1. Hadia mbuania na taʼondrasi Wanörö Tödö Faʼamate Yesu nifalua ero röfi?

 TATU fao dödöda fefu ba wangumaʼö wa höli andrö no buala fondrege zebua böli! (2 Ko. 9:15) Börö me no itehegö nosonia Yesu salahida, tola tobali ita si fahuwu khö Lowalangi Yehowa. Tola göi taʼokhögö dötönafö faʼauri si lö aetu. Taʼandrö sibai saohagölö ba höli, buala nibeʼe Yehowa börö me iʼomasiʼö ita. (Rom. 5:8) Enaʼö lö tebulö taforomaʼö wangandrö saohagölö ba taʼameʼegö tödö höli, ibeʼe khöda goroisa Yesu enaʼö tafalua Wanörö Tödö ero röfi.—Luk. 22:​19, 20.

2. Hadia nitutunöda ba artikel daʼa?

² Ba ndröfi daʼa, mufalua Wanörö Tödö ba ngaluo Satu, 12 mbawa si Öfa 2025. Tatu omasi ita taʼondrasi acara daʼö. Ba migu fatua lö mufalua Wanörö Tödö hegöi na no aefa daʼö, tandraigö angerönusi a hadia manö zi no ifalua Yehowa hegöi Yesu salahida. Na öfalua daʼö, hasambalö ötema mbuania. Ba artikel daʼa, tatutunö hadia manö wamahaʼö nihalöda sanandrösa khö Yehowa hegöi Ononia moroi ba höli. Ba wamahaʼö aefa daʼa, tatutunö hadia manö mbua nitemada moroi ba höli, ba hadia zi tola tafalua ba wangoromaʼö fangandröda saohagölö.

 FAMAHAʼÖ NIHALÖDA SANANDRÖSA KHÖ YEHOWA MOROI BA HÖLI

3. Hewisa wa tola teʼefaʼö niha sato ba waʼamate zi samösa niha? (Faigi göi gambara.)

³ Moroi ba höli, tola tafahaʼö ita sanandrösa ba waʼatulö Yehowa. (5 Mo. 32:4) Angeragö atö: Börö me lö moloʼö Gadamo, lua-luania göna ita horö ondröita hegöi faʼamate. (Rom. 5:12) Ba wangefaʼö yaʼita, iʼalui lala Yehowa enaʼö Yesu zi tobali höli. Hizaʼi, hewisa wa tola tehöli mazui teʼefaʼö niha sato börö waʼamate zi samösa niha soʼahonoa? Imane Faulo, ”Hulö simane ba walömoloʼö niha si ha samösa andrö [yaʼia daʼö Adamo] no möi börö wa dozi niha mamalua horö, ba börö woloʼö zi samösa andrö [yaʼia daʼö Yesu] no möi börö wangatulö niha sato khö Lowalangi.” (Rom. 5:19; 1 Ti. 2:6) Eluahania, göna fefu niha horö hegöi faʼamate börö walömoloʼö zi samösa niha soʼahonoa. Tobali, moguna so samösa niha soʼahonoa soloʼö khö Lowalangi ba wangefaʼö yaʼita.

4. Hana wa lö itehegö Yehowa enaʼö auri sagötö faʼara ngaʼötö Gadamo soloʼö khö Lowalangi?

⁴ Hadia hasambalö mate Yesu ba wangefaʼö yaʼita? Hadia tebai menaʼö itehegö manö Yehowa auri sagötö faʼara ngaʼötö Gadamo soloʼö khö Lowalangi? Ba wamaigida yaʼita niha si lö moʼahonoa, daʼö no amuata si sökhi ba si tefaudu. Hizaʼi, lö tefaudu daʼö ba waʼatulö Yehowa soʼahonoa. Hadia mbörö? Na ifalua daʼö Yehowa, hulö zi lö irai ifalua horö sebua Adamo ba moʼahonoa ngaʼötönia, sindruhunia sa lö atulö daʼö.

5. Hana wa tola faduhu dödöda wa lö tebulö ifalua zatulö Yehowa?

⁵ Hadia zalua na lö ifalua zatulö Yehowa me föna ba itehegö manö auri sagötö faʼara ngaʼötö Gadamo si lö moʼahonoa hewaʼae lö hadöi höli? Tola tumbu ba wangera-ngerada wa lö göi atulö nifalua Yehowa na so nifaluania tanö böʼö. Duma-dumania, aombö dödöda hadia ifalua fefu mbuʼusa linia Yehowa mazui löʼö. Hizaʼi, börö me atulö nifaluania iʼotarai me föna, lö saʼae khöda faʼaombö dödö. Itehegö Nono niʼomasiʼönia Yehowa enaʼö tola ifalua goi-goinia satulö. Daʼa zameʼe khöda faʼafaduhu dödö wa lö tebulö ifalua zatulö.

6. Hewisa wa tola oroma waʼomasi Yehowa moroi ba höli? (1 Yohane 4:​9, 10)

⁶ Ifahaʼö ita höli tenga ha sanandrösa ba waʼatulö Yehowa, hizaʼi sanandrösa ba waʼebua waʼomasinia khöda. (Yoh. 3:16; baso 1 Yohane 4:​9, 10.) Höli andrö zangoromaʼö wa omasi Yehowa na taʼokhögö waʼauri si lö aetu ba tobali ita ösi nomonia. Me föna, me ifalua horö Adamo, tebai saʼae tobali ia ösi nomo Yehowa. Lua-luania, iʼotarai me tumbu tenga saʼae ösi nomo Yehowa ita. Hizaʼi börö höli,  tola iʼefaʼö Yehowa fefu niha samati ba soloʼö khönia irege tobali ira ösi nomonia. Iadaʼa manö, tola taʼokhögö wahuwusa saro khö Yehowa hegöi khö ndra talifusöda si sara lala wamati. Sindruhu-ndruhu wa iʼomasiʼö ita Yehowa!—Rom. 5:​10, 11.

7. Moroi ba wamakao nitaögö Yesu, hadia zangoromaʼö wa iʼomasiʼö ita Yehowa?

⁷ Tola itugu aboto ba dödöda hawaʼebua waʼomasi Yehowa khöda na taʼangeragö hadia manö zi no itehegö ba wangehenaigö höli. Iwaʼö Satana wa hasambalö faröi fefu nono mbanua Yehowa na göna ira abula dödö. Ba wangoromaʼö wa fasala niböbögö Zatana andrö, itehegö Yehowa tefakao Yesu fatua lö mate ia. (Yob. 2:​1-5; 1 Fe. 2:21) Iʼila Yehowa me laʼoʼaya Yesu ira samadaö, laleasi ia ira saradadu ba laʼosö ia ba döla geu. Aefa daʼö, iʼila göi me mate ba waʼafökhö Nono niʼomasiʼönia andrö. (Mat. 27:​28-31, 39) Sindruhunia, so waʼabölö khö Yehowa ba wangefaʼö Yesu moroi ba wamakao salua. Duma-dumania, me lamane ira samadaö, ”Akha iʼorifi ia Lowalangi iadaʼa na sindruhu iʼomasiʼö ia Lowalangi,” tola menaʼö ifalua daʼö Yehowa. (Mat. 27:​42, 43) Hizaʼi na ifalua daʼö, tebai ibeʼe waʼaurinia Yesu tobali höli, ba lö hadöi tötönaföda. Daʼö mbörö wa itehegö tefakao Nononia Yehowa irege mate.

8. Hadia afökhö dödö Yehowa me iʼila tefakao Nononia? Tutunö. (Faigi göi gambara.)

⁸ Hewaʼae fondrege zabölö Yehowa andrö, hizaʼi hadia daʼö geluahania wa lö iʼila irasoi hadia ia? Böi so khöda wangera-ngera simane daʼö. Datatörö tödöda wa iwöwöi ita si fakhili-khili khönia, ba tola tarasoi hadia ia. Tobali, iʼila göi irasoi hadia ia Yehowa. Ifatunö khöda Sura Niʼamoniʼö wa tola ’afökhö dödö’ Yehowa. (Si. 78:​40, 41) Angeragö zalua khö Gaberahamo hegöi Izaʼaki. Mubeʼe fareta khö Gaberahamo ba wameʼe ononia si ha sambua sotöi Izaʼaki tobali sumange. (1 Mo. 22:​9-12; Heb. 11:​17-19) Tatu fawuka dödönia me igogohe rosö ba edöna ibunu nononia Izaʼaki. Na simanö, khalaigö hewisa dödö Yehowa me iʼila lafakao ba labunu nononia. Tatu fatalikhö bakha dödönia ba waʼafökhö!—Faigi video Miʼohiaʼö Wamatira—Aberahamo, Faosatö 2 ba jw.org.

9. Moroi ba Roma 8:​32, 38, 39, hadia wamahaʼö si tola tahalö sanandrösa ba waʼomasi Yehowa?

⁹ Moroi ba höli, tafahaʼö ita wa lö hadöi sangomasiʼö yaʼita töra moroi khö Yehowa. Abölö ebua waʼomasinia moroi ba waʼomasi nösi nomo hegöi si fahuwu khöda. (Baso Roma 8:​32, 38, 39.) Mendrua manö, abölö iʼomasiʼö ita moroi ba waʼomasida faʼaurida. Hadia omasiʼö ösöndra waʼauri si lö aetu? Abölö omasi nasa Yehowa moroi ba waʼomasimö. Hadia omasiʼö na teʼefaʼö horömö? Abölö  omasi nasa Yehowa moroi ba waʼomasimö. Awai niʼandrönia khöda yaʼia daʼö enaʼö taʼandrö saohagölö ba höli si no ibeʼe, mamati ita ba taʼoʼö niwaʼönia. Moroi ba höli, ba daʼö taʼila wa sindruhu-ndruhu iʼomasiʼö sibai ita Yehowa. Ba gulidanö si bohou dania, abölö oya nasa wamahaʼö nihalöda sanandrösa ba waʼomasi Yehowa.—Sango. 3:11.

FAMAHAʼÖ NIHALÖDA SANANDRÖSA KHÖ YESU MOROI BA HÖLI

10. (a) Hadia mbörö wa abu sibai dödö Yesu? (b) Hadia nifalua Yesu ba wangamoniʼö töi Yehowa? (Faigi göi kotak ” Faʼalöfaröi Yesu Möi Fangamoniʼö Döi Yehowa”.)

¹⁰ Sindruhu-ndruhu iʼameʼegö tödö Yesu döi si sökhi niʼokhögö Namania. (Yoh. 14:31) Abu sibai dödö Yesu börö me iʼila wa laböbögö khönia zi lö duhu wa no iʼoʼaya Lowalangi ba mate ia simane faʼamate niha si lö sökhi. Möi fangoʼaya döi Namania daʼö. Andrö wa mangandrö ia, ”He Ama, na tola, akha italuʼi ndraʼo mako andre.” (Mat. 26:39) Hizaʼi, börö me lö faröi Yesu khö Yehowa irugi waʼamatenia, sindruhu-ndruhu teʼamoniʼö döi Namania.

11. Hewisa wangoromaʼö Yesu wa sindruhu-ndruhu iʼomasiʼö niha gulidanö? (Yohane 13:1)

¹¹ Moroi ba höli, tafahaʼö göi ita wa sindruhu-ndruhu iʼameʼegö tödö niha sato Yesu, mendrua manö khö ndra nifahaʼönia. (Amd. 8:31; baso Yohane 13:1.) Duma-dumania, iʼila Yesu wa hasambalö itaögö wamakao sagötö wamaluania halöwö fanuriaigö ba gulidanö, ba itörö waʼamate safökhö. Hewaʼae simanö, lö iböhöli wamalua halöwönia soroi ba dödö. Ilau manuriaigö, mamahaʼö ba itolo niha böʼö börö me iʼomasiʼö ira, tenga ha asala ifalua halöwönia. Baero daʼö, ba mbongi fatua lö mate ia, iʼogunaʼö ginötönia ba wanasai ahe ndra sinengenia, ifahaʼö ira ba iʼabölöʼö. (Yoh. 13:​12-15) Aefa daʼö, ba döla geu famakao, iʼogunaʼö  ginötönia si toröi ba wameʼe tötönafö khö zi samösa niha si lö sökhi ba itatugöi enaʼö so zondrorogö inania. (Luk. 23:​42, 43; Yoh. 19:​26, 27) Sindruhu-ndruhu oroma waʼomasi Yesu tenga ha ba waʼamatenia, hizaʼi moroi ba zi sandrohu faʼaurinia ba gulidanö.

12. Hadia manö zi lö tebulö ifalua Yesu salahida?

¹² Sindruhu sa wa mate Yesu ”sakali irugi zi lö aetu”. Hizaʼi irugi iadaʼa, so nasa nifaluania salahida. (Rom. 6:10) Hadia manö daʼö? Lö iböhöli wohalöwö ba wameʼe khöda ngawalö zi sökhi, si tola tarasoi börö me so höli. Mangai halöwö ia tobali Razo, Ere Sebua hegöi Högö ba mbanua niha Keriso. (1 Ko. 15:25; Ef. 5:23; Heb. 2:17) Tebeʼe göi khönia halöwö ba wangowuloi niha nibayoini hegöi ngawawa sato. Moguna iʼasiwai halöwönia andrö fatua lö teʼasiwai wamakao sabölö-bölö. b (Mat. 25:32; Mrk. 13:27) Baero daʼö, itatugöi enaʼö latema gö ba wamati ira niha samosumange yaʼia si lö faröi sagötö wamakao safuria andre. (Mat. 24:45) Hewaʼae no tarugi dania Wamatörö si Saribu Fakhe, lö iböhöli wohalöwö salahida. Sindruhu-ndruhu wa no buala sebua böli Yesu nibeʼe Yehowa khöda!

BÖI BÖHÖLI WAMAHAʼÖ YAʼUGÖ

13. Hewisa enaʼö itugu oya tafahaʼö ita sanandrösa ba waʼomasi Lowalangi hegöi Keriso?

¹³ Tola itugu oya tafahaʼö ita ba waʼomasi si no iforomaʼö Lowalangi Yehowa hegöi Keriso, na lö taböhöli woʼangerönusi daʼö. Ba migu fatua lö mufalua Wanörö Tödö hegöi na no aefa mufalua daʼö ba ndröfi daʼa, baso fazambua mazui mato hauga ngawua mbuku Injil. Böi samuzaigö wombaso fefu. Daʼi-daʼi wombaso ba angerönusi hadia nasa zamarou yaʼita irege itugu taʼomasiʼö Yehowa hegöi Yesu. Aefa daʼö, fatunö ba niha böʼö zi no öfahaʼö yaʼugö.

14. Hana wa möi fanoloda riset enaʼö itugu oya tafahaʼö ita sanandrösa ba höli hegöi tanö böʼönia? (Sinunö 119:​97, nisura ba gahe zura; faigi göi gambara.)

¹⁴ Na no ara öfahaʼö ndraʼugö ba zindruhu, hadia so nasa zi tola öfahaʼö ndraʼugö sanandrösa ba waʼatulö Lowalangi, faʼomasinia, höli hegöi ngawalö danö böʼö si no asese mudunö-dunö? Tatu manö. Lö tebulö so zi bohou si tola tafahaʼö yaʼita. Ba publikasida, oya sibai waʼaboto ba dödö si tola taʼila. Börö daʼö, ogunaʼö daʼö fefu. Na so ayati si lö aboto ba dödöu, falua riset. Aefa daʼö, fatou-tou tödöu nisöndramö ba riset andrö ba zi maʼökhö daʼö, ba angeragö hadia wamahaʼö si tola öhalö moroi  ba daʼö sanandrösa khö Yehowa, Ononia hegöi faʼomasira khöu.—Baso Zinunö 119:97 hegöi nisura ba gahe zura.

15. Hana wa tebai awuwu ita ba wangalui girö-girö ba wamati?

¹⁵ Te lö ero-ero ösöndra ngawalö zi bohou mazui sadöni dödöu ba ginötö öbaso Zura Niʼamoniʼö hegöi na öfalua riset. Hewaʼae simanö, böi ide-ide dödöu. Duma-dumania, si toʼölönia niha sangalui anaʼa, ihorigö ginötönia mato hauga za mazui hauga hari fatua lö isöndra hamo-hamo ganaʼa. Hizaʼi, lö ibato wangalui börö me ebua mböli ganaʼa andrö ba wamaiginia hewaʼae no ide-ide. Simane daʼö göi girö-girö ba wamati si so ba Zura Niʼamoniʼö, abölö ebua mbölinia moroi ba ganaʼa. (Si. 119:127; Amd. 8:10) Börö daʼö, böi böhöli wombaso Sura Niʼamoniʼö hegöi ba wangalui girö-girö ba wamati.—Si. 1:2.

16. Hewisa woloʼöda Yehowa hegöi Yesu?

¹⁶ Ba ginötö öfahaʼö ndraʼugö, tandraigö angeragö hewisa wamaluamö daʼö. Duma-dumania, oʼö waʼatulö Yehowa, lalania böi ebua dödö zambuana ndraʼugö. Oʼö waʼomasi Yesu khö Namania hegöi ba niha böʼö yaʼia na ötehegö waʼaurimö ba wangoʼawögö töi Yehowa hegöi ira talifusö si sara lala wamati. Falua göi halöwö fanuriaigö simane nifalua Yesu enaʼö tebeʼe ginötö ba niha böʼö ba wangoromaʼö famati ba höli nibeʼe Yesu, si no tobali buala sebua böli moroi khö Yehowa.

17. Hadia nitutunöda ba artikel aefa daʼa?

¹⁷ Na itugu tafahaʼö ita sanandrösa ba höli ba itugu monönö wangandröda saohagölö, tatu itugu taʼomasiʼö Yehowa hegöi Ononia. Itugu laʼomasiʼö göi ita. (Yoh. 14:21; Yak. 4:8) Börö daʼö, böi böhöli wangogunaʼö fefu zi no ihenaigö Yehowa ba wamahaʼö yaʼita sanandrösa ba höli. Ba artikel aefa daʼa, tatutunö dania hadia manö mbua nitemada ba höli nibeʼe Yehowa si fao faʼomasi, ba hadia nifaluada ba wangoromaʼö fangandröda saohagölö.