta mazui ba watandrisa. Hizaʼi, börö zi no tesura ba mbuku Halöwö Zinenge faza 8 hegöi ba waö-waö sejarah tanö böʼö, daʼö mbörö wa muʼamaedolagö ba publikasida iadaʼa, kureta sebua nitörö niha Gaitiofia andrö.