Ba artikel daʼö, no tafahaʼö ita wa sindruhunia ha sambua gamadöniwa sabölö ebua ba niha gulidanö hegöi malaʼika, yaʼia daʼö fangamoniʼö töi Yehowa. Faʼasinangea Yehowa ba wamatörö hegöi faʼalöfaröi niha gulidanö khö Lowalangi, farahu ia ba gamadöniwa sebua andrö.

Hana wa moguna tatanögö ba dödöda wa fangamoniʼö töi Yehowa no amadöniwa sabölö ebua? Datatutunö tölu ngawalö zi tobali fanema linia.

Si oföna, nitandrawaisi Zatana yaʼia daʼö töi Yehowa ba Kabu Edena. Fanofu Zatana khö Khawa hulö no itaha zi sökhi Yehowa ba ngawalö niwöwöinia ba ibeʼe khöra goi-goi si lö ikhamö fangera-ngerara. Ifobahulu wa no falimo Yehowa, yaʼia me ibilaʼö wehede Yehowa. Me ifalua daʼö, no iʼobousi döi si sökhi niʼokhögö Yehowa. Andrö wa lafotöi ia ’Afökha’, eluahania ”samöbögö si lö duhu”. (Yoh. 8:44) Faduhu dödö Khawa ba walimosa Zatana andrö. Lua-luania, lö moloʼö ia khö Lowalangi ba mamadaö ia ba wolawa famatörö Lowalangi. (1 Mo. 3:1-6) Irugi iadaʼa, lö iböhöli Satana ba wamöbögö si lö duhu ba wangobousi töi si sökhi niʼokhögö Yehowa. Niha si faduhu tödö ba walimosa Zatana, tola manö ba gafuriata lö moloʼö ira khö Yehowa. Börö daʼö, ba wamaigi nono mbanua Lowalangi, fefu nifalua Zatana ba wangobousi töi Yehowa niʼamoniʼö no faʼalösökhi fondrege zebua daʼö. Daʼö mbörö wa alua fefu wamakao hegöi faʼalösökhi ba gulidanö andre.

Si dua, ihalö gangetula Yehowa ba wangamoniʼö töinia moroi ba ngawalö zi lö duhu niböbögö khönia börö me so gunania daʼö ba niwöwöinia, simane khö ndra malaʼika hegöi ba niha gulidanö. Daʼö zabölö moguna ba wamaigi Yehowa. Imane, ”Hasambalö uʼamoniʼö döigu solakhömi andrö.” (Hez. 36:23) Baero daʼö, ifatunö göi Yesu hadia zabölö moguna niʼangandröi fefu nono mbanua Yehowa si lö faröi. Imane, ”Yateʼamoniʼö döimö.” (Mat. 6:9) Asese göi itandrösaigö khöda Sura Niʼamoniʼö wa moguna sibai tafolakhömi döi Yehowa. Nehegö duma-duma andre: ”Mifolakhömi Yehowa börö döinia.” (1 Ng. 16:29; Si. 96:8) ”Miʼanunöisi zinunö fanuno ba döinia solakhömi.” (Si. 66:2) ”Ufolakhömi döimö irugi zi lö aetu.” (Si. 86:12) Ha mato hauga kali fahuhuo Yehowa moroi ba zorugo, sambua duma-dumania me alua daʼö ba gosali Yeruzalema. Me luo daʼö me iwaʼö Yesu, ”He Ama, folakhömi döimö,” itema linia Yehowa, ”No ufolakhömi ba ufolakhömi nasa dania.”—Yoh. 12:28. a

Si tölu, ohitö dödö Yehowa moʼamakhaita daʼö ba döinia. Angeragö daʼa: Hadia dania zalua na no aefa wanandraigö safuria salua ba gangohorita Wamatörö Keriso si Saribu Fakhe? Ba ginötö daʼö, hewisa wamaigi ndra malaʼika hegöi niha gulidanö sanandrösa ba döi Yehowa? Ba wameʼe  fanema linia, törö tödöu zi dombua ngawalö zoʼamakhaita ba wangamoniʼö töi Yehowa, yaʼia daʼö faʼalöfaröi niha gulidanö hegöi faʼasinangea Yehowa ba wamatörö. Hadia tetandraigö nasa waʼalöfaröi niha si no mangoromaʼö faʼalöfaröira ba zilalö? Löʼö. Ba luo daʼö, sindruhu-ndruhu wa no moʼahonoa ira ba no laforomaʼö waʼalöfaröi. Latema waʼauri si lö aetu. Hadia tobali amadöniwa nasa waʼasinangea Yehowa ba wamatörö? Löʼö. Ba ginötö daʼö dania, teʼosambua fefu zi so ba zorugo hegöi si so ba gulidanö. Lafaduhuʼö dania wa no sinangea mamatörö Yehowa ba no fondrege zi sökhi lalania wamalua daʼö. Na simanö, hewisa sanandrösa ba döi Yehowa?

Ba ginötö daʼö dania, sindruhu-ndruhu teʼamoniʼö döi Yehowa, mazui ibuʼa ba hulunia fefu zi lö duhu niböbögö khönia. Hizaʼi, lö tebulö tobali fondrege zi tohude döi Yehowa ba nono mbanuania si so ba zorugo hegöi ba gulidanö. Hadia mbörö? Börö me lö tebulö laʼila fefu zahöli-höli dödö nifalua Yehowa. Khalaigö daʼa: Si fao fangide-ngideʼö itouʼö Yesu fefu wamatörö khö Yehowa ”irege ha Lowalangi Zamatörö ba ngawalö fefu hadia ia”. (1 Ko. 15:28) Aefa daʼö, fefu niha gulidanö ”latema wangefa solakhömi simane nitema ndraono Lowalangi”. (Rom. 8:21) Ba iʼoʼozui gohitö dödönia Yehowa ba wangosambuaʼö fefu nono mbanuania si so ba zorugo hegöi si so ba gulidanö tobali sambua ösi nomo.—Ef. 1:10.

Na no alua fefu daʼö, hewisa dödö nösi nomo Yehowa si so ba zorugo hegöi ba gulidanö? Tefarou dödöda ba omasi sibai ita ba wanuno töi Yehowa solakhömi. Börö wanuturu lala geheha niʼamoniʼö, isura Dawido ba mbuku Zinunö, ”Nisuno Lowalangi Yehowa . . . Yatesuno döinia solakhömi irugi zi lö aetu.” (Si. 72:18, 19) Hasambalö so mbörö wa lö tebulö tasuno Lowalangida sabölö sagötö faʼara.

Tola taʼila hewisa Yehowa andrö moroi ba döinia. Töinia andrö zamasugi ba dödöda sanandrösa ba waʼomasinia. (1 Yo. 4:8) Lö tebulö tatörö tödöda wa iwöwöi ita Yehowa börö waʼomasi, ihenaigö höli börö waʼomasi, ba ifalua zatulö sagötö mamatörö ia börö waʼomasi. Hizaʼi, tenga ha daʼö. Lö tebulö tarasoi waʼomasi Yehowa khöda. Tefarou göi dödöda ba wangahatöʼö yaʼita khö Namada hegöi ba woʼanunöisi zinunö fanuno ba döinia solakhömi irugi zi lö aetu.—Si. 73:28.