1. Hadia gabula dödö salua khö Yehoasi, Usia, hegöi Yosia?

 HEWISA dödömö na tobali ndraʼugö samatörö ono mbanua Lowalangi, hizaʼi awuyu-wuyu nasa ndröfimö? Hewisa wangogunaʼömö kuaso niʼokhögömö andrö? Ifatunö khöda Sura Niʼamoniʼö wa so hadauga zi bohou ebua si tobali razo ba Yehuda. Duma-dumania, Yehoasi awena 7 fakhe ndröfinia, Usia 16 fakhe, ba Yosia 8 fakhe. Khalaigö hawaʼabua noro dödö nibeʼe khöra! Hewaʼae lö aoha khöra wamalua daʼö, hizaʼi latema wanolo moroi khö Yehowa hegöi ba niha böʼö enaʼö tola mofozu ira ba wamalua ngawalö zi sökhi.

2. Hadia wamahaʼö nihalöda moroi ba duma-duma Yehoasi, Usia hegöi Yosia?

² Hewaʼae tenga razo mazui ratu ita, hizaʼi oya wamahaʼö nihalöda moroi khö Yehoasi, Usia, hegöi Yosia. So wamahaʼö nihalöda moroi ba gangetula si sökhi hegöi angetula si fasala nihalöra. Moroi ba duma-dumara andrö, tola taʼila hadia mbörö wa tafili zi fahuwu khöda, lö tebulö taʼokhögö wangide-ngideʼö, ba hana wa lö tebulö ahatö ita khö Yehowa.

3. Hewisa Yehoyada wanolonia Razo Yehoasi ba wangai angetula satua-tua?

³ Oʼö gangetula satua-tua nihalö Yehoasi. Ihalö gangetula satua-tua Razo Yehoasi me bohou ebua ia. Mate namania me awuyu-wuyu nasa ia, ba Ere Sebua Yehoyada zangebuaʼö ba samahaʼö yaʼia sanandrösa khö Yehowa. Atua-tua Yehoasi börö me ifondrondrongo mene-mene nibeʼe Yehoyada. Börö duma-duma Yehoyada, ihalö gangetula Yehoasi ba wamosumange Yehowa ba itolo nono mbanuania ba wamalua famosumange satulö. Itatugöi enaʼö mufuli muʼehaogö gosali Yehowa.—2 Ng. 24:​1, 2, 4, 13, 14.

4. Hadia mbua nitemada na taʼomasiʼö ba taʼoʼö gamakhoita Yehowa? (Amaedola 2:​1, 10-12)

 ⁴ Na lafahaʼö ndraʼugö ba wangomasiʼö Yehowa hegöi ba wamalua fefu goi-goinia, oya mbua si sökhi nitemamö. (Baso Gamaedola 2:​1, 10-12.) Oya lala si tola lafalua ira satua ba wamahaʼö iraonora. Angeragö hewisa zi samösa ama ba wanolo ononia sotöi Katya ba wangai angetula si sökhi. Na ifasao nononia andrö ba zekola, lö aetu ladunö-dunö ayat harian ba lala. Imane Katya, ”Fefu nidunö-dunöma, daʼö zanolo yaʼo ba wamalua si sökhi hewaʼae alua gabula dödö ba zi maʼökhö daʼö.” Tola manö so gamakhoita nifazökhi ndra satuamö si teʼodane-dane ba Zura Niʼamoniʼö, hizaʼi te ömane tödöu wa lö öʼila öfalua fefu zomasi-masi dödöu börö gamakhoita andrö. Hadia zanolo yaʼugö ba woloʼö gamakhoita nibeʼe khöu? Itörö tödö dalifusöda Anastasia me latutunö khönia ira satuania hadia mbörö wa lafazökhi gamakhoita daʼö. Imane, ”Awena uʼila wa lafazökhi gamakhoita daʼö ira satuagu tenga enaʼö lö ufalua zomasido, hizaʼi ba wolumöʼöra yaʼo börö waʼomasira khögu.”

5. Hewisa dödö ndra satuamö hegöi Yehowa na so nifaluamö? (Amaedola 22:6; 23:​15, 24, 25)

⁵ Hasambalö omuso dödö zatuamö na öfondrondrongo mene-mene nibeʼera khöu si teʼodane-dane ba Zura Niʼamoniʼö. Ba sabölö tohudenia, omuso sibai dödö Lowalangi ba tola itugu aro göi wahuwusami. (Baso Gamaedola 22:6; 23:​15, 24, 25.) Daʼa mbörö wa moguna taʼoʼö duma-duma Yehoasi me awuyu-wuyu nasa ndröfinia.

6. Me no mate Yehoyada, mene-mene haniha niʼoʼö Yehoasi, ba hadia lua-luania? (2 Ngaʼötö 24:​17, 18)

⁶ Famahaʼö moroi ba gangetula si fasala nihalö Yehoasi. Me no aefa mate Yehoyada, ira si fahuwu khö Yehoasi ladönisi dödönia ba wamalua ngawalö zi lö sökhi. (Baso 2 Ngaʼötö 24:​17, 18.) Ifondrondrongo wehede ndra sondröniaʼö niha Yehuda si lö mangomasiʼö Yehowa ba samalua si lö sökhi. Sinangea menaʼö na lö fariawö Yehoasi khöra enaʼö böi alua gabula dödö. (Amd. 1:10) Hizaʼi, ifondrondrongo mbua gera-era si fasala nibeʼe ndra awö-awönia. Aefa daʼö, me iʼamenesi ia Zakharia ono Gere Yehoyada, ibeʼe fareta ba wamunu Zakharia. (2 Ng. 24:​20, 21; Mat. 23:35) Sindruhu-ndruhu no angetula fondrege zi lö sökhi ba faʼabodo nifaluania andrö! Ba wamobörö, sökhi sibai lala waʼauri Yehoasi. Hizaʼi, ba gafuriata iröi zindruhu ba tobali ia samunu niha. Lua-luania, labunu ia ira sawuyunia. (2 Ng. 24:​22-25) Tatu tenga simane daʼö lua-lua waʼaurinia na lö mamalö ifondrondrongo niwaʼö Yehowa hegöi niwaʼö ndra si fahuwu khö Yehowa! Hadia wamahaʼö nihalöda moroi ba duma-dumania andrö?

7. Haniha zinangeania öfili tobali si fahuwu khömö? (Faigi göi gambara.)

 ⁷ Moroi ba gangetula si fasala nihalö Yehoasi, tafahaʼö ita wa moguna tafili zi fahuwu khöda sangomasiʼö hegöi sangomusoiʼö tödö Yehowa. Yaʼira zanolo yaʼita enaʼö lö tebulö tafalua ngawalö zi sökhi. Tola fahuwu ita ba niha salawa döfi mazui sabölö awuyu-wuyu moroi khöda. Böi olifu ita wa abölö awuyu-wuyu ndröfi Yehoasi moroi khö Yehoyada. Ba ginötö öfili zi fahuwu khömö, angeragö: ’Hadia latolo ndraʼo ba wangaʼaroʼö famatigu khö Yehowa? Hadia lafarou ndraʼo ba wamaudugö faʼaurigu ba goi-goi Lowalangi? Hadia asese ladunö-dunö sanandrösa khö Yehowa hegöi ngawalö zi no lafahaʼö yaʼira moroi ba Zura Niʼamoniʼö? Hadia so khöra waʼabarani ba woʼamenesi yaʼo ba ginötö moguna ia khögu?’ (Amd. 27:​5, 6, 17) Sindruhunia, na tenga sangomasiʼö Yehowa zi fahuwu khömö, lö moguna fariawö ndraʼugö khöra. Hizaʼi, na fahuwu ndraʼugö ba niha sangomasiʼö Yehowa, aroʼö wahuwusau khöra börö me daʼö zanolo yaʼugö ba wamalua ngawalö zi sökhi!—Amd. 13:20.

8. Ba ginötö taʼogunaʼö media sosial, hadia zinangeania taʼangeragö?

⁸ Media sosial no sambua lala enaʼö tola fahuhuo ita ba nösi nomoda hegöi khö ndra awö-awöda. Hizaʼi, ato niha sangogunaʼö daʼö ba lala si lö tefaudu. Duma-dumania, la-posting koda mazui video sangoromaʼö hadia niʼölira mazui nifaluara. Ba ginötö öʼogunaʼö media sosial, angeragö daʼa: ’Hadia omasido enaʼö ahöli-höli dödö niha khögu? Hadia samarou tödö niha böʼö ndraʼo mazui ha enaʼö lasuno ndraʼo? Hadia tebulö lala wangera-ngeragu, fehedegu, hegöi nifaluagu börö postingan niha böʼö si lö tefaudu?’ So mene-mene moroi khö dalifusöda Nathan Knorr, samösa Boto Solohe, imane, ”Böi forege ba wangomusoiʼö tödö niha fefu. Na öfalua daʼö, samösa lö niha si tola öʼomusoiʼö tödö. Hizaʼi, na öʼomusoiʼö dödö Yehowa, hasambalö tola öʼomusoiʼö fefu dödö niha sangomasiʼö Yehowa.”

9. Hewisa Yehowa ba wanolonia Usia? (2 Ngaʼötö 26:​1-5)

⁹ Oʼö gangetula si sökhi nihalö Usia. So wangide-ngideʼö khö Usia me awuyu-wuyu ndröfinia. Ifahaʼö ia ”ba wangataʼufi Lowalangi sindruhu”. Auri ia sagötö zi 68 fakhe, ba arakhagö sandrohu faʼaurinia ifahowuʼö ia Yehowa. (Baso 2 Ngaʼötö 26:​1-5.) Ato nudu si no ikalaisi ba iʼaroʼö mbanua Yeruzalema. (2 Ng. 26:​6-15) Sindruhu-ndruhu irasoi waʼomuso dödö Usia börö wanolo nitemania moroi khö Lowalangi.—Sango. 3:​12, 13.

10. Hadia zalua khö Usia ba gafuriata waʼaurinia?

¹⁰ Famahaʼö moroi ba gangetula si fasala nihalö Usia. No toʼölö Razo Usia ba wangoni mazui ba wofaretakö niha böʼö. Tola manö daʼö mbörö wa so ba dödönia lö moguna saʼae iʼoʼö gamakhoita Lowalangi. Möi ia ba gosali Yehowa ba si fao faʼasiliyawa itunu zumange somuhua ba naha wanunu sumange. Sindruhunia lö latehegö khö razo ba wamalua daʼö. (2 Ng. 26:​16-18) Iʼanemaiʼö itegu ia Ere Sebua Asaria, hizaʼi mofönu sibai Usia. Börö me lö irorogö waʼalöfaröinia Usia, lua-luania ihuku ia Yehowa faoma bou auri. (2 Ng. 26:​19-21) Tatu lö alua khönia daʼö na lö tebulö iʼokhögö wangide-ngideʼö!

11. Hadia zanolo yaʼita enaʼö lö tebulö taʼokhögö wangide-ngideʼö? (Faigi göi gambara.)

¹¹ Me itugu monönö waʼabölö Usia, olifu ia wa Yehowa zameʼe khönia faʼabölö hegöi ngawalö zi sökhi. Hadia wamahaʼö nihalöda? Böi olifu ita wa Yehowa zameʼe ngawalö zi sökhi ba waʼaurida hegöi halöwö ba wamosumange yaʼia. Moroi na fayawa ita ba zi no takhamö, abölö sökhi na taʼandrö saohagölö khö Yehowa börö wanolo nitemada moroi khönia. b  (1 Ko. 4:7) Na so khöda wangide-ngideʼö, tafaduhuʼö wa lö moʼahonoa ita ba moguna khöda degu-tegu. Imane talifusöda si no töra 60 fakhe, ”Moguna ufahaʼö ndraʼo enaʼö böi alio tetutu dödögu mazui ide-ide dödögu na so zamatunö khögu sala nifaluagu. Itaria na ufalua zala side-ide ba labeʼe khögu degu-tegu, utemaʼö daʼö ba lö tebulö ufalua zabölö sökhi khö Yehowa.” Sindruhunia, na taʼoʼö Yehowa ba lö tebulö taʼokhögö wangide-ngideʼö, hasambalö tarasoi waʼomuso dödö sindruhu ba waʼauri.—Amd. 22:4.

12. Hadia nifalua Yosia me awuyu-wuyu ia si tobali tandra wa iʼalui Yehowa? (2 Ngaʼötö 34:​1-3)

¹² Oʼö gangetula si sökhi nihalö Yosia. Awena 16 fakhe ndröfi Yosia me ibörögö wangalui Yehowa. Omasi ia ba wamahaʼö yaʼia sanandrösa khö Yehowa hegöi ba wamalua somasi Yehowa. Hizaʼi, lö aoha khö razo si bohou ebua andre ba wamalua yaʼia. Me luo daʼö, ato niha samosumange lowalangi faya. Börö daʼö, moguna barani Yosia ba wangoʼawögö famosumange satulö. Daʼö nifaluania! Fatua lö irugi 20 fakhe ndröfi Yosia, no ibörögö wangohori famosumange faya ba soi andrö.—Baso 2 Ngaʼötö 34:​1-3.

13. Hadia mbuania na ölulu waʼaurimö khö Yehowa?

¹³ Hewaʼae awuyu-wuyu ndröfimö, tola öhalö gangetula ba woloʼö duma-duma Yosia. Fahaʼö ndraʼugö sanandrösa khö Yehowa hegöi amuatania sahöli-höli dödö. Na öfalua daʼö, tola terou dödöu ba wolulu faʼaurimö khönia. Hadia nirasoimö na no ölulu waʼaurimö khö Yehowa? Imane Luke si no tebayagö idanö me 14 fakhe ndröfinia, ”Iʼotarai me uhalö gangetula andrö, uʼofönaiʼö wamosumange hegöi ba wangomusoiʼö tödö Yehowa ba waʼaurigu.” (Mrk. 12:30) Na öfalua göi zimane daʼö, hasambalö ötema howu-howu!

14. Beʼe duma-duma ndra si bohou ebua soloʼö Razo Yosia.

¹⁴ Hadia daha-taha si tola manö alua khö zi bohou ebua samosumange Yehowa? Ifatunö Johan si no tebayagö idanö me 12 fakhe ndröfinia wa ladönisi dödönia ira awönia sekola ba wangogunaʼö roko elektrik mazui vape. Ba wanimbagö fondrönisi dödö andrö, itörö tödönia hadia lua-luania na iʼogunaʼö daʼö, he ba mbotonia hegöi ba wahuwusania khö Yehowa. Rachel si no tebayagö idanö me 14 fakhe ndröfinia,  ifatunö hadia zanolo yaʼia ba wanaögö abula dödö salua khönia ba zekola. Imane, ”Gofu hadia niʼilagu, uʼalui hadia gamakhaitania daʼö ba Zura Niʼamoniʼö mazui khö Yehowa. Duma-dumania, na lafahaʼö ndraʼaga ba sejarah, itörö tödögu ayati mazui famaʼeleʼö Zura Niʼamoniʼö. Ba ginötö fahuhuodo khö ndra awögu ba zekola, uʼangeragö hadia ayati si tola ubaso khöra.” Hewaʼae faböʼö gabula dödö salua khömö ba zalua khö Razo Yosia, hizaʼi tola atua-tua ba lö faröi ndraʼugö simane yaʼia. Na mofozu ndraʼugö wanaögö abula dödö salua ba waʼawuyu-wuyumö, tola tefaʼanö ndraʼugö ba wanaögö abula dödö tanö böʼö salua ba zi so miföna.

15. Hadia zanolo Yosia enaʼö lö faröi ia ba wamosumange Yehowa? (2 Ngaʼötö 34:​14, 18-21)

¹⁵ Me 26 fakhe ndröfi Razo Yosia, ibörögö ba wangehaogö mangawuli osali Lowalangi. Sagötö mufalua halöwö andrö, musöndra ”mbuku Goroisa Yehowa nifaʼemania khö Moze”. Me labaso khö razo mbuku andrö, iʼanemaiʼö ifalua wombulöʼö ba woloʼö si no tesura. (Baso 2 Ngaʼötö 34:​14, 18-21.) Hadia omasiʼö ba wombaso Sura Niʼamoniʼö ero maʼökhö? Te no öbörögö ba wamalua daʼö. Hadia so khöu waʼomuso dödö? Hadia öʼalui ba ösura ayati si tola manö moguna khöu samösa? Luke si no mutötöi moroi yawa no mege, isura hadia manö zadöni dödönia ba ayati si no ibaso. Na öfalua zimane daʼö, tetolo ndraʼugö enaʼö lö alio olifuʼö ayati Zura Niʼamoniʼö hegöi famahaʼö si no öfahaʼö yaʼugö. Na itugu aboto ba dödöu ba itugu öʼomasiʼö Zura Niʼamoniʼö, itugu adöni dödöu ba wamosumange Yehowa. Simane Razo Yosia, tefarou göi dödöu ba wamalua Taromali Lowalangi.

16. Hana wa ifalua zala Yosia, ba hadia wamahaʼö nihalöda?

¹⁶ Famahaʼö moroi ba gangetula si fasala nihalö Yosia. Te me 39 fakhe ndröfi Yosia, so zala nifaluania irege teʼala waʼaurinia. Abölö iʼodaligö waʼabölönia samösa ba lö iʼandrö wanuturu lala moroi khö Yehowa. (2 Ng. 35:​20-25) So wamahaʼö si tola tahalö. Gofu hawaʼalawa  ndröfida mazui no ara tafahaʼö ita ba Zura Niʼamoniʼö, böi tebulö taʼalui Yehowa. Dataʼandrö wanuturu lala moroi khönia ero maʼökhö, tafahaʼö ita ba Daromalinia, ba tatemaʼö mene-mene moroi ba niha Keriso saro ba wamati. Na tafalua daʼö, lö alio tedönisi dödöda ba wamalua sala, ba hasambalö itugu monönö waʼomuso dödöda.—Yak. 1:25.

17. Hadia wamahaʼö nihalöda khö ndra razo si datölu moroi ba Yehuda?

¹⁷ Oya zi tola öfalua fatua awuyu-wuyu ndraʼugö nasa. Waö-waö waʼauri Yehoasi, Usia hegöi Yosia zangoromaʼö wa tola lahalö gangetula satua-tua ira si bohou ebua ba laʼomusoiʼö dödö Yehowa. Sindruhu sa, ba gafuriata so zala nifaluara irege teʼala waʼaurira. Hizaʼi, na taʼoʼö zi sökhi nifaluara ba tatimbagö wamalua sala simane nifaluara, hasambalö taʼokhögö waʼomuso dödö ba waʼauri.

18. Haniha duma-duma sangoromaʼö wa tola öʼokhögö waʼomuso dödö ba waʼauri? (Faigi göi gambara.)

¹⁸ Ba Zura Niʼamoniʼö, so ayati sanutunö waö-waö ndra si bohou ebua tanö böʼö si fahuwu khö Yehowa, sangomusoiʼö tödönia, mazui si no mofozu ba waʼauri. Duma-dumania simane Dawido. Hewaʼae awuyu-wuyu ia, ihalö gangetula ba wamosumange Lowalangi ba tobali ia razo si lö faröi. Hewaʼae no hauga kali ifalua zala, hizaʼi ba wamaigi Lowalangi yaʼia andrö niha si lö faröi. (1 Ra. 3:6; 9:​4, 5; 14:8) Tola teʼabölöʼö ba tefarou dödömö na öfahaʼö ndraʼugö ba waö-waö waʼauri Dawido hegöi faʼalöfaröinia ba wamosumange Lowalangi. Mazui tola öfahaʼö ndraʼugö ba duma-duma Mareko hegöi Timoteo. Labörötaigö lafosumange Yehowa me awuyu-wuyu nasa ira ba lö tebulö larorogö waʼalöfaröira. Larasoi waʼomuso dödö börö me lahalö gangetula ba wamosumange hegöi ba wangomusoiʼö tödö Yehowa.

19. Hewisa wangogunaʼömö faʼaurimö iadaʼa?

¹⁹ Lala wangogunaʼömö faʼaurimö iadaʼa, tola molua-lua ia ba waʼaurimö ba zi so miföna. Na öʼodaligö Yehowa tenga faʼatua-tuamö samösa, daʼö zanolo yaʼugö ba wangai angetula si sökhi. (Amd. 20:24) Tola ösöndra waʼohahau dödö ba so mbuania khöu. Törö tödöu wa hasambalö iʼameʼegö tödö Yehowa fefu zi no öfalua khönia. Lö hadöi lala waʼauri sabölö sökhi baero wamosumange Amada Yehowa si so ba zorugo safönu faʼomasi!