1-2. Hana wa moguna tafahaʼö ita ba waö-waö waʼauri Zimesono?

 HADIA zi so ba wangera-ngeramö na örongo döi Zimesono? Te ökhalaigö samösa ndra matua sabölö sibai. Atulö daʼö. Hizaʼi, so gangetula si fasala nihalö Zimesono irege alua khönia gabula dödö. Hewaʼae simanö, iʼosambuaʼö dödönia Yehowa ba waʼalöfaröi Zimesono ba wamosumange yaʼia. Isura göi ba Zura Niʼamoniʼö duma-duma Zimesono soguna khöda irugi iadaʼa.

² Iʼogunaʼö Zimesono andre Yehowa ba wanolo ono mbanuania Izaraʼeli. Ngaotu fakhe me no aefa mate Zimesono, ibeʼe gehehania Yehowa khö zinenge sotöi Faulo ba wanura töi Zimesono ba gotalua döi ndra matua samati tanö böʼö. (Heb. 11:​32-34) Möi famarou dödöda duma-duma Zimesono. Iʼodaligö Yehowa hewaʼae so gabula dödö salua. Ba artikel daʼa, tatutunö hadia wamahaʼö nihalöda moroi khö Zimesono ba hewisa wa möi famarou dödöda daʼö.

3. Hadia halöwö nitema Zimesono?

³ Me tumbu Zimesono, niha Wilisiti zamatörö ba samakao  iraono Gizaraʼeli. (Sangu. 13:1) Tefakao sibai waʼaurira börö waʼalösökhi niha Wilisiti. Andrö wa ifili Zimesono Yehowa ba ’wangefaʼö iraono Gizaraʼeli moroi ba danga niha Wilisiti’. (Sangu. 13:5) No halöwö sabua sibai daʼa! Ba wamalua halöwö andre, moguna iʼodaligö Yehowa.

4. Hadia nifalua Yehowa ba wanolo Simesono enaʼö teʼefaʼö ia moroi ba danga niha Wilisiti? (Sanguhuku 15:​14-16)

⁴ Datafaigi sambua duma-duma sangoromaʼö wa faduhu dödö Zimesono ba iʼodaligö wanolo moroi khö Yehowa. Samuza inötö, möi ndra saradadu Wilisiti ba wondraʼu yaʼia ba Lehi, te ba Yehuda. Ataʼu sibai niha Yehuda irege labeʼe Zimesono ba danga nudu. Laböbö ia ira niha si sambua soi khönia faoma sinali si bohou dua rozi, ba laʼohe ia ba niha Wilisiti. (Sangu. 15:​9-13) Hizaʼi, ”iʼabölöʼö ia eheha Yehowa” ba tola iʼefaʼö ia moroi ba mböbö andrö. Aefa daʼö, ”isöndra sambua döla zimbi galide si matua si bohou mate”, ihalö daʼö ba iʼogunaʼö ba wamunu 1.000 ndra matua Wilisiti!—Baso Zanguhuku 15:​14-16.

5. Hewisa wangoromaʼö Zimesono wa iʼodaligö Yehowa?

⁵ Hana wa iʼogunaʼö döla zimbi galide Simesono? Sindruhunia, tebai muʼogunaʼö daʼö tobali fangöna! Iʼila Simesono wa hasambalö itolo ia Yehowa ba wokalaisi niha Wilisiti, gofu hadia wangöna niʼogunaʼönia. Ira matua si lö faröi andre iʼogunaʼö gofu hadia zi no tehenaigö ba wamalua ohitö dödö Yehowa. Börö me iʼodaligö Yehowa, tola möna ia ba wolawa niha Wilisiti.

6. Na tatema halöwö moroi ba organisasi Yehowa, hadia wamahaʼö nihalöda moroi khö Zimesono?

⁶ Tola göi iʼabölöʼö ita Yehowa ba wamalua halöwöda, hewaʼae ba wamaigida abua sibai halöwö andrö. Tola itolo ita ba lala sahöli-höli dödöda. Faduhusi tödö wa hasambalö itoloʼö Yehowa ba wamalua ohitö dödönia sagötö öʼodaligö ia, simane nifaluania khö Zimesono.—Amd. 16:3.

7. Hadia duma-duma sangoromaʼö wa moguna taʼalui wanuturu lala moroi khö Yehowa?

⁷ Ato ndra talifusöda si fao ba halöwö  fangotomosi domosa organisasi, laforomaʼö wa laʼodaligö Yehowa. Ba zilalö, ira talifusöda zamazökhi rancangan hegöi sangotomosi domosa Nahia Gangowuloa hegöi tomosa tanö böʼö. Hizaʼi, börö me itugu tedou organisasi, moguna so zinangea mubulöʼö. Ira talifusö si so noro dödö, laʼalui wanuturu lala moroi khö Yehowa ba latandraigö lafalua ngawalö lala si bohou. Duma-dumania, lafuli laʼöli domosa mazui lafazökhi mangawuli. Imane Robert, si no fao ba wamazökhi tomosa ba zi sagörö ulidanö ba zi hauga fakhe, ”Ba wamobörö lö aoha khöma ba wamalua lala si bohou andre. Faböʼö sibai daʼa moroi ba zi no toʼölö mafalua ba zi hauga fakhe. Hizaʼi, omasi ndra talifusö ba wamalua fombulöʼö, ba oroma sibai wa ifahowuʼö halöwö andrö Yehowa.” Awena sambua duma-duma daʼa sangoromaʼö wa ibeʼe wanuturu lala Yehowa ba nono mbanuania irege tola lafalua halöwö nibeʼenia. Börö daʼö, moguna tasofu khöda samösa, ’Hadia uʼalui wanuturu lala moroi khö Yehowa, ba ufaudugö waʼaurigu enaʼö tola ufalua wondrege zi sökhi ba wamosumangegu yaʼia?’

8. Hadia nifalua Zimesono me owökhi sibai dödönia?

⁸ Te itörö tödömö zahöli-höli dödö tanö böʼö nifalua Zimesono. No irai ibunu sageu zingo ba 30 ndra matua Wilisiti si so ba Gasekalo. Ifalua daʼö ha yaʼi-yaʼia ba lö hadöi fangönania. (Sangu. 14:​5, 6, 19) Iʼila Simesono wa börö wanolo moroi khö Yehowa wa tola ifalua daʼö. Oroma daʼö me no aefa ibunu zi 1.000 niha Wilisiti ba owökhi sibai dödönia. Hadia nifaluania? Moroi na iʼodaligö waʼabölönia samösa ba wangalui idanö, iʼandrö wanolo moroi khö Yehowa.—Sangu. 15:18.

9. Hadia nifalua Yehowa me iʼandrö khönia wanolo Simesono? (Sanguhuku 15:19)

⁹ Me muʼao Zimesono ba wangandrö fanolo khö Yehowa, ifalua dandra sahöli-höli dödö Yehowa ba wangaʼasogö idanö. Me ibadu nidanö andrö Simesono, ”mangawuli waʼabölönia ba ohahau dödönia”. (Baso Zanguhuku 15:19) Lö tebulö so gumbu nidanö daʼa irugi me isura mbuku Sanguhuku andre Samueli samaʼeleʼö. Na laʼila iraono Gizaraʼeli gumbu nidanö andrö, daʼö zamasugi ba dödöra wa na laʼodaligö Yehowa hasambalö itolo ira ba ginötö si tefaudu.

10. Hadia zinangea tafalua ba wanema fanolo moroi khö Yehowa? (Faigi göi gambara.)

¹⁰ Moguna göi taʼodaligö Yehowa ba wanolo yaʼita, gofu hadia nekhe-nekhe danga mazui faʼabölöda ba wangai halöwö khönia. Moguna so khöda wangide-ngideʼö ba tafaduhuʼö wa tola tafalua fefu niʼandrö Yehowa ha börö me taʼodaligö ia. Ifuli teʼabölöʼö Zimesono me ibadu nidanö nihenaigö Yehowa. Simanö göi ita, moguna tatemaʼö fefu nihenaigö Yehowa khöda enaʼö tola tarorogö waʼalöfaröida khönia.—Mat. 11:28.

11. Hewisa lalada ba wangodaligö fanolo moroi khö Yehowa? Tutunö duma-dumania.

¹¹ Angeragö duma-duma Aleksey, samösa dalifusöda moroi ba Rusia si göna famakao sebua. Hadia zanolo yaʼia enaʼö anau gölönia hewaʼae abua sibai gabula dödö salua khönia? Yaʼia hegöi foʼomonia ira alawe lö tebulö lafahaʼö ira ba Zura Niʼamoniʼö hegöi ba wamalua halöwö ba wamati. Imane Aleksey, ”Lö tebulö ufalua wamahaʼö samösa hegöi fombaso Sura Niʼamoniʼö ero maʼökhö. Ero sihulö wongi, yaʼo hegöi foʼomogu mabaso ayat harian ba mangandröga khö Yehowa.” Hadia wamahaʼönia khöda? Moroi na taʼodaligö waʼabölöda samösa, abölö sökhi na taʼodaligö Yehowa.  Hewisa lalania? Moguna taʼotomosi wamatida, yaʼia na tafalua wamahaʼö samösa, talau mangandrö, taʼondrasi gangowuloa ba tafalua wanuriaigö. Hasambalö itolo ita Yehowa enaʼö anau gölöda ba wamosumange yaʼia. Simane nifaluania ba wangabölöʼö Simesono, hasambalö göi iʼabölöʼö ita.

12. Hadia gangetula si fasala nihalö Zimesono, ba hana wa faböʼö daʼö moroi ba zomasi Yehowa?

¹² Simane yaʼita, lö moʼahonoa Zimesono. Daʼö mbörö wa itaria ihalö gangetula si fasala. Sambua gangetula si fasala nihalönia tobali famaʼala waʼaurinia. Lö ara me no tobali ia sanguhuku, ibörögö ’omasi ia khö zi samösa ira alawe ba Ndraso Zoreki sotöi Delila’. (Sangu. 16:4) Ba zilalö, no famatua Zimesono khö zi samösa ndra alawe Wilisiti. Yehowa zameʼe ba dödönia enaʼö ifalua daʼö irege so ginötö khönia ba wolawa niha Wilisiti. Aefa daʼö, möi ia ba nomo ndra alawe sohorö-horö ba mbanua Gaza si so ba Wilisiti. Ba daʼö ibeʼe khönia waʼabölö Lowalangi enaʼö tola ideha fefu mbawa göli mbanua, irege aoha ba wokalaisi banua andrö. (Sangu. 14:​1-4; 16:​1-3) Hizaʼi, börö me Delila andre te moroi ba soi Gizaraʼeli, tebai iʼogunaʼö daʼö Yehowa ba wolawa niha Wilisiti.

13. Hadia nifalua Delila khö Zimesono?

¹³ Itema gefe sebua Delila moroi ba niha Wilisiti ba wemanga mböli Zimesono. Ero maʼökhö ifaso ia Delila enaʼö ifatunö hadia mbörö wa abölö sibai ia. Börö waʼomasinia sebua sibai khö Delila, lö iʼila Simesono hadia zindruhunia gohitö dödö Delila. Ba gafuriata, ifatunö manö khönia Simesono. Lua-luania, angetula si fasala nihalö Zimesono tobali  börö wa taya saʼae waʼabölönia hegöi howu-howu Yehowa.—Sangu. 16:​16-20.

14. Hadia zalua khö Zimesono börö me ifaduhusi tödö Delila?

¹⁴ Itaögö lua-lua si lö sökhi andrö Simesono börö me abölö ifaduhusi tödö Delila moroi khö Yehowa. Laraʼu ba lakoe hörönia ira niha Wilisiti. Labeʼe ia ba gurunga ba Gaza, banua niʼailasinia mböröta. Tobali ia sogili gandru. Samuza inötö, laʼohe Zimesono ira niha Wilisiti ba gowasa nifaluara. Labeʼe zumange sebua khö lowalangira Dagono, börö me faduhu dödöra wa lowalangira andrö zanolo yaʼira ba wondraʼu Simesono. Laʼohe baero Zimesono moroi ba gurunga, enaʼö tobali famaʼikira sagötö lafalua gowasa andrö.—Sangu. 16:​21-25.

15. Hewisa wangoromaʼö Zimesono wa ifuli iʼodaligö Yehowa? (Sanguhuku 16:​28-30) (Faigi gambara ba guli majalah.)

¹⁵ Ifalua zala sebua Simesono, hizaʼi lö iböhöli wamosumange Yehowa. Lö tebulö iʼalui ginötö ba wamalua ohitö dödö Lowalangi ba wolawa niha Wilisiti. (Baso Zanguhuku 16:​28-30.) Mangandrö Zimesono, ”Tehegö khögu wanulöni niha Wilisiti andre.” Ibeʼe Lowalangi wanema li ba wangandrönia, ba sakali tö ibeʼe waʼabölö sahöli-höli dödö khö Zimesono. Buania, abölö ato nibununia sakali daʼa, moroi ba zi no ibunu ba zilalö.

16. Hadia wamahaʼö nihalöda moroi ba zala nifalua Zimesono?

¹⁶ Hewaʼae itaögö Simesono lua-lua si lö sökhi ba gangetula si fasala nihalönia, hizaʼi lö iböhöli wamalua ohitö dödö Yehowa. Hewaʼae no irai göi tafalua zala irege göna ita degu-tegu ba taya noro dödöda ba gangowuloa, böi tabato ba wamosumange Yehowa. Datatörö tödöda wa no ihenaigö ia Yehowa ba wangefaʼö salada. (Si. 103:​8-10) Gofu hadia zala si no irai tafalua, hasambalö ibeʼe khöda waʼabölö Yehowa ba wamalua somasi ia, simane nifaluania khö Zimesono.

17-18. Hana wa möi famarou dödöu duma-duma Michael? (Faigi göi gambara.)

¹⁷ Angeragö duma-duma dalifusöda si bohou ebua sotöi Michael. Oya ginötö niʼogunaʼönia ba wangai halöwö khö Yehowa, tobali ia enoni hegöi perintis biasa. Hizaʼi, so zala nifaluania irege aheta khönia halöwö ba mbanua niha Keriso. Imane Michael, ”Oya sibai ginötö si no uʼogunaʼö khö Yehowa. Hizaʼi, samuza inötö urasoi wa hulö lö hadöi si tola ufalua ba wangai halöwö khö Yehowa. Uʼila wa lö iröi ndraʼo Yehowa, hizaʼi umane tödögu  wa tenga saʼae simane ba zilalö wahuwusama ba tebai uhalö halöwö khönia simane me mböröta.”

¹⁸ Hewaʼae simanö, lö awuwu Michael. Imane, ”Uʼosambuaʼö dödögu ba wangaʼazökhi fahuwusagu khö Yehowa, ubokai dödögu khönia ba wangandrö, ufahaʼö ndraʼo ba Zura Niʼamoniʼö ba uʼangerönusi daʼö.” Me no numalö ginötö, ifuli zui itema halöwö Michael ba mbanua niha Keriso. Tobali ia satua sokubaloi hegöi perintis biasa. Imane, ”Fanolo hegöi famarou dödö nitemagu, mendrua manö khö ndra satua sokubaloi, daʼö zanolo yaʼo ba wangila wa lö tebulö iʼomasiʼö ndraʼo Yehowa. Tola ifuli ufalua halöwö ba mbanua niha Keriso, ba lö itegudo tödögu side-ide. Moroi ba zalua andrö ufahaʼö ndraʼo wa hasambalö iʼefaʼö Yehowa zala niha samalalini era-era.” Faduhu dödöda wa lö tebulö iʼogunaʼö ba ifahowuʼö ita Yehowa hewaʼae no irai tafalua zala. Hizaʼi, iʼandrö khöda enaʼö taforege ba wombulöʼö amuatada ba lö tebulö taʼodaligö ia.—Si. 86:5; Amd. 28:13.

19. Hewisa wa tobali fangabölöʼömö duma-duma Zimesono?

¹⁹ Ba artikel daʼa, no tatutunö ösa zalua sahöli-höli dödö ba waʼauri Zimesono. Yaʼia andrö tenga niha soʼahonoa, hizaʼi lö iböhöli wamosumange Yehowa, mendrua manö me no aefa ifalua zala soʼamakhaita khö Delila. Ba lö göi tebulö iʼogunaʼö ia Yehowa ba lala sahöli-höli dödö. Ifaduhuʼö Yehowa wa Simesono andrö ira matua samati, ba tefarahu ia ba gotalua ndra matua samati nitutunö ba Heberaiʼo faza 11. Tatu tefarou sibai dödöda börö me taʼila wa tafosumange Namada safönu faʼomasi si so ba zorugo somasi manolo yaʼita, mendrua manö ba ginötö alua khöda gabula dödö! Börö daʼö, simane nifalua Zimesono, dataʼandrö khö Yehowa, ”Törö tödöu ndraʼo ba beʼe khögu waʼabölö.”—Sangu. 16:28.