1. Hadia zi toröi-röi ba dödö niha me awena laʼondrasi gangowuloa? (Faigi göi gambara.)

 KHALAIGÖ zi sambua fongambatö me awena sibai laʼondrasi Nahia Gangowuloa Ndra Samaduhuʼö Yehowa. Toröi-röi sibai ba dödöra börö me so ndra talifusöda zanemaʼö yaʼira ba faoma laforomaʼö waʼomasi. Me mangawuli ira, imane foʼomonia ira alawe, ’Faböʼö sibai ndra Samaduhuʼö Yehowa andre moroi ba danö böʼö. Omasido sibai falukha khöra.’

2. Hadia manö mbörö wa so ösa zawuwu ba wamati?

² No sahöli-höli dödö waʼomasi ba gotalua nono mbanua Yehowa. Hizaʼi, tenga niha soʼahonoa ndra Samaduhuʼö Yehowa. (1 Yo. 1:8) Börö daʼö, na itugu aboto ba dödöda ndra talifusöda ba mbanua niha Keriso, itugu taʼila wa lö moʼahonoara. (Rom. 3:23) Alimagö sibai, so ösa niha zawuwu ba wamati börö wa lö moʼahonoa niha böʼö, ba gafuriata labato wamosumange Yehowa.

3. Hadia dandra niha Keriso sindruhu? (Yohane 13:34, 35)

³ Fuli faigi ayati nihalö si tobali duho ba artikel andre. (Baso Yohane 13:34, 35.) Tola oroma ba niha böʼö wa yaʼita andre niha Keriso sinduruhu börö me taforomaʼö waʼomasi soroi ba dödö, tenga börö me moʼahonoa ita. Lö imane wangumaʼö Yesu, ”Aboto ba dödömi wa no nifahaʼögu ami.” Hizaʼi imane wangumaʼö, ”Aboto ba dödö niha fefu wa no nifahaʼögu ami.” Ba daʼa iforomaʼö Yesu wa fefu niha, he si so bakha mazui baero mbanua niha Keriso, tola laʼila haniha zindruhu soloʼö khö Keriso.

4. Hadia manö wanofu-nofu nifaʼema zi tenga Samaduhuʼö Yehowa?

 ⁴ Te so ösa zi tenga Samaduhuʼö Yehowa, manofu-nofu ira: ’Hana wa faʼomasi andrö zi tobali tandra niha Keriso sindruhu? Hewisa wangoromaʼö Yesu faʼomasi khö ndra sinengenia? Hadia tola taʼoʼö duma-duma niforomaʼö Yesu iadaʼa?’ Yaʼita Samaduhuʼö, moguna taʼangeragö wanema li moroi ba zinofu-nofu andrö. Na tafalua daʼö, tola taʼosindruhugö wangoromaʼö faʼomasi, mendrua manö na taʼila wa lö moʼahonoa niha böʼö.—Ef. 5:2.

5. Hadia geluaha wehede Yesu ba Yohane 15:12, 13?

⁵ Itutunö Yesu wa ira nifahaʼönia laforomaʼö waʼomasi si tohude khö nawöra zamösana. (Baso Yohane 15:12, 13.) Ifaretakö ndra nifahaʼönia imane, ”Miʼomasiʼö nawömi simane fangomasiʼögu yaʼami.” Hadia geluaha daʼa? Simane nitutunö Yesu aefa daʼö, moguna laforomaʼö waʼomasi si fao faʼaohagölö. Daʼa zamarou niha Keriso ba wanehegö nosonia salahi dalifusönia ba wamati. b

6. Hewisa wangoromaʼö Daromali Lowalangi wa moguna sibai waʼomasi andrö?

⁶ Taromali Lowalangi zamahaʼö yaʼita wa faʼomasi andrö no amuata sabölö moguna. Duma-dumania, nehegö ösa ayati daʼa: ”Lowalangi andrö no faʼomasi.” (1 Yo. 4:8) ”Omasiʼö nawöu simane faʼomasiu ndraʼugö.” (Mat. 22:39) ”Oya ibalugö horö faʼomasi andrö.” (1 Fe. 4:8) ”Si lö mamalö-malö waʼomasi andrö.” (1 Ko. 13:8) Ato niha zomasi ayati daʼö. Moroi ba ayati daʼa hegöi ayati tanö böʼö, tola tafahaʼö ita wa moguna tadouʼö ba taforomaʼö gamuata si sökhi andre.

7. Hana wa tebai ifahaʼö niha Satana enaʼö teʼosambuaʼö ba faoma laʼomasiʼö nawöra?

⁷ Ato niha zanofu, ’Hewisa enaʼö tola uʼila hezo agama sindruhu? Fefu agama  lafaduhuʼö wa sindruhu nifahaʼöra. Hizaʼi, no faböʼö-böʼö wamahaʼöra sanandrösa khö Lowalangi.’ Ato niha zanofu simane daʼö börö me no oya agama sofaya nifasindro Zatana. Hizaʼi, tebai iʼosambuaʼö niha moroi ba ngawalö soi ba faoma laʼomasiʼö nawöra. Ha Yehowa zi tola mamalua daʼö. Tefaudu daʼa börö me moroi khö Yehowa waʼomasi soroi ba dödö. Börö daʼö, ha niha nifahowuʼö geheha niʼamoniʼö zi tola sindruhu-ndruhu mangomasiʼö awönia. (1 Yo. 4:7) Andrö imane Yesu wangumaʼö wa ha soloʼö khönia zi tola mangoromaʼö faʼomasi soroi ba dödö ba si lö mangalui tana khönia.

8-9. Hewisa dödö niha sato me laʼila waʼomasi ba gotalua nono mbanua Yehowa?

⁸ Simane si no ifaʼeleʼö Yesu, ato niha zangila haniha zindruhu-ndruhu soloʼö khönia börö me laforomaʼö waʼomasi ba gotaluara. Nehegö zi no irai alua khö dalifusöda Ian me awena sibai iʼondrasi gangowuloa sebua ba zi sambua regional nifalua ba stadion olahraga sahatö ba nomonia. Hauga waŵa silalö, no ifaigi pertandingan olahraga ba stadion daʼö. Imane wangumaʼö, ”Faböʼö sibai zalua ba gangowuloa sebua daʼa. Laʼameʼegö tödö nawöra zamösana, sökhi lagu wonukhara, ba ahono göi ndraonora.” Inönö nasa wangumaʼö, ”Sabölö tohudenia, na ufaigi so khöra waʼahono dödö hegöi faʼatulö, ba daʼö niʼalui-aluigu. Lö itörö tödögu huhuo sebua nifaʼema me luo daʼö, hizaʼi toröi-röi khögu gamuatara si sökhi.” c Tola sökhi gamuata ndra Samaduhuʼö, börö me faoma laʼomasiʼö nawöra. Sindruhu sa, börö me taʼomasiʼö ndra talifusöda tola sökhi gamuatada khöra ba tafosumange ira.

⁹ Simanö göi nirasoi dalifusöda John me awena sibai iʼondrasi gangowuloa. Imane wangumaʼö, ’Toröi-röi ba dödögu waʼafahuwu niha ba daʼö, hulö zimane malaʼika ira. Faʼomasira soroi ba dödö zamaduhuʼö ba dödögu wa no usöndra agama sindruhu.’ d Salua andre zangoromaʼö wa ono mbanua Yehowa no niha Keriso sindruhu.

10. Hadia manö ginötö ba wangoromaʼö faʼomasi khö ndra talifusöda? (Faigi nisura ba gahe zura.)

¹⁰ Simane si no mututunö moroi yawa, lö moʼahonoa fefu ndra talifusöda. Itaria lawaʼö mazui lafalua zi möi fangabao dödöda. e (Yak. 3:2) Ba ginötö alua zimane daʼö, daʼö ginötö khöda ba wangoromaʼö faʼomasi ba wehede hegöi ba nifaluada. Börö daʼö, hadia wamahaʼö si tola tahalö moroi ba duma-duma Yesu?—Yoh. 13:15.

11. Hadia gamuata si lö sökhi niforomaʼö Yakobo hegöi Yohane? (Faigi göi gambara.)

¹¹ Lö itötöna waʼamoʼahonoa khö ndra soloʼö khönia Yesu. Hizaʼi, si fao faʼomasi itolo ira enaʼö laʼehaogö gamuatara irege tola laʼomusoiʼö dödö Yehowa. Samuza inötö, so darua ndra sinengenia sotöi Yakobo hegöi Yohane, laʼandrö khö ninara enaʼö iʼandrö khö Yesu ba wameʼe khöra dadaoma sabölö tohude ba Wamatörö Lowalangi. (Mat. 20:20, 21) Daʼö zangoromaʼö wa Yakobo hegöi Yohane so khöra gamuata faʼasiliyawa, ba omasi ira na yaʼira zabölö tohude moroi ba niha böʼö.—Amd. 16:18.

12. Hadia ha Yakobo ba Yohane zangoromaʼö amuata si lö sökhi? Tutunö.

 ¹² Me laʼandrö ira Yakobo hegöi Yohane dadaoma si tohude khö Yesu, tenga ha yaʼira zangoromaʼö amuata si lö sökhi. Nehegö hadia zalua khö ndra sinenge tanö böʼö me larongo daʼö. Imane Sura Niʼamoniʼö, ”Me larongo daʼö ira nifahaʼö si dafulu, mofönu ira khö zi darua si fatalifusö andrö.” (Mat. 20:24) Yakobo, Yohane ba simanö göi ndra sinenge tanö böʼö, abölö-bölö sibai wabuʼa-buʼasara. Te so zangumaʼö, ’Hana wa miʼandrö dadaoma sabölö tohude ba Wamatörö? Hadia mimane wangumaʼö wa abölö pade ami moroi khöma? No göi maforege wohalöwö wefao khö Yesu. Börö daʼö, sinangea na matema dadaoma si tohude andrö!’ Lö taʼila sibai hadia niwaʼö mazui nifalua ndra sinenge tanö böʼö. Hizaʼi sino tatu, ba ginötö daʼö lö laforomaʼö waʼomasi hegöi faʼasökhi dödö khö nawöra zamösana.

13. Hadia nifalua Yesu me iʼila wa lö moʼahonoa ndra sinengenia? (Mataiʼo 20:25-28)

¹³ Hadia nifalua Yesu me iʼila wa lö moʼahonoa ndra sinengenia? Lö mofönu ia, ba lö göi imane wangumaʼö wa iʼalui niha böʼö si so fangide-ngideʼö, ba si so faʼomasi si tobali fangali ndra sinengenia. Hizaʼi, iʼamenesi ira si fao faʼebolo dödö börö me iʼila wa sindruhunia omasi ira wamalua satulö. (Baso Mataiʼo 20:25-28.) Lö tebulö iforomaʼö waʼasökhi dödö khö ndra nifahaʼönia Yesu, hewaʼae  na no hauga kali lafadöni haniha zabölö ebua ba gotaluara.—Mrk. 9:34; Luk. 22:24.

14. Hewisa waö-waö lala waʼauri ndra sinenge Yesu ba zilalö?

¹⁴ Tola ebolo dödö Yesu khö ndra sinengenia börö me iʼila hewisa waö-waö lala waʼauri ndra sinengenia ba zilalö. (Yoh. 2:24, 25) Ba mbanua niʼebuaʼö yaʼira, lafahaʼö niha ira sangila amakhoita hegöi ira Farizaiʼo wa dadaoma si tohude andrö sabölö moguna. (Mat. 23:6; fatimbaisi video Tempat Duduk Paling Depan di Sinagoga ba keterangan tambahan ba Mataiʼo 23:6.) Baero daʼö, ira sondröniaʼö agama Yahudi lamane tödöra abölö sökhi ira moroi ba ba niha böʼö. f (Luk. 18:9-12) Aboto ba dödö Yesu wa lala wangera-ngera ndra sondröniaʼö ba agama andrö, tola molua-lua khö ndra sinengenia sanandrösa ba wamaigira yaʼira samösa hegöi ba wamaigira niha böʼö. (Amd. 19:11) Lö itötöna Yesu waʼamoʼahonoa ndra nifahaʼönia, ba lö mofönu ia me lafalua zala. Aboto ba dödö Yesu, wa sindruhunia sökhi dödöra. Börö daʼö, ebolo dödönia ba wanolo yaʼira enaʼö tola latiboʼö gamuata faʼasiliyawa andrö, irege so khöra wangide-ngideʼö ba faʼomasi.

15. Hadia wamahaʼö si tola tahalö ba zalua khö Yakobo, Yohane hegöi ira sinenge tanö böʼö?

¹⁵ Oya wamahaʼö si tola tahalö khö Yakobo, Yohane hegöi ira sinenge tanö böʼö. Atulö sa, Yakobo hegöi Yohane sindruhunia tebai laʼandrö dadaoma si tohude ba Wamatörö Lowalangi. Hizaʼi, fasala göi ndra sinenge tanö böʼö börö me nifaluara andrö tola tekiko wahasara dödö ba gotaluara. Hewaʼae simanö, lö tebulö iforomaʼö Yesu waʼasökhi dödö hegöi faʼomasi khö ndra sinengenia si-12. Hadia wamahaʼönia? Na so niha samalua sala, moguna taʼangenanöi nifaluada. Moguna so khöda waʼebolo dödö ba taforomaʼö khönia waʼomasi. Hadia zanolo yaʼita? Ba ginötö so khöda waʼabao dödö khö ndra talifusöda, tola taʼangerönusi wanofu-nofu andre: Hana wa tola abao dödögu ba nifaluania andrö? Hadia faʼabao dödögu andre zangoromaʼö wa so gamuatagu si lö sökhi sinangea ubulöʼö? Hadia so gabula dödö nitaögö niha sameʼe abao dödögu andrö? Hewaʼae na so börö waʼabao dödögu, hadia tola uforomaʼö waʼomasi ba lö uʼebua-buaʼö zala niha daʼö? Na lö tebulö taforomaʼö waʼomasi khö ndra talifusöda, no taforomaʼö wa sindruhu-ndruhu soloʼö khö Keriso ita.

16. Hadia nasa wamahaʼö si tola tahalö ba duma-duma nibeʼe Yesu?

¹⁶ Moroi ba duma-duma Yesu, tola tafahaʼö ita wa moguna taforege enaʼö aboto ba dödöda ndra talifusöda. (Amd. 20:5) Sindruhu sa, tenga simane Yesu ita. Lö taʼila nösi dödö niha. Hizaʼi, tola so khöda waʼebolo dödö ba ginötö taʼila wa lö moʼahonoa ndra talifusöda. (Ef. 4:1, 2; 1 Fe. 3:8) Tola itugu aoha khöda wamalua daʼö, na aboto ba dödöda hewisa waö-waö lala waʼaurira. Nehegö sambua duma-duma.

17. Hadia mbua nitema si samösa satua samasui me iforege enaʼö aboto ba dödönia zi samösa talifusöda ba wamati?

¹⁷ Samösa zatua samasui moroi ba Afrika Timur, itutunö sanandrösa khö zi samösa dalifusöda si no irai ifalukhaisi. Ba wamobörö, amuʼi sibai ba wamaiginia dalifusöda andrö. Hadia nifalua zatua samasui andrö? Lö iröi  dalifusöda no mege, hizaʼi iforege enaʼö sindruhu-ndruhu aboto ba dödönia dalifusöda andrö. Me ibeʼe ginötönia zatua samasui khö dalifusöda no mege, ba gafuriata iʼila hewisa waö-waö lala waʼauri dalifusöda andrö irege molua-lua daʼö ba gamuatania. Me no aefa aboto ba dödö zatua samasui wamorege nifalua dalifusöda andrö ba wombulöʼö amuatania, ahöli dödönia khö dalifusöda no mege. Ba gafuriata, tobali ira si fahuwu si sökhi. Na taforege enaʼö aboto ba dödöda ndra talifusöda, itugu aoha khöda ba wangoromaʼö faʼomasi khöra.

18. Hadia wanofu-nofu sinangea taʼangeragö na so ndra talifusöda zangafökhöiʼö tödöda? (Amaedola 26:20)

¹⁸ Itaria tarasoi wa moguna fahuhuo ita ba niha sangafökhöiʼö tödöda. Hizaʼi, fatua lö tafalua daʼö, moguna taʼangeragö wanofu-nofu andre: ’Hadia sindruhu-ndruhu aboto ba dödögu zalua?’ (Amd. 18:13) ’Hadia iʼodödögö niha daʼö ba wangafökhöiʼö tödögu?’ (Sango. 7:20) ’Hadia no irai ufalua zala simane nifaluania?’ (Sango. 7:21, 22) ’Na fahuhuodo khönia, hadia tola teʼasiwai gabula dödö andrö, mazui hadia itugu ebua?’ (Baso Gamaedola 26:20.) Na taʼangeragö wanofu-nofu simane daʼö, tola aboto ba dödöda wa sindruhunia tola taʼolifugö zala niha daʼö börö me taʼomasiʼö ia.

19. Hadia gangetulau?

¹⁹ Ira Samaduhuʼö Yehowa, no sindruhu-ndruhu soloʼö khö Yesu. Fefu ita taforomaʼö wa yaʼita andre sindruhu-ndruhu soloʼö khö Yesu börö me taforomaʼö waʼomasi si lö mangalui tana khöda khö ndra talifusöda hewaʼae na lö moʼahonoa ira. Na tafalua daʼö, tola tatolo niha böʼö enaʼö aboto ba dödöra wa ira Samaduhuʼö Yehowa no agama satulö, ba omasi ira farahu khöda ba wamosumange Yehowa, Lowalangi sebua faʼomasi. Yalötebulö taforomaʼö waʼomasi khö nawöda zamösana.