1. Ba gafuriata waʼauri zinenge sotöi Fetero, hadia halöwö nitemania?

 LÖ FARÖI zinenge sotöi Fetero ba wangai halöwö sagötö zi ngafulu fakhe. Fao ia mangai halöwö khö Yesu, ibörögö wanuriaigö ba soi böʼö, ba tobali ia samösa boto solohe. Hizaʼi, ba gafuriata waʼaurinia, ibeʼe khönia halöwö tanö böʼö Yehowa. Te me döfi 62-64 M, iʼogunaʼö ia Yehowa ba wanura si dombua sura, yaʼia daʼö sura 1 Fetero hegöi 2 Fetero si so ba Zura Niʼamoniʼö. Itötöna Fetero enaʼö latema mbua ira niha Keriso moroi ba zurania andrö me no aefa mate ia.—2 Fe. 1:​12-15.

2. Hana wa tefaudu sibai zura Wetero andrö ba niha Keriso me luo daʼö?

² Me isura Fetero zurania, oya ”ngawalö wamakao” si göna khö ndra talifusönia si sara lala wamati. (1 Fe. 1:6) So niha samorege wanaʼunöisi banua niha Keriso faoma famahaʼö faya hegöi amuata si raʼiö. (2 Fe. 2:​1, 2, 14) Baero daʼö, niha Keriso si toröi ba Yeruzalema me luo daʼö, lataögö ”gamozua fefu hadia ia”, yaʼia daʼö faʼadudu mbanua Yeruzalema hegöi osalinia börö me tohare zaradadu romawi ba wanuwö yaʼira. (1 Fe. 4:7) Na labaso zurania andrö ira niha Keriso, tola laʼila hadia zinangea lafalua enaʼö anau gölöra ba tefaʼanö ira ba wanaögö fanandraigö si lö ara tö alua. b

3. Hana wa moguna tafahaʼö ita ba zura Wetero si dombua?

³ Sindruhu sa, mufanandrösa zura Wetero andre khö ndra  niha Keriso me abad siföföna. Hizaʼi, itatugöi Yehowa enaʼö tobali faosatö ba Daromalinia zura andre irege tola tatema mbuania iadaʼa. (Rom. 15:4) No tefasui ita niha si lö sökhi amuata, ba daʼö mbörö wa abua khöda wamosumange Yehowa. Baero daʼö, ba zi lö ara tö, alua göi khöda wamakao sabölö abua moroi ba zalua khö ndra niha Yahudi me tedudugö mbanua Yeruzalema hegöi osalinia. Börö daʼö, famasugi ba dödö si tohude si so ba zi dombua sura Wetero, daʼö zanolo yaʼita enaʼö lö taʼolifugö ngaluo Yehowa, tola talawa waʼataʼuda ba niha ba faoma taʼomasiʼö nawöda soroi ba dödö. Famasugi ba dödö göi andre zanolo ira satua sokubaloi enaʼö laʼila hewisa lala ba wokubaloira ira talifusö.

4. Simane niwaʼönia ba 2 Fetero 3:​3, 4, hadia manö zangaʼasogö khöda faʼaombö dödö?

⁴ Ba zi fasuida, ato sibai niha si lö faduhu tödö ba wamaʼeleʼö si so ba Zura Niʼamoniʼö. Te laʼoʼaya ita börö me no ngafulu fakhe tadöna-döna gamozua gulidanö andre. So ösa ba gotaluara zangumaʼö wa lö tohare ngaluo andrö. (Baso 2 Fetero 3:​3, 4.) Na tarongo wehede simane daʼö moroi ba nösi nomoda, awöda wohalöwö mazui niha si falukha khöda ba wanuriaigö, tola awuwu wamatida. Hizaʼi, itutunö khöda Fetero hadia manö zi tola manolo yaʼita.

5. Hadia zinangea tatörö tödö na tadöna-döna waʼalua nifabuʼu Yehowa? (2 Fetero 3:​8, 9)

⁵ So ösa niha sangumaʼö wa iradö-radö Yehowa ba wangohori ulidanö si lö sökhi andre. Fehede Wetero zamasugi ba dödöda wa lala wamaigi Yehowa inötö faböʼö moroi ba lala wamaigi niha. (Baso 2 Fetero 3:​8, 9.) Khö Yehowa, si saribu fakhe fagölö ira zi sahari. So waʼebolo dödö khö Yehowa ba lö omasi ia na so niha nihori. Hizaʼi, na tohare dania ngaluo Yehowa, hasambalö ihori gulidanö si lö sökhi andre. Fatua lö alua daʼö, omasi ita taʼogunaʼö ginötö si toröi andre ba wanuriaigö ba niha fefu.

6. Hewisa enaʼö ’böi taya ba wangera-ngerada’ ngaluo Yehowa? (2 Fetero 3:​11, 12)

⁶ Iʼamenesi ita Fetero enaʼö ’böi taya ba wangera-ngerada’ ngaluo Yehowa. (Baso 2 Fetero 3:​11, 12.) Hewisa lalania? Ero maʼökhö, angerönusi howu-howu nitemamö dania ba gulidanö si bohou. Khalaigö wa tola dania öhofo nangi si sökhi, öʼa gö sami ba si sökhi, ötemaʼö nösi nomou hegöi si fahuwu khöu si no tesusugi, ba öfahaʼö niha sauri ba götö föna sanandrösa ba waʼalua wamaʼeleʼö si so ba Zura Niʼamoniʼö. Foʼangerönusi simane daʼö zanolo yaʼugö enaʼö lö öʼolifugö ngaluo Yehowa ba faduhu dödöu wa sindruhu-ndruhu no so ita ba ngaluo safuria. Börö me no ’tohöna taʼila’ sanandrösa ba dötönaföda ba zi so miföna, lö saʼae tefaelungu ita khö ndra samahaʼö sofaya.—2 Fe. 3:17.

7. Na ataʼu ita ba niha, hadia zataʼu ita tafalua?

⁷ Börö me taʼila wa no ahatö ngaluo Yehowa, tefarou dödöda ba wanuriaigö turia somuso dödö ba niha böʼö. Hizaʼi, itaria ataʼu ita wamalua daʼö. Hadia mbörö? Tola manö aombö dödöda ba lala wanemaʼö niha turia nifaʼemada. Daʼö zalua khö Wetero. Ba mbongi me muʼetuʼö hukuma Yesu, lö barani Wetero ba wamaduhuʼö wa yaʼia andrö soloʼö khö Yesu ba mato hauga kali iʼosilöʼögö Yesu. (Mat. 26:​69-75) Hizaʼi ba gafuriata, si fao faʼafaduhu dödö imane Fetero, ”Böi miʼataʼufi na so zataʼu niha ba böi aombö dödömi.” (1 Fe. 3:14) Fehede Wetero andrö zamaduhuʼö ba dödöda wa tola talawa waʼataʼuda ba niha.

8. Hewisa wolawada faʼataʼu ba niha? (1 Fetero 3:15)

⁸ Hewisa wolawada faʼataʼu ba niha? Imane  Fetero, ”Mifaduhuʼö ba dödömi wa Keriso andrö Soʼaya.” (Baso 1 Fetero 3:15.) Eluahania, moguna taʼangerönusi dadaoma hegöi kuaso niʼokhögö Razo hegöi Soʼaya yaʼita Keriso Yesu. Na ataʼu ndraʼugö ba wamalua fanuriaigö, törö tödöu Razoda. Khalaigö wa mamatörö ia ba zorugo ba ato sibai malaʼika si no mamasui yaʼia. ’No tebeʼe khönia waʼabölö ba zorugo hegöi ba gulidanö, ba fao ia khöda irugi gamozua götö daʼa’. (Mat. 28:​18-20) Ifarou göi ita Fetero enaʼö lö tebulö tafaʼanö ita ba wamaduhuʼö famatida. Hadia omasiʼö öbeʼe kesaksian tidak resmi ba zekola, nahia wohalöwö mazui ba nahia böʼö? Angeragö hawaʼara tola öfalua daʼö, ba faʼanö wehedemö. Andrö waʼabarani khö Yehowa ba faduhusi tödö wa hasambalö itoloʼö Yehowa ba wolawa faʼataʼu ba niha.—Hal. 4:29.

9. Hadia zalua irege lö mofozu Wetero ba wangoromaʼö faʼomasi? (Faigi göi gambara.)

⁹ No ifahaʼö ia Fetero ba wangomasiʼö ira talifusönia. No irongo me imane Yesu, ”Ubeʼe khömi goroisa si bohou: Faoma miʼomasiʼö nawömi. Simane fangomasiʼögu yaʼami, yasimanö göi wangomasiʼömi awömi.” (Yoh. 13:34) Hewaʼae simanö, no irai lö omasi Wetero fao manga khö ndra talifusönia moroi ba soi böʼö börö me ataʼu ia ba niha Keriso Yahudi. Iwaʼö sinenge sotöi Faulo wa nifalua Wetero andrö zangoromaʼö wa so khönia ”wamini  tödö” mazui famodombua tödö. (Gal. 2:​11-14) Omasi Wetero wanemaʼö degu-tegu moroi khö Waulo ba ifahaʼö ia ba zala si no ifalua. Ba zi dombua surania, itandrösaigö wa moguna taforomaʼö waʼomasida khö ndra talifusöda, tenga ha ba wehede manö.

10. Hewisa enaʼö taʼokhögö ’waʼomasi ba waʼafatalifusöta si lö famini tödö’? (1 Fetero 1:22)

¹⁰ Iwaʼö Fetero wa moguna taʼokhögö ”waʼomasi ba waʼafatalifusöta si lö famini tödö” khö ndra talifusöda si sara lala wamati. (Baso 1 Fetero 1:22.) Tola taʼokhögö waʼomasi simane daʼö na ’taʼoʼö zindruhu’. Sambua zindruhu andrö yaʼia daʼö famahaʼö wa ”lö ifaigi mbawa niha Lowalangi”. (Hal. 10:​34, 35) Lö nifaluada oroisa Yesu sanandrösa ba waʼomasi na tafili-fili niha niʼomasiʼöda ba mbanua niha Keriso. Sindruhu sa, so ösa ndra talifusöda sabölö ahatö khöda, simane salua khö Yesu mböröta. (Yoh. 13:23; 20:2) Hizaʼi, ifasugi ba dödöda Fetero wa moguna taʼokhögö ”waʼomasi ba waʼafatalifusöta”, eluahania moguna taʼomasiʼö fefu ndra talifusöda simane ösi nomoda samösa.—1 Fe. 2:17.

11. Hadia geluahania taʼomasiʼö niha böʼö ”soroi ba dödö”?

¹¹ Ifasugi ba dödöda Fetero enaʼö ’faoma taʼomasiʼö nawöda soroi ba dödö’. Ba ayati daʼa, ’mangomasiʼö soroi ba dödö’ eluahania taforege ba wangomasiʼö si samösa niha hewaʼae sindruhunia abua wangomasiʼö yaʼia. Duma-dumania, na so niha sangafökhöiʼö tödöda mazui tetutu dödöda ba nifaluania, si tumbu ba dödöda si oföna sibai te omasi ita tasulöni nifaluania andrö, tenga ba wangoromaʼö faʼomasi. Hizaʼi, ifahaʼö ia Fetero moroi khö Yesu wa lö omasi Lowalangi na tasulöni zi lö sökhi. (Yoh. 18:​10, 11) Imane Fetero, ”Böi misulöni zi lö sökhi awönia si lö sökhi, mazui fangoʼaya awönia fangoʼaya. Hizaʼi, sulöni faoma fangandrö howu-howu.” (1 Fe. 3:9) Na öʼokhögö waʼomasi soroi ba dödö, daʼö zanolo yaʼugö enaʼö abölö öʼokhögö waʼasökhi dödö hegöi foʼameʼegö tödö, mendrua manö ba niha sangafökhöiʼö tödömö.

12. (a) Hadia nifaluada na taʼomasiʼö niha böʼö soroi ba dödö? (b) Me no aefa öfaigi video Rorogö Wahasara Dödö Sebua Böli Niʼokhögöda, hadia zinangea öfalua?

¹² Ba zurania siföföna, iwaʼö göi Fetero wa faʼomasi soroi ba dödö andrö zanolo yaʼita ba wangefaʼö sala niha böʼö. (1 Fe. 4:8) Te itörö tödö Wetero ba wamahaʼö nibeʼe Yesu khönia ba zi hauga fakhe silalö sanandrösa ba wangefaʼö sala. Me luo daʼö, iwaʼö tödönia Fetero wa no si sökhi sibai ia börö me omasi ia wangefaʼö sala dalifusönia irugi fitu kali. Hizaʼi ifahaʼö Wetero andrö Yesu hegöi yaʼita ba wangefaʼö sala irugi 77 kali, eluahania lö ola wamaluada daʼö. (Mat. 18:​21, 22) Na abua khömö ba woloʼö mene-mene andre, böi ide-ide dödömö. Fefu nono mbanua Yehowa si lö moʼahonoa, itaria göi abua khöra ba wangefaʼö sala. Sabölö moguna, no öforege iadaʼa ba wangalui lala enaʼö tola öʼefaʼö zala dalifusöu si sara lala wamati ba öʼatulöʼö gamakhaitami. c

13. Hana wa itaria abua khö ndra satua sokubaloi ba wokubaloi ira talifusöra?

¹³ Me no aefa tesusugi Yesu, imane khö Wetero, ”Kubaloi nono mbiri-birigu”. Tatu lö irai iʼolifugö Fetero wehede daʼa. (Yoh. 21:16) Na samösa satua sokubaloi ndraʼugö, tatu öʼila wa moguna göi öfalua goroisa andrö. Hizaʼi, tola manö abua khö zi samösa satua sokubaloi wameʼe inötö ba wamalua halöwö si tohude andre. Ero samösa satua sokubaloi, moguna iʼofönaiʼö wangalui soguna ba nösi nomonia, iʼalui lala enaʼö larasoi waʼomasi ba itolo ira ba wamati. Tobali göi ira duma-duma  ba wamalua halöwö fanuriaigö, ba wamaʼanö hegöi ba wamaʼema faosatö ba gangowuloa ero migu, ba gangowuloa sebua ba zi sambua wilayah hegöi regional. So ösa göi zi tobali Panitia Penghubung Rumah Sakit mazui ba Departemen Rancang Bangun Setempat. Ba daʼa taʼila wa oya sibai halöwö nifalua ndra satua sokubaloi.

14. Hana wa omasi ndra satua sokubaloi ba wokubaloi biri-biri Lowalangi, ba hadia zanolo yaʼira? (1 Fetero 5:​1-4)

¹⁴ Ibeʼe göi mene-mene Fetero khö ndra awönia satua sokubaloi, ”Mikubaloi mbiri-biri Lowalangi.” (Baso 1 Fetero 5:​1-4.) Na satua sokubaloi ndraʼugö, tatu öʼomasiʼö sibai ndra talifusö si sara lala wamati ba omasiʼö ökubaloi ira. Hizaʼi, itaria örasoi wa talafo oya halöwömö mazui marase sibai ndraʼugö irege tebai öfalua halöwö andrö. Hadia zanolo yaʼugö? Tutunö nirasoimö khö Yehowa. Imane Fetero, ”Na mitolo niha böʼö, miʼodaligö waʼabölö Lowalangi.” (1 Fe. 4:11) Te so ösa gabula dödö nitaögö ndra talifusömö si sara lala wamati si tebai muʼasiwai fatua lö tohare gulidanö si bohou. Börö daʼö, te ömane tödöu wa lö oya zi tola öfalua ba wanolo yaʼira. Hizaʼi, törö tödöu wa ”kubalo sebua” yaʼia daʼö Yesu Keriso, tola itolo ira iadaʼa hegöi ba gulidanö si bohou dania. Niʼandrö Yehowa khömi yaʼami ira satua sokubaloi yaʼia daʼö enaʼö miʼomasiʼö ira, mikubaloi ba tobali ami duma-duma khöra.

15. Hadia nifalua William ba wokubaloi ira talifusönia? (Faigi göi gambara.)

¹⁵ Samösa dalifusöda si no ara tobali satua sokubaloi sotöi William, aboto ba dödönia wa moguna sibai mukubaloi ndra talifusöda. Me awena so COVID-19, yaʼia hegöi ira satua sokubaloi tanö böʼö, ero migu laforege ba wotelefo fefu ndra talifusö si so ba kelompok-ra. Hadia mbörö? Imane, ”Ato ba gotalua ndra talifusöda ha yaʼi-yaʼira ba nomo irege aoha sibai ihawui ira fangera-ngera si lö sökhi.” Ba ginötö so ndra talifusö si sara lala wamati sanaögö abula dödö, ihaogö ifondrondrongo William hadia nitutunöra enaʼö iʼila hadia niʼaombösira tödö hegöi soguna khöra. Iʼalui göi hadia zi tola manolo niha daʼö, simane video si so ba situs web khöda. Imane William, ”Moguna sibai takubaloi ndra talifusöda, ba abölö moguna nasa daʼö iadaʼa töra moroi ba zilalö. Moguna taforege wanolo niha enaʼö lafahaʼö ira sanandrösa khö  Yehowa, hizaʼi moguna göi taforege ba wokubaloi ngawawa mbiri-biri Yehowa enaʼö lö tebulö ira ba zindruhu.”

16. Hadia nifaluada ba woloʼö famahaʼö nitemada moroi ba zura Wetero?

¹⁶ No tatutunö ösa wamahaʼö nihalöda moroi ba zi dombua sura Wetero si so ba Zura Niʼamoniʼö. Te awena aboto ba dödöu wa so zinangea ödouʼö nasa. Duma-dumania, hadia omasiʼö abölö asese öʼangerönusi howu-howu nitemau dania ba gulidanö si bohou? Hadia omasiʼö öforege ba wameʼe famaduhuʼö si lö resmi ba zekola, ba nahiau wohalöwö, mazui ba nahia böʼö? Hadia no öʼila lala tanö böʼö si tola öfalua ba wangoromaʼö faʼomasi khö ndra talifusö si sara lala wamati soroi ba dödö? Yaʼami ira satua sokubaloi, hadia no miʼosambuaʼö dödömi ba wokubaloi biri-biri Yehowa si fao faʼaoha gölö ba faʼamohiʼa dödö? Ba ginötö öhaogö öfareso dödömö, te öʼila göi wa so zinangea öbulöʼö. Hizaʼi, böi ide-ide dödömö. No ’si sökhi tödö Zoʼaya [Yesu]’ ba omasi ia itolo ndraʼugö ba wamalua fombulöʼö. (1 Fe. 2:3) Ifaduhuʼö khöda Fetero, ’Lowalangi andrö hasambalö iʼasiwai wamahaʼö yaʼami, iʼabölöʼö, iʼabeʼeʼö, ba iʼaroʼö ami.’—1 Fe. 5:10.

17. Hadia mbuania na lö awuwu ita ba tatemaʼö wamomaha nibeʼe Yehowa?

¹⁷ No irai tumbu ba dödö Wetero wa tenga sinangea so ia ba ngai Nono Lowalangi. (Luk. 5:8) Hizaʼi, börö wanolo si fao faʼomasi moroi khö Yehowa hegöi Yesu, tola tobali ia soloʼö khö Keriso si lö faröi. Buania, ’tefaʼamöi ia ba Wamatörö si lö tebulö khö Zoʼaya yaʼita Yesu Keriso ba Sangorifi yaʼita’. (2 Fe. 1:11) No howu-howu sahöli-höli dödö daʼö. Simane Fetero, na lö awuwu ndraʼugö ba ötemaʼö wamomaha moroi khö Yehowa, hasambalö ösöndra waʼauri si lö aetu. ’Famatimö andrö zangorifi yaʼugö.’—1 Fe. 1:9.