ARTIKEL WAMAHAʼÖ 3
SINUNÖ 35 ”Mitatugöi Hadia Zabölö Moguna”
Mangai Angetula Sangomusoiʼö Tödö Yehowa
”Böröta waʼatua-tua, fangataʼufi Yehowa, ba faʼaboto ba dödö sanandrösa khö Wondrege Niʼamoniʼö daʼö wangiʼila.”—AMD. 9:10.
NITUTUNÖ
Lala ba wangogunaʼö faʼatua-tua, faʼaboto ba dödö hegöi fangera-ngera si sökhi ba wangai angetula sangomusoiʼö tödö Yehowa.
1. Hadia manö gangetula sabua khöda wangai?
ERO maʼökhö tahalö gangetula. So gangetula saoha, duma-dumania hadia niʼada ba zihulö wongi mazui hauga bözi mörö ita. Hizaʼi, so gangetula sabua, te soʼamakhaita ba waʼomuso dödöda, botoda, ösi nomoda, mazui famosumangeda Lowalangi. Tatu omasi ita tahalö gangetula si möi fangomuso dödöda hegöi ösi nomoda. Ba sabölö moguna, omasi ita tahalö gangetula sangomusoiʼö tödö Yehowa.—Rom. 12:1, 2.
2. Hadia manö zanolo yaʼugö ba wangai angetula si sökhi?
2 Tola öhalö gangetula si sökhi na (1) öʼangeragö hadia dania zalua, (2) öʼangeragö hewisa lala wangera-ngera Yehowa, ba (3) öhaogö öʼangeragö hadia zedöna öfili. Tatutunö dania daʼö ba artikel daʼa. Tatutunö göi hadia zinangea tafalua ba wangokhögö lala wangera-ngera si sökhi.—Amd. 2:11.
ANGERAGÖ HADIA DANIA ZALUA
3. Beʼe duma-duma sangoromaʼö wa moguna sibai öʼangeragö hadia dania zalua fatua lö öhalö gangetula.
3 Si oföna öfalua ba wangai angetula si sökhi yaʼia daʼö na öʼangeragö hadia dania zalua. Hana wa moguna daʼa? Angeragö atö: Na so niha si göna fökhö sabölö-bölö, hadia ihalö gangetula doto ba wodalu-daluni niha daʼö fatua lö ifareso ba isofu-sofu hadia nirasoinia? Tatu manö löʼö. Simanö göi, tola öhalö gangetula si sökhi na oföna öʼangeragö hadia dania zalua ba gangetula nihalömö andrö. Hewisa lala wamalua daʼö?
4. Moloʼö Amaedola 18:13, hewisa enaʼö tola öʼangeragö hadia dania zalua ba gangetula nihalömö? (Faigi göi gambara.)
4 Sasesenia, tola öʼangeragö hadia dania zalua ba gangetula nihalömö na manofu-nofu ndraʼugö. Duma-dumania, so zogaoni yaʼugö weʼamöi manga ba zi sambua nahia. Hadia möi ndraʼugö? Na lö öʼila sibai zokhö omo ba lö öʼila hadia dania nifalua ba daʼö, tola manofu ndraʼugö, ”Hawaʼara ba hezo lafalua? Hawaʼato ba haniha manö zi möi? Haniha zabeʼe dödöda ba wamaigi-maigi nifalua ba daʼö? Hadia manö nifalua ba hadia so duo ba daʼö?” Na öʼila wanema li moroi ba wanofu-nofu daʼö, tola öhalö gangetula si sökhi.—Baso Gamaedola 18:13.
Angeragö hadia manö dania zalua (Faigi ngenoli si 4) a
5. Hadia zinangea öfalua na no öʼila hadia dania zalua ba gangetula nihalömö?
5 Na no öʼila hadia dania zalua, haogö angeragö daʼö. Duma-dumania, hewisa na möi niha si lö moʼameʼegö tödö goi-goi Zura Niʼamoniʼö? Mazui hewisa na so duo ba daʼö, hizaʼi lö hadöi niha sabeʼe dödöda ba wamaigi-maigi? Hadia lua-luania ato niha si mabu? (1 Fe. 4:3) Baero daʼö, hewisa na tefaudu ginötönia ba weʼamöi manuriaigö mazui ba gangowuloa? Na öhaogö öʼangeragö fefu daʼö, no öfalua lala satulö ba wangai angetula si sökhi. Hewaʼae simanö, so nasa zinangea öʼangeragö. No öʼila hadia nifaluamö, hizaʼi hewisa lala wangera-ngera Yehowa?—Amd. 2:6.
ANGERAGÖ LALA WANGERA-NGERA YEHOWA
6. Moloʼö Yakobo 1:5, hana wa moguna taʼandrö wanolo moroi khö Yehowa?
6 Andrö khö Yehowa enaʼö itolo ndraʼugö ba wangila hewisa lala wangera-ngerania ba zalua khömö. No ifabuʼu Yehowa wa hasambalö ibeʼe khöda waʼatua-tua enaʼö taʼila hezo gangetula sangomusoiʼö tödönia. ”Fahöna wameʼe Lowalangi [waʼatua-tua] ba lö iʼailasi niha.”—Baso Yakobo 1:5.
7. Hewisa enaʼö öʼila lala wangera-ngera Yehowa? Beʼe duma-duma.
7 Na no aefa öʼandrö wanuturu lala moroi khö Yehowa, haogö nehegö wanema li nibeʼenia. Duma-dumania: Na elungu ndraʼugö ba lala, tatu manofu ndraʼugö ba niha si toröi ba daʼö. Hizaʼi, hadia mofanöʼö fatua lö ifatunö khömö hezo lala? Tatu manö löʼö. Öfondrondrongo ua sakali me ituturu khöu lala. Simane daʼö göi, na no aefa öʼandrö waʼatua-tua moroi khö Yehowa, nehegö wanema li nibeʼenia. Alui hadia goroisa mazui goi-goi si so ba Zura Niʼamoniʼö si tefaudu ba zalua khömö. Duma-dumania, fatua lö öhalö gangetula no mege ba wotemaʼö undraga weʼamöi manga, angeragö hadia niwaʼö Zura Niʼamoniʼö sanandrösa ba gowasa si lö sökhi, fariawösa si lö sökhi hegöi fangofönaiʼö wangalui Famatörö Lowalangi moroi ba zomasi-masi dödöu samösa.—Mat. 6:33; Rom. 13:13; 1 Ko. 15:33.
8. Hadia zinangea öfalua na moguna khöu wanolo ba wangila hadia dania zalua ba gangetula nihalömö? (Faigi göi gambara.)
8 Itaria, moguna khöu wanolo ba wangila hadia dania zalua ba gangetula nihalömö. Tola öʼandrö mene-mene moroi khö ndra talifusöda si no aro ba wamati. Tola göi öʼogunaʼö sarana riset si no ihenaigö organisasi, simane Fanuturu Lala ba Wamalua Riset khö Ndra Samaduhuʼö Yehowa hegöi Ayati Soguna ba Waʼauri Niha Keriso. Törö tödöu wa ohitö dödöu yaʼia daʼö ba wangai angetula sangomusoiʼö tödö Yehowa.
Angeragö lala wangera-ngera Yehowa (Faigi ngenoli si 8) b
9. Hewisa enaʼö aboto ba dödöda hadia gangetula sangomusoiʼö tödö Yehowa? (Efeso 5:17)
9 Hewisa enaʼö aboto ba dödöda hadia gangetula sangomusoiʼö tödö Yehowa? Imane Sura Niʼamoniʼö, ”Faʼaboto ba dödö sanandrösa khö Wondrege Niʼamoniʼö daʼö wangiʼila.” (Amd. 9:10) Eluahania, moguna sindruhu-ndruhu aboto ba dödöda sanandrösa khö Yehowa. Taforege enaʼö taʼila sanandrösa ba gamuatania, ohitö dödönia, hadia zomasi ia, ba hadia göi zi fatuwu ia. Aefa daʼö, sofu khöu samösa, ’Moroi ba zi no aboto ba dödögu sanandrösa khö Yehowa, hadia gangetula sinangea uhalö ba wangomusoiʼö tödönia?’—Baso Efeso 5:17.
10. Hana wa abölö tohude goi-goi Zura Niʼamoniʼö moroi ba zasese lafalua ira ösi nomoda mazui niha si so ba zi fasuida?
10 Ba wangomusoiʼö tödö Yehowa, itaria tafalua zi möi fangafatö dödö niha si fahatö khöda. Duma-dumania, tola manö so zatua samaso onora alawe enaʼö mangowalu ia khö ndra matua si kayo mazui ba niha si tola mangaʼasogö böwö sebua, hewaʼae sindruhunia lö aro ba wamati ndra matua daʼö. Te lafalua daʼö börö me sökhi gohitö dödöra, omasi ira na ohahau dödö nonora alawe. Hizaʼi, haniha dania zanolo onora andrö enaʼö tedou ia ba wamati? Hewisa lala wangera-ngera Yehowa sanandrösa ba daʼö? Fanema linia so ba Mataiʼo 6:33. Ba daʼö, mubeʼe mene-mene khö ndra niha Keriso enaʼö ’laʼofönaiʼö wangalui Famatörö Lowalangi’. Hewaʼae tafosumange zatuada, simanö göi niha si so ba zi fasuida, hizaʼi böi olifu ita wa ohitö dödöda siföföna yaʼia daʼö ba wangomusoiʼö tödö Yehowa.
HAOGÖ ANGERAGÖ HADIA ZEDÖNA ÖFILI
11. Moloʼö Filifi 1:9, 10, hadia zanolo yaʼugö ba wangai angetula si sökhi?
11 Me no aefa öʼangeragö goi-goi Zura Niʼamoniʼö si tefaudu ba zalua khömö, fuli angeragö hadia manö gangetula si tola öhalö. (Baso Wilifi 1:9, 10.) Na so khöu wangera-ngera si sökhi, tatu öʼila ökhalaigö hadia mbua moroi ba ngawalö gangetula si tola öhalö. Itaria, tola iʼanemaiʼö öʼila hezo gangetula satulö. Hizaʼi, lö ero-ero manö daʼö. Fangera-ngera si sökhi zanolo yaʼugö ba wangai angetula sangomusoiʼö tödö Yehowa hewaʼae na abua zalua.
12-13. Hewisa wa möi fanolomö wangera-ngera si sökhi ba wangai angetula sanandrösa ba halöwö?
12 Khalaigö zalua andre: Me öʼalu-alui halöwömö ba wombönökhi soguna yomo ba nomo, so darua niha sogaoni yaʼugö wohalöwö. Tatu öʼangeragö sanandrösa ba daʼö, duma-dumania hadia halöwö nifalua ba daʼö, hawaʼaröu gotaluania ba nomomö, hewisa ginötö wohalöwönia, ba tanö böʼönia nasa. Aefa daʼö, öʼila wa lö fasala halöwö si dombua andrö. Te abölö öfili zi oföna börö me ebua gazi ba omasiʼö halöwönia. Hizaʼi, so nasa zinangea öʼangeragö fatua lö öhalö gangetula.
13 Duma-dumania, hadia isaisi ndraʼugö halöwö daʼö ba weʼamöi ba gangowuloa? Hadia ihorigö ginötöu halöwö daʼö irege lö saʼae inötöu ba wanolo ösi nomou enaʼö larasoi waʼahono dödö ba aro gamakhaitara khö Yehowa? Fanofu-nofu daʼa zanolo yaʼugö enaʼö abölö öʼofönaiʼö zabölö moguna, yaʼia daʼö famosumange Lowalangi hegöi soguna ba nösi nomou, tenga ba wangalui harato. Na öfalua daʼö, tola öhalö gangetula nifahowuʼö Yehowa.
14. Hewisa wangera-ngera si sökhi hegöi faʼomasi möi fanoloda irege lö tafobörö wangala ba niha böʼö?
14 Tola göi tobali fanoloda wangera-ngera si sökhi ba woʼangeragö hadia lua-lua gangetulada ba niha böʼö irege lö ”tobali [ita] fangala ba wamati niha böʼö”. (Fil. 1:10) Moguna sibai daʼa ba ginötö tahalö gangetula sanandrösa ba wonukha hegöi fangehaogö boto. Te omasi ita tafalua menaʼö zomasi dödöda, hizaʼi hewisa na fatuwu daʼö khö ndra talifusöda si sara lala wamati mazui ba niha böʼö? Na taʼokhögö wangera-ngera si sökhi, daʼö mbörö wa taʼameʼegö tödö ira. Faʼomasi zamarou yaʼita ba wangofönaiʼö ”soguna ba niha böʼö”. (1 Ko. 10:23, 24, 32; 1 Ti. 2:9, 10) Buania, no tahalö gangetula sangoromaʼö wa taʼomasiʼö ba tafosumange niha böʼö.
15. Hadia zinangea taʼangeragö fatua lö tahalö gangetula sebua?
15 Fatua lö öhalö gangetula sebua, tandraigö angeragö hadia manö zinangea öfalua enaʼö mofozu gangetula daʼö. Ifahaʼö ita Yesu enaʼö talau ’modadao sakali ba wangerai hadia ibönö gefeda ba wangasiwai’. (Luk. 14:28) Börö daʼö, angeragö hawaʼoya ginötö, kefe niʼogunaʼö hegöi famorege ba wamalua angetula daʼö. Itaria, moguna mifatunöisi yaʼami si sambua omo hadia zinangea mifalua ero zamösana ba wotuhini angetula daʼö. Hana wa moguna sibai daʼö? Börö me tola tobali famasugi ba dödöda daʼa hadia moguna tabulöʼö gangetulada mazui so gangetula sabölö sökhi. Na öfaogö nösi nomomö ba öfondrondrongo mbua gera-erara, tola latuhini gangetula nihalömö si fao faʼomuso dödö.—Amd. 15:22.
MOFOZU BA WANGAI ANGETULA SI TEFAUDU
16. Hadia manö wanuturu lala sanolo yaʼugö ba wangai angetula si sökhi? (Faigi göi kotak ” Lala ba Wangai Angetula si Sökhi”.)
16 Me no öfalua wanuturu lala nitutunö moroi yawa, no tefaʼanö ndraʼugö ba wangai angetula si sökhi. No öʼangeragö hadia dania zalua ba öfareso goi-goi Zura Niʼamoniʼö sanolo yaʼugö ba wangai angetula sangomusoiʼö tödö Yehowa. Andrö wanolo moroi khö Yehowa enaʼö mofozu ndraʼugö wamalua angetula si no öhalö.
17. Hadia zi lö tola löʼö tafalua ba wangai angetula si sökhi?
17 Hewaʼae oya gangetula si sökhi si no irai öhalö ba no mofozu daʼö, törö tödöu wa si lö tola löʼö öfalua yaʼia daʼö odaligö waʼatua-tua moroi khö Yehowa tenga faʼatua-tuamö samösa. Ha Yehowa zi tola mameʼe khöu faʼaboto ba dödö, faʼonekhe ba fangera-ngera si sökhi. Daʼö fefu zanolo yaʼugö ba wangokhögö faʼatua-tua. (Amd. 2:1-5) Yehowa zanolo yaʼugö ba wangai angetula si möi fangomuso dödönia.—Si. 23:2, 3.
SINUNÖ 28 Mamakhai Fahuwusa khö Yehowa
