1. Moloʼö Heberaiʼo 12:1, hadia zinangea tafalua enaʼö tola fagohi ita irugi gamozua?

 IFAEDOGÖ waʼaurida andre Sura Niʼamoniʼö hulö simane watandrisa. Niha sofozu ba wagohisa irugi gamozua, latema waʼauri si lö aetu. (2 Ti. 4:7, 8) Moguna so wamorege nifaluada ba wagohisa, mendrua manö me no so ba duduma höröda gamozuania. Sinenge sotöi Faulo si no mofozu ba wagohisa irugi gamozua, ifatunö khöda hadia zanolo yaʼita enaʼö tola mofozu. Ifarou ita enaʼö ’tatouʼö tou noroda ba yaʼanau gölöda wagohisa ba watandrisa si no muhenaigö khöda’.—Baso Heberaiʼo 12:1.

2. Hadia geluahania ”datatouʼö tou noroda”?

² Me iwaʼö Faulo ”datatouʼö tou noroda”, hadia daʼö geluahania wa sindruhu-ndruhu lö hadöi noro dödöda tobali niha Keriso? Tenga. Hizaʼi, eluahania moguna tatouʼö tou noro dödö si lö moguna taluʼi. Noro simane daʼö, tola tobali taha-tahada ba tola marase ita. Enaʼö anau gölöda, moguna alio taʼila hawaʼabua noro niʼoheda ba anemaiʼö touʼö ia tou. Börö daʼö, moguna göi taʼila hadia noro sinangea taʼohe. Hizaʼi, na lö taʼohe noro andrö, tebai saʼae fao ita ba watandrisa. (2 Ti. 2:5) Hadia manö noro sinangea taʼohe?

3. (a) Moloʼö Galatia 6:5, hadia noro sinangea taluʼi? (b) Hadia dania nitutunöda ba wamahaʼö daʼa, ba hadia mbörö?

 ³ Baso Galatia 6:5. Ifatunö khöda Faulo hadia manö noro sinangea taʼohe. Imane, ”Iluʼi-luʼi sa noronia zamösana.” Eluaha wehede Waulo ba daʼa yaʼia daʼö noro dödö nibeʼe Lowalangi khöda zamösana. Ba wamahaʼö daʼa, taʼila dania hadia manö zi farahu ba ’noro’ niluʼida ba hewisa woluʼida daʼö. Aefa daʼö, taʼila göi hadia manö noro si lö moguna taluʼi ba hewisa lala ba wotouʼöda tou noro andrö. Na taluʼi noro sinangea taʼohe ba tatouʼö tou noro si lö moguna, daʼö zanolo yaʼita enaʼö mofozu ita ba wogamö faʼauri.

4. Hana wa lö abua wamalua buʼusa lida ba wamosumange Yehowa sagötö faʼara? (Faigi göi gambara.)

⁴ Buʼusa lida ba wamosumange Yehowa sagötö faʼara. Me talulu waʼaurida khö Yehowa, no tafabuʼu wa tafosumange ba tafalua zomasi ia. Moguna tafalua zi no tafabuʼu andrö. Sindruhu sa, no sambua noro dödö sebua ba wamalua hadia zi no tafabuʼu khö Yehowa, hizaʼi lö abua wamalua daʼö. Iwöwöi ita Yehowa  enaʼö tola tafalua gohitö dödönia. (Fam. 4:11) Itanögö göi ba dödöda enaʼö omasi ita taʼila ba tafosumange ia, ba iwöwöi ita si fakhili-khili khönia. Buania, tola ahatö ita khönia ba tasöndra waʼomuso dödö ba wamalua somasi ia. (Si. 40:8) Na tafalua zomasi Lowalangi ba taʼoʼö Nononia, hasambalö ifuli teʼabölöʼö ita.—Mat. 11:28-30.

5. Hadia zanolo yaʼugö ba wamalua si no öfabuʼu? (1 Yohane 5:3)

⁵ Hewisa enaʼö tola öluʼi noro andrö? So dombua zanolo yaʼugö. Si oföna, böi tebulö aroʼö waʼomasiʼöu khö Yehowa. Tola öfalua daʼö na öʼangerönusi fefu zi sökhi si no ötema hegöi howu-howu nitemau dania. Na itugu ebua waʼomasimö khönia, itugu aoha khömö ba woloʼö niwaʼönia. (Baso 1 Yohane 5:3.) Si dua, oʼö Yesu. Mofozu ia ba wamalua somasi Lowalangi börö me iʼandrö wanolo moroi khö Yehowa ba iʼosambuaʼö dödönia ba howu-howu nitemania dania. (Heb. 5:7; 12:2) Simane Yesu, angandrö khö Yehowa enaʼö iʼabölöʼö ndraʼugö ba lö tebulö so ba wangera-ngerau dötönafö faʼauri si lö aetu. Na itugu ebua waʼomasimö khö Lowalangi ba öʼoʼö Nononia, hasambalö tola öfalua zi no öfabuʼu khö Yehowa.

6. Hana wa moguna taʼameʼegö tödö noro dödöda yomo ba nomo? (Faigi göi gambara.)

⁶ Noro dödö yomo ba nomo. Ba wagohisa wogamö faʼauri, moguna abölö taʼomasiʼö Yehowa hegöi Yesu moroi ba nösi nomoda. (Mat. 10:37) Hizaʼi, tenga daʼö geluahania wa taʼosiwawöi noro dödöda yomo ba nomo. Enaʼö tola taʼomusoiʼö dödö Lowalangi hegöi Keriso, moguna tafalua noro dödöda yomo ba nomo. (1 Ti. 5:4, 8) Na tafalua daʼö, hasambalö tasöndra waʼomuso dödö. Hadia mbörö? Börö me iʼila Yehowa wa hasambalö so waʼomuso dödö yomo ba nomo na foʼomo ira matua hegöi ira alawe faoma laʼomasiʼö ba lafosumange nawöra, na laʼomasiʼö ba lafahaʼö ndraonora ira satua, ba iraono laʼoʼö niwaʼö zatuara.—Ef. 5:33; 6:1, 4.

7. Hewisa wamaluamö hadia niʼandrö Yehowa yomo ba nomo?

⁷ Hewisa enaʼö tola öluʼi noro andrö? Gofu hadia noro dödöu yomo ba nomo, abölö sökhi na öfaduhusi tödö wanuturu lala moroi ba Zura Niʼamoniʼö. Böi odaligö hadia zi so ba dödömö, sasese mufalua ba mbanuamö mazui niwaʼö niha sogonekhe. (Amd. 24:3, 4) Ogunaʼö publikasida si teʼodane-dane ba Zura Niʼamoniʼö. Tola taʼila ba daʼö wanuturu lala sanolo yaʼita ba woloʼö goi-goi Zura Niʼamoniʼö. Duma-dumania, brosur Tola Ohahau Dödömi Yomo ba Nomo hegöi buku Lala ba Wanöndra Faʼohahau Dödö Sagötö Faʼara! famahaʼö 49 ba 50. Itutunö khöda goi-goi sanolo niha si no mongambatö, satua hegöi si bohou ebua. b Halö gangetula ba wamalua hadia niwaʼö Zura Niʼamoniʼö hewaʼae na lö lafalua daʼö ira ösi nomou tanö böʼö. Na öfalua daʼö, hasambalö ifahowuʼö ndraʼugö Yehowa, ibeʼe khöu waʼomuso dödö ba so mbua nitema nösi nomou.—1 Fe. 3:1, 2.

8. Hadia so lua-luania khöda gangetula nihalöda?

⁸ Noro dödöda ba gangetula nihalöda. No ibeʼe khöda Yehowa mbuala ba wangai angetula samösa, ba omasi ia na omuso dödöda börö gangetula si sökhi nihalöda. Na tahalö gangetula si fasala, hasambalö tatema lua-luania. (Gal. 6:7, 8) Börö daʼö, yaʼita samösa zangonorogö tödö lua-lua gangetula, fehede mazui amuatada si fasala. Gofu hadia zala si  no tafalua, tola manö itegu-tegu ita tödöda side-ide. Hizaʼi, börö me taʼila wa yaʼita samösa zangonorogö tödö lua-lua gangetula nihalöda, daʼö zamarou tödöda ba wamaduhuʼö sala nifaluada, tafalalini gera-erada ba lö saʼae tafuli tafalua zala andrö. Daʼö fefu zanolo yaʼita enaʼö lö tebulö so ita ba watandrisa wogamö faʼauri.

9. Hadia nifaluamö na no öhalö gangetula si fasala? (Faigi göi gambara.)

⁹ Hewisa enaʼö tola öluʼi noro andrö? Hadia nifaluamö na no öhalö gangetula si fasala? Böi olifuʼö wa lö öʼila öbulöʼö zi no alua. Böi horigö ginötöu hegöi faʼabölöu ba wangoromaʼö wa lö fasala nifaluamö mazui ötahigö niha böʼö. Abölö sökhi na öfaduhuʼö wa fasala ndraʼugö ba forege wamalua satulö. Na itahi-tahigö ndraʼugö tödömö, angandrö khö Yehowa si fao fangide-ngideʼö, tutunö khönia zala nifaluamö ba andrö wangefa. (Si. 25:11; 51:3, 4) Andrö waʼebolo dödö ba niha niʼafökhöiʼömö tödö, ba na tola andrö wanolo khö ndra satua sokubaloi. (Yak. 5:14, 15) Fahaʼö ndraʼugö ba zala si no öfalua, ba böi saʼae fuli falua. Na öfalua daʼö, yafaduhu dödöu wa hasambalö iforomaʼö waʼasökhi dödönia khöu Yehowa ba ituhini ndraʼugö.—Si. 103:8-13.

10. Na taforege wamalua si tebai takhamö, hana wa tola tobali noro sabua daʼö? (Galatia 6:4)

¹⁰ Na taforege wamalua zi tebai takhamö. Na tafaedo-faedogö ita ba niha böʼö, tola manö taforege wamalua si tebai takhamö, ba daʼö zi tobali noro sabua khöda. (Baso Galatia 6:4.) Na lö taböhöli wamalua daʼö, tola manö so khöda wahindrisa ba afökhö dödöda ba niha. (Gal. 5:26) Möi famaʼala waʼaurida na taforege wamalua hadia zi no ikhamö niha böʼö si tebai tafalua. Iwaʼö Sura Niʼamoniʼö wa ’fanötöna si no tetaha manö möi fangafökhö dödö’ mendrua manö na tebai tafalua nitötönada andrö. Sindruhu-ndruhu wa afökhö sibai daʼö! (Amd. 13:12) Na tafalua daʼö, hasambalö marase ita ba arara manö awuwu ita ba watandrisa waʼauri andre.—Amd. 24:10.

11. Hadia zanolo yaʼugö enaʼö lö öforege wamalua zi tebai ökhamö?

¹¹ Hewisa wanouʼömö tou noro andrö? Böi faso wamalua zi töra moroi ba niʼandrö Yehowa. Lö irai itötöna Yehowa enaʼö öbeʼe khönia zi tebai öfalua. (2 Ko. 8:12) Yafaduhu dödöu wa lö ifaedo-faedogö ndraʼugö ba niha böʼö. (Mat. 25:20-23) Iʼameʼegö tödö sibai wamosumange nifaluamö soroi ba dödö, faʼalöfaröimö, hegöi faʼanau gölömö. Yaso khöu wangide-ngideʼö ba faduhuʼö wa so zi tebai öfalua iadaʼa börö me no atua ndraʼugö, mofökhö mazui so zalua tanö böʼö. Simane Barasilai, böi temaʼö halöwö nibeʼe khöu na lö sagu öfalua daʼö börö wökhö mazui me no atua ndraʼugö. (2 Sa. 19:35, 36) Simane Moze, temaʼö wanolo ba beʼe noro dödö andrö ba niha böʼö. (2 Mo. 18:21, 22) Na so khöu wangide-ngideʼö, lö öfaso ndraʼugö ba wamalua si tebai öfalua börö me möi fangawuwumö daʼö ba watandrisa waʼauri andre.

12. Hadia tobali noro dödöda lua-lua gangetula si fasala nihalö niha böʼö? Tutunö.

¹² Tawaʼö tödöda wa taʼonorogö tödö lua-lua gangetula si fasala nihalö niha böʼö. Tebai tahalö gangetula ba niha böʼö ba tebai göi talumöʼö ira ba lua-lua gangetula si fasala nihalöra. Duma-dumania, so samösa ndraono sangai angetula ba wamöhöli famosumange Yehowa. Tatu abu sibai dödö zatuara na alua daʼö. Hizaʼi, tola tobali noro sabua khö ndra satua na lawaʼö tödöra wa börö ira wa alua daʼö. Ba lö omasi Yehowa na laluʼi noro andrö.—Rom. 14:12.

13. Hadia nifalua zatua ba gangetula si fasala nihalö ndraonora?

 ¹³ Hewisa wanouʼömö tou noro andrö? Böi olifuʼö wa no ibeʼe khöda mbuala Yehowa ba wangai angetula samösa. Farahu ba daʼö gangetulada ba wamosumange yaʼia. Iʼila Yehowa wa yaʼami andrö satua si lö moʼahonoa, ba omasi ia na öfalua wondrege zi sökhi ba wamahaʼö iraonou. Angetula nihalö ndraonomi, daʼö noro dödöra, tenga noro dödömi. (Amd. 20:11) Na lö tebulö örasoi wa lö nifaluamö halöwömö tobali satua, tutunö khö Yehowa nirasoimö ba andrö khönia wangefa. Iʼila Yehowa wa tebai öfuli furi ginötö ba tebai öbulöʼö zalua. Hizaʼi, lö göi iʼandrö khöu enaʼö ölumöʼö ndraonomö moroi ba lua-lua zala nifaluara. Böi olifuʼö, na iforege onomö wangawuli khö Yehowa, hasambalö ifuli itemaʼö ia Yehowa si fao faʼomuso dödö.—Luk. 15:18-20.

14. Na itahi-tahigö manö ita tödöda, hana wa moguna tatouʼö tou noro andrö?

¹⁴ Na itahi-tahigö manö ita tödöda. Na tafalua horö, hasambalö lö sökhi-sökhi dödöda. Hizaʼi, lö omasi Yehowa na lö aetu itahi-tahigö ita tödöda. Moguna tatouʼö tou noro andrö. Hewisa na lö tebulö itahi-tahigö manö ita tödöda? Na tafaduhuʼö horö nifaluada, tafalalini gera-erada, ba tafalua wondrege zi sökhi enaʼö lö ifuli tafalua horö andrö, tola faduhu dödöda wa hasambalö iʼefaʼö horöda Yehowa. (Hal. 3:19) Na no tafalua daʼö fefu, lö omasi Yehowa na itahi-tahigö manö ita tödöda. Iʼila wa möi famaʼalada daʼö. (Si. 31:10) Na talafo taʼabusi tödö daʼö, tola manö awuwu ita ba watandrisa waʼauri andre.—2 Ko. 2:7.

15. Hadia zanolo yaʼugö enaʼö lö itahi-tahigö manö ndraʼugö tödöu? (1 Yohane 3:19, 20) (Faigi göi gambara.)

¹⁵ Hewisa wanouʼömö tou noro andrö? Na lö tebulö itahi-tahigö manö ndraʼugö tödöu, osambuaʼö dödöu ba wangefa nibeʼe Lowalangi. (Si. 130:4) Ba ginötö iʼefaʼö zala niha samalalini era-era, ifabuʼu khöra, ”Lö saʼae itörö tödögu zi no lafalua andrö.” (Yer. 31:34) Eluahania, lö saʼae itörö-törö tödö  Yehowa horö nifaluada ba zilalö börö me no iʼefaʼö khöda daʼö. Tobali, böi irai so ba dödömö wa abula dödö salua khöu iadaʼa no lua-lua horö si tebai muʼefaʼö, ba böi huku ndraʼugö samösa na aheta khöu halöwö ba mbanua niha Keriso börö horö nifaluamö. Lö iʼera-era saʼae Yehowa horö si no öfalua, ba itötöna enaʼö simane daʼö göi ndraʼugö.—Baso 1 Yohane 3:19, 20.

16. Hadia zinangea aboto ba dödöda sagötö fagohi ita?

¹⁶ Sagötö fagohi ita ba wogamö faʼauri, moguna ’taforege wagohisa enaʼö tatema mbuala andrö’. (1 Ko. 9:24) Tola tafalua daʼö na aboto ba dödöda hezo noro sinangea taluʼi ba hezo zinangea tatouʼö tou. Ba artikel andre, no tatutunö ösa duma-duma noro sinangea taluʼi ba sinangea tatouʼö tou. Hizaʼi, oya nasa duma-duma tanö böʼö si no itutunö Sura Niʼamoniʼö. Iwaʼö Yesu enaʼö ”böi tobali noro dödö sabua [khöda] wemanga-manga, famadu-madu, ba faʼaombö dödö ba waʼauri”. (Luk. 21:34) Ayati daʼa hegöi ayati tanö böʼö möi fanolomö ba wangila hadia manö zinangea öbulöʼö ba wagohisa wogamö faʼauri.

17. Hana wa faduhu dödöda wa tola möna ita ba wagohisa wogamö faʼauri andre?

¹⁷ Faduhu dödöda wa tola möna ita ba wagohisa wogamö faʼauri börö me hasambalö iʼabölöʼö ita Yehowa. (Yes. 40:29-31) Börö daʼö, böi awuwu ndraʼugö! Oʼö zinenge sotöi Faulo si no mamorege ba wagohisa wogamö buala si no tehenaigö fönania. (Fil. 3:13, 14) Sindruhu sa, lö hadöi niha si fagohi salahimö, hizaʼi tola mofozu ndraʼugö börö wanolo moroi khö Yehowa. Itolo ndraʼugö ba woluʼi noro sinangea öʼohe hegöi ba wotouʼö tou noro si lö moguna. (Si. 68:19) Börö me ituhini ndraʼugö Yehowa, tola anau gölöu ba möna ndraʼugö ba wagohisa andre!