• ”Ba worasoigu, hulö no asese selingkuh woʼomogu.”

• ”Ailado sibai, uwaʼö tödögu wa lö baga-baga ndraʼodo, ba lö eluaha waʼaurigu.”

• ”Lö uʼila ututunö nirasoigu andre ba niha böʼö. Lua-luania, tefakao samösa ndraʼo.”

• ”Ba worasoigu, hulö lö iʼameʼegö tödö ndraʼo Yehowa.”

Fehedera andrö zangoromaʼö hawaʼafökhö nirasoi woʼomo ira alawe börö me ifaigi-faigi pornografi foʼomonia ira matua. Na ibini-biniʼö ia foʼomonia wamalua daʼö sagötö zi hauga waŵa mazui hauga fakhe, tola manö lö saʼae ifaduhusi tödö ia foʼomonia ira alawe. Imane si samösa foʼomo ira alawe, ”Urasoi wa lö saʼae uʼila haniha sindruhunia woʼomogu. Imane tödögu, ’Hadia nasa nibiniʼönia khögu?’”

Na so woʼomo ira matua samaigi-maigi pornografi, mufanandrösa artikel daʼa khö woʼomora ira alawe. a Tobali fondrara dödöra goi-goi Zura Niʼamoniʼö nitutunö ba daʼa, sameʼe khöra faʼafaduhu dödö wa ituhini ira Yehowa, ba sanolo yaʼira enaʼö ifuli teʼabölöʼö ira ba wamati hegöi ba wamadöhö zokho dödöra. b

Hewaʼae na tebai mifatörö fefu nifalua woʼomomi ira matua, hizaʼi so zi tola mifalua enaʼö mirasoi waʼahono dödö ba lö talafo miʼabusi tödö. Nehegö atö wanuturu lala andre.

Böi tahigö ndraʼugö samösa. Te so woʼomo ira alawe sanahigö yaʼia samösa börö me ifaigi-faigi pornografi foʼomonia ira matua. Simanö göi nirasoi dalifusöda ira alawe sotöi Alice. c Iwaʼö tödönia wa ambö nasa waʼasökhi lagunia khö woʼomonia ira matua. Imane, ’Te daʼö mbörö wa ifaigi-faigi ndra alawe tanö böʼö foʼomogu.’ So ösa woʼomo ira alawe sanahigö yaʼira samösa, lawaʼö tödöra börö ira wa lö sökhi zalua. Imane Danielle, ”Fawuka sibai gera-eragu ba mofönu-fönudo manö. Ba worasoigu hulö no ufakiko wongambatöma börö me simane daʼö gamuatagu.”

Na daʼö nirasoimi, böi olifu ami niwaʼö ba Yakobo 1:14, ”Dozi niha tetandraigö na tedönisi ba teböbö ia ba gisö-isö dödönia samösa.” (Rom. 14:12; Fil. 2:12) Eluahania, lö itahigö ami Yehowa börö gamuata woʼomomi ira matua. Sindruhunia, iʼameʼegö tödö sibai Yehowa waʼalöfaröimi khönia.—2 Ng. 16:9.

 Na ifaigi-faigi pornografi foʼomomi ira matua, moguna aboto ba dödömi wa tenga daʼö geluahania wa tenga foʼomo si sökhi ami. Moloʼö ira sogonekhe, pornografi andrö tola iʼasogö gisö-isö dödö si lö ikhamö fangera-ngera niha, ba samösa lö hadöi ira alawe si tola mamalua daʼö.

Böi talafo öʼaombösi tödö. Iwaʼö Catherine wa so khönia waʼaombö dödö ero maʼökhö, ba lö iʼila saʼae iʼangeragö danö böʼö börö me asese ifaigi-faigi pornografi foʼomonia. Imane Frances, ”So khögu waʼaombö dödö na lö uʼila hezo woʼomogu. Lö khögu faʼahono dödö ba zi maʼö-maʼökhö daʼö.” So göi zanutunö wa aila ira fariawö khö ndra talifusö si no mangila hadia zasese lafalua foʼomora. So nasa zangumaʼö wa lö aboto ba dödö niha böʼö hadia nirasoira irege hulö ha yaʼira samösa zanaögö daʼö fefu.

Lö fasala na örasoi zimane daʼö. Hizaʼi, tola itugu aombö dödömö na lö aetu öʼangera-ngeragö manö daʼö. Börö daʼö, osambuaʼö dödöu ba wahuwusau khö Yehowa. Daʼö zanolo yaʼugö enaʼö anau gölömö.—Si. 62:2; Ef. 6:10.

Baso ba angerönusi waö-waö Zura Niʼamoniʼö sanandrösa khö ndra alawe sabu tödö, sanema fondrara dödö börö me mangandrö ira khö Yehowa. Hewaʼae na lö iʼanemaiʼö iheta gabula dödöra andrö Yehowa, hizaʼi ibeʼe khöra waʼahono dödö. Duma-dumania, no irai ”abu sibai” dödö Khana börö zalua khönia. Hizaʼi, me no aefa ”ara sibai wangandrönia khö Yehowa”, irasoi waʼahono dödö hewaʼae lö iʼila hadia zalua aefa daʼö.—1 Sa. 1:10, 12, 18; 2 Ko. 1:3, 4.

Andrö wanolo moroi khö ndra satua sokubaloi. Yaʼira andrö no ”amaedola zawatö moroi ba nangi . . . [ba] naha wolumöʼö ba deu laöhö”. (Yes. 32:2) Te lafatunö khömi haniha manö dalifusöda ira alawe si tola tobali awömi fahuhuo ba sondrara tödömi.—Amd. 17:17.

Hadia tola mitolo woʼomomi ira matua ba wamöhöli si toʼölö ifalua ba wamaigi-maigi pornografi? Tola manö. Ba wangasiwai abula dödö mazui ba wokalaisi udu sabölö, ibeʼe khöda mene-mene Sura Niʼamoniʼö wa ”sökhi zi darua moroi na ha samösa”. (Sango. 4:9-12) Moloʼö si no mufareso, tola muböhöli waʼasandru ba wamaigi pornografi ba tola ifuli so waʼafaduhu dödö ba zi sambua fongambatö na falulu fohalöwö woʼomo ira matua khö woʼomonia ira alawe ba wolawa daʼö.

 Tatu manö, teʼodaligö daʼö fefu moroi ba waʼedöna woʼomo ira matua ba womböhöli wamaigi-maigi pornografi ba iforege ba wombulöʼö fangera-ngerania. Hadia no iʼandrö waʼabölö moroi khö Yehowa hegöi fanolo moroi khö ndra satua sokubaloi? (2 Ko. 4:7; Yak. 5:14, 15) Hadia no iʼera-era enaʼö lö saʼae tedönisi dödönia ba wamaigi-maigi pornografi duma-dumania, iʼalösi wangogunaʼö fakake elektronik ba iʼaröuʼö ia moroi ba zi tola mondrönisi tödönia? (Amd. 27:12) Hadia omasi ia itema wanolo nibeʼemi ba lö falimo ia? Na omasi ia, te tola mibeʼe khönia wanolo.

Hewisa lalania? Nehegö duma-duma andre. Mangowalu Felicia khö Ethan, si no sandru wamaigi-maigi pornografi iʼotarai me ide-ide ia. Hizaʼi, iforege Felicia enaʼö aoha khö Ethan ba wahuhuosa khönia ba ginötö tedönisi dödönia ba wamaigi pornografi. Imane Ethan, ”Ufatunö fefu khö woʼomogu ba lö ubini-biniʼö. Si fao faʼomasi itolo ndraʼo ba wanimbagö fondrönisi dödö andrö, ba asese isofu hadia nirasoigu. Itolo göi ndraʼo enaʼö lö talafo oya uʼogunaʼö Internet.” Sindruhu sa, afökhö dödö Felicia börö me omasi Ethan ba wamaigi-maigi pornografi. Hizaʼi, imane Felicia, ”Faʼafökhö dödö hegöi faʼaukhu dödögu, lö tobali fanolo khönia enaʼö iböhöli zi toʼölö ifalua andrö. Me no mahaogö matutunö daʼa, iʼosambuaʼö dödönia ba wanolo yaʼo enaʼö lö saʼae afökhö dödögu.”

Fahuhuosa simane daʼö, tobali fanolo khö woʼomo ira matua enaʼö lö saʼae ifaigi-faigi pornografi. Daʼö göi zi tobali dela irege ifuli faduhu dödö woʼomonia ira alawe khönia. Na lö ibini-biniʼö foʼomo ira matua ba wanutunö hadia gaoloma dödönia si fasala, hadia nifaluania ero maʼökhö, ba hezo möi ia, tola manö lö saʼae manahö-nahö dödö woʼomonia ira alawe.

Moloʼö yaʼami, hadia tola göi möi fanolo khö woʼomomi ira matua na mifalua zimane daʼö? Na tola, mifaogö ami ba wombaso hegöi ba wanutunö artikel daʼa. Ohitö dödö woʼomomi ira matua yaʼia daʼö enaʼö iböhöli wamaigi-maigi pornografi ba enaʼö tola öfaduhusi tödö ia mangawuli. Moguna aboto ba dödönia hadia lua-luania khömi gamuatania si lö baga andrö, tenga enaʼö abao dödönia börö me mifatunöisi gabula dödö andre. Ohitö dödömi yaʼia daʼö ba wotuhini famorege si no ifalua hegöi ba wameʼe inötö khönia enaʼö öfuli öfaduhusi tödö ia. Yaʼami si darua, moguna miʼila hadia manö zondrönisi tödö zi samösa niha ba wamaigi-maigi pornografi, ba hadia nifaluami ba wanimbagö fondrönisi dödö andrö. d

 Na so khömi waʼaombö dödö ma dania faʼudu ami na mitutunö daʼö, tola miʼandrö khö zi samösa satua sokubaloi enaʼö fao ia khömi mato hauga kali ba ginötö mitutunö gabula dödö andrö. Mifili haniha zatua sokubaloi somasi ami. Törö tödöu, hewaʼae tola ilawa waʼasandrunia foʼomomö ira matua ba wamaigi-maigi pornografi, hizaʼi lö iʼanemaiʼö tola öfuli öfaduhusi tödö ia. Foromaʼö waʼebolo dödö ba böi awuwu. Miʼosambuaʼö dödömi ba zi no mikhamö hewaʼae no fondrege zide-ide ia. Böi tebulö mitötöna wa ba gafuriata tola ifuli aro wongambatömi.—Sango. 7:8; 1 Ko. 13:4.

Hewisa na ifuli ifaigi pornografi foʼomomö ira matua hewaʼae no irai ibato ba zilalö? Hadia daʼö geluahania wa lö nifalalininia gera-erania ba lö saʼae tötönafö khönia? Tatu manö tenga daʼö geluahania. Na no irai sandru ia, moguna iforege ba wolawa daʼö sandrohu faʼaurinia. Tola ifuli tesao gamuata si lö sökhi andrö hewaʼae no ibato wamalua yaʼia ba zi hauga fakhe. Enaʼö lö ifuli adöni dödönia, moguna so khönia waʼaro dödö ba lö tebulö ifalua zi no iʼera-era ba wamöhöli amuata andrö, hewaʼae no mofozu ia iadaʼa ba wolawa gisö-isö dödönia si lö sökhi. (Amd. 28:14; Mat. 5:29; 1 Ko. 10:12) Moguna iforege ba ’wamohouni lala wangera-ngerania’ hegöi ba ’wangogorofi si lö sökhi’, yaʼia daʼö pornografi ba fefu gamuata si raʼiö soʼamakhaita ba daʼö simane masturbasi. (Ef. 4:23; Si. 97:10; Rom. 12:9) Hadia iforege foʼomomi ba wamalua daʼö fefu? Na ifalua daʼö, hasambalö tola ibulöʼö gamuatania andrö. e

Hizaʼi, hewisa na lö omasi woʼomomi ira matua ba wondröi amuata si lö sökhi andrö? No sinangea na afatö dödömi, aila mazui mofönu ami. Touʼö ba danga Yehowa gabula dödömi andrö enaʼö tola mirasoi waʼahono dödö. (1 Fe. 5:7) Böi tebulö hatöʼö ndraʼugö khö Yehowa yaʼia na öfahaʼö ndraʼugö ba Zura Niʼamoniʼö, öʼangerönusi ba ölau mangandrö. Na mifalua daʼö, hasambalö ahatö Yehowa khömi. Simane niwaʼö ba Zinunö 34:18, ”ahatö Yehowa ba niha sarasa tödö” ba itolo ira enaʼö ifuli so khöra waʼomuso dödö. Miforege enaʼö tobali ami niha Keriso sangokhögö bua-bua si sökhi. Miʼandrö wanolo moroi khö ndra satua sokubaloi, ba böi aetu dötönafömi wa samuza inötö dania tola ibulöʼö gamuatania andrö foʼomomi ira matua.—Rom. 2:4; 2 Fe. 3:9.