1. Hadia nitötöna zatua ba ndraonora?

 YAʼAMI satua, tatu omasi ami ba wanolo iraonomi enaʼö aboto ba dödöra Yehowa ba laʼomasiʼö ia. Hizaʼi, lö oroma Lowalangi. Börö daʼö, hewisa lalami ba wanolo yaʼira enaʼö aboto ba dödöra wa sindruhu-ndruhu so Yehowa ba tola ahatö ira khönia?—Yak. 4:8.

2. Hewisa zatua ba wamahaʼö iraonora sanandrösa ba gamuata Yehowa?

² Sambua lala si tohude ba wanolo iraono enaʼö ahatö khö Yehowa yaʼia daʼö na fao ami khöra ba wamalua famahaʼö ba Zura Niʼamoniʼö. (2 Ti. 3:14-17) Hizaʼi, so lala tanö böʼö niʼombakhaʼö Zura Niʼamoniʼö khöda ba wamahaʼö iraono sanandrösa khö Yehowa. Ba buku Gamaedola, so wehede si samösa ama samasugi ba dödö nononia enaʼö lö iʼolifugö gamuata Yehowa niʼilania ba niwöwöi. (Amd. 3:19-21) Datatutunö ösa hewisa lala zatua ba wangogunaʼö niwöwöi ba wanolo iraonora sanandrösa ba gamuata Yehowa.

3. Hadia wanolo nibeʼe zatua ba ndraonora?

³ Imane Sura Niʼamoniʼö, ”Hewaʼae lö oroma Lowalangi, tola laʼila hewisa ia sindruhunia moroi ba niwöwöinia iʼotarai me tefazökhi gulidanö . . . börö me tola aboto ba dödöra nifazökhinia.” (Rom. 1:20) Yaʼami satua te omasi ami ba wangohorigö inötömi wefao ba ndraonomi ba wanörö-nörö. Ba ginötö simane daʼö, mitolo ndraonomi ba wamahaʼö yaʼira sanandrösa  ba gamuata Yehowa sahöli-höli dödö moroi ba niwöwöinia. Hewisa lalania? Nehegö duma-duma Yesu.

4. Hewisa wangogunaʼö Yesu ngawalö niwöwöi ba wamahaʼö ira nifahaʼönia? (Luka 12:24, 27-30)

⁴ Asese iʼogunaʼö niwöwöi Yesu ba wamahaʼö niha böʼö. Samuza inötö, iʼandrö khö ndra nifahaʼönia ba wonehegö wofo gaga hegöi bunga lili. (Baso Luka 12:24, 27-30.) Tola manö itötöi Yesu döi gurifö mazui sinanö tanö böʼö, hizaʼi ifili wofo mazui mbunga sasese laʼila ira nifahaʼönia. Te no irai laʼila wofo gaga sihombo ba dalu mbanua hegöi bunga lili ba mbenua. Tola manö ituturu wofo mazui mbunga lili andrö Yesu me itutunö sanandrösa ba daʼö. Hadia nifaluania aefa daʼö? Ibeʼe khöra wamahaʼö si tohude sanandrösa ba waʼoböwö hegöi faʼasökhi dödö Namania: Itatugöi Yehowa enaʼö tebönökhi fefu zoguna khö nono mbanuania, duma-dumania ö hegöi niʼonukha, simane nifaluania ba wofo gaga hegöi bunga lili ba mbenua.

5. Hewisa zatua wangogunaʼö niwöwöi ba wamahaʼö iraonora sanandrösa khö Yehowa?

⁵ Yaʼugö satua, hewisa woloʼömö duma-duma Yesu ba wamahaʼö iraonomö? Tola öfatunö ba ndraonomö sambua niwöwöi Lowalangi sadöni dödömö, simane urifö mazui sinanö. Aefa daʼö, tutunö khönia hadia wamahaʼö nihalömö sanandrösa khö Yehowa moroi ba niwöwöinia andrö. Aefa daʼö, tola ösofu ba ndraonomö hadia gurifö mazui sinanö somasi ia. Na ödunö-dunö zadöni dödö ba ndraonomö, tola itugu aoha khöra wamondrondrongo yaʼugö ba ginötö öfahaʼö ira sanandrösa ba gamuata Yehowa.

6. Hadia wamahaʼö si tola tahalö moroi ba duma-duma zatua Christopher?

⁶ Yaʼami satua, lö moguna miʼodödögö sibai wamahaʼö yaʼami sanandrösa ba gurifö mazui sinanö ba wamahaʼö iraonomi sanandrösa khö Yehowa. Mböröta, lö izara-zara wanutunö Yesu hewisa na manga wofo gaga, mazui hewisa waʼatedou mbunga lili. Sindruhu sa, te omasi ndraonomö na abölö oya ötutunö sanandrösa ba niwöwöi. Hizaʼi itaria, bua gera-era mazui fanofu sadogo-dogo no obönö daʼö ba wanolo yaʼira. Nehegö zi no irai alua khö dalifusöda Christopher. Itutunö me ide-ide ia, ”Asese ibeʼe mbua gera-era sadogo-dogo mamagu ba wanolo yaʼaga enaʼö maʼameʼegö tödö niwöwöi si so ba zi fasuima. Duma-dumania, me möiga ba hili, imane mamagu, ’Alawa sibai hili daʼa, ba sökhi sibai na tafaigi! No si fahöna faʼabölö Yehowa!’ Mazui me möiga ba nasi, imane, ’Nehegö ndrulu nasi sebua andrö! Abölö sibai Yehowa.’” Imane Christopher, ”Hewaʼae na adogo-dogo mbua gera-era andrö, hizaʼi molua-lua sibai daʼö ba waʼaurima.”

7. Hewisa lalamö ba wamahaʼö iraonomö enaʼö laʼangeragö sanandrösa ba niwöwöi?

⁷ Na itugu ebua-bua ndraonomö, tola öfahaʼö ira ba woʼangeragö sanandrösa ba niwöwöi hegöi ba wamahaʼö yaʼira sanandrösa ba gamuata Yehowa moroi ba niwöwöinia andrö. Tola ötutunö sambua duma-duma niwöwöi Lowalangi ba ösofu khöra, ”Hadia wamahaʼö nihalömö sanandrösa khö Yehowa moroi ba niwöwöinia andrö?” Tola manö tokea ndraʼugö me örongo wanema li nibeʼera.—Mat. 21:16.

8. Hadia zi tola lafalua ira satua ba Gizaraʼeli na fao ira ”ba lala” khö ndraonora?

⁸ Ira satua ba Gizaraʼeli, labeʼe khöra fareta ba wamahaʼö iraonora sanandrösa ba goroisa Yehowa ba ginötö so ira ”ba lala”. (5 Mo. 11:19) Me mowaö-waö ira, latörö mbanua side-ide si so ba Gizaraʼeli, ba daʼö tola laʼila  ngawalö gurifö, fofo hegöi bunga. Tola laʼogunaʼö ginötö daʼö ira satua ba Gizaraʼeli, ba wamahaʼö iraonora sanandrösa ba niwöwöi Yehowa. Iadaʼa göi, so ginötö simane daʼö khö ndra satua ba wamahaʼö iraonora sanandrösa khö Yehowa yaʼia daʼö na laʼogunaʼö niwöwöi. Nehegö hewisa ndra satua wamalua daʼö.

9. Hadia wamahaʼö nihalöda ba zalua khö Punitha hegöi Katya?

⁹ Imane si samösa ina sotöi Punitha si toröi ba mbanua sebua ba India, ”Me ma ondrasi nösi nomoma si toröi ba mbanua side-ide, maʼogunaʼö ginötö daʼö ba wamahaʼö iraonoma sanandrösa ba niwöwöi Yehowa sahöli-höli dödö. Urasoi, abölö oya wamahaʼö nihalö ndraonogu sanandrösa ba niwöwöi na lö hadöi yaʼira ba nahia sato niha mazui ba lala si rami.” Yaʼami satua, tola manö lö olifu ndraonomi ginötö si no mibeʼe khöra wefao ba nahia si sökhi. Samösa dalifusöda ira alawe sotöi Katya moroi ba Moldova, imane, ”Mböröta, hauga kali iʼohe ndraʼo satuagu ba mbanua side-ide. Daʼö ginötö si tebai uʼolifugö me ide-idedo. Uʼandrö sibai saohagölö börö me lafahaʼö ndraʼo iʼotarai ba waʼide-ide ba wonehegö niwöwöi hegöi ba wamahaʼö yaʼo sanandrösa khö Yehowa moroi ba niwöwöi andrö.”

10. Hadia zi tola lafalua ira satua na tebai möi ira ba mbanua side-ide? (Faigi kotak ” Fanolo khö Ndra Satua.”)

¹⁰ Hewisa na tebai möiʼö ba mbanua side-ide? Samösa dalifusöda ira matua moroi ba India, imane, ”Ba mbanuagu, maʼö-maʼökhö mohalöwö zatua, ba moguna khöra gefe sebua awena tola möi ira ba mbanua side-ide. Hewaʼae simanö, tola nasa manehegö niwöwöi Yehowa ba ginötö so ndraʼaga ba taman mazui ba kaki lima.” Na öhaogö önehegö tola ösöndra ngawalö niwöwöi si tola öforomaʼö ba ndraonomö. (Si. 104:24) Tola öʼila ngawalö wofo, serangga, sinanö hegöi  tanö böʼönia. Samösa dalifusöda ira alawe sotöi Karina moroi ba Jerman, imane, ”Omasi sibai mamagu mbunga. Me ide-idedo, asese iforomaʼö khögu mbunga sibaga-baga ero mofanö ndraʼaga.” Yaʼami satua, tola göi mifahaʼö ndraonomi na miʼogunaʼö video hegöi publikasi sanandrösa ba niwöwöi si no ifazökhi organisasida. Gofu hezo so toröi ndraʼugö, tola ötolo ndraonomö ba wonehegö niwöwöi Lowalangi. Iadaʼa, datatutunö ösa gamuata Yehowa si tola öfahaʼö khö ndraonomö.

11. Hewisa zatua ba wanolo iraonora enaʼö laʼila waʼomasi Yehowa?

¹¹ Enaʼö tola ötolo ndraonomö ba wangiʼila faʼomasi Yehowa, tola ötutunö khöra hewisa gurifö me ihaogö wondrorogö ononia. (Mat. 23:37) Tola göi ötutunö khöra sanandrösa ba niwöwöi si no faböʼö-böʼö. Karina, si no mututunö moroi yawa, imane, ”Me fao ndraʼaga wanörö-nörö mamagu, asese iʼandrö khögu enaʼö molombasega sabata ba manehegö ngawalö mbunga hegöi faʼasökhinia sangoromaʼö faʼomasi Yehowa. Hauga fakhe aefa daʼö, lö tebulö omasido sibai ba wonehegö ngawalö mbunga hegöi laʼa-laʼania si faböʼö-böʼö. Daʼö zamasugi ba dödögu wa iʼomasiʼö sibai ita Yehowa.”

12. Hewisa zatua ba wanolo iraonora ba wangiʼila faʼatua-tua Yehowa? (Sinunö 139:14) (Faigi göi gambara.)

¹² Moguna ötolo ndraonomö ba wangiʼila faʼatua-tua Yehowa. Abölö atua-tua Yehowa moroi khöda. (Rom. 11:33) Tola ötutunö hewisa wa tola tobali lawuo nidanö, aefa daʼö tewuʼa-wuʼa lawuo andrö ba nahia tanö böʼö. (Yob. 38:36, 37) Tola göi ötutunö hewisa wamazökhi ndroto-ndroto si so ba mbotoda sahöli-höli dödö. (Baso Zinunö 139:14.) Daʼö nifalua zi samösa ama sotöi Vladimir. Imane, ”Samuza maʼökhö, alabu nonoma ba gureta ba mesokho ia. Me no hauga hari, döhö zokhonia andrö. Yaʼo hegöi foʼomogu, matutunö khönia hewisa wamazökhi Yehowa sel-sel si so ba mbotoda irege tola döhö samösa zokhoda. Matutunö göi nasa khönia wa lö hadöi nifazökhi niha gulidanö si fagölö simane daʼö. Duma-dumania, simane moto si no tekiko börö me no fatandru, tebai ifazökhi samösa ia mangawuli. Daʼa zanolo onoma enaʼö aboto ba dödönia waʼatua-tua Yehowa.”

13. Hewisa zatua ba wanolo iraonora ba wangiʼila faʼabölö Yehowa? (Yesaya 40:26)

 ¹³ Iʼandrö khöda Yehowa ba wamaigi talu mbanua, ba taʼangeragö hewisa wangogunaʼönia faʼabölönia sahöli-höli dödö enaʼö lö tebulö so ndröfi ba nahiania. (Baso Yesaya 40:26.) Tola göi öʼandrö ba ndraonou ba wamaigi talu mbanua, ba laʼangeragö hadia niʼilara andrö. Samösa dalifusöda ira alawe moroi ba Taiwan, itutunö hewisa me ide-ide ia, ”Samuza inötö, malau mörö mamagu ba nose. Ba tola maʼila waʼoya ndröfi ba dalu mbanua börö me fandröndröu ndraʼaga moroi ba mbanua sebua safönu fandru. Me luo daʼö so wanaisi moroi khö ndra awö-awögu, irege so khögu waʼaombö dödö hadia tola anau gölögu ba wamosumange Yehowa. Iʼandrö khögu mamagu ba woʼangeragö sanandrösa ba waʼabölö Yehowa, niʼogunaʼönia ba wamazökhi ndröfi ba dalu mbanua. Ba ifasugi ba dödögu wa tola iʼogunaʼö waʼabölönia Yehowa ba wanolo yaʼo ba wanaögö fanaisi. Me no aefa unehegö niwöwöi, tefarou dödögu enaʼö itugu aboto ba dödögu Yehowa, ba uhalö gangetula enaʼö lö tebulö ufosumange ia.”

14. Hewisa zatua ba wanolo iraonora enaʼö laʼila wa Yehowa andrö no Lowalangi somuso tödö?

¹⁴ Niwöwöi Yehowa andrö zangoromaʼö wa yaʼia andrö no Lowalangi somuso tödö ba omasi ia na omuso dödöda. Lahaogö lanehegö ira niha sagatua-tua wa oya sibai gurifö somasi famai-mai, tefarahu ba daʼö wofo hegöi iʼa. (Yob. 40:20) Hadia noi irai maʼiki ndraonomö na laʼila gamuata gurifö si möi famaʼikida? Te maʼiki ira na laʼila nono mao so gohi-gohi naha mbana, mazui ono nasu si fabude-bude. Na öʼila maʼiki ira ba daʼö, fasugi ba dödöra wa Lowalangi nifosumangeda no Lowalangi somuso tödö.—1 Ti. 1:11.

15. Hadia zanolo satua enaʼö laʼila hadia niʼangeragö ndraonora? (Amaedola 20:5) (Faigi göi gambara.)

¹⁵ Itaria alawö ndraono ba wamatunö salua khöra khö zatua. Na simane daʼö ndraonomö, tola öforege ba wangiʼila hadia zi so ba gera-erara. (Baso Gamaedola 20:5.) So ösa zatua sangumaʼö wa abölö aoha khöra wamalua daʼö na fao ira khö ndraonora ba wamaigi si sökhi si so ba zi fasuira. Hadia mbörö? Börö me ba  ginötö daʼö lö hadöi si tola möi famangoloi dödö ndraono hegöi satua. Imane nasa si samösa ama sotöi Masahiko moroi ba Taiwan, ”Me mahorigö ginötöma wefao ba ndraonoma, duma-dumania möi ba hili mazui ba zinga nasi, ba ginötö daʼö lö oya halöwö si tola lafalua iraonoma. Daʼö mbörö wa aoha khöma ba wangiʼila hadia zi so ba gera-erara.” Katya, si no mututunö moroi yawa imane wangumaʼö, ”Na no mangawulido ba zekola, asese iʼohedo mamagu ba taman si sökhi. Börö me lö oya halöwö ba daʼö, tola aoha khögu wanutunö khö mamagu hadia zalua khögu ba zekola mazui niʼaombösigu tödö.”

16. Hewisa enaʼö so ginötömi yaʼami si sambua omo, ba miʼowua-wuaʼö dödömi ba niwöwöi Yehowa?

¹⁶ Na laʼogunaʼö ginötö ira satua wefao ba ndraonora ba wamaigi niwöwöi Yehowa, tola owua-wua dödöra ba itugu fahuwu ira. Imane Sura Niʼamoniʼö, so ’ginötö waʼiki’ ba so ’ginötö wanaoka-naoka’. (Sango. 3:1, 4, nisura ba gahe zura.) No ifazökhi Yehowa nahia si sökhi famaigi ba gulidanö andre enaʼö tola tasöndra waʼowua-wua dödö. Ato nösi nomo somuso tödö börö me labeʼe ginötöra wefao ba nösi nomora, duma-dumania möi ba zinga nasi, ba hili, mazui ba mbanua si gide-ide. Si toʼölönia, omasi ndraono na fagohi-gohi, ba fawude-wude ira ba taman, lafaigi gurifö, molangi ira ba nungo nidanö, danau, mazui asi. Oya ginötö enaʼö tola taʼokhögö waʼowua-wua dödö ba wamaigi faʼasökhi si so ba zi fasuida hegöi ngawalö niwöwöi Yehowa!

17. Hana wa moguna latolo ndraonora ira satua enaʼö owua-wua dödöra ba niwöwöi Lowalangi?

¹⁷ Ba gulidanö si bohou si no ifabuʼu Lowalangi, satua hegöi iraono laʼokhögö waʼowua-wua dödö ba niwöwöi Yehowa. Lö ataʼu ita ba gurifö ba lö göi ataʼu ira khöda. (Yes. 11:6-9) Oya ginötöda ba worasoi faʼomuso dödö ba niwöwöi Yehowa. (Si. 22:26) Hizaʼi yaʼami ira satua, böi mibaloi gulidanö si bohou awena mitolo ndraonomi enaʼö owua-wua dödöra ba niwöwöi. Na miʼogunaʼö niwöwöi ba wamahaʼö iraonomi sanandrösa khö Yehowa, tola larasoi simane nirasoi Razo Dawido me imane, ”Sindruhu waʼoya nifazökhi dangau yaʼugö Yehowa!”—Si. 104:24.