1. Hezo abölö laʼosambuaʼö dödöra niha iadaʼa?

 ATO niha iadaʼa abölö laʼosambuaʼö dödöra ba zoguna khöra samösa. Duma-dumania, so zangogunaʼö media sosial enaʼö adöni dödö niha khöra hegöi ba waʼamofozu si no lakhamö. Hizaʼi, lö ato niha somasi mamolakhömi Lowalangi Yehowa. Ba artikel daʼa, tatutunö dania hadia geluahania mamolakhömi Yehowa ba hadia mbörö wa tafalua daʼö. Tatutunö göi hadia zi tola tafalua ba wameʼe lakhömi sinangea itema ba hadia nifalua Yehowa ba wamolakhömi töinia ba zi lö ara tö.

HADIA GELUAHANIA MAMOLAKHÖMI YEHOWA?

2. Hewisa wangoromaʼö Yehowa lakhöminia ba Hili Zinaʼi? (Faigi göi gambara.)

² Ba Zura Niʼamoniʼö, ngawua wehede ”lakhömi” tola mufoʼeluaha ia ngawalö zahöli-höli dödö khö zi samösa niha. Lö ara me no teʼefaʼö ndraono Gizaraʼeli moroi ba wangosawuyu ba danö Miserai, iforomaʼö lakhöminia sahöli-höli dödö Yehowa. Khalaigö atö: Zuta waʼato ndraono Gizaraʼeli si no owulo ba gahe Hili Zinaʼi ba wamondrondrongo me fahuhuo Lowalangira. Ba zi lö mudöna-döna, ihawui hili daʼö lawuo saweʼe-weʼe, ba alua ndruru danö sabölö-bölö si fao feʼugu-ugu mbanua, gari mbanua hegöi li dorofe nifazökhi moroi ba  dandru. (2 Mo. 19:​16-18; 24:17; Si. 68:8) Ahöli-höli sibai dödö ndraono Gizaraʼeli me laʼila lakhömi sebua moroi khö Yehowa.

3. Hadia geluahania mamolakhömi Yehowa?

³ Hadia tola lafolakhömi Yehowa niha gulidanö? Tola. Sambua lalania yaʼia daʼö na tafatunö ba niha böʼö sanandrösa ba waʼabölönia sahöli-höli dödö hegöi amuatania si sökhi. Tola göi tafolakhömi Yehowa na tafaduhuʼö wa yaʼia zanolo yaʼita irege mofozu fefu nifaluada. (Yes. 26:12) No tobali duma-duma si sökhi Dawido ba wamalua daʼa. Me mangandrö ia föna ndraono Gizaraʼeli maʼafefu, imane Dawido, ”He Yehowa, yaʼugö wondrege zalawa, sabölö, sebua, nifolakhömi ba nifosumange, börö me okhötau fefu zi so ba mbanua si yawa hegöi ba gulidanö.” Me no aefa mangandrö Dawido, ”fefu nono mbanua lasuno Yehowa”.—1 Ng. 29:​11, 20.

4. Hadia nifalua Yesu ba wamolakhömi Yehowa?

⁴ Me so Yesu ba gulidanö, lö tebulö ifolakhömi Namania. Ifaduhuʼö wa Yehowa zanolo yaʼia ba wamalua fefu dandra sahöli-höli dödö. (Mrk. 5:​18-20) Fehede Yesu sanandrösa khö Namania hegöi nifaluania ba niha böʼö, möi famolakhömi Yehowa. Nehegö hadia zalua me mamahaʼö Yesu ba nahia waʼowulo. Ba gotalua niha samondrondrongo huhuonia, so samösa ndra alawe nifakao malaʼika si lö sökhi sagötö zi 18 fakhe. No aköi mbotonia börö malaʼika si lö sökhi andrö ba tebai ifasindro ia. Sindruhu-ndruhu wa tefakao ia. Ahakhö dödö Yesu ba ifahatö ia khö ndra alawe daʼö. Ihaogö wehede khönia Yesu ba imane, ”He alawe, no teʼefaʼö ndraʼugö moroi ba wökhömö andrö.” Aefa daʼö, itufa tangania ndra alawe andrö, ba iʼanemaiʼö adölö wesindronia ba ”ibörögö isuno Lowalangi”. Iʼandrö sibai saohagölö me no ifadöhö ia Yehowa! (Luk. 13:​10-13) Sindruhu wa so dane-dane saro khö ndra alawe daʼö ba wamolakhömi Yehowa. Hewisa göi ita?

HADIA MBÖRÖ WA OMASI ITA TAFOLAKHÖMI YEHOWA?

5. Hadia manö mbörö wa tafosumange Yehowa?

⁵ Tafolakhömi Yehowa börö me tafosumange sibai ia. Hadia manö mbörö wa tafosumange Yehowa? Yaʼia andrö Lowalangi sebua kuaso, ba lö ola waʼabölönia. (Si. 96:​4-7) Atua-tua sibai ia, oroma daʼö moroi ba niwöwöinia. Yaʼia zameʼe khöda faʼauri ba fefu zoguna khöda enaʼö lö tebulö tasöndra waʼauri. (Fam. 4:11) Lö faröi ia. (Fam. 15:4) Mofozu fefu nifaluania, ba hasambalö ifalua zi no ifabuʼu. (Yos. 23:14) Daʼö mbörö wa imane Yeremia sanandrösa khö Yehowa, ”Ba gotalua niha satua-tua ba soi böʼö awö ba zi sagörö famatöröra, lö hadöi simane yaʼugö!” (Yer. 10:​6, 7) Ba daʼa aboto ba dödöda wa oya sibai dane-dane khöda ba wamosumange Amada si so ba zorugo. Hizaʼi, lö ibönö na ha tafosumange Yehowa, moguna göi taʼomasiʼö ia.

6. Hana wa taʼomasiʼö Yehowa?

⁶ Tafolakhömi Yehowa börö me taʼomasiʼö sibai ia. Nehegö gamuata Yehowa si möi börö wa taʼomasiʼö ia. So khönia waʼomasi ba faʼahakhö dödö. (Si. 103:13; Yes. 49:15) Abu dödönia na göna ita abula dödö. (Zak. 2:8) Itolo ita enaʼö aboto ba dödöda sanandrösa khönia ba tobali ita si Fahuwu khönia. (Si. 25:14; Hal. 17:27) So göi khönia wangide-ngideʼö. ”Ifaöndrö ia ba wamaigi banua awö danö, ifazawa niha si tebai moroi ba gawu-gawu.” (Si. 113:​6, 7) Amuata daʼa zamarou yaʼita ba wamolakhömi Lowalangida sahöli-höli dödö.—Si. 86:12.

7. Hadia ginötö si tohude niʼokhögöda?

 ⁷ Tafolakhömi Yehowa börö me omasi ita na laʼila niha zindruhu sanandrösa khönia. Ato niha si lö mangila sindruhu sanandrösa khö Yehowa börö me no ibalugö gera-erara Satana, yaʼia me ifazaewe ngawalö walimosa sanandrösa khö Lowalangi. (2 Ko. 4:4) Iʼalui lala Satana enaʼö so ba wangera-ngera niha wa Yehowa andrö lö iʼameʼegö tödö niha, mofönu-fönu manö, ba yaʼia mbörö wa tefakao niha gulidanö. Hizaʼi, taʼila wa faya daʼö! Tebeʼe khöda ginötö si sökhi ba wanolo niha enaʼö atulö lala wangera-ngerara ba lafolakhömi Lowalangi. (Yes. 43:10) Iadaʼa, datatutunö ösa ayati si so ba Zinunö 96 sangombakha khöda lala si tola tafalua ba wamolakhömi Yehowa. Ba ginötö tatutunö daʼö, angeragö hadia zi tola öfalua ba wameʼe khö Yehowa lakhömi sinangea itema.

HADIA ZI TOLA TAFALUA BA WAMOLAKHÖMI YEHOWA?

8. Hadia zi tola tafalua ba wamolakhömi Yehowa? (Sinunö 96:​1-3)

⁸ Baso Zinunö 96:​1-3. Tola tafolakhömi Yehowa moroi ba wehededa. Ba ayati daʼö, mukaoni nono mbanua Yehowa enaʼö ’manunö ira khö Yehowa’, ’lasuno döinia’, ’laʼombakhaʼö duria somuso dödö sanandrösa ba wangorifi nifaluania’, ba ’latutunö lakhöminia ba gotalua soi’. Na tafalua göi zimane daʼö, no tafolakhömi Namada si so ba zorugo moroi ba wehededa. Lö ataʼu ndra niha Yahudi si lö faröi hegöi ira niha Keriso me abad siföföna ba wangoʼawögö töi Yehowa ba latutunö ngawalö zi sökhi nifalua Yehowa khöra. (Dan. 3:​16-18; Hal. 4:29) Hewisa woloʼöda duma-dumara?

9-10. Hadia wamahaʼö nihalömö moroi ba zalua khö Angelena? (Faigi göi gambara.)

⁹ Angeragö zalua khö Angelena, a samösa talifusöda ira alawe si toröi ba Amerika Serikat. Lö ataʼu ia ba wangoʼawögö töi Yehowa ba nahia wohalöwönia. Börö me awena mohalöwö Angelena ba daʼö, lakaoni ia wefao ba rafe. Laʼandrö khö ndra sohalöwö si bohou enaʼö lafatunö haniha ira. No ifaʼanö ia Angelena ba wanutunö hadia manö zangaʼasogö khönia faʼomuso dödö me no tobali ia Samaduhuʼö Yehowa. Hizaʼi, fatua lö fahuhuo ia, so samösa nawönia sohalöwö sanutunö wa Samaduhuʼö Yehowa ndra satuania ba no lafahaʼö  ia ba daʼö iʼotarai me ide-ide. Aefa daʼö, ibörögö iʼobousi nifaduhusi tödö ndra Samaduhuʼö Yehowa. Imane Angelena, ”Moʼugu-ugu bakha dödögu. Umane tödögu, ’Hadia utehegö iʼoʼaya-aya manö döi Yehowa? Mazui hadia uʼoʼawögö Yehowa?’”

¹⁰ Me no aefa fahuhuo ndra matua daʼö, mangandrö Angelena bakha ba dödönia. Aefa daʼö, ihaogö wangumaʼö khö ndra matua daʼö, ”Fagölö ita. Samaduhuʼö Yehowa göi zatuagu ba no lafomaha ndraʼo ba daʼö iʼotarai me ide-ide. Irugi iadaʼa Samaduhuʼö Yehowa nasa ndraʼo.” Izumaigö faoma fatöngö niha sato, hizaʼi lö ataʼu Angelena. Ibörögö iforomaʼö kodania Angelena me fao ia khö ndra awö-awönia sorasoi faʼomuso dödö ba wamosumange Yehowa, ba si fao faʼatua-tua itutunö nifaduhusinia tödö. (1 Fe. 3:15) Me no awai itutunö huhuonia Angelena, tebulö lala wangera-ngera ndra matua daʼö. Ba gafuriata ifaduhuʼö wa no irai isöndra waʼomuso dödö me fariawö ia khö ndra Samaduhuʼö Yehowa. Imane Angelena, ”Sinangea taʼoʼawögö Yehowa. No töi si sökhi khöda ba wangoʼawögö töinia.” Tebeʼe göi khöda döi si sökhi ba wanuno hegöi ba wamolakhömi Yehowa, mendrua manö ba ginötö laʼobousi döinia.

11. Iʼotarai me föna, hewisa nono mbanua Yehowa woloʼöra goi-goi si so ba Zinunö 96:8?

¹¹ Baso Zinunö 96:8. Tola tafolakhömi Yehowa moroi ba gama-gamada sebua böli. Daʼö nifalua nono mbanua Yehowa iʼotarai me föna. (Amd. 3:9) Duma-dumania, labeʼe dolo-tolo iraono Gizaraʼeli ba wamazökhi hegöi ba wondrorogö osali. (2 Ra. 12:​4, 5; 1 Ng. 29:​3-9) Laʼogunaʼö göi ”gokhötara” ira nifahaʼö ba wotuhini Keriso hegöi ira sinengenia. (Luk. 8:​1-3) Simanö göi ndra niha Keriso me abad siföföna, labeʼe wanolo khö ndra talifusöra si sara lala wamati. (Hal. 11:​27-29) Iadaʼa, tola göi tafolakhömi Yehowa na tabeʼe dolo-tolo si no aoha gölö fameʼe.

12. Hewisa wa möi famolakhömi Yehowa dolo-tolo nibeʼeda? (Faigi göi gambara.)

¹² Nehegö zalua sanutunö khöda hewisa wa möi famolakhömi Yehowa dolo-tolo nibeʼeda. So sambua gangombakhata me döfi 2020 sanutunö hadia lua-luania me ilau lökhö sabölö-bölö ba Zimbabwe. Zuta niha si göna lofo, farahu ba daʼö dalifusöda ira alawe sotöi Prisca. Hewaʼae simanö, lö tebulö manuriaigö ia ero hari Rabu hegöi hari Zumaha. Sindruhunia, daʼö ginötö ba wamaku tanö ba niha sato. Laʼoʼaya ia si faola omo khönia  börö me möi ia manuriaigö tenga mohalöwö. Lamane khönia, ”Alai dania na si mate ba waʼolofo ndraʼugö andrö!” Hizaʼi, ihaogö wangumaʼö khöra Prisca, ”Lö iröi nono mbanuania Yehowa.” Lö ara aefa daʼö, so mbuala nitemania moroi ba organisasida. Tola teʼasogö daʼö börö dolo-tolo nibeʼeda. Adöni sibai dödö zi faola omo khö Prisca irege lamane, ”Sindruhu wa lö irai iröi ndraʼugö Lowalangi. Omasiga göi aboto ba dödöma sanandrösa khönia.” Aefa daʼö, so dafitu zi faola omo khö Prisca, ibörögö möi ira ba gangowuloa.

13. Moloʼö Sinunö 96:​9, hadia zinangea tafalua ba wamolakhömi Yehowa?

¹³ Baso Zinunö 96:9. Tola tafolakhömi Yehowa na tarorogö gamuatada. Me föna, laʼehaogö mbotora ira ere faböi taʼunö fatua lö mangai halöwö ira ba gosali. (2 Mo. 40:​30-32) Hizaʼi, sabölö tohude moroi ba daʼö moguna larorogö enaʼö lö raʼiö gamuatara. (Si. 24:​3, 4; 1 Fe. 1:​15, 16) Moguna taheta khöda ”gamuata si tohöna”. Eluahania, taforege ba wondröi amuata hegöi nifaluada si lö tefaudu ba zomasi Lowalangi. Moguna göi ’tabohouni gamuatada’. Eluahania, taforege ba woloʼö amuata, lala wangera-ngera hegöi nifalua Yehowa. (Kol. 3:​9, 10) Börö wanolo moroi khö Yehowa, tola ibulöʼö gamuatania niha si lö sökhi.

14. Hadia wamahaʼö si tola öhalö moroi ba zalua khö Jack? (Faigi göi gambara.)

¹⁴ Nehegö zalua khö Jack, samösa niha gurunga nifotöi Afökha börö waʼamuʼi ba faʼalösökhinia. Muʼetuʼö khönia hukuma faʼamate. Hizaʼi, samuza inötö ifahaʼö ia ba Zura Niʼamoniʼö khö zi samösa talifusöda ira matua si möi ba gurunga. Iröi gamuatania si tohöna Jack, irege tola tebayagö ia idanö. Oroma sibai waʼatebulö gamuata Jack irege so ösa safi gurunga sege-ege me fabali ira fatua lö laʼetuʼö hukuma wa labunu ia. Imane samösa folisi sohalöwö ba gurunga, ”Me mböröta, yaʼia niha fondrege zi lö sökhi ba daʼa. Hizaʼi iadaʼa, samösa ia wondrege zi sökhi.” Samigu me no aefa mate Jack, so ösa ndra talifusöda si möi ba gurunga ba wamalua angowuloa simane si toʼölö. Me luo daʼö, so samösa niha gurunga sawena möi ba gangowuloa andrö. Hadia mbörö wa möi ia? Börö me adöni dödönia ba waʼatebulö gamuata Jack, ba omasi ia iʼila hadia zinangea ifalua enaʼö tobali ia samosumange  Yehowa. Ba daʼa taʼila wa amuatada möi famolakhömi Namada Yehowa si so ba zorugo!—1 Fe. 2:12.

HADIA NIFALUA YEHOWA BA WAMOLAKHÖMI TÖINIA BA ZI LÖ ARA TÖ?

15. Hadia nifalua Yehowa ba wamolakhömi töinia ba zi lö ara tö? (Sinunö 96:​10-13)

¹⁵ Baso Zinunö 96:​10-13. Ayati safuria moroi ba Zinunö 96 iʼamaedolagö Yehowa hulö simane Sanguhuku hegöi Razo satulö. Ifolakhömi döinia me ifalua wanguhuku satulö. Ba zi lö ara tö, idudugö Mbabilona Sebua, si no mangobousi töinia. (Fam. 17:​5, 16; 19:​1, 2) Te so ösa niha sangila faʼadudu andrö si fao khöda dania ba wamosumange satulö. Ba gafuriata, ihori fefu gulidanö Zatana andre Yehowa. Ihori fefu niha solawa ba sangobousi töinia si sökhi. Hizaʼi, ba ginötö daʼö göi, iʼorifi fefu niha sangomasiʼö, soloʼö ba samolakhömi yaʼia. (Mrk. 8:38; 2 Te. 1:​6-10) Aefa daʼö, na no awai dania Wamatörö Keriso si Saribu Fakhe ba na no aefa wanandraigö safuria, awena sindruhu-ndruhu teʼamoniʼö döi Yehowa. (Fam. 20:​7-10) Ba ginötö daʼö, ”anönö sa dania danö faʼaboto ba dödö lakhömi Yehowa, simane faʼanönö doyo nasi andrö asi”.—Hab. 2:14.

16. Hadia gangetula sinangea öhalö? (Faigi göi gambara.)

¹⁶ Tatu tadöna-döna sibai ginötönia fefu niha labeʼe khö Yehowa lakhömi sinangea itema. Gasa-gasa wombaloi daʼö, datahalö gangetula ba wamolakhömi Lowalangi ero inötö. Ba wanandrösaigö hawaʼamoguna daʼa, lafili ira Boto Solohe Zinunö 96:8 tobali ayati ba ndröfi 2025: ”Mifolakhömi Yehowa börö döinia.”