1. Hadia mbörö wa ifasindro zi sambua fongambatö Lowalangi Yehowa?

 IFATUNÖ khöda Sura Niʼamoniʼö wa Yehowa ”Lowalangi somuso tödö”, ba omasi ia göi na omuso dödöda. (1 Ti. 1:11) No oya mbuala nibeʼenia khöda enaʼö tarasoi waʼomuso dödö ba waʼaurida sero maʼökhö. (Yak. 1:17) Sambua mbuala nibeʼenia khöda yaʼia daʼö fangowalu. Me alua walöwa, fawuʼu li woʼomo ira matua hegöi foʼomo ira alawe wa faoma laʼomasiʼö ba lafosumange nawöra zamösana.—Amd. 5:18.

2. Hewisa zasesenia lagu woʼomo ira matua khö woʼomora ira alawe?

² Alimagö sibai, ato zi no mangowalu solifu mbuʼusa lira me awena alua walöwa. Lua-luania lö lasöndra waʼohahau dödö. Moloʼö sambua angombakhata barö-barö daʼa nifaʼema Organisasi Kesehatan Dunia, ato sibai woʼomo ira matua samözi foʼomora ira alawe, laʼoʼaya-aya ba laʼaohasi ba dödö. Ato woʼomo ira matua si sökhi amuata khö woʼomonia ira alawe föna niha sato, hizaʼi lö sökhi gamuatania khö ngambatönia na ba nomo. Ato göi zi no mangowalu, lö lasöndra waʼohahau dödö börö wamaigi-maigi pornografi.

3. Hadia mbörö wa so ndra matua samöbözi foʼomonia?

³ Hadia mbörö wa so ndra matua samöbözi foʼomonia? Tola manö börö me amuʼi zatuania mege irege si toʼölö manö daʼö ba wamaiginia. So göi zamalua daʼö börö me simanö gamuata niha ba zi fasuira. Lawaʼö tödöra wa sinangea na laböbözi woʼomora ira alawe börö me yaʼira högö yomo ba nomo, ba daʼö dandra wa ”sindruhu ira matua” ira. So göi zi lö irai mufahaʼö ba wangoromaʼö faʼebolo dödö. Ato göi ndra matua sangokhögö lala wangera-ngera si lö sökhi sanandrösa khö ndra alawe hegöi ba wamalua faʼorudu börö me lafaigi-faigi pornografi. Moloʼö angombakhata, itugu ato ndra matua samöbözi foʼomora me  alua pandemi COVID-19. Hizaʼi gofu hadia mbörö, tebai ibözi woʼomonia foʼomo ira matua.

4. Hezo moguna mangelama woʼomo ira matua, ba hadia mbörö?

⁴ Moguna mangelama woʼomo ira matua enaʼö lö tedönisi dödöra ba lala wangera-ngera si fasala sanandrösa khö ndra alawe. a Hadia mbörö? Börö me lala wangera-ngera, molua-lua ia ba nifalua zi samösa niha. Ifaʼoheʼö zurania Faulo si tobali famangelama khö ndra niha Keriso si toröi ba Roma, imane ”Böi mifaomagö ami ba niha gulidanö.” (Rom. 12:​1, 2) Me luo daʼö, no ara tefasindro mbanua niha Keriso ba Roma. Hizaʼi, fehede Waulo andrö zangoromaʼö wa so ösa ndra talifusö ba mbanua niha Keriso sangokhögö lala wangera-ngera ba si tedönisi tödö ba zi toʼölö lafalua niha. Daʼö mbörö wa iʼamenesi ira Faulo enaʼö labulöʼö lala wangera-ngera hegöi amuatara. Moguna göi mene-mene daʼö iadaʼa khö ndra talifusöda foʼomo ira matua. Alimagö sibai, so ösa zi no tedönisi tödö ba lala wangera-ngera gulidanö daʼa ba lafakao woʼomora ira alawe. b Börö daʼö, hadia niʼandrö Yehowa khö woʼomo ira matua enaʼö ifalua khö woʼomonia? Fanema linia, so ba ayati si tobali tuho ba artikel daʼa.

5. Moloʼö 1 Fetero 3:​7, hewisa zinangeania lagu ndra matua khö woʼomonia ira alawe?

⁵ Baso 1 Fetero 3:7. Eluaha ngawua wehede ”ameʼegö tödö” ba li sindruhunia yaʼia daʼö ”beʼe zumange”. Iʼandrö Yehowa khö ndra matua enaʼö lafosumange woʼomora ira alawe. Ira matua samosumange foʼomonia ira alawe, ihaogö-haogö wehede ba iʼomasiʼö woʼomonia. Tatutunö dania ba artikel daʼa hadia nifalua ndra matua ba wamosumange foʼomonia ira alawe. Si oföna datatutunö hadia manö gamuata si möi fangailasi woʼomo ira alawe.

BÖI FALUA ZI MÖI FANGAILASI WOʼOMOMÖ IRA ALAWE

6. Hewisa dödö Yehowa khö ndra matua samöbözi foʼomonia ira alawe? (Kolose 3:19)

⁶ Famöbözi. Fatuwu Yehowa ba niha sangomasiʼö si lö sökhi. (Si. 11:5) Fatuwu sibai ia khö ndra matua samöbözi foʼomonia. (Mal. 2:16; baso Kolose 3:19.) Simane ayati ba duho artikel daʼa, 1 Fetero 3:​7, na lö sökhi gamuata ndra matua khö woʼomonia ira alawe, hasambalö tekiko wahuwusania khö Lowalangi ba lö ifondrondrongo wangandrönia Yehowa.

7. Moloʼö Efeso 4:​31, 32, hewisa zinangeania lagu wahuhuosa woʼomo ira matua khö woʼomonia? (Faigi göi ”Geluaha Ngawua Wehede”.)

⁷ Fehede fangailasi mazui li sagafökhö. So ösa ndra matua sangumaʼö fehede si möi fangailasi woʼomonia ira alawe. Fatuwu sibai Yehowa wehede ”faʼabao dödö, fönu, feʼira-ira, falelesa ba fefu ngawalö zi möi fangafökhö dödö”. c (Baso Efeso 4:​31, 32.) Irongo Yehowa hewisa lagu wahuhuosa woʼomo ira matua khö woʼomonia ira alawe, hewaʼae na ba nomo so ira. Inehegö daʼö Yehowa. Na so ndra matua si fahuhuo khö woʼomonia ira alawe ba lö sökhi-sökhi wehedenia, tola tekiko wongambatönia ba mendrua manö wahuwusania khö Yehowa.—Yak. 1:26.

8. Hewisa dödö Yehowa na so zamaigi pornografi, ba hadia mbörö?

⁸ Mamaigi pornografi. Fatuwu sibai Yehowa na so zamaigi pornografi. Na so ndra matua samaigi pornografi, no ifakiko wahuwusania khö  Yehowa ba no iʼailasi woʼomonia ira alawe. d Iʼandrö Yehowa khö woʼomo ira matua enaʼö lö faröi ira khö woʼomora ira alawe. Eluahania, lö mohorö ia khö ndra alawe böʼö, ba lö iʼera-era wamalua daʼö. Iwaʼö Yesu, haniha zotöngö ira alawe irege tumbu ba dödönia wangisö, ”no ifalua horö bakha ba dödönia”. e—Mat. 5:​28, 29.

9. Hana wa lö omasi Yehowa na so ndra matua sangailasi foʼomonia ira alawe sanandrösa ba waʼorudu?

⁹ Ifaso mazui iʼailasi ba wamalua faʼorudu. So ösa ndra matua si lö faʼahakhö dödö, lafaso woʼomora ira alawe ba wamalua faʼorudu mazui laʼailasi. Fatuwu Yehowa gamuata fakhögusa simane daʼö ba si lö faʼahakhö dödö. Omasi Yehowa na laʼomasiʼö woʼomora ira alawe, lahaogö-haogö wehede ba lafosumange soroi ba dödö. (Ef. 5:​28, 29) Hewisa na so ndra matua si no mangailasi ba samöbözi foʼomonia ira alawe mazui samaigi pornografi? Hewisa enaʼö tebulö lala wangera-ngera hegöi amuatania?

LALA BA WOMBÖHÖLI AMUATA SI MÖI FANGAILASI WOʼOMO IRA ALAWE

10. Hewisa woʼomo ira matua ba woloʼöra duma-duma Yesu?

¹⁰ Hewisa enaʼö ibato si samösa ira matua ba wamöbözi mazui ba wangailasi foʼomonia ira alawe? Moguna iforege ba woloʼö amuata Yesu. Hewaʼae na lö irai mangowalu Yesu, tola tobali duma-duma ia khö woʼomo ira matua moroi ba wehede hegöi nifaluania khö ndra nifahaʼönia. (Ef. 5:25) Duma-dumania, nehegö hadia zi tobali famahaʼö khö woʼomo ira matua moroi ba lagu wahuhuosa Yesu hegöi nifaluania khö ndra sinengenia.

11. Hewisa Yesu khö ndra sinengenia?

¹¹ Lö irai ihangöi ndra sinengenia Yesu ba no ihaogö-haogö manö na muhede ia khöra ba si fao sumange. Hewaʼae na yaʼia andrö Soʼaya ba Sokhö yaʼira, lö omasi ia iʼogunaʼö kuaso nibeʼe khönia ba wametaʼu mazui ba wangailasi ira nifahaʼönia. Hizaʼi, si fao fangide-ngideʼö isasai gahe ndra nifahaʼönia. (Yoh. 13:​12-17) Imane khö ndra nifahaʼönia, ”Mifahaʼö ami khögu börö me no sebolo tödö ndraʼo ba si lö fayawa, ba misöndra wolombase.” (Mat. 11:​28-30) Iwaʼö ba ayati daʼö wa no sebolo tödö ia. Niha sebolo tödö, tenga niha si lö faʼabölö. Hizaʼi, so khönia waʼabölö ba wanaha tödö. Na so zangandrö fönunia, ihonogö manö ia ba ihöna khönia wanaha tödö.

12. Hewisa na fahuhuo Yesu ba niha böʼö?

¹² Iʼogunaʼö Yesu ngawua wehede si möi fangabölö ba famarou dödö niha böʼö. Lö ihangö-hangöi manö ndra nifahaʼönia. (Luk. 8:​47, 48) ”Lö isulöni” me latandrawaisi ia si faʼudu khönia ba me laʼandrö wönunia. (1 Fe. 2:​21-23) Itaria ilau zi lö hede-hede Yesu moroi na itema li si fao fönu. (Mat. 27:​12-14) Sindruhu-ndruhu wa no tobali ia duma-duma si sökhi khö woʼomo ira matua niha Keriso!

13. Hadia geluahania me iwaʼö Sura Niʼamoniʼö wa foʼomo ira matua ”lö aetu falemba dödönia khö ngambatönia”? (Mataiʼo 19:​4-6; faigi göi gambara.)

¹³ Iʼandrö Yesu khö woʼomo ira matua enaʼö lö faröi ira khö woʼomora ira alawe. Ifuli itötöi ngawua wehede Namania wa foʼomo ira matua ”lö aetu falemba dödönia khö ngambatönia”. (Baso Mataiʼo 19:​4-6.) Ba ayati daʼa, ngawua wehede li Yunani nifoʼeluaha tobali ”lö aetu falemba dödönia khö ngambatönia” eluahania ”fakitö”. Na simanö, fangowalu zi samösa ira matua faoma ira alawe tebai mufabali irege hulö nifakitö mazui nilem. Faoma afökhö na lafabali ira. Börö daʼö, ira matua sangomasiʼö foʼomonia ira alawe, lö omasi ia wamaigi-maigi pornografi. Iʼanemaiʼö ’iholeʼö hörönia faböi iʼila zi lö moguna’. (Si. 119:37) Amaedola no fawuʼu  li ia ba hörönia samösa wa lö ifaigi ndra alawe tanö böʼö si fao fangisö.—Yob. 31:1.

14. Na no iböbözi woʼomonia si samösa ira matua, hadia manö nifaluania enaʼö ifuli sökhi wahuwusania khö Yehowa hegöi khö woʼomonia?

¹⁴ So zi lö tola löʼö ifalua ira matua si no mamöbözi mazui si no mangailasi foʼomonia ira alawe enaʼö ifuli sökhi wahuwusania khö Yehowa hegöi khö ngambatönia. Si oföna, moguna aboto ba dödönia wa no ifalua horö sebua. Lö hadöi si tobini föna Yehowa. (Si. 44:21; Sango. 12:14; Heb. 4:13) Si dua, iböhöli ba wamöbözi foʼomonia ba ibulöʼö gamuatania. (Amd. 28:13) Si tölu, iʼandrö waʼebolo dödö khö woʼomonia hegöi khö Yehowa, ba iforege enaʼö laʼefaʼö zalania. (Hal. 3:19) Iʼandrö göi wanolo khö Yehowa enaʼö ibeʼe khönia waʼedöna ba fanolo ba wozago fehedenia, fangera-ngera, hegöi nifaluania. (Si. 51:​10-12; 2 Ko. 10:5; Fil. 2:13) Si öfa, ifaudugö nifaluania ba zi no iʼangandröi. Ifahaʼö ia enaʼö fatuwu ia ba ngawalö waʼalösökhi hegöi fehede sagafökhö. (Si. 97:10) Si lima, iʼanemaiʼö iʼandrö wanolo moroi khö ndra satua sokubaloi ba mbanua niha Keriso. (Yak. 5:​14-16) Si önö, ihenaigö iʼangeragö nifaluania enaʼö lö ifuli teʼala ia ba zala simane daʼö ba zi so miföna. Moguna göi iʼoʼö wanuturu lala simane daʼa foʼomo ira matua samaigi-maigi pornografi. Hasambalö ifahowuʼö Yehowa wamorege nifaluara. (Si. 37:5) Baero daʼö, moguna göi ifahaʼö ia foʼomo ira matua ba wamosumange foʼomonia, tenga ha iböhöli wamalua amuata si möi fangailasi woʼomonia. Hewisa lalania?

LALA BA WAMOSUMANGE FOʼOMO IRA ALAWE

15. Hewisa wangoromaʼö foʼomo ira matua waʼomasi khö woʼomonia?

¹⁵ Foromaʼö waʼomasi. So ösa ndra talifusöda ira matua sorasoi faʼomuso dödö ba wongambatöra, asese so nifaluara ero maʼökhö ba wangoromaʼö faʼomasira khö woʼomora. (1 Yo. 3:18) Tola ifalua daʼö foʼomo ira matua ba lala si öna-öna, duma-dumania igogohe danga woʼomonia mazui italagui. Tola göi ikirim SMS mazui chat, ösinia: ”Hadia no mangaʼö?” mazui ”Hewisa ndraʼugö?” Baero daʼö, tola göi isura  zura ero-ero inötö sangoromaʼö wa iʼomasiʼö sibai ngambatönia. Mazui iʼohe gö somasi woʼomonia na mangawuli ia ba nomo. Na ifalua daʼö, no iforomaʼö foʼomo ira matua wa ifosumange woʼomonia ba no iʼaroʼö wongambatöra.

16. Hana wa moguna isuno woʼomonia si samösa ira matua?

¹⁶ Foromaʼö wa tohude ia ba wamaigimö. Foʼomo ira matua samosumange foʼomonia, iforege enaʼö irasoi foʼomonia wa mufosumange ia. Sambua lalania yaʼia daʼö na lö olifu ia ba wangandrö saohagölö ba zi no ifalua foʼomonia ba wotuhini yaʼia. (Kol. 3:15) Na soroi ba dödö isuno woʼomonia, tatu irasoi foʼomo ira alawe andrö wa laʼomasiʼö ba lafosumange ia. Omuso dödönia ba isöndra waʼahono dödö.—Amd. 31:28.

17. Hewisa woʼomo ira matua wangoromaʼönia wa ifosumange woʼomonia?

¹⁷ Haogö gamuatamö ba fosumange ia. Foʼomo ira matua sangomasiʼö foʼomonia, ifosumange ba lö olifu ia wa no buala sebua böli moroi khö Yehowa woʼomonia andrö. (Amd. 18:22; 31:10) Daʼö zamarou tödönia enaʼö ihaogö gamuatania ba iʼameʼegö tödö sibai woʼomonia, farahu ba daʼö ba wamalua faʼorudu. Lö ifaso woʼomonia wamalua faʼorudu si möi fangailasi, si lö omasi ia ifalua mazui si möi fanegu-negu dödönia side-ide. f Iforege göi ba wondrorogö enaʼö lö taʼunö dödönia side-ide föna Yehowa.—Hal. 24:16.

18. Hadia zinangeania gangetula woʼomo ira matua? (Faigi göi kotak ” Öfa Lala ba Wamosumange Foʼomo Ira Alawe”.)

¹⁸ Yaʼami foʼomo ira matua, yafaduhu dödömi wa iʼila Yehowa ba iʼameʼegö tödö wamorege nifaluami ba wamosumange foʼomomi ba wehede hegöi ba gamuata. Mihalö gangetula ba wamosumange yaʼira. Böi mifalua gamuata si möi fangailasi woʼomomi, hizaʼi miforomaʼö khöra waʼahakhö dödö, mihaogö gamuatami, mifosumange ba miʼomasiʼö ira. Na mifalua daʼö, no miforomaʼö wa miʼomasiʼö ba mifosumange ira. Na mifosumange woʼomomi, no mirorogö gamakhaitami sabölö tohude, yaʼia daʼö fahuwusa khö Yehowa.—Si. 25:14.