1-2. Hadia gabula dödö si tola manö alua ba nono mbanua Yehowa si lö faröi?

 NA SO zalua ba zi lö mudöna-döna, tola tebulö waʼaurida ba zi lö arara. Duma-dumania, so samösa dalifusöda ira matua sotöi Luis, a lafatunö khönia ira doto wa no göna ia fökhö kanker. Ifatunö khönia doto hatö mato hauga waŵa tö ba mate ia. Monika hegöi foʼomonia laʼoyaʼö ginötöra ba wamosumange Yehowa. Hizaʼi, samuza maʼökhö, iʼila Monika wa no ifalua horö sebua foʼomonia ba zi hauga fakhe, hewaʼae samösa satua sokubaloi ia. Iröi nomonia Olivia börö me lö ara tö alua mbade sabölö-bölö. Me ifuli ia, no ahori adudu nomonia. Alio sibai tebulö zalua ba waʼaurira. Hadia tola ötöfaigö ba dödöu zalua khöra? Hadia no irai alua khöu zimane daʼö sombulöʼö faʼaurimö ba zi lö arara?

² Hewaʼae na samosumange Yehowa ita, hasambalö alua khöda gabula dödö hegöi fökhö simane salua ba niha böʼö. Tola manö göi tataögö wanaisi mazui folohi moroi ba niha si fatuwu ba nono mbanua Yehowa. Hewaʼae na lö ilumöʼö ita Yehowa moroi ba gabula dödö andrö, hizaʼi no ifabuʼu wa hasambalö ibeʼe khöda wanolo. (Yes. 41:10) Börö wanolo moroi khönia, lö tebulö tarasoi waʼomuso dödö, tahalö gangetula si tefaudu ba lö faröi ita hewaʼae na alua khöda gabula dödö sebua. Ba artikel daʼa, tatutunö dania öfa ngawalö nifalua Yehowa ba wanolo yaʼita. Tatutunö göi hadia zinangea tafalua enaʼö tatema mbua moroi ba wanolo nibeʼenia.

 HASAMBALÖ IROROGÖ NDRAʼUGÖ YEHOWA

3. Hadia zabua khöda famalua na göna ita abula dödö si lö mudöna-döna?

³ Abula dödö. Na göna ita abula dödö si lö mudöna-döna, tola manö taya khöda lala wangera-ngera si sökhi, ba mendrua manö ba wangai angetula si tefaudu. Hadia mbörö? Tola manö börö waʼafökhö dödöda. Te ihawui ita faʼaombö dödö. Hulö zolaya-laya ba dalu mbanua ita, lö taʼila hezo numalö. Nehegö hadia nirasoi ndra talifusöda ira alawe si darua no mege me göna ira abula dödö. Imane Olivia, ”Me no tekiko nomogu ba nangi sabölö-bölö, hulö zelungu ndraʼo ba lö uʼila hadia nifaluagu.” Imane Monika börö me no iröi ia foʼomonia, ”Töra moroi ba zafatö tödö ndraʼo. Afökhö sibai dödögu hulö nifahö-fahö. Abua khögu wamalua halöwö si toʼölö ufalua. Lö faduhu dödögu wa alua khögu daʼa.” Hadia nifalua Yehowa ba wanolo yaʼita na göna ita abula dödö? Datatutunö hadia nifabuʼunia.

4. Moloʼö Filifi 4:​6, 7, hadia nifabuʼu Yehowa khöda?

⁴ Nifalua Yehowa. No ifabuʼu wa ibeʼe khöda hadia niwaʼö ba Zura Niʼamoniʼö, yaʼia daʼö ”faʼohahau dödö andrö khö Lowalangi”. (Baso Wilifi 4:​6, 7.) Faʼohahau dödö daʼa eluahania faʼahono dödö hegöi era-era börö me taʼokhögö wahuwusa si sökhi khö Yehowa. Faʼohahau dödö daʼa ’abölö moroi ba gera-era niha fefu’, mazui töra moroi ba zi tola takhalaigö. Duma-dumania, hadia no irai öʼosindruhugö wangandrö khö Yehowa ba aefa daʼö örasoi waʼahono dödö? Daʼö nifotöi ”faʼohahau dödö andrö khö Lowalangi”.

5. Hewisa waʼohahau dödö moroi khö Lowalangi andrö ba wondrorogö era-era hegöi tödöda?

⁵ Ifatunö göi ba ayati daʼö wa faʼohahau dödö moroi khö Lowalangi, tola ”irorogö” mazui ilumöʼö ”dödömi awö gera-erami”. Ngawua wehede ”irorogö” ba li sindruhunia muʼogunaʼö daʼö ba halöwö nifalua ndra saradadu mazui sanaro ba wondrorogö si sambua banua enaʼö telumöʼö moroi ba nudu. Ahono dödö niha mbanua wemörö, börö me laʼila wa so zanaro ba göli mbanua. Simane daʼö göi waʼohahau dödö moroi khö Lowalangi, irorogö dödö awö gera-erada irege tarasoi waʼahono dödö börö me taʼila wa so zondrorogö yaʼita. (Si. 4:8) Simane zalua khö Khana, hewaʼae lö iʼanemaiʼö sökhi zalua hasambalö tola tarasoi waʼahono dödö. (1 Sa. 1:​16-18) Na tarasoi waʼahono dödö, taʼokhögö lala wangera-ngera si sökhi ba tola tahalö gangetula si tefaudu.

6. Hadia zinangea tafalua enaʼö tatema mbua ba waʼohahau dödö moroi khö Lowalangi? (Faigi göi gambara.)

⁶ Sinangea tafalua. Na lö sökhi-sökhi dödömö, moguna ökaoni zi no amaedola zanaro. Hadia geluahania? Angandrö irege örasoi  waʼohahau dödö moroi khö Lowalangi. (Luk. 11:9; 1 Te. 5:17) Luis, nitötöi moroi yawa, itutunö hadia zanolo yaʼia hegöi foʼomonia sotöi Ana, me no aefa lafatunö khönia ira doto wa atö mato hauga waŵa tö ba mate ia. Imane, ”Me alua khöma gabula dödö andre, abua khöma ba wangai angetula hewisa lala ba wamadöhö fökhögu hegöi angetula tanö böʼö. Hizaʼi, tola masöndra waʼahono dödö börö wangandrö.” Iwaʼö Luis hegöi foʼomonia wa asese mangandrö ira soroi ba dödö, laʼandrö khö Yehowa enaʼö ibeʼe khöra waʼahono gera-era, faʼahono dödö ba faʼatua-tua ba wangai angetula si tefaudu. Buania, latema wanolo moroi khö Yehowa. Na alua khöu gabula dödö, böi böhöli wangandrö enaʼö örasoi waʼohahau dödö moroi khö Yehowa sondrorogö tödömö awö gera-eramö.—Rom. 12:12.

HASAMBALÖ IBEʼE KHÖU WAʼAHONO DÖDÖ YEHOWA

7. Hadia nirasoida na alua gabula dödö sebua?

⁷ Abula dödö. Na göna ita abula dödö sebua, tola manö molua-lua daʼö ba lala wangera-ngerada, nirasoida, hegöi nifaluada. Tola manö hulö nifadaulu-daulu wangera-ngerada. Ana, nitötöi moroi yawa, itutunö wa tebulö-bulö manö nirasoinia me no aefa mate Luis. Imane, ”Itaria fawuka gera-eragu ba ibörögö uhakhösi tödö waʼaurigu samösa. Itaria mofönu sibai ndraʼo börö waʼamatenia.” Baero daʼö, irasoi Ana wa hulö zi lö awö-awö ia ba alangu dödönia börö me ifalua fefu hadia ia zi toʼölö ifalua Luis. Itaria irasoi wa hulö zi so ba dalu nasi ia. Hewisa wameʼe Yehowa khöda fanolo na arakhagö ahöndrö ita börö gabula dödö salua?

8. Moloʼö Yesaya 33:​6, hadia dania nifalua Yehowa khöda?

⁸ Nifalua Yehowa. Ifaduhuʼö ba dödöda wa hasambalö ibeʼe khöda ’waʼahono dödö’. (Baso Yesaya 33:6.) Tola göi mufoʼeluaha wehede daʼa tobali ”sangaʼaroʼö”. Na abölö-bölö mbade tola manö tobali göfa. Börö daʼö, oya göfa iadaʼa sangogunaʼö tambua gamaudu tanö tou göfa ba gabera hegöi ba gambölö. Daʼö mbörö wa lö abua dambai göfa andrö irege tola mofanö ba ohahau dödö zanörö köfa. Hizaʼi, awena oroma hadia gunania dambua andrö na no mofanö göfa. Simane daʼö göi iadaʼa, awena ibeʼe khöda waʼaro dödö Yehowa na lö taböhöli ba wamosumange yaʼia gofu hadia ia zalua khöda.

9. Hewisa lala ba wamalua riset nihenaigö organisasi tola tobali fanoloda enaʼö tarasoi waʼahono dödö? (Faigi göi gambara.)

⁹ Sinangea tafalua. Na ihawui ita lala wangera-ngera si lö tefaudu, forege enaʼö lö tebulö öfalua halöwö ba wamati. Sindruhu sa, tola manö tebai öfalua simane faʼoya zi no  öfalua ba zilalö. Hizaʼi, böi olifuʼö wa lö iʼandrö khöda Yehowa zi tebai tafalua. (Faigi göi Luka 21:​1-4.) Beʼe ginötöu ba wamalua famahaʼö samösa ba foʼangerönusi. Moguna sibai daʼa börö me ba organisasinia no ihenaigö Yehowa wanuturu lala si sökhi si teʼodane-dane ba Zura Niʼamoniʼö sanolo yaʼita enaʼö lö tebulö tarasoi waʼahono dödö. Enaʼö öʼila wanuturu lala soguna khöu, ogunaʼö fakake wamalua riset si no muhenaigö ba li niʼogunaʼömö, duma-dumania aplikasi JW Library^®, Indeks Publikasi Menara Pengawal, hegöi Fanuturu Lala ba Wamalua Riset khö Ndra Samaduhuʼö Yehowa. Itutunö Monika si no mutötöi moroi yawa, ba ginötö fawuka gera-erania, iʼalui mene-mene moroi ba ngawalö fakake riset si no muhenaigö andrö. Duma-dumania, no irai iʼalui ngawua wehede ”fönu”, ”si manga mböli”, ba ”faʼalöfaröi”. Aefa daʼö ibaso wanuturu lala si no isöndra irege irasoi waʼahono dödö. Imane wanutunö, ”Me ubörögö woketik, lö sökhi-sökhi bakha dödögu. Hizaʼi me no awai ubaso, urasoi wa hulö no italagui ndraʼo Yehowa. Aboto ba dödögu wa anehe Yehowa nirasoigu ba lö iböhöli wanolo yaʼo.” Tola göi itolo ndraʼugö Yehowa enaʼö örasoi waʼahono dödö irege taya gabula dödö salua khömö.—Si. 119:​143, 144.

ITOLO NDRAʼUGÖ YEHOWA

10. Me no aefa göna ndraʼugö abula dödö, hadia manö nirasoimö?

¹⁰ Abula dödö. Na no aefa göna ita abula dödö, no sinangea na tarasoi wa lö faʼabölöda mazui atata dölada. Te simane niha sabölö fagohi ita ba zilalö, hizaʼi iadaʼa no takela-kela börö me no mesokho. Tola manö abua khöda wamalua halöwö saoha si toʼölö tafalua mazui ambö terou dödöda wamalua halöwö somasi ita. Simane Elia, te abua sibai khöda wemaoso. Omasi manö ita mörö. (1 Ra. 19:​5-7) Hewaʼae simanö, no ifabuʼu Yehowa wa hasambalö itolo ita na tarasoi wa hulö lö saʼae faʼabölöda. Nehegö hadia nifaluania.

11. Hadia nasa nifalua Yehowa ba wanolo yaʼita? (Sinunö 94:18)

¹¹ Nifalua Yehowa. No ifabuʼu wa hasambalö itolo ba ibeʼe khöda waʼabölö. (Baso Zinunö 94:18.) Na so zi fagohi si no mesokho, te moguna latolo ia enaʼö iʼila mofanö. Simane daʼö göi ita iadaʼa, moguna khöda wanolo enaʼö lö taböhöli wamosumange Yehowa. Ba ginötö simane daʼö, ifaduhuʼö khöda Yehowa, imane, ”Yehowa Lowalangiu ndraʼo, ugogohe dangau kambölö ba umane khöu, ’Böi ataʼufi. Hasambalö utoloʼö.’” (Yes. 41:13) No irai alua khö Razo Dawido daʼö. Me oya ngawalö  gabula dödö ba lasuwö ia si faʼudu khönia, imane khö Yehowa, ”Tangamö kambölö zangabeʼeʼö yaʼo.” (Si. 18:35) Hewisa Yehowa ba wangabeʼeʼö yaʼita?

12. Haniha manö zi tola iʼogunaʼö Yehowa ba wangabeʼeʼö yaʼita?

¹² Asese ifarou dödö niha böʼö Yehowa ba wanolo yaʼita. Duma-dumania, me irasoi Dawido wa hulö zi lö faʼabölö ia, tohare Yonata si fahuwu khönia ba wangabeʼeʼö hegöi ba wamarou tödönia. (1 Sa. 23:​16, 17) No göi irai iʼogunaʼö Gelisa Yehowa ba wanolo Elia. (1 Ra. 19:​16, 21; 2 Ra. 2:2) Iadaʼa, tola göi iʼogunaʼö nösi nomoda Yehowa, si fahuwu khöda hegöi ira satua sokubaloi ba wangabölöʼö yaʼita. Hizaʼi, ba ginötö fawuka gera-erada te abölö omasi ita na taʼoniagö ita. Lö fasala na itaria tafalua daʼö. Hadia zinangea tafalua enaʼö tatema wanolo moroi khö Yehowa?

13. Hadia zinangea tafalua enaʼö so mbuania khöda wanolo moroi khö Yehowa? (Faigi göi gambara.)

¹³ Sinangea tafalua. Lawa gaoloma dödöu ba wangoniagö yaʼugö. Na taʼoniagö ita si toʼölönia teduhö wangera-ngerada ba abölö taʼosambuaʼö dödöda ba gabula dödö hegöi ba waʼaurida samösa. Daʼa dania mbörö wa tola manö tahalö gangetula si fasala. (Amd. 18:1) Sindruhu sa, itaria omasi ita na ha yaʼi-yaʼita, töra-töra na awena alua khöda gabula dödö sebua. Hizaʼi na talafo ara taʼoniagö ita, tola manö tatimbagö wanolo moroi khö Yehowa. Börö daʼö, na alua gabula dödö temaʼö wanolo moroi ba nösi nomomö, si fahuwu khömö hegöi moroi khö ndra satua sokubaloi hewaʼae na abua wamalua daʼö. Böi olifu ndraʼugö wa Yehowa zangogunaʼö yaʼira ba wangabeʼeʼö yaʼugö.—Amd. 17:17; Yes. 32:​1, 2.

YEHOWA ZAMEʼE KHÖU FONDRARA DÖDÖ

14. Hadia manö zalua si möi fametaʼuda?

¹⁴ Abula dödö. Itaria so ginötönia tarasoi waʼataʼu. Ba Zura Niʼamoniʼö, so göi ndra enoni Lowalangi si no irai morasoi faʼataʼu ba faʼabu dödö börö wametaʼu moroi ba nudu hegöi tanö böʼönia. (Si. 18:4; 55:​1, 5) Simanö daʼö göi iadaʼa, tola manö göna ita fanaisi mazui famakao ba zekola, ba nahia wohalöwö, moroi ba nösi nomoda mazui moroi khö ndra samatörö. Tola manö göi göna ita fökhö sabölö-bölö. Fefu daʼö tola tobali fangawuwuda simane iraono si lö faʼabölö. Na simane daʼö zalua, hadia nifalua Yehowa ba wanolo yaʼita?

15. Moloʼö Sinunö 94:​19, hadia nifalua Yehowa khöda?

¹⁵ Nifalua Yehowa. Irara dödöda ba ibeʼe khöda waʼahono dödö. (Baso Zinunö 94:19.) Ba ginötö tabaso ayati daʼa, te tumbu ba wangera-ngerada  zi samösa ono alawe sataʼu ba si lö mangila mörö börö deu sabölö-bölö si fao gari mbanua. Khalaigö me tohare namania ba italagui nononia andrö irege alau hörönia. Hewaʼae na lö si tebato deu, irasoi waʼahono dödö börö me no italagui ia amania. Simane daʼö na alua khöda gabula dödö si möi fametaʼuda, te moguna italagui ita Amada si so ba zorugo irege tarasoi waʼahono dödö. Hizaʼi so zinangea tafalua. Hadia daʼö?

16. Hadia zinangea tafalua enaʼö itolo ita Yehowa ba worasoi faʼahono dödö? (Faigi göi gambara.)

¹⁶ Sinangea tafalua. Aseseʼö beʼe ginötöu khö Yehowa ba wangandrö hegöi ba wombaso Taromalinia. (Si. 77:​1, 12-14) Na toʼölö ndraʼugö wamalua daʼö, ba ginötö alua gabula dödö si oföna öfalua yaʼia daʼö öʼalui wanolo moroi khö Namamö si so ba zorugo. Tutunö khönia hadia mbörö wa ataʼu ndraʼugö mazui örasoi waʼaombö dödö. Fondrondrongo na fahuhuo khöu Yehowa ba Daromalinia ba wameʼe khöu fondrara dödö. (Si. 119:28) So ösa faosatö ba Zura Niʼamoniʼö si möi fondrara dödömö na örasoi waʼataʼu. Duma-dumania, tola ösöndra zi möi fondrara dödömö moroi ba mbuku Yobi, Sinunö, Amaedola hegöi ba wehede Yesu nisura ba Mataiʼo faza 6. Na lö öböhöli wangandrö khö Yehowa ba öbaso Daromalinia, hasambalö itolo ndraʼugö enaʼö örasoi waʼahono dödö.

17. Hadia zi faduhu dödöda?

¹⁷ Faduhu dödöda wa fao khöda Yehowa ba ginötö göna ita abula dödö. Lö irai faröi ia khöda. (Si. 23:4; 94:14) No ifabuʼu Yehowa wa hasambalö irorogö ita, ibeʼe waʼahono dödö, itolo ba ibeʼe khöda wondrara dödö. Ba Yesaya 26:3 imane sanandrösa khö Yehowa, ”Ölumöʼö niha sangodaligö yaʼugö; Lö tebulö öbeʼe khöra waʼahono dödö, börö me faduhu dödöra khöu.” Börö daʼö, faduhusi tödö Yehowa ba ogunaʼö fefu wanolo si no ihenaigö. Na öfalua daʼö, ösöndra waʼabölö na göna ndraʼugö abula dödö.