1-2. Hadia zi toʼölö taʼila ba tarongo na so niha nibayagö idanö, ba hadia nitutunöda ba artikel daʼa?

 HADIA no irai öʼila ngawawa niha sedöna mubayagö idanö? Örongo wanema li soroi ba dödö nibeʼera ba zi dombua fanofu fatua lö tebayagö ira idanö. Öʼila hawaʼomuso dödö nösi nomora hegöi ira awö-awöra wamaigi yaʼira. Ba ginötö möi ira baero moroi ba nidanö, örongo li dawo-tawo ba öʼila waʼomuso dödö moroi ba zikhalara. Arakhagö ribu waʼato niha zolulu faʼaurinia khö Lowalangi Yehowa ero migu, ba tebayagö ira idanö tobali Samaduhuʼö khönia.

² Hewisa göi ndraʼugö? Hadia no so ba dödömö öfabayagöʼö ndraʼugö idanö? Na so, eluahania ’öʼalui Yehowa’, ba tatu omuso dödönia börö me no öfaböʼöni ndraʼugö moroi ba niha sato si so ba gulidanö si lö sökhi andre. (Si. 14:1, 2) Khöu mufanandrösa artikel daʼa, hewaʼae na awuyu-wuyu mazui no atua ndraʼugö. Yaʼita si no tebayagö idanö, moguna göi khöda artikel daʼa ba wangaʼaroʼö angetulada ba wamosumange Yehowa sagötö faʼara. Iadaʼa, datatutunö tölu dane-dane hana wa omasi ita tafosumange Yehowa.

3. Hana wa laʼomasiʼö zindruhu ono mbanua Yehowa? (Sinunö 119:128, 163)

³ Ifaretakö nono mbanuania Yehowa enaʼö ’laʼomasiʼö zindruhu’. (Zak. 8:19) Omasi göi Yesu na lagohi zindruhu ira nifahaʼönia. (Mat. 5:6) Eluahania, moguna taʼokhögö waʼomasi ba wamalua sindruhu, si sökhi ba lö raʼiö föna Lowalangi. Hadia öʼomasiʼö zindruhu? Faduhu dödöma wa öʼomasiʼö zindruhu. Fatuwu ndraʼugö ba walimosa hegöi ngawalö zi lö sökhi. (Baso Zinunö 119:128, 163.) Niha si falimo, sindruhunia no iʼoʼö Zatana samatörö ulidanö andre. (Yoh. 8:44; 12:31)  Iʼotarai me föna, no iböbögö zi lö duhu Satana khö Lowalangida me alua wamadaö ba Kabu Edena. Ohitö dödönia enaʼö teʼobousi döi Yehowa niʼamoniʼö. Iforege sibai ba wamatumbuʼö ba wangera-ngera niha wa Yehowa andrö Samatörö sangalui tana khönia, si falimo, ba lö ibeʼe zi sökhi ba niha. (1 Mo. 3:1, 4, 5) Irugi iadaʼa, ato niha si lö mangokhögö lala wangera-ngera satulö sanandrösa khö Yehowa börö walimosa Zatana. Na lö ’iʼomasiʼö zindruhu’ si samösa niha, tola idönisi lala wangera-ngerania Satana ba wamalua ngawalö zi lö sökhi.—Rom. 1:25-31.

4. Hadia zangoromaʼö wa Yehowa andrö ”Lowalangi sindruhu”? (Faigi göi gambara)

⁴ Yehowa andrö ”Lowalangi sindruhu”, ba si fao faʼasökhi dödö ifahaʼö zindruhu ba niha sangomasiʼö yaʼia. (Si. 31:5) Börö me ifalua daʼö, itolo ira enaʼö lö telimo ba walimosa Zatana. Ifahaʼö göi nono mbanuania Yehowa enaʼö tobali niha satulö ba latörö zindruhu. Andrö wa tola larasoi waʼahono dödö ba laʼokhögö döi si sökhi. (Amd. 13:5, 6) Hadia no örasoi fefu daʼö me öfahaʼö ndraʼugö ba Zura Niʼamoniʼö? No öfahaʼö ndraʼugö ba goi-goi Yehowa, goi-goi sabölö sökhi soguna ba niha fefu hegöi khöu samösa. (Si. 77:13) Daʼö mbörö wa omasi ndraʼugö wamalua satulö moloʼö Lowalangi. (Mat. 6:33) Omasi göi ndraʼugö wamatunö ba niha böʼö sanandrösa ba zindruhu, ba öforomaʼö khöra wa lö atulö niböbögö Zatana khö Lowalangida Yehowa. Hewisa wamaluau daʼö?

5. Hewisa wangoromaʼöu wa öʼomasiʼö zindruhu?

⁵ Tola öforomaʼö wa öʼomasiʼö zindruhu moroi ba lala waʼaurimö, ba lö öfaduhusi tödö walimosa Zatana. Hulö na ömane wangumaʼö, ”Omasido na Yehowa Zamatörö yaʼo, ba ufalua zatulö ba wamaiginia.” Hewisa wamaluau daʼö? Moguna ölulu waʼaurimö khö Yehowa ba wangandrö, ba öfabayagöʼö ndraʼugö idanö enaʼö laʼila niha wa no ölulu waʼaurimö. Na öʼomasiʼö zindruhu, daʼö zamarou yaʼugö enaʼö tebayagö idanö.

6. Simane nitutunö ba Zinunö 45:4, hana wa öʼomasiʼö Yesu Keriso?

⁶ Hana wa öʼomasiʼö Yesu Keriso? Nehegö dane-danenia ba Zinunö 45:4. (Baso.) Ba wamaigi Yesu, sindruhu, fangide-ngideʼö, hegöi faʼatulö andrö no tohude sibai. Na öʼomasiʼö zindruhu hegöi faʼatulö, tola öʼomasiʼö Yesu Keriso, börö me lö khönia faʼataʼu ba  wamaduhuʼö sindruhu. (Yoh. 18:37) Baero daʼö, ifahaʼö niha enaʼö laʼokhögö wangide-ngideʼö. Hewisa wamaluania daʼö?

7. Hadia zadöni dödöu ba wangide-ngideʼö niʼokhögö Yesu?

⁷ Tobali duma-duma Yesu ba wangoromaʼö fangide-ngideʼö. Duma-dumania, lö tebulö ifolakhömi Namania, tenga yaʼia samösa. (Mrk. 10:17, 18; Yoh. 5:19) Hewisa dödöu na öʼangeragö wangide-ngideʼö niʼokhögö Yesu? Tatu tefarou dödöu ba wangomasiʼö yaʼia, ba öʼoʼö duma-dumania. Hana wa so khö Yesu wangide-ngideʼö? Börö me iʼomasiʼö ba iʼoʼö Namania sangokhögö fangide-ngideʼö.(Si. 18:35; Heb. 1:3) Moʼahonoa woloʼö Yesu gamuata Yehowa. Daʼa zamarou yaʼugö ba wangomasiʼö yaʼia.

8. Hana wa omasi ita na Yesu zi tobali Razoda?

⁸ Tatu omasi ita na Yesu zi tobali Razoda. Hadia mbörö? Börö me yaʼia andrö Samatörö sabölö sökhi. Yehowa samösa zamahaʼö ba samataro Ononia tobali Razo. (Yes. 50:4, 5) Iʼomasiʼö sibai ita Yesu, irege itehegö nosonia salahida. (Yoh. 13:1) No sinangea taʼomasiʼö Yesu si tobali Razoda. Itutunö Yesu wa niha sangomasiʼö yaʼia nifotöinia si fahuwu khönia, lafalua hadia niwaʼönia. (Yoh. 14:15; 15:14, 15) No töi si sökhi khöda me tola fahuwu khö Nono Lowalangi!

9. Hadia zi fagölö ba wamayagö idanö Keriso hegöi famayagö idanö ndra nifahaʼönia?

⁹ Hadia sambua fareta Yesu khö ndra nifahaʼönia? Ifaretakö ira enaʼö tebayagö idanö. (Mat. 28:19, 20) No ibeʼe ia duma-duma Yesu, ifabayagöʼö ia idanö. Sindruhu sa, so ösa gamaehuta famayagö idanö Yesu moroi ba wamayagö idanö ndra nifahaʼönia. (Faigi kotak ” Amaehuta Wamayagö Idanö Yesu moroi ba Wamayagö Idanö Ndra Nifahaʼönia”.) Hizaʼi, so göi waʼafagölönia. Tebayagö idanö Yesu ba wangoromaʼö wa no ifaʼanö ia ba wamalua ohitö dödö Namania. (Heb. 10:7) Hulö simane daʼö ndra nifahaʼönia, lalulu waʼaurira khö Lowalangi Yehowa ba tebayagö idanö. Daʼö zangoromaʼö wa laʼosambuaʼö dödöra ba wamalua ohitö dödö Yehowa, tenga somasi-masi ira samösa. Börö daʼö, laʼoʼö duma-duma Zoʼaya yaʼira.

10. Hadia manö mbörö wa öʼomasiʼö Yesu, ba hadia zi sökhi si tola öfalua?

¹⁰ Faduhu dödömö wa Yesu andrö Ono si hasambua khö Yehowa, ba yaʼia Razo nifataro Lowalangi ba wamatörö yaʼita. Aboto ba dödömö wa so khö Yesu wangide-ngideʼö, ba moʼahonoa woloʼönia khö Namania. No öfahaʼö ndraʼugö wa no irai ibeʼe gö niha solofo, iʼabölöʼö niha sarasa tödö, ba ifadöhö niha sofökhö. (Mat. 14:14-21) Ba öʼila göi hewisa ia wondröniaʼö mbanua niha Keriso iadaʼa. (Mat. 23:10) Aboto ba dödömö wa oya nasa nifaluania ba zi so miföna börö me Razo ia ba Wamatörö Lowalangi. Hewisa wangoromaʼömö wa öʼomasiʼö ia? Yaʼia daʼö, na öʼoʼö duma-dumania. (Yoh. 14:21) Tola öbörögö wamalua daʼö na ölulu waʼaurimö khö Yehowa ba tebayagö idanö.

11. Moloʼö yaʼugö, hadia dane-dane si oföna wa tebayagö ndraʼugö idanö?

¹¹ Hadia dane-dane si oföna sibai wa tebayagö ndraʼugö idanö? Fanema linia oroma ba wehede Yesu me ifatunö fareta Lowalangi sabölö tohude. Imane, ”Omasiʼö Yehowa Lowalangiu moroi siʼaikö ba dödöu, nosou maʼasambua, era-erau ba faʼabölöu maʼafefu.” (Mrk. 12:30) Hadia simane daʼö waʼomasimö khö Lowalangi?

12. Hana wa öʼomasiʼö Yehowa? (Faigi göi gambara)

¹² Oya sibai mbörö wa öʼomasiʼö Yehowa. Duma-dumania, aboto ba dödöu wa yaʼia  andrö ’umbu waʼauri’. Ba öʼila göi ’fefu mbuala si sökhi ba soʼahonoa’ moroi khönia. (Si. 36:9; Yak. 1:17) Fefu ngawalö zi sökhi sameʼe omuso dödöu, tohare daʼö moroi khö Lowalangida sebua faʼomasi ba soböwö.

13. Hana wa no buala sebua mböli höli andrö?

¹³ Höli andrö no buala fondrege zebua böli moroi khö Yehowa. Hadia mbörö? Angeragö atö, fahuwu sibai Yehowa khö Nononia. Imane Yesu wa iʼomasiʼö sibai ia Amania, ba yaʼia samösa göi iʼomasiʼö Namania. (Yoh. 10:17; 14:31) Itugu fahuwu ira börö me lö tebulö falulu fohalöwö ira sagötö zi miliaran fakhe faʼara. (Amd. 8:22, 23, 30) Iadaʼa, tola ökhalaigö hawaʼafökhö nirasoi Yehowa me tefakao ba mate Nono niʼomasiʼönia börö ita. Iʼomasiʼö sibai fefu niha Yehowa, tefarahu ba daʼö ndraʼugö, irege itehegö mate Nono niʼomasiʼönia enaʼö tola ösöndra waʼauri si lö aetu simanö göi niha böʼö. (Yoh. 3:16; Gal. 2:20) Daʼa dane-dane saro ba wangomasiʼö Lowalangi.

14. Hadia gangetula sabölö sökhi si tola öhalö?

¹⁴ Na itugu oya öfahaʼö ndraʼugö sanandrösa khö Yehowa, itugu ebua waʼomasimö khönia. Tatu, omasiʼö na lö tebulö ahatö ndraʼugö khö Yehowa sagötö faʼara, ba tola öfalua daʼö. Si fao faʼasökhi dödö ifatunö khöu wa tola öʼomusoiʼö dödönia. (Amd. 23:15, 16) Tola öʼomusoiʼö dödönia tenga ha ba wehede, hizaʼi  ba nifaluau. Tola öforomaʼö ba lala waʼaurimö wa sindruhu-ndruhu öʼomasiʼö Yehowa. (1 Yo. 5:3) No angetula sabölö sökhi daʼö si tola öhalö.

15. Hadia zinangea öfalua ba wangoromaʼö wa öʼomasiʼö Yehowa?

¹⁵ Hadia zinangea öfalua ba wangoromaʼö wa öʼomasiʼö Yehowa? Si oföna, ölau mangandrö ba wolulu faʼaurimö khö Yehowa, Lowalangi sindruhu si hasambua. (Si. 40:8) Aefa daʼö, moguna öfabayagöʼö ndraʼugö idanö ba wangoromaʼö wa no ölulu waʼaurimö. Simane si no tatutunö ba artikel daʼa, famayagö idanö no angetula si tohude ba solohe faʼomuso dödö. Iʼotarai daʼö, tenga ha khömö waʼaurimö hizaʼi khö Yehowa. (Rom. 14:8; 1 Fe. 4:1, 2) Sindruhu sa, örasoi wa no angetula sebua daʼö. Hizaʼi törö tödömö, ba ginötö tebayagö idanö ndraʼugö sindruhunia no öhalö gangetula fondrege zi sökhi ba waʼaurimö. Hadia mbörö?

16. Simane nitutunö ba Zinunö 41:12, hadia howu-howu nibeʼe Yehowa ba niha solulu faʼaurinia khönia?

¹⁶ Yehowa andrö no Lowalangi soböwö sibai. Gofu hawaʼoya nibeʼemö khönia, ba hasambalö oya nasa nibeʼenia khömö. (Mrk. 10:29, 30) Ibeʼe khöu waʼauri si sökhi, moʼeluaha waʼauriu, ba so khöu waʼomuso dödö hewaʼae toröiʼö ba gulidanö si lö sökhi andre. Famayagö idanö nifaluamö, awena famobörö daʼö. Tenga daʼö wozunia. Tola anau gölöu wamosumange Yehowa, Ama niʼomasiʼöu sagötö faʼara. Itugu tedou waʼomasimö khö Yehowa ba lö tebulö auri ndraʼugö sagötö auri Yehowa, eluahania sagötö faʼara.—Baso Zinunö 41:12.

17. Hadia zi tola öbeʼe khö Yehowa si lö niʼokhögönia?

¹⁷ Irugi iadaʼa, no oya ngawalö zi sökhi ba sangomusoiʼö tödöu nibeʼe Yehowa. Ba ginötö ölulu waʼaurimö ba tebayagö idanö, eluahania no öbeʼe wondrege zebua böli khönia. No öbeʼe khö Zokhö banua si yawa awö danö si lö niʼokhögönia, yaʼia daʼö folulu faʼauri soroi ba dödöu. (Yob. 1:8; 41:11; Amd. 27:11) Daʼö lala sabölö sökhi ba wangogunaʼö faʼauriu. Sindruhu sa, fangomasiʼö Yehowa dane-dane si oföna enaʼö tebayagö ndraʼugö idanö.

18. Hadia manö wanofu sinangea öʼangeragö?

¹⁸ Hadia no öfaʼanö ndraʼugö enaʼö tebayagö idanö? Yaʼugö samösa zangila daʼö. Börö daʼö, moguna öʼangeragö wanofu andre: ’Hana wa lö ufabayagöʼö ndraʼo idanö?’ (Hal. 8:36) Törö tödöu zi tölu ngawalö si tola mamarou tödöu enaʼö tebayagö idanö. Si oföna, moguna öʼomasiʼö zindruhu. Si dua, öʼomasiʼö Yesu Keriso. Si tölu, sabölö moguna omasiʼö Yehowa. Iadaʼa, angeragö wanofu-nofu andre: Hadia no ubalo-baloi ginötönia lafalua ba lawaʼö zindruhu niha? Hadia omasido na Ono Lowalangi zi tobali Razogu, ba hadia omasido uʼoʼö duma-dumania? Hadia omasido uʼomusoiʼö dödö Yehowa ba ufosumange ia? Na daʼö wanema li moroi ba zinofu andrö yaʼia daʼö omasi, hadia nasa wa ötaha wa lö öfabayagöʼö ndraʼugö idanö?—Hal. 16:33.

19. Hana wa böi so khöu waʼaombö dödö enaʼö tebayagö idanö? Beʼe duma-duma. (Yohane 4:34)

¹⁹ Na so khöu waʼaombö dödö enaʼö tebayagö idanö, angeragö duma-duma nibeʼe Yesu. (Baso Yohane 4:34.) Imane wangumaʼö wa famalua somasi Namania no amedola gö. Hadia mbörö? Börö me gö andrö no soguna khöda, ba aboto ba dödö Yesu wa fefu zomasi Yehowa tafalua no soguna khöda. Lö iʼandrö khöda Yehowa zi möi famaʼalada. Hadia omasi Yehowa na tebayagö ndraʼugö idanö? Omasi. (Hal. 2:38) Börö daʼö, na tebayagö ndraʼugö idanö, hasambalö ötema mbuania. Na no labeʼe fönamö gö sabölö ami ba gulidanö andre, tatu lö aombö dödöu wemanga yaʼia. Börö daʼö, hana wa waʼaombö dödöu enaʼö tebayagö idanö?

20. Hadia nitutunöda ba artikel aefa daʼa?

²⁰ So ösa niha, lö lafabayagöʼö ira idanö börö me larasoi tebai nasa ira. Sindruhu sa, angetula ba wolulu faʼauri khö Yehowa ba tebayagö idanö, no angetula sabölö tohude. Börö daʼö, moguna ginötö, foʼangeragö, hegöi famorege enaʼö sinangea ita tebayagö idanö. Hizaʼi, na sindruhu-ndruhu omasiʼö tebayagö idanö, hadia zinangea öfalua? Ba artikel aefa daʼa tatutunö dania wanema linia.