1. Hana wa adöni sibai dödö niha Mbabilona khö Danieli samaʼeleʼö?

 AWUYU-WUYU nasa Danieli me laʼoloiʼö ia ira niha Mbabilona, ba laʼohe ia ba mbanua si fandröndröu moroi ba Yeruzalema. Hewaʼae awuyu-wuyu nasa ia, hizaʼi adöni dödö ndra sohalöwö khö razo khönia. Laʼila wa no siga-siga ia, ba ösi nomonia tenga niha si toʼölö. (1 Sa. 16:7) Börö daʼö, lafahaʼö ia enaʼö tola mangai halöwö ia dania ba gödo razo.—Dan. 1:3, 4, 6.

2. Hewisa dödö Yehowa khö Danieli? (Hezekieli 14:14)

² Iʼomasiʼö sibai Danieli andrö Yehowa, tenga börö me siga-siga mazui börö me tohude halöwönia ba gödo razo, hizaʼi börö mbua-bua si sökhi niʼokhögönia hewaʼae awuyu-wuyu nasa ia. Sindruhunia, awena mato 20 fakhe ndröfi Danieli me iwaʼö Yehowa wa fagölö waʼalöfaröi Danieli simane Noakhi hegöi Yobi, ira matua sangokhögö töi si sökhi föna Lowalangi sandrohu faʼaurira. (1 Mo. 5:32; 6:9, 10; Yob. 42:16, 17; baso Hezekieli 14:14.) Ba lö tebulö iʼomasiʼö Danieli andrö Yehowa sandrohu faʼaurinia.—Dan. 10:11, 19.

3. Hadia dania nitutunöda ba artikel daʼa?

³ Ba artikel daʼa, tafahaʼö ita ba zi dombua gamuata Danieli irege ebua mbölinia föna Yehowa. Si oföna, taʼila dania hezo manö iforomaʼö gamuata daʼö. Aefa daʼö, taʼila dania hadia zanolo Danieli ba wondrouʼö amuata andrö. Safuria, tatutunö hewisa woloʼöda duma-duma nibeʼenia. Hewaʼae mufanandrösa artikel daʼa khö ndra si bohou ebua, fefu ita tola tahalö wamahaʼö moroi ba duma-duma Danieli.

4. Hadia nifalua Danieli ba wangoromaʼö faʼabarani? Beʼe duma-duma.

⁴ Niha si so faʼabarani tatu no irai larasoi waʼataʼu. Hizaʼi, lö awuwu ira ba wamalua si sökhi. Danieli andre ono matua si lö faʼatau. Datafaigi hewisa wangoromaʼönia faʼabarani ba zi dombua salua andre. Si oföna, alua ia mato dua fakhe me no ladudugö Yeruzalema ira niha Mbabilona. Razo Mbabilona sotöi Nebukanesa, iʼangifigö nadu sebua sataʼu niha famaigi. Iʼandrö khö ndra niha sagatua-tua, farahu ba daʼö Danieli, ba wanutunö fangifinia andrö awö geluahania. Na lö laʼila lafalua daʼö, hasambalö ibunu ira fefu. (Dan. 2:3-5) Na lö iʼanemaiʼö ifalua daʼö Danieli, ato niha si mate. Andrö wa ”möi [ia] khö Razo ba iʼandrö enaʼö mubeʼe khönia ginötö ba wanutunö eluaha wangifi Razo”. (Dan. 2:16) Moguna wamati hegöi faʼabarani khö Danieli börö me lö si tesura ba Zura Niʼamoniʼö wa no irai ifoʼeluaha wangifi. Iʼandrö khö ndra si fahuwu khönia ”enaʼö laʼangaröfili Lowalangi si so ba zorugo ba wangandrö faʼahakhö dödö ba wanutunö si tobini andrö”. Töi ndra awönia yaʼia daʼö Saderakhi, Mezakhi, ba Abedonego, daʼö döi nibeʼe niha Mbabilona khöra. (Dan. 2:18) Ibeʼe wanema li Yehowa ba wangandröra. Börö wanolo moroi khö Lowalangi, tola ifoʼeluaha Danieli wangifi Nebukanesa. Teʼorifi Danieli hegöi ira awönia.

5. Hadia nasa zalua sanandraigö faʼabarani Danieli?

⁵ Tetandraigö zui waʼabarani Danieli lö ara me no aefa ifoʼeluaha wangifi sanandrösa ba nadu sebua. Ifuli zui mangifi Nebukanesa, fangifi sataʼu niha. Ba wangifinia andrö, iʼila sageu döla geu sebua. Si fao faʼabarani, itutunö Danieli hadia geluaha wangifi andrö khö razo, ba iʼombakhaʼö wa owöhö dania razo ba aheta khönia dadaoma waʼarazo ba zi hauga fakhe. (Dan. 4:25) Tola manö so ba wangera-ngera razo wa no tobali si faʼudu khönia Danieli, ba te möi famunu Danieli daʼö. Hizaʼi, iforomaʼö waʼabarani Danieli ba itutunö geluaha wangifi andrö.

6. Hadia zanolo Danieli ba wangokhögö faʼabarani?

⁶ Hadia zanolo Danieli ba wangokhögö faʼabarani sandrohu faʼaurinia? Faduhu dödöda wa iʼotarai me awuyu-wuyu Danieli, no labeʼe khönia duma-duma si sökhi ira satuania. Si fao faʼafaduhu dödö, laʼoʼö wanuturu lala nibeʼe Yehowa khö ndra satua ba gotalua  ndraono Gizaraʼeli, ba lafahaʼö Goroisa Lowalangi ba ndraonora. (5 Mo. 6:6-9) Niʼila Danieli tenga ha si Fulu Oroisa, hizaʼi fefu zoʼamakhaita ba Goroisa andrö. Duma-dumania, hadia zi tola awö zi tebai laʼa iraono Gizaraʼeli. b (3 Mo. 11:4-8; Dan. 1:8, 11-13) Ifahaʼö göi ia Danieli ba waö-waö nono mbanua Lowalangi, ba iʼila hadia lua-luania na lö laʼoʼö goi-goi Yehowa. (Dan. 9:10, 11) Fefu zi no irai itörö Danieli sandrohu faʼaurinia, daʼö zangaʼaroʼö tödönia wa gofu hadia zalua ba waʼaurinia, lö tebulö itolo ia Yehowa hegöi ira malaʼikania sabölö.—Dan. 2:19-24; 10:12, 18, 19.

7. Hadia nasa zanolo Danieli ba wangoromaʼö faʼabarani? (Faigi göi gambara.)

⁷ Ifahaʼö göi ia Danieli moroi ba nisura ndra samaʼeleʼö khö Lowalangi, tefarahu ba daʼö wamaʼeleʼö Yeremia. Moroi ba daʼö, aboto ba dödö Danieli wa lö ara tö aheta niha Yahudi moroi ba Mbabilona, me no ara teʼoloiʼö ira. (Dan. 9:2) Iʼila Danieli wa hasambalö alua fefu zi no iwaʼö Yehowa, ba lö faʼataʼu ba niha sangodaligö yaʼia. Daʼö zangaʼaroʼö faʼafaduhu dödönia khö Yehowa. (Fareso göi Roma 8:31, 32, 37-39.) Baero daʼö, asese sibai mangandrö Danieli khö Namania si so ba zorugo. (Dan. 6:10) Ifaduhuʼö horö nifaluania föna Yehowa, ifaehagö nösi dödönia ba iʼandrö wanolo. (Dan. 9:4, 5, 19) Simane yaʼita, tenga iʼotarai me tumbu iʼokhögö waʼabarani Danieli. Hizaʼi, börö me ifahaʼö ia, ilau mangandrö ba iʼodaligö Yehowa, andrö wa tola iʼokhögö waʼabarani.

8. Hadia zanolo yaʼita ba wondrouʼö faʼabarani?

⁸ Hadia zinangea tafalua ba wondrouʼö faʼabarani? Tola manö laʼokhögö waʼabarani ira satuada ba lafarou ita enaʼö taʼoʼö daʼö. Hizaʼi, tenga daʼö geluahania wa iʼanemaiʼö barani ita simane yaʼira. Mangokhögö faʼabarani hulö simane na tafahaʼö ita ba nekhe-nekhe danga si bohou. Tola onekhe ita na tahaogö wamaigi nifalua zamahaʼö yaʼita ba taʼoʼö duma-duma nifaluania. Simane daʼö göi, tola itugu barani ita na tahaogö wamaigi hadia nifalua niha böʼö ba wangoromaʼö bua-bua andrö ba taʼoʼö duma-dumara. Tobali, hadia wamahaʼö nihalöda moroi khö Danieli? Simane yaʼia, moguna sindruhu-ndruhu aboto ba dödöda Daromali Lowalangi. Moguna göi taʼotomosi wahuwusada khö Yehowa, taʼaseseʼö fahuhuo khönia ba tatutunö nösi dödöda. Datafaduhusi tödö wa hasambalö itolo ita Yehowa. Na tafalua daʼö fefu, tola taʼokhögö waʼabarani ba ginötö tetandraigö wamatida.

9. Hadia mbua nitemada na barani ita?

⁹ Oya mbua nitemada na barani ita. Nehegö duma-duma Ben. Me sekola ia ba Jerman, fefu nawönia sekola faduhu dödöra ba evolusi ba lawaʼö tödöra wa lö atulö fefu niwaʼö Zura Niʼamoniʼö sanandrösa ba womböwöi. Samuza inötö, tebeʼe ginötö khö Ben ba wanutunö nifaduhusinia tödö sanandrösa ba womböwöi föna ndra awö-awönia. Si fao faʼabarani itutunö nifaduhusinia tödö andrö. Hadia mbuania? Imane Ben, ”Ihaogö ifondrondrongo gurugu nifaʼemagu andrö, i-copy artikel niʼogunaʼögu ba ibeʼe khö ndra awö-awögu maʼafefu.” Hadia göi nifalua ndra awönia ba kelas? Imane Ben, ”Lahaogö göi lafondrondrongo hadia nifaʼemagu, ba lasuno ndraʼodo.” Simane salua khö Ben, tola lafosumange ita niha tanö böʼö na taforomaʼö waʼabarani, ba daʼö göi zamarou yaʼita ba wanolo niha böʼö enaʼö lafahaʼö ira sanandrösa khö Yehowa. Tatu manö, oya mbua si sökhi nitemada na taforomaʼö waʼabarani.

10. Hadia geluaha waʼalöfaröi?

¹⁰ Ba Zura Niʼamoniʼö, ngawua wehede ”faʼalöfaröi” mazui ”faʼomasi si lö faröi” ba li Heberaiʼo, eluahania amakhaita saro ba safönu faʼomasi. Asese muʼogunaʼö daʼö ba wanutunö faʼomasi niforomaʼö Lowalangi ba niha samosumange yaʼia hegöi faʼomasi ba gotalua nono mbanua Lowalangi. (2 Sa. 9:6, 7) Tola itugu tedou ba aro waʼalöfaröida. Datafaigi hewisa wa tola itugu aro waʼalöfaröi Danieli.

11. Hadia zanandraigö faʼalöfaröi Danieli me atua ia? (Faigi gambara ba guli majalah.)

¹¹ Asese tetandraigö waʼalöfaröi Danieli khö Yehowa sandrohu faʼaurinia. Hizaʼi, fanandraigö sabölö ebua, alua ia te mato 90 fakhe ndröfinia. Me luo daʼö, tohare niha Media hegöi Feresia nifatörö Razo Dario ba wokalaisi banua Mbabilona. Niha sohalöwö ba gödo razo, fatuwu ira khö Danieli ba lö lafosumange Lowalangi Danieli. Börö daʼö, laʼalui lala ba wamunu Danieli. Lafazökhi gamakhoita si no iteka razo ba wangiʼila hadia abölö irorogö waʼalöfaröinia khö Lowalanginia mazui khö razo. Enaʼö oroma waʼalöfaröi Danieli khö razo ba lö faböʼö ia moroi ba niha böʼö, tobönö na ha iböhöli wangandrö sagötö ba zi 30 hari. Hizaʼi, ihalö gangetula Danieli ba wondrorogö faʼalöfaröinia khö Yehowa. Lua-luania, mutiboʼö ia ba dögi zingo. Hewaʼae simanö, ifahowuʼö waʼalöfaröi Danieli Yehowa yaʼia me iʼefaʼö ia moroi ba mbawa zingo. (Dan. 6:12-15, 20-22) Hewisa enaʼö tola tadouʼö waʼalöfaröida khö Yehowa simane nifalua Danieli?

12. Hadia nifalua Danieli ba wondrouʼö faʼalöfaröinia khö Yehowa?

¹² Enaʼö lö faröi ita khö Yehowa, moguna aro waʼomasida khönia. Tola irorogö waʼalöfaröinia Danieli börö me iʼomasiʼö Namania si so ba zorugo. Hana wa iʼomasiʼö sibai Yehowa Danieli? Börö me asese iʼangeragö gamuata Yehowa ba iʼangerönusi hewisa lala Yehowa ba wamalua amuata andrö. (Dan. 9:4) Iʼangerönusi göi fefu zi sökhi nifalua Yehowa khönia hegöi ba nono mbanuania, ba iʼandrö sibai saohagölö ba daʼö fefu.—Dan. 2:20-23; 9:15, 16.

13. (a) Hadia wanandraigö faʼalöfaröi ndra si bohou ebua? Beʼe duma-duma. (Faigi göi gambara.) (b) Simane niʼilada ba video, hewisa na so zanofu khöda, hadia latuhini homoseksual ira Samaduhuʼö Yehowa?

¹³ Simane Danieli, ira si bohou ebua no so ira ba gotalua niha si lö mamosumange  Yehowa ba si lö moʼameʼegö tödö goi-goinia. Tola manö so zoʼuduni niha sangomasiʼö Lowalangi. So ösa ndra si bohou ebua niʼoʼaya ba nifakao enaʼö awuwu waʼalöfaröira khö Yehowa. Datafaigi hadia zalua khö zi samösa si bohou ebua sotöi Graeme, si so ba Australia. Alua khönia gabula dödö andre me SMA ia. Manofu gurura ba kelas, hadia nifaluara na so nawöra zamatunö wa yaʼia andrö homoseksual. c Iʼandrö khöra guru enaʼö mosindro ira föna kelas. Na latuhini nawöra homoseksual andrö, mosindro ira tanö ba gabera, ba na löʼö, mosindro ira tanö ba gambölö. Imane Graeme, ”Fefu nawöma ba kelas mosindro ira tanö ba gabera. Yaʼo ba samösa tö nawögu Samaduhuʼö Yehowa, mosindroga tanö ba gambölö.” Abölö abua zalua aefa daʼö si möi fanandraigö faʼalöfaröi Graeme khö Yehowa. Imane, ”Sagötö zi sambua za, laʼoʼaya ba lafakao ndraʼaga ira awöma hegöi guruma. No uforege ba no uhaogö ba wamatunö hadia nifaduhusigu tödö, hizaʼi lö omasi ira lafondrondrongo.” Hadia nirasoi Graeme aefa daʼö? Imane, ”Lö omasido na laʼoʼaya ndraʼo ira awö-awögu, hizaʼi omuso dödögu börö me lö faröi ndraʼo khö Yehowa ba tola uʼoʼawögö wamatigu.” d

14. Hadia nifaluada ba wondrouʼö faʼalöfaröida khö Yehowa ba ginötö so wanandraigö?

¹⁴ Simane Danieli, na itugu taʼomasiʼö Yehowa, itugu tedou göi waʼaro dödöda ba wondrorogö faʼalöfaröida khönia ba ginötö tetandraigö ita. Tola itugu tedou waʼomasida khö Yehowa na tafahaʼö ita ba gamuatania. Duma-dumania, tafahaʼö ita ba ngawalö niwöwöinia. (Rom. 1:20) Na omasiʼö enaʼö itugu monönö wangataʼufimö hegöi faʼomasiu khö Yehowa, tola öbaso artikel sadogo-dogo mazui öfaigi video moroi ba seri ”Apakah Ini Dirancang?” Tola göi ösöndra informasi tanö böʼö ba brosur Benarkah Kehidupan Diciptakan? hegöi Asal Mula Kehidupan—Lima Pertanyaan yang Patut Direnungkan. Nehegö hadia niwaʼö zi samösa talifusöda si bohou ebua moroi ba Denmark sotöi Esther sanandrösa ba brosur daʼö, ”Ahöli-höli sibai dödögu nitutunö ba daʼö. Lö itutunö khöda hadia zinangea tafaduhusi tödö, hizaʼi ihaogö wanutunö hadia zindruhunia irege alio aboto ba dödöda ba tola tahalö gangetula samösa.” Imane Ben si no mututunö ba wamobörö, ”Möi fangaʼaroʼö wamatigu brosur daʼa. Daʼö zanolo yaʼo irege faduhu dödögu wa Lowalangi zomböi faʼauri.” Me no aefa öbaso brosur andrö, hasambalö fao dödöu ba niwaʼö Zura Niʼamoniʼö andre, ”No sinangea ötema zumange, lakhömi, faʼabölö, yaʼugö Yehowa Lowalangima, börö me yaʼugö zamazökhi fefu hadia ia.”—Fam. 4:11. e

15. Hadia nasa zanolo yaʼugö enaʼö itugu aro wahuwusamö khö Yehowa?

¹⁵ Enaʼö itugu öʼomasiʼö nasa Yehowa, moguna öfahaʼö ndraʼugö ba lala waʼauri Nononia, yaʼia daʼö Yesu. Daʼö nifalua zi samösa talifusöda ira alawe sotöi Samira si toröi ba Jerman. Imane, ”Me ufahaʼö ndraʼo sanandrösa khö Yesu, itugu aboto ba dödögu Yehowa.” Me iraono nasa ia, abua sibai khönia ba wokhalaigö hadia nirasoi Yehowa. Hizaʼi, tola ikhalaigö hadia nirasoi Yesu. Imane, ”Uʼomasiʼö sibai Yesu börö me fahuwu ia ba iʼomasiʼö göi ndraono.” Börö me itugu oya ifahaʼö ia sanandrösa khö Yesu, itugu iʼomasiʼö ba  aboto ba dödönia sanandrösa khö Yehowa. Hadia mbörö? Imane, ”Ba gafuriata aboto ba dödögu wa moʼahonoa Yesu ba woloʼö Amania. Oya zi fakhili ira. Umane tödögu wa te daʼö mbörö wa Yesu nifatenge Yehowa ba gulidanö, enaʼö aoha ba niha ba wangokhögö faʼaboto ba dödö sanandrösa khö Yehowa.” (Yoh. 14:9) Na omasiʼö öʼaroʼö wahuwusau khö Yehowa, beʼe ginötöu ba wamahaʼö yaʼugö sanandrösa khö Yesu. Na öfalua daʼö, tola itugu tedou waʼomasimö hegöi faʼalöfaröimö khö Yehowa.

16. Hadia mbuania khöda na taforomaʼö waʼalöfaröi? (Sinunö 18:25; Mikha 6:8)

¹⁶ Na lö faröi ita ba niha böʼö, tola göi tasöndra zi fahuwu si lö faröi khöda. (Rut. 1:14-17) Simanö göi, na lö faröi ita khö Yehowa, tola tarasoi waʼahono dödö. Hadia mbörö? Börö me no ifabuʼu Yehowa wa lö faröi ia ba niha si lö faröi khönia. (Baso Zinunö 18:25; Mikha 6:8.) Angeragö daʼa: Hewaʼae no ide-ide sibai ita na mufaedogö khö Zomböi yaʼita fondrege zabölö, hizaʼi ifabuʼu wa lö tebulö iʼomasiʼö ita. Ba na taʼokhögö wahuwusa saro khö Yehowa, lö hadöi si tola mamabali yaʼita khönia, he famakao, folohi mazui faʼamate. (Dan. 12:13; Luk. 20:37, 38; Rom. 8:38, 39) Moguna sibai taʼoʼö duma-duma Danieli ba tarorogö waʼalöfaröida khö Yehowa!

17-18. Hadia wamahaʼö tanö böʼö nihalöda moroi khö Danieli?

¹⁷ Ba artikel daʼa, no tatutunö dombua gamuata Danieli. Hizaʼi, oya nasa wamahaʼö tanö böʼö nihalöda moroi khönia. Duma-dumania, no hauga kali ibeʼe khönia Yehowa gangilata hegöi fangifi, ba tebeʼe khönia waʼonekhe ba wamoʼeluaha famaʼeleʼö. Oya moroi ba wamaʼeleʼö andrö zi no alua. So ösa göi zanutunö hadia zalua ba zi so miföna soʼamakhaita ba niha gulidanö.

¹⁸ Ba artikel aefa daʼa, tatutunö dania dombua wamaʼeleʼö nisura Danieli. Na aboto ba dödöda wamaʼeleʼö daʼö, tola tetolo ita ba wangai angetula si sökhi, he si bohou ebua mazui si no alawa döfi. Famaʼeleʼö andrö göi zangaʼaroʼö faʼabaranida hegöi faʼalöfaröida irege tola tefaʼanö ita ba wanaögö fanandraigö si lö ara tö alua.