1. Hadia zi tola manö lasofu ira awöda wohalöwö hegöi awöda sekola?

 HADIA nirasoimö na so nawöu wohalöwö mazui awöu sekola sanofu khömö sanandrösa ba nifaduhusimö tödö? Hadia moʼugu-ugu dödömö? Ato zorasoi simane daʼö. Moroi ba wanofu-nofura, tola taʼila hadia zi so ba wangera-ngerara mazui nifaduhusira tödö, irege aoha khöda ba wamatunö khöra turia somuso dödö. Itaria, manofu zi samösa niha börö me lö fao dödönia ba nifaduhusida tödö mazui börö me omasi ia fabuʼa-buʼa. Sasesenia lafalua daʼö börö me so duria si fasala nirongora sanandrösa ba nifaduhusida tödö. Tatu lö tokea ita na alua daʼö. (Hal. 28:22) Börö me ba ”ngaluo safuria” so ita, ato niha ”si lö fahasara dödö” ba ”safaito”.—2 Ti. 3:​1, 3.

2. Hana wa moguna so khöda gamuata falöʼalio mofönu?

² Te ömane tödöu, ’Na so niha somasi fabuʼa-buʼa sanandrösa ba nifaduhusigu tödö, hewisa enaʼö uhaogö-haogö manö wehedegu?’ Hadia zanolo yaʼugö? Yaʼia daʼö faʼebolo dödö. Lö alio mofönu niha sebolo tödö, hizaʼi so khönia wanaha tödö töra-töra na fawuka gera-erania mazui na so zangandrö fönunia. (Amd. 16:32) Tatu manö abua ba wondrorogö falöʼalio mofönu. Hewisa wondrouʼömö amuata andrö? Hewisa wangoromaʼöu wa lö alio mofönu ndraʼugö na latandrawaisi nifaduhusimö tödö? Na samösa satua ndraʼugö, hewisa wanolou iraonomö enaʼö lahaogö-haogö manö wehede hegöi nifaluara ba ginötö lafaduhuʼö wamatira? Datatutunö.

3. Na lö alio mofönu zi samösa niha, hadia daʼö geluahania wa lö khönia faʼabölö? (2 Timoteo 2:​24, 25)

³ Na lö alio mofönu zi samösa niha, tenga daʼö geluahania wa  lö khönia faʼabölö. Daʼö gamuata sanolo yaʼia ba wangoromaʼö faʼahono gera-era ba ginötö si basaki. Falöʼalio mofönu no sambua moroi ba ’mbua-bua geheha’. (Gal. 5:​22, 23) Ngawua wehede Yunani nifoʼeluaha tobali ”falöʼalio mofönu” asese muʼogunaʼö ia ba wanutunö kudo gatua si no mufauwu. Khalaigö atö kudo sabölö si no mufauwu. Eluahania lö alio fatifa mazui molawa ia. Hewaʼae no mauwu ia, lö tebulö waʼabölönia. Hewisa göi wondrouʼöda amuata falöʼalio mofönu ba lö tebulö abölö ita? Tebai taʼodaligö waʼabölöda samösa. Moguna taʼandrö geheha Lowalangi ba wanolo yaʼita enaʼö tola taʼokhögö gamuata si sökhi andrö. Ato zi no mofozu wamahaʼö yaʼia ba wangoromaʼö falöʼalio mofönu. Duma-dumania, ato ndra talifusöda sangoromaʼö wa lö alio mofönu ira na so zomasi fabuʼa-buʼa khöra. Daʼö zanolo niha böʼö ba wangokhögö fangera-ngera si sökhi sanandrösa khö ndra Samaduhuʼö Yehowa. (Baso 2 Timoteo 2:​24, 25.) Hewisa enaʼö tobali faʼabölömö gamuata andrö?

4. Hadia wamahaʼö nihalöda moroi khö Gizaʼaki sanandrösa ba gamuata falöʼalio mofönu?

⁴ Oya ayati ba Zura Niʼamoniʼö sanutunö hawaʼatohude gamuata falöʼalio mofönu. Datafaigi duma-duma Gizaʼaki. Me toröi ia ba mbanua Gerara si so ba Wilisiti, ira niha si falazi omo khönia safökhö tödö, laduhö mbaʼa nidanö nikhao ndra sawuyu namania. Moroi na itandro ba khönia, ihalö gangetula Izaʼaki ba wanawa nahia tanö böʼö. Iʼohe zoroi yomonia ba ifuli ikhao khönia mbaʼa si bohou ba daʼö. (1 Mo. 26:​12-18) Hizaʼi, lawaʼö zui ira niha Wilisiti wa khöra nasa nidanö si so ba nahia daʼö. Hewaʼae simanö, lö tebulö irorogö waʼatulö Izaʼaki. (1 Mo. 26:​19-25) Hadia zanolo yaʼia ba wangoromaʼö falöʼalio mofönu hewaʼae na so niha böʼö zanandrawaisi yaʼia? Tatu manö iʼoʼö duma-duma ndra satuania. Ifahaʼö ia ba nifalua Gaberahamo ba wondrorogö faʼatulö, hegöi ba ’waʼahono-hono ba fangide-ngideʼö’ niforomaʼö Zara.—1 Fe. 3:​4-6; 1 Mo. 21:​22-34.

5. Tutunö duma-duma sangoromaʼö hewisa zi samösa satua ba wanolo ononia ba wangoromaʼö amuata falöʼalio mofönu.

⁵ Yaʼami ira satua, yafaduhu dödömi wa tola mifahaʼö ndraonomi ba wangokhögö amuata falöʼalio mofönu. Datafaigi duma-duma Max b si 17 fakhe. Asese falukha ia ba niha sofönu-fönu, he ba zekola hegöi ba wanuriaigö. Hizaʼi, lahaogö latolo ia ira satuania enaʼö ihaogö-haogö na fahuhuo ia. Lamane, ”Aboto ba dödö Max wa moguna ihöna khönia wanaha tödö na so zanandrawaisi yaʼia, enaʼö lö mofönu-fönu ia mazui isulöni khöra zi lö sökhi.” Ba gafuriata, tobali faʼabölö khö Max gamuata andrö.

6. Hewisa wangandrö möi fanoloda ba wondrouʼö amuata falöʼalio mofönu?

⁶ Hadia nifaluada na so zanandrawaisi yaʼita, duma-dumania laböbögö zi lö duhu sanandrösa ba döi Lowalangi mazui laʼoʼaya Zura Niʼamoniʼö? Moguna taʼandrö geheha niʼamoniʼö hegöi faʼatua-tua moroi khö Yehowa enaʼö tola tahaogö-haogö manö ba wameʼe fanema li khöra. Hizaʼi, hewisa na ba gafuriata awena taʼila wa lö nihaogöda lida ba ginötö tatema lira? Moguna taʼohe ba wangandrö zalua andrö ba taʼangeragö hewisa enaʼö itugu sökhi wamaluada yaʼia ba ginötö tanö böʼö. Hasambalö ibeʼe khöda gehehania niʼamoniʼö Yehowa enaʼö tola tataha wönuda ba tahaogö wahuhuosa.

7. Hewisa ayati nitanöda ba dödöda tola möi fanoloda ba ginötö so zanandrawaisi yaʼita? (Amaedola 15:​1, 18)

⁷ Oya ayati ba Zura Niʼamoniʼö sanolo yaʼita ba ginötö abua khöda ba wohaogö-haogö fehededa na so zanandrawaisi yaʼita. Itolo ita eheha Lowalangi enaʼö itörö tödöda ngawalö ayati andrö. (Yoh. 14:26) Duma-dumania, goi-goi nisöndrada ba mbuku Gamaedola tola  tobali fanoloda enaʼö lö alio mofönu. (Baso Gamaedola 15:​1, 18.) Ifatunö göi khöda hadia mbuania na taforomaʼö wanaha tödö na so zanandrawaisi yaʼita.—Amd. 10:19; 17:27; 21:23; 25:15.

8. Hana wa moguna taʼangeragö hadia mbörö wa manofu zi samösa niha sanandrösa ba nifaduhusida tödö?

⁸ Tola göi tobali fanolo khöda waʼaboto ba dödö. (Amd. 19:11) Niha si so faʼaboto ba dödö, tola iforomaʼö wanaha tödö na so zanandrawaisi famatinia. Itaria, na manofu zi samösa niha khöda, sasesenia lö lafatunö khöda hadia mbörö wa labeʼe wanofu andrö. Börö daʼö, fatua lö tabeʼe wanema li, abölö sökhi na tatörö tödöda wa lö aboto sibai ba dödöda hadia gohitö dödöra.—Amd. 16:23.

9. Hewisa Gideono ba wangoromaʼö faʼaboto ba dödö hegöi falöʼalio mofönu?

⁹ Angeragö hewisa Gideono ba wameʼe fanema li khö ndra niha Geferai. Mofönu ira me lasofu hadia mbörö wa lö ifaogö ira Gideono ba wamobörö me lalawa nudu ndraono Gizaraʼeli. Hizaʼi, sindruhunia hadia sibai mbörö wa mofönu ira? Tola manö börö waʼabao dödöra. Gofu hadia mbörönia, iforomaʼö waʼaboto ba dödö Gideono. Iʼameʼegö tödö hadia nirasoira ba ihaogö wameʼe khöra fanema li. Hadia  mbuania? Imane Sura Niʼamoniʼö, ”Me iwaʼö wehede daʼö, alö saʼae wönura.”—Sangu. 8:​1-3.

10. Hadia zanolo yaʼita ba wameʼe fanema li na so zanofu hadia nifaduhusida tödö? (1 Fetero 3:15)

¹⁰ Tola manö so nawöda wohalöwö mazui awöda sekola zanofu khöda hadia mbörö wa taʼoʼö goi-goi Zura Niʼamoniʼö sanandrösa ba gamuata. Tatu taforege ba wamalua sabölö sökhi ba wamaduhuʼö famatida, hizaʼi taʼameʼegö tödö göi hadia mbua gera-erara. (Baso 1 Fetero 3:15.) Daʼö zanolo yaʼita ba wangosambuaʼö tödöda ba zadöni dödöra, tenga ba mbua gera-erara sambö tefaudu. Gofu hadia mbörö wa ibeʼe wanofu andrö si samösa niha, moguna sökhi ba tahaogö wameʼe khönia fanema li. Fanema li nibeʼeda tola manö möi fanolonia ba wombulöʼö lala wangera-ngerania sanandrösa ba nifaduhusida tödö. Hewaʼae lö baga gamuatania khöda, böi tebulö tahaogö tabeʼe wanema li.—Rom. 12:17.

11-12. (a) Hadia zinangea taʼangeragö fatua lö tabeʼe wanema li ba zi sambua fanofu? (Faigi göi gambara.) (b) Beʼe duma-duma hewisa wameʼeda fanema li na so zanofu tuho si fatuwu ba niha.

¹¹ Duma-dumania, na manofu nawöda wohalöwö hadia mbörö wa lö taʼowasaini mbaŵa waʼatumbu, angeragö wanofu-nofu daʼa: Hadia imane tödönia wa tebai taʼomuso-musoiʼö dödöda? Mazui so ba wangera-ngerania wa no tafakiko wahasara dödö ba nahia wohalöwö? Si oföna, moguna tasuno ia börö me iʼameʼegö tödö niha böʼö. Aefa daʼö, tawaʼö göi khönia wa omasi ita ba wondrorogö fahasara dödö ba nahia wohalöwö. Tola taʼogunaʼö ginötö daʼö ba wanutunö khönia hadia niwaʼö Zura Niʼamoniʼö sanandrösa ba ngaluo waʼatumbu, hizaʼi böi hulö zi fabuʼa-buʼa ita khönia.

¹² Tola göi tafalua lala simane daʼö na so zanofu khöda tuho tanö böʼö si fatuwu ba niha. Duma-dumania, na so nawöda sekola zangumaʼö wa moguna labulöʼö lala wangera-ngerara ira Samaduhuʼö Yehowa sanandrösa ba homoseks, mazui faʼorudu ndra matua ba ndra matua hegöi ira alawe ba ndra alawe. Hadia sindruhunia lö aboto sibai ba dödönia nifaduhusi tödö ndra Samaduhuʼö Yehowa? Hadia so nawönia mazui ösi nomonia samalua homoseks? Hadia iwaʼö tödönia wa fatuwu ita ba niha simane daʼö? Moguna taʼalui lala enaʼö faduhu dödönia wa taʼameʼegö tödö fefu niha ba tafosumange gangetula nihalöra. c (1 Fe. 2:17) Aefa daʼö, tafatunö khönia hadia goi-goi Zura Niʼamoniʼö sanandrösa ba gamuata ba hadia gunania na ifalua daʼö.

13. Hadia nifaluada na so zangoʼaya yaʼita börö me faduhu dödöda wa so Lowalangi?

¹³ Na lö fatema ba dödö zi samösa niha hadia nifaduhusida tödö, böi tawaʼö tödöda wa no taʼila hadia nifaduhusinia tödö. (Tit. 3:2) Duma-dumania, na so nawöda sekola sangoʼaya yaʼita börö me faduhu dödöda wa so Lowalangi, hadia daʼö geluahania wa faduhu sibai dödönia ba teori evolusi ba ahori iʼila sanandrösa ba daʼö? Lö tatu. Tola manö, lö irai ihaogö woʼangeragö daʼö. Moroi na fabuʼa-buʼa ita khönia sanandrösa ba evolusi, abölö sökhi na tabeʼe khönia wanuturu lala si tola iʼangeragö. Tola öfarou dödönia ba wamaigi artikel mazui video si so ba jw.org soʼamakhaita ba womböwöi. Tola manö adöni dödönia ba wanutunö sambua artikel mazui video si so ba daʼö. Na taʼameʼegö tödö mbua gera-erara, tola manö terou dödöra ba wamahaʼö yaʼira ba Zura Niʼamoniʼö.

14. Hewisa Niall wangogunaʼö situs web khöda ba wangatulöʼö lala wangera-ngera nawönia sekola sanandrösa khö ndra Samaduhuʼö Yehowa?

¹⁴ Samösa zi bohou ebua sotöi Niall, iʼogunaʼö situs web khöda ba wangatulöʼö lala wangera-ngera niha sanandrösa khö ndra  Samaduhuʼö Yehowa. Imane wanutunö, ”Asese lawaʼö ira awögu sekola wa abölö ufaduhusi tödö mbuku ’manö-manö’ moroi ba ilmu pengetahuan.” Iforege Niall ba wanutunö hadia nifaduhusinia tödö, hizaʼi lö lafondrondrongo ira awönia. Börö daʼö, ifatunö khöra jw.org sanandrösa ba faosatö ”Sains dan Alkitab”. Te no ibaso nitutunö ba faosatö daʼö awönia irege me ifuli falukha ira fao dödö nawönia andrö me latutunö hewisa mböröta waʼauri andre. Na öforege göi wamalua simane daʼö, hasambalö ötema mbua si sökhi.

15. Hewisa zatua wamahaʼö iraonora ba wameʼe fanema li na so zanofu khöra ba zekola sanandrösa ba nifaduhusira tödö?

¹⁵ Tola lafahaʼö ndraonora ira satua ba wangogunaʼö fehede si sökhi ba wameʼe fanema li na so zanofu khöra sanandrösa ba nifaduhusira tödö. (Yak. 3:13) So ösa zatua samahaʼö iraonora ba lafalua wamadumaisi ba wamahaʼö zi sambua omo. Latutunö duho si tola manö lasofu-sofu khöra ba zekola, hewisa wameʼe fanema li, ba lafahaʼö ndraonora hewisa lala wahuhuosa si sökhi ba enaʼö ohahau dödö zamondrongo.—Faigi kotak, ” Moguna Wamadumaisi ba Nösi Nomou”.

16-17. Hadia gunania khö ndra si bohou ebua na mufalua wamadumaisi?

¹⁶ Na mufalua wamadumaisi, daʼö zanolo ira si bohou ebua enaʼö faduhu dödöra wa atulö nifaduhusira tödö ba laʼila latutunö daʼö ba niha böʼö. Ba faosatö ”Pertanyaan Anak Muda” ba jw.org, so lembar kegiatan untuk kaum muda. Muhenaigö daʼö enaʼö itugu aro waʼafaduhu dödö ndra si bohou ebua ba nifaduhusira tödö ba tola lafaʼanö wanema li moloʼö fehedera samösa. Na fao ita ba nösi nomoda ba wanutunö faosatö andrö, tola tafahaʼö ita ba wangoʼawögö famatida ba lala si sökhi ba tahaogö wameʼe fanema li.

 ¹⁷ Samösa nono matua si bohou ebua sotöi Matthew, itutunö hadia mbua nitemania me lafalua wamadumaisi ba wamahaʼö zi sambua omo. Matthew hegöi ira satuania asese lafalua riset ba duho-tuho sasese lasofu-sofu ira awönia ba zekola. Imane, ”Maʼangeragö hadia manö wanofu si tola labeʼe, ba mafahaʼö ndraʼaga hewisa wameʼe fanema li, tefaudu moloʼö si no ma-riset. Me aboto ba dödögu wa atulö zi no ufaduhusi tödö, lö alawö ndraʼo ba aoha khögu wameʼe fanema li na so niha böʼö sanofu nifaduhusigu tödö.”

18. Hadia wamahaʼö nihalöda ba Kolose 4:6?

¹⁸ Hewaʼae no taforege wameʼe fanema li si tefaudu ba si fao faʼafaduhu dödö, lö dozi niha omasi ira lafondrondrongo. Hizaʼi, böi tebulö tarorogö walöʼalio mofönu ba faʼatua-tua. (Baso Kolose 4:6.) Ba ginötö tadunö-dunö hadia nifaduhusida tödö, tola muʼamaedolagö daʼö simane samazaumba bola. Tahaogö-haogö wamazaumba tenga saʼoi dölada, enaʼö tola itema bola daʼö awöda ba tola tatohugö fabola. Simane daʼö göi na tahaogö-haogö wameʼe fanema li si fao faʼatua-tua, abölö adöni dödö niha wamondrongo ba omasi ira na tatohugö wahuhuosa. Tatu manö, lö omasi ita tatohugö wahuhuosa ba niha si fabuʼa-buʼa mazui sangoʼaya nifaduhusida tödö. (Amd. 26:4) Hizaʼi, lö fefu niha simane daʼö. Ato nasa niha somasi mamondrondrongo.

19. Hana wa moguna tahaogö wahuhuosa ba ginötö tatutunö nifaduhusida tödö?

¹⁹ Sindruhu sa, oya mbuania na taforege wangoromaʼö amuata falöʼalio mofönu. Börö daʼö, angandrö khö Yehowa enaʼö lö tebulö öhaogö-haogö wameʼe fanema li ba niha sanofu mazui sanandrawaisi nifaduhusimö tödö. Törö tödöu, na lö alio mofönu ita, lö alua wabuʼa-buʼasa. Ba na tahaogö-haogö wameʼe fanema li si fao famosumange, tola terou dödö niha ba wombulöʼö fangera-ngerara sanandrösa khöda hegöi sindruhu moroi ba Zura Niʼamoniʼö. Börö daʼö, ’böi mamalö-malö tafaʼanö ita ba wameʼe fanema li’ ba ’tahaogö wameʼe fanema li si fao sumange’. (1 Fe. 3:15) Yalötebulö taʼokhögö gamuata falöʼalio mofönu sangabölöʼö yaʼita!