1-2. Na lö mufaʼanöu ndraʼugö enaʼö tebayagö idanö, böi so khöu waʼide-ide dödö, hadia mbörö? (Faigi gambara ba guli majalah.)

 HADIA no so ba dödömö enaʼö tebayagö idanö ndraʼugö? Na so, no ohitö dödö si sökhi daʼö. Hadia no öfaʼanö ndraʼugö ba wangai angetula andrö? Na no öfaʼanö ndraʼugö ba fao dödö ndra satua sokubaloi, böi so khöu waʼaombö dödö enaʼö tebayagö idanö ba zi so miföna. Hasambalö örasoi waʼomuso dödö börö me öfosumange Yehowa.

² Hizaʼi, hewisa na lafatunö khömö wa moguna ödouʼö ndraʼugö ba wamati enaʼö tola tebayagö idanö? Mazui, hewisa na yaʼugö samösa zangila daʼö? Böi so khöu waʼide-ide dödö. Tola ödouʼö ndraʼugö ba wamati irege sinangea ndraʼugö tebayagö idanö, hewaʼae na awuyu-wuyu mazui na no alawa ndröfimö.

3. Hadia niwaʼö zalawa faka ba Gaitiofia khö Wilifo, ba hadia wanofu si tola tumbu ba dödöda? (Halöwö Zinenge 8:36, 38)

³ Baso Halöwö Zinenge 8:36, 38. Samösa zalawa faka ba Gaitiofia, manofu ia khö Wilifo imane, ”Hadia daha-tahagu wa lö ubayagö ndraʼo idanö?” Omasi sibai zalawa faka andrö na tebayagö idanö ia. Hizaʼi, hadia no ifaʼanö ia ba wangai angetula si tohude andrö?

4. Hadia zangoromaʼö wa lö aetu ifahaʼö ia salawa faka ba Gaitiofia?

⁴ Salawa faka moroi ba Gaitiofia andrö möi ia ”wamosumange Lowalangi ba Yeruzalema”. (Hal. 8:27) Tatu manö no ifalalini agamania ba no farahu ia ba agama Yahudi. No göi ifahaʼö ia sanandrösa khö Yehowa moroi ba Mbuku Niʼamoniʼö Heberaiʼo. Hizaʼi, omasi ia nasa ba wamahaʼö yaʼia. Me falukha Wilifo khö zalawa faka andre ba lala, iʼila ia Filifo me ibaso gölu-gölu zura Yesaya. (Hal. 8:28) No ö sabeʼe daʼö ba Zura Niʼamoniʼö. Lö omasi ia na ha dane-dane wamahaʼö niʼilania. Daʼö mbörö wa ifahaʼö ia nasa.

5. Hadia nifalua zalawa faka ba Gaitiofia ba wamahaʼö si no isöndra?

 ⁵ Salawa faka andrö, iʼokhögö dadaoma si tohude ba wamatörö Gandrake, Ratu niha Gaitiofia. Halöwönia ’ba wamatörö okhöta Gandrake’. (Hal. 8:27) Tatu oya sibai halöwönia. Hewaʼae simanö, ibeʼe ginötönia ba wamosumange Yehowa. Tenga ha ifahaʼö ia ba zindruhu, hizaʼi ifalua göi zi no ifahaʼö yaʼia. Börö daʼö, aröu lala itörö iʼotarai Gaitiofia numalö ba Yeruzalema ba wamosumange Yehowa ba gosali. Tatu oya ginötö hegöi kefe niʼogunaʼö ba wofanönia andrö. Hewaʼae simanö, itehegö daʼö fefu enaʼö tola ifosumange Yehowa.

6-7. Hadia mbörö wa itugu tedou waʼomasi zalawa faka ba Gaitiofia khö Yehowa?

⁶ Itolo zalawa faka ba Gaitiofia andrö Filifo enaʼö aboto ba dödönia ösa zindruhu si tohude, duma-dumania haniha Mesia. (Hal. 8:34, 35) Tatu tofakha sibai ba dödö zalawa faka andrö me iʼila hadia nifalua Yesu khönia. Hadia nifaluania? Sindruhunia, tola manö lö tebulö farahu ia ba agama Yahudi nifosumange. Hizaʼi, börö me iʼomasiʼö Yehowa hegöi Ononia, tefarou dödönia ba wangai angetula si tohude yaʼia daʼö ifabayagöʼö ia idanö tobali soloʼö khö Yesu Keriso. Me oroma wa no ifaʼanö ia salawa faka andrö, daʼö mbörö wa ibayagö ia idanö Filifo.

⁷ Na öʼoʼö duma-duma zalawa faka ba Gaitiofia andrö, tola tefaʼanö ndraʼugö enaʼö tebayagö idanö. Simane yaʼia, tola öwaʼö si fao faʼafaduhu dödö, ”Hadia Daha-tahagu wa lö ubayagö ndraʼo idanö?” Datatutunö hewisa lala enaʼö tola öʼoʼö duma-duma nifalua zalawa faka andrö. Lö tebulö ifahaʼö ia, ifalua zi no ifahaʼö yaʼia, ba idouʼö waʼomasinia khö Lowalangi.

8. Moloʼö Yohane 17:3, hadia zinangea öfalua?

⁸ Baso Yohane 17:3. Hadia fehede Yesu andre zamarou tödöu enaʼö öfahaʼö ndraʼugö ba Zura Niʼamoniʼö? Daʼö mbörö wa ato ndra talifusöda zomasi mamahaʼö yaʼira ba Zura Niʼamoniʼö. Fehede ba ayati andrö zangoromaʼö wa böi taböhöli wamahaʼö yaʼita. Lö irai ahori aboto ba dödöda sanandrösa khö ’Lowalangi sindruhu si ha sambua’. (Sango. 3:11) Lö tebulö tafahaʼö ita sanandrösa khönia sagötö faʼara. Itugu oya tafahaʼö ita, itugu ahatö ita khö Yehowa.—Si. 73:28.

9. Hadia zinangea tafalua me no aefa tafahaʼö ita ba dane-dane wamahaʼö Zura Niʼamoniʼö?

⁹ Me ibörögö tafahaʼö ita sanandrösa khö Yehowa, ha dane-dane wamahaʼö Zura Niʼamoniʼö nifahaʼöda yaʼita. Moroi ba zurania ba niha Heberaiʼo, no irai itötöi sinenge sotöi Faulo sanandrösa ba ”wamahaʼö si oföna”, mazui ”dane-dane” wamahaʼö. Hizaʼi,  tenga daʼö geluahania wa lö moguna khönia dane-dane wamahaʼö ba Zura Niʼamoniʼö. Iʼamaedolagö daʼö simane susu sameʼe tedou mboto nono sawuyu. (Heb. 5:12; 6:1) Hewaʼae simanö, iʼamenesi fefu niha Keriso enaʼö lafahaʼö ira ba zindruhu sanandrösa ba gö sabeʼe ba Daromali Lowalangi. Hadia no ödouʼö waʼomasimö ba wamahaʼö yaʼugö sanandrösa ba gö sabeʼe ba Zura Niʼamoniʼö? Hadia omasiʼö tedou ba wamati ba lö öböhöli öfahaʼö ndraʼugö sanandrösa khö Yehowa hegöi ohitö dödönia?

10. Hana wa so ösa zorasoi wa abua sibai wamalua famahaʼö?

¹⁰ Ato moroi ba gotaluada zorasoi wa abua sibai wamalua famahaʼö. Hewisa moloʼö yaʼugö? Hadia lahaogö lafahaʼö ndraʼugö ba zekola ba wombaso hegöi ba wamahaʼö? Hadia omuso dödöu na öfalua wamahaʼö ba örasoi mbuania? Mazui, hadia örasoi wa lö oya mbua nitemau na öfalua wamahaʼö wangogunaʼö buku? Na daʼö nirasoimö, törö tödömö wa ato niha zorasoi simane daʼö. Yafaduhu dödöu tola itoloʼö Yehowa. Moʼahonoa ia, ba no Samahaʼö fondrege zi sökhi.

11. Hadia zangoromaʼö wa Yehowa andrö ”Samahaʼö Fondrege zi Sökhi”?

¹¹ Iwaʼö Yehowa wa yaʼia andrö ”Samahaʼö Fondrege zi Sökhi”. (Yes. 30:20, 21) Samahaʼö sebolo tödö, si sökhi tödö ba lö fatandro. Inehe-nehegö hadia zi sökhi si so ba dödö nifahaʼönia. (Si. 130:3) Ba lö irai iʼandrö khöda si töra moroi ba waʼabölöda. Törö tödöu, yaʼia zamazökhi utoda, ba no buala sahöli-höli dödö daʼö. (Si. 139:14) No itanögö ba dödöda wa omasi ba wamahaʼö yaʼita samösa. Omasi Zomböi yaʼita na lö taböhöli wamahaʼö yaʼita sagötö faʼara, ba omasi ia na owua-wua dödöda wamalua daʼö. Andrö, iʼotarai iadaʼa moguna ’tadouʼö waʼomasi’ ba wamahaʼö yaʼita ba zindruhu si so ba Zura Niʼamoniʼö. (1 Fe. 2:2) Tatugöi gohitö dödö si tola ökhamö, ba fazökhi jadwal ba wombaso hegöi ba wamahaʼö yaʼugö ba Zura Niʼamoniʼö. (Yos. 1:8) Börö wanolo Yehowa, itugu omuso dödöu ba wombaso hegöi ba wamahaʼö yaʼugö sanandrösa khönia.

12. Hana wa moguna tafahaʼö ita ba waö-waö waʼauri Yesu hegöi halöwö fanuriaigö nifaluania?

¹² Moguna göi owölö-ölö ita woʼangerönusi waö-waö waʼauri hegöi fanuriaigö Yesu. Na omasi ita wamosumange Yehowa, moguna tahaogö wanara lahe Yesu töra-töra ba ginötö si basaki. (1 Fe. 2:21) Iʼombakhaʼö khö ndra soloʼö khönia Yesu wa hasambalö lataögö ngawalö waʼabasaki. (Luk. 14:27, 28) Hizaʼi, faduhu dödönia khö zoloʼö yaʼia si lö faröi, wa tola anau gölöra khö Lowalangi, simane nifaluania. (Yoh. 16:33) Andrö, fahaʼö ndraʼugö ba waö-waö waʼauri Yesu ba oʼö duma-dumania ba waʼaurimö sero maʼökhö.

13. Hadia zi lö mamalö-malö taʼandrö khö Yehowa ba hadia mbörö?

¹³ Ba ginötö tafahaʼö ita, hadia ha ba wanöndra faʼaboto ba dödö gohitö dödöda? Tenga. Ohitö dödöda si oföna yaʼia daʼö enaʼö itugu aboto ba dödöda Yehowa, tadouʼö bua-bua si sökhi simane faʼomasi ba enaʼö itugu mamati ita khönia. (1 Ko. 8:1-3) Börö daʼö, ba ginötö öfahaʼö ndraʼugö, böi böhöli andrö khö Yehowa enaʼö itugu tedou wamatimö ibeʼe. (Luk. 17:5) Si fao faʼasökhi dödö, hasambalö itema li wangandrömö. Na öʼokhögö wamati saro si teʼodane-dane ba waʼaboto ba dödö si tefaudu sanandrösa khö Lowalangida, hasambalö itugu tedou ndraʼugö ba wamati.—Yak. 2:26.

14. Hewisa wangoromaʼö Fetero wa moguna tafalua zi no tafahaʼö yaʼita? (Faigi göi gambara)

¹⁴ Iforomaʼö zinenge sotöi Fetero wa moguna lafalua zi no lafahaʼö yaʼira, ira soloʼö khö Keriso. Itutunö sanandrösa ba waö-waö  Noakhi si so ba Zura Niʼamoniʼö. Imane Yehowa khö Noakhi wa hasambalö ihori niha si lö sökhi ba götönia faoma molö sebua. Na ha asala aboto ba dödö Noakhi hegöi ösi nomonia sanandrösa ba waʼatohare molö andrö, ba lö hadöi nifaluara hadia ia, tatu lö teʼorifi ira. Hizaʼi nehegö atö, fahuhuo Wetero sanandrösa ba götö fatua lö Anönö Danö Idanö, yaʼia daʼö sagötö ”famazökhi owo”. (1 Fe. 3:20) Börö daʼö, Noakhi hegöi ösi nomonia lafalua hadia zi no aboto ba dödöra. Lafazökhi nowo, mazui göfa sabölö ebua. (Heb. 11:7) Ifagölöisi nifalua Noakhi andrö Wetero simane famayagö idanö. Imane, ”Daʼö amaedola wombayagö idanö, sangorifi yaʼami iadaʼa.” (1 Fe. 3:21) Börö daʼö, famorege nifaluamö iadaʼa enaʼö tola tebayagö idanö, tola mufagölösi daʼö ba halöwö famazökhi owo nifalua Noakhi hegöi ösi nomonia ba zi hauga fakhe. Hadia manö zinangea öfalua enaʼö tefaʼanö ndraʼugö tebayagö idanö?

15. Hewisa wangoromaʼöda wa sindruhu-ndruhu no tafalalini gera-erada?

¹⁵ Sambua lala zinangea tafalua yaʼia daʼö tafalalini gera-erada moroi ba horöda. (Hal. 2:37, 38) Na sindruhu-ndruhu no tafalalini gera-erada, eluahania no tabulöʼö lala waʼaurida. Hadia no öröi ngawalö zi fatuwu khö Yehowa, simane famalua amuata wohorö, fangogunaʼö mbago, mazui fehede si lö sökhi ba sangafökhöiʼö tödö? (1 Ko. 6:9, 10; 2 Ko. 7:1; Ef. 4:29) Na lö nasa öbato wamalua daʼö, forege wamalua fombulöʼö. Fatunöisi khö zamahaʼö yaʼugö ba Zura Niʼamoniʼö mazui sofu khö ndra satua sokubaloi ba mbanua niha Keriso ba wanolo yaʼugö. Na awuyu-wuyu nasa ndröfimö, ba toröiʼö khö ndra satuamö, böi böhöli wangandrö tolo khöra enaʼö tola öröi zi lö sökhi si toʼölö öfalua si tobali mbörö wa lö tebayagö ndraʼugö idanö.

16. Hadia manö halöwö ba wamati zinangea tafalua enaʼö owölö-ölö ita wamosumange Yehowa?

¹⁶ Moguna göi owölö-ölö ita wamosumange Yehowa. Sambua lalania, yaʼia daʼö na taʼondrasi gangowuloa ba tabeʼe mbua gera-erada. (Heb. 10:24, 25) Ba na no sinangea tobali ndraʼugö sanuriaigö, yaʼowölö-ölö ndraʼugö wamalua halöwö fanuriaigö. Na itugu asese möiʼö manuriaigö, itugu örasoi waʼomuso dödö wamalua yaʼia. (2 Ti. 4:5) Na awuyu-wuyu nasa ndraʼugö, ba toröiʼö khö ndra  satuamö, angeragö daʼa: ’Hadia moguna lafasugi ba dödögu ira satuagu ba wangondrasi angowuloa mazui feʼamöi manuriaigö? Mazui, hadia mbörö waʼomasigu samösa wa ufalua daʼö?’ Na öfalua halöwö wamati simane daʼö börö waʼomasiu samösa, eluahania no öforomaʼö wamatimö, faʼomasimö, hegöi fangandrö saohagölö khö Lowalangi Yehowa. Halöwö wamati nifaluamö, no sumange daʼö khö Yehowa ba wangoromaʼö wa no ölulu waʼaurimö khönia. (2 Fe. 3:11; Heb. 13:15) Fefu zumange nibeʼeda si fao faʼaohagölö, tatu möi fangomuso dödö Lowalangida. (Fareso göi 2 Korindro 9:7.) Omasi ita ba wamalua fefu halöwö ba wamati börö me omuso dödöda ba wameʼe fondrege zi sökhi khö Yehowa.

17-18. Hadia zinangea öʼokhögö enaʼö tebayagö idanö, ba hadia mbörö? (Amaedola 3:3-6)

¹⁷ Ba ginötö ödouʼö ndraʼugö ba wamati enaʼö tebayagö idanö, oya dania wanandraigö nitaögömö. So ösa zangoʼaya ndraʼugö börö wamatimö. So göi zi fatiu tödö ba samakao yaʼugö. (2 Ti. 3:12) Ba ginötö öforege ba wondröi si lö sökhi si toʼölö öfalua, itaria ifuli zui öfalua ia. Mazui lö ebolo dödöu ba so khöu wa abao dödö börö me oya ginötö niʼogunaʼömö awena tebayagö ndraʼugö idanö. Börö daʼö, moguna öʼokhögö waʼomasi khö Yehowa. Daʼö zabölö moguna si tola manolo yaʼugö enaʼö anau gölöu.

¹⁸ Ebua sibai böli waʼomasimö khö Yehowa töra moroi ba gofu hadia ia niʼokhgömö. (Baso Gamaedola 3:3-6.) Na aro waʼomasimö khö Lowalangi, tola mofozu ndraʼugö ba wanaögö faʼabasaki. Asese itötöi Sura Niʼamoniʼö sanandrösa ba waʼomasi Yehowa si lö faröi khö nono mbanuania. Börö me so khö Yehowa waʼomasi si lö faröi, lö irai iröi nono mbanuania mazui iböhöli wangomasiʼö yaʼira. (Si. 100:5) Tewöwöi ndraʼugö si fakhili-khili khö Lowalangi. (1 Mo. 1:26) Börö daʼö, hewisa woloʼömö faʼomasinia si lö faröi?

19. Hadia zinangea öfalua enaʼö itugu öʼandrö saohagölö khö Yehowa? (Galatia 2:20)

¹⁹ Andrö saohagölö khö Yehowa. (1 Te. 5:18) Tandraigö angeragö daʼa ero maʼökhö, ’Hewisa wangoromaʼö Yehowa faʼomasinia khögu maʼökhö daʼa?’ Aefa daʼö, faʼema wangandrö saohagölö khö Yehowa ba wangandrö. Zara-zara wanutunö khönia hadia zi no ifalua khömö. Simane sinenge sotöi Faulo, moguna aboto ba dödömö waʼomasi niforomaʼö Yehowa khöu börö me iʼomasiʼö ndraʼugö. (Baso Galatia 2:20.) Tandraigö angeragö, ’Hadia omasido göi  ba wangoromaʼö faʼomasigu khö Yehowa?’ Na öʼomasiʼö Yehowa, tola ötimbagö wondrönisi dödö ba mofozu ndraʼugö ba wanaögö faʼabasaki. Tola göi tefarou ndraʼugö ba wangaʼaroʼö famatiu ero maʼökhö. Na öfalua daʼö, tola öforomaʼö ero maʼökhö wa öʼomasiʼö Namamö si so ba zorugo.

20. Hadia zinangea öfalua ba wolulu faʼaurimö khö Yehowa, ba hana wa moguna sibai öhalö gangetula andrö?

²⁰ Ba ginötö tumbu waʼomasiu khö Yehowa, tefarou ndraʼugö ba wanutunö ösi dödöu khönia ba wangandrö, ba öfatunö khönia wa omasiʼö ölulu waʼauriu. Törö tödöu, na no ölulu waʼauriu tola öʼokhögö dötönafö sahöli-höli dödö andre: Tola tobali tana khö Yehowa ndraʼugö sagötö faʼara. Buʼusa limö ba wolulu faʼauri zangoromaʼö wa omasiʼö wamosumange Yehowa ba ginötö waʼomuso dödö hegöi na so wangabu dödö. Buʼusa limö andrö ha sakali irugi zi lö aetu. Folulu faʼauri no angetula si tohude sibai. Angeragö atö daʼa: Oya gangetula sinangea öhalö ba waʼaurimö, ba so ösa zi sökhi moroi ba gotaluania. Hizaʼi, angetula ba wolulu faʼauri khö Yehowa, no angetula sabölö sökhi si tola öhalö. (Si. 50:14) Iforege Satana ba wowuwu faʼomasimö khö Yehowa enaʼö faröi ndraʼugö khönia. Böi tehegö möna Zatana! (Yob. 27:5) Na sindruhu-ndruhu öʼomasiʼö Namamö si so ba zorugo, tola mofozu ndraʼugö ba wamuʼa mbuʼusa limö, ba itugu fahuwu ndraʼugö khönia.

21. Hana wa famayagö idanö andre awena mböröta wangaʼiu halöwö khö Yehowa?

²¹ Na no ölulu waʼauriu khö Yehowa, fatunö khö ndra satua sokubaloi ba mbanua niha Keriso wa no öfaʼanö ndraʼugö wangai angetula si tohude aefa daʼö, yaʼia daʼö famayagö idanö. Törö tödöu wa famayagö idanö awena mböröta wangaʼiu halöwö khö Yehowa sagötö faʼara. Börö daʼö, iʼotarai iadaʼa douʼö waʼomasimö khö Yehowa. Tatugöi gohitö dödömö si tola manolo yaʼugö ba wangomasiʼö yaʼia ero maʼökhö. Na öfalua daʼö, tola tefarou dödömö enaʼö tebayagö idanö. Ngaluo tebayagö ndraʼugö idanö, no ngaluo si tohude. Hizaʼi, awena famobörö daʼö. Yalötebulö ödouʼö waʼomasimö khö Yehowa hegöi Ononia sagötö faʼara!