1. Hewisa dödö Wetero me no itolo ia Yesu ba wondraʼu iʼa soya sibai?

 NO IHORIGÖ ginötönia Fetero weʼamöi fagai ba zi sara wongi faʼara, hizaʼi sara lö isöndra. Ba zi lö mudöna-döna imane khönia Yesu, ”Ohe dundraha daʼa ba zabakha, ba daʼö mibeʼe tou ndrialami.” (Luk. 5:4) Lö faduhu dödö Wetero hadia ahulö dania ia ba daʼö, hizaʼi, ifalua manö wanuturu lala andrö. Ibörögö asika ndrialara börö waʼoya zahulu ira. Ahöli-höli dödö Wetero hegöi ira si fao khönia ba aboto ba dödöra wa tandra sahöli-höli dödö daʼa. Imane Fetero, ”Böi fahatö ndraʼugö khögu Soʼaya, börö me niha sebua horö ndraʼo.” (Luk. 5:​6-9) Iwaʼö tödönia Fetero wa tenga sinangea fao ia khö Yesu.

2. Hana wa möi fanoloda duma-duma Wetero?

² Atulö niwaʼö Wetero wa yaʼia andrö ”niha sebua horö”. Ifatunö khöda Sura Niʼamoniʼö wa itaria maniasa ia börö wehede hegöi nifaluania. Hadia itaria göi örasoi zimane daʼö? Hadia so gamuata mazui falömoʼahonoa si no ara omasi ndraʼugö öbulöʼö? Na simanö, tatu möi fondrara dödömö duma-duma Wetero. Hana wa tawaʼö zimanö? Angeragö atö: Tola manö lö itehegö Yehowa na musura ba Zura Niʼamoniʼö fefu zala si no irai ifalua Fetero. Hizaʼi, enaʼö so wamahaʼö nihalöda moroi ba zi no irai alua khönia, itehegö Yehowa enaʼö mufaʼanö daʼö ba  Zura Niʼamoniʼö. (2 Ti. 3:​16, 17) Tola tafahaʼö ita khö Wetero hewaʼae lö moʼahonoa ia simane yaʼita. Aboto ba dödöda wa lö itötöna Yehowa enaʼö moʼahonoa fefu nifaluada. Omasi ia na lö awuwu ita, hewaʼae na so zoʼamböta ita.

3. Hana wa tebai awuwu ita?

³ Hana wa tebai awuwu ita? Si toʼölönia, itugu monönö waʼatua-tuada ba wamalua gofu hadia ia na lö taböhöli wamalua daʼö. Duma-dumania: Na omasi zi samösa niha enaʼö onekhe ia wangogunaʼö alat musik, te moguna ifahaʼö ia ba zi hauga fakhe. Sagötö ifahaʼö ia, tatu asese fasala ia. Hizaʼi, börö me lö iböhöli wamalua daʼö, itugu monönö waʼonekhenia. Hewaʼae sindruhu-ndruhu no onekhe ia ba wangogunaʼö alat musik, hasambalö fasala ia fasasakali ba wangogunaʼö daʼö. Hizaʼi, lö awuwu ia. Lö ibato ba wamahaʼö yaʼia irege tedou waʼonekhenia. Simane daʼö göi ita, hewaʼae na tawaʼö tödöda wa no mofozu ita ba wolawa falömoʼahonoa, itaria manö tafuli zui tafalua zala. Börö daʼö, böi awuwu ita. Tola manö, maniasa ita ba wehede hegöi nifaluada. Hizaʼi, na lö awuwu ita, hasambalö itolo ita Yehowa enaʼö itugu sökhi nifaluada. (1 Fe. 5:10) Iadaʼa, datatutunö duma-duma Wetero si lö faʼawuwu. Faʼasökhi dödö niforomaʼö Yesu khö Wetero hewaʼae asese ifalua zala, daʼö zamarou tödöda enaʼö lö taböhöli wamosumange Yehowa.

4. Hadia niwaʼö Wetero sanandrösa khönia simane nisura ba Luka 5:​5-10, hizaʼi hadia nifaduhuʼö Yesu khönia?

⁴ Lö itutunö Sura Niʼamoniʼö hadia mbörö wa iwaʼö Fetero ”niha sebua horö” ia, mazui hadia horö andrö moloʼö fangera-ngerania. (Baso Luka 5:​5-10.) Te so horö sebua nifalua Wetero. Aboto ba dödö Yesu wa ataʼu Wetero te börö me iwaʼö tödönia wa tenga sinangea ia. Hizaʼi, faduhu dödö Yesu wa lö faröi Wetero. Börö daʼö, ihaogö wangumaʼö khönia Yesu, ”Böi ataʼufi.” Faʼafaduhu dödö Yesu zamarou tödö Wetero ba wombulöʼö faʼaurinia. Fetero hegöi talifusönia Andrea, laröi halöwöra ba wangalui iʼa ba tobali ira soloʼö khö Mesia. Börö daʼö, oya lala nifalua Yehowa ba wamahowuʼö yaʼira.—Mrk. 1:​16-18.

5. Hadia howu-howu nitema Wetero börö me lö awuwu ia ba lö iböhöli woloʼö Yesu?

⁵ Oya sibai zi sökhi nirasoi Wetero sagötö me no tobali ia soloʼö khö Keriso. Iʼila hewisa me ifadöhö niha sofökhö Yesu, ifofanö malaʼika si lö sökhi, ba ifuli isusugi niha si no mate. b (Mat. 8:​14-17; Mrk. 5:​37, 41, 42) Itema  göi gangilata sahöli-höli dödö Fetero si tebai iʼolifugö. Iʼila hewisa na mamatörö Yesu tobali Razo ba Wamatörö Lowalangi. (Mrk. 9:​1-8; 2 Fe. 1:​16-18) Lö itema howu-howu daʼö Fetero na lö iʼoʼö Yesu. Hawaʼebua wangandrönia saohagölö me lö itehegö wangera-ngera si lö sökhi si so ba dödönia tobali taha-taha ba wanema howu-howu andrö!

6. Hadia no mofozu Wetero ba wolawa falömoʼahonoania ba zi lö arara? Tutunö.

⁶ Hewaʼae no oya niʼila hegöi nirongo Wetero, hizaʼi lö iböhöli nasa ba wolawa falömoʼahonoania. Duma-dumania, me itutunö Yesu hewisa dania na tefakao ia ba mate simane si no tefaʼeleʼö ba Zura Niʼamoniʼö, iwaʼö Fetero wa lö alua daʼö khö Yesu. (Mrk. 8:​31-33) Asese sibai fabuʼa-buʼa Wetero hegöi ira nifahaʼö tanö böʼö ba wamadöni haniha zabölö ebua ba gotaluara. (Mrk. 9:​33, 34) Ba mbongi fatua lö mate Yesu, itaba dalinga zi samösa niha. (Yoh. 18:10) Ba mbongi daʼö göi ataʼu Wetero irege tölu kali iʼosilöʼögö Yesu. (Mrk. 14:​66-72) Daʼö mbörö wa iduhugö wege-ege.—Mat. 26:75.

7. Me no aefa tesusugi Yesu, hadia noro dödö nibeʼenia khö Wetero?

⁷ Lö faröi Yesu khö zinengenia safatö tödö andre. Me no aefa tesusugi ia, ibeʼe ginötö khö Wetero ba wangoromaʼö faʼomasinia. Iʼandrö khö Wetero ba wokubaloi biri-birinia si fao fangide-ngideʼö. (Yoh. 21:​15-17) Itemaʼö halöwö daʼö Fetero. Me so Wetero ba Yeruzalema me ngaluo Wendrakose, farahu ia ba gotalua niha siföföna nibayoini eheha niʼamoniʼö.

8. Hadia zala sebua nifalua Wetero me so ia ba Gandriokhia?

⁸ Hewaʼae no tobali niha Keriso nibayoini Wetero, lö nasa iböhöli wamorege ba wolawa falömoʼahonoania. Me döfi 36 M, ifatenge ia Lowalangi ba wamalukhaisi Konelio si tenga niha Yahudi. Aefa daʼö, tebayoini Gonelio faoma eheha niʼamoniʼö si tobali tandra ”wa lö ifaigi mbawa niha Lowalangi”, ba fefu niha moroi ba soi böʼö tola farahu ira ba mbanua niha Keriso. (Hal. 10:​34, 44, 45) Baero daʼö, falulu manga Wetero khöra, hewaʼae lö irai ifalua daʼö ba zilalö. (Gal. 2:12) Hizaʼi, so nasa ösa niha Keriso Yahudi sangumaʼö wa tebai falulu manga ira khö ndra niha si tenga Yahudi. Me möi ndra niha Yahudi sangokhögö lala wangera-ngera daʼö ba Gandriokhia, lö fao Wetero wemanga khö ndra niha si tenga Yahudi. Te ataʼu ia na mofönu ndra niha Keriso Yahudi. Börö daʼö, mofönu khönia Waulo ba itegu ia föna niha sato. (Gal. 2:​13, 14) Hewaʼae no ifuli ifalua zala Fetero, hizaʼi anau gölönia. Hadia zanolo yaʼia?

9. Hewisa Yohane 6:​68, 69 wangoromaʼö waʼalöfaröi Wetero?

⁹ Lö faröi Wetero; lö itehegö so zi tobali taha-tahania ba woloʼö Yesu. Iforomaʼö waʼalöfaröinia me so nitutunö Yesu si lö aboto ba dödö ndra nifahaʼönia. (Baso Yohane 6:​68, 69.) Ato zondröi Yesu ba lö laʼandrö mazui labaloi wanutunö Yesu geluaha nitutunönia. Hizaʼi, lö ifalua daʼö Fetero. Ifaduhuʼö wa ba wehede Yesu andrö ”so waʼauri si lö aetu”.

10. Hewisa wangoromaʼö Yesu waʼafaduhu dödönia khö Wetero? (Faigi göi gambara.)

¹⁰ Lö iröi Wetero Yesu. Ba mbongi safuria fatua lö mate ia, iʼila Yesu wa iröi ia Fetero hegöi ira sinenge tanö böʼö. Hewaʼae simanö, iforomaʼö waʼafaduhu dödönia Yesu khö Wetero wa hasambalö ifalalini gera-erania ba tola irorogö waʼalöfaröinia. (Luk. 22:​31, 32) Aboto ba dödö Yesu wa ”aoha sa gölö dödö, ba no ambö faʼabölö nösi”. (Mrk. 14:38) Börö daʼö, lö iröi ia Yesu hewaʼae no iʼosilöʼögö ia Fetero. Me no aefa tesusugi ia, ifalukhaisi  Wetero ba zi ha yaʼira. (Mrk. 16:7; Luk. 24:34; 1 Ko. 15:5) Sindruhu-ndruhu wa daʼö zi möi famarou dödö zinenge si no afatö tödö andre!

11. Hadia nifalua Yesu enaʼö faduhu dödö Wetero wa hasambalö ibönökhi zoguna khönia Yehowa?

¹¹ Ifaduhuʼö Yesu khö Wetero wa hasambalö ibönökhi zoguna khönia Yehowa. Me no aefa tesusugi Yesu, iforomaʼö khö Wetero hegöi ira sinenge tanö böʼö dandra sahöli-höli dödö ba wangalui iʼa. (Yoh. 21:​4-6) Daʼa zamaduhuʼö tödö Wetero wa aoha khö Yehowa ba wombönökhi soguna khönia. Te itörö tödönia wehede Yesu wa hasambalö ibönökhi Yehowa zoguna ba niha ’sangofönaiʼö wangalui Famatörönia’. (Mat. 6:33) Börö daʼö, iʼofönaiʼö Fetero ba wamalua halöwö fanuriaigö, tenga ba wangalui iʼa. Me luo Wendrakose 33 M, manuriaigö ia si fao faʼabarani, ba ribu niha nitolonia irege latemaʼö duria somuso dödö. (Hal. 2:​14, 37-41) Baero daʼö, itolo göi niha Zamaria hegöi niha moroi ba soi böʼö enaʼö tobali soloʼö khö Keriso. (Hal. 8:​14-17; 10:​44-48) Sindruhu-ndruhu iʼogunaʼö ia Yehowa ba wondröni niha moroi ba ngawalö soi enaʼö farahu ira ba mbanua niha Keriso.

12. Hadia zi tebai taʼolifugö na taforege wolawa falömoʼahonoada?

¹² Tola itolo ita Yehowa enaʼö anau gölöda. Tola manö abua wamalua daʼö mendrua manö na tataögö gabula dödö si lö iʼila aetu. Itaria abölö abua daʼö moroi ba nitaögö Wetero. Hizaʼi, tola ibeʼe khöda waʼabölö Yehowa enaʼö lö awuwu ita. (Si. 94:​17-19) Duma-dumania, so samösa dalifusöda si no ara mamalua homoseks fatua lö ifahaʼö ia ba zindruhu. Ihalö gangetula ba wombulöʼö faʼaurinia ba ifaudugö moloʼö Sura Niʼamoniʼö. Hewaʼae simanö, itaria zui adöni dödönia ba wamalua daʼö. Hadia zanolo yaʼia enaʼö lö ifuli ifalua? Imane, ”Yehowa zameʼe khögu faʼabölö. . . . Börö geheha Yehowa . . . , ufahaʼö ndraʼo wa tola ufaudugö lala waʼaurigu ba zomasi Yehowa . . . Hewaʼae lö moʼahonoa ndraʼo, lö tebulö iʼogunaʼö ndraʼo Yehowa ba ibeʼe khögu waʼabölö.”

13. Hewisa woloʼöda duma-duma Wetero nisura ba Halöwö Zinenge 4:​13, 29, 31? (Faigi göi gambara.)

¹³ Simane si no taʼila, tenga ha sakali ifalua zala Fetero börö waʼataʼunia ba niha. Hizaʼi, börö me iʼandrö waʼabarani khö Yehowa, tola ilawa waʼataʼunia andrö. (Baso Halöwö Zinenge 4:​13, 29, 31.) Tola göi talawa waʼataʼuda. Angeragö zalua khö dalifusöda si  bohou ebua sotöi Horst, sauri ba götö Nazi Jerman. Börö me ataʼu ia khö ndra guru hegöi ira awönia sekola, so mato hauga kali iwaʼö, ”Heil Hitler!” Moroi na mofönu khönia ndra satuania, fao ira khönia ba wangandrö ba laʼandrö khö Yehowa enaʼö ibeʼe khönia waʼabarani. Börö wanolo moroi khö zatuania ba iʼodaligö Yehowa, ba gafuriata aro wamati Horst. Aefa daʼö imane, ”Lö irai iröi ndraʼo Yehowa.” c

14. Hewisa ndra satua sokubaloi safönu faʼomasi wameʼe famarou dödö ba niha safatö tödö?

¹⁴ Lö iröi ita Yehowa hegöi Yesu. Me no iʼosilöʼögö Yesu Fetero, moguna ihalö gangetula si tohude. Hadia awuwu ia mazui lö iböhöli tobali soloʼö khö Keriso? No mangandrö Yesu khö Yehowa enaʼö lö awuwu wamati Wetero. No göi ifatunö khö Wetero wangandrönia andrö, ba iforomaʼö waʼafaduhu dödö wa tola ibeʼe wamarou dödö Fetero khö ndra talifusönia. (Luk. 22:​31, 32) Ba gafuriata tatu manö teʼaroʼö Wetero me ifuli itörö tödönia wehede Yesu! Hadia wamahaʼönia? Ba ginötö tahalö gangetula si tohude, tola manö iʼogunaʼö Yehowa ndra satua sokubaloi safönu faʼomasi ba wameʼe khöda famarou dödö enaʼö lö faröi ita. (Ef. 4:​8, 11) Duma-dumania Paul, samösa talifusöda si no ara tobali satua sokubaloi. Ba ginötö fahuhuo ia ba niha sorasoi faʼide-ide dödö, si toʼölönia iʼandrö khöra enaʼö laʼangeragö hewisa me idöni ira Yehowa mböröta ba zindruhu andre. Aefa daʼö, ifaduhuʼö ba dödöra wa Yehowa andrö Lowalangi sangokhögö faʼomasi si lö faröi. Börö daʼö, lö irai iröi ira. Imane Paul, ”No uʼila hewisa Yehowa ba wanolo niha sato sorasoi faʼide-ide dödö irege anau gölöra.”

15. Hewisa duma-duma Wetero hegöi Horst tobali tandra wa atulö wehede nisura ba Mataiʼo 6:33?

 ¹⁵ Na taʼofönaiʼö wamalua halöwö fanuriaigö, hasambalö ibönökhi zoguna khöda Yehowa simane nifaluania khö Wetero hegöi ira sinengenia tanö böʼö. (Mat. 6:33) Me no aefa Wasuwöta Gulidanö II, Horst nitötöi moroi yawa mege, ihalö gangetula omasi ia merintis. Hizaʼi, tosasa sibai ia ba aombö dödönia hadia tola dania ibönökhi zoguna khönia na merintis ia. Hadia nifaluania? Ihalö gangetula ba wanandraigö Yehowa. Möi ia manuriaigö ba zi samigu daʼö, sagötö faʼatohare zatua samasui. Ba gafuriata weʼamöi zatua samasui ba migu daʼö, tokea sibai ia me ibeʼe khönia amplop satua samasui ba ösinia bakha kefe. Lö ifatunö khönia hezo so moroi gefe daʼö. Kefe daʼö tola tobali fanolonia sagötö merintis ia mato hauga waŵa aefa daʼö. Itugu faduhu dödönia wa hasambalö ibönökhi zoguna khönia Yehowa. Lö iböhöli ba wangofönaiʼö Famatörö Lowalangi sandrohu faʼaurinia.—Mal. 3:10.

16. Hana wa moguna tafahaʼö ita ba duma-duma Wetero hegöi ba zurania?

¹⁶ Tatu omuso sibai dödö Wetero me lö iröi ia Yesu ba ginötö iwaʼö tödönia wa tenga saʼae sinangea ia tobali soloʼö khö Yesu. Lö iböhöli Keriso ba wameʼe famahaʼö khö Wetero irege tobali ia sinenge si lö faröi ba duma-duma si sökhi ba niha Keriso iadaʼa. Oya wamahaʼö si sökhi si tola tahalö moroi ba wamomaha nitema Wetero. Tola tafahaʼö ita ba daʼö hegöi tanö böʼönia moroi ba zi dombua sura nifaʼoheʼö Wetero ba mbanua niha Keriso me abad siföföna. Ba artikel aefa daʼa tatutunö ösa dania mene-mene moroi ba zura andrö ba hewisa woloʼöda daʼö.