1. Hadia zanolo yaʼita enaʼö tarasoi waʼomuso dödö ba ginötö tafahaʼö ita ba wamaʼeleʼö Zura Niʼamoniʼö?

 IMANE si samösa talifusöda si bohou ebua sotöi Ben, ”Omasido sibai ufahaʼö ndraʼo ba wamaʼeleʼö si so ba Zura Niʼamoniʼö.” Hadia simane daʼö goi nirasoimö? Mazui, hadia abua khöu ba wangiʼila eluaha wamaʼeleʼö si so ba Zura Niʼamoniʼö? Te so khöu waʼaföli ba ginötö öfahaʼö ndraʼugö sanandrösa ba wamaʼeleʼö. Hizaʼi, tola manö tebulö lala wangera-ngeramö andrö na aboto ba dödöu hadia mbörö wa oya wamaʼeleʼö nisura Yehowa ba Daromalinia.

2. Hadia nitutunöda ba artikel daʼa?

² Ba artikel andre, tatutunö dania hana wa moguna tafahaʼö ita ba wamaʼeleʼö si so ba Zura Niamoniʼö, ba hewisa lalada wamalua daʼö. Tatutunö göi geluaha zi dombua wamaʼeleʼö nisura ba mbuku Danieli, ba hewisa wa möi fanoloda daʼö iadaʼa.

3. Hadia zinangea tafalua na omasi ita taʼila wamaʼeleʼö si so ba Zura Niʼamoniʼö?

³ Moguna khöda wanolo na omasi ita taʼila wamaʼeleʼö si so ba Zura Niʼamoniʼö. Angeragö duma-duma andre. Khalaigö atö, möiʼö ba mbanua si lö irai öʼila, hizaʼi fao khöu nawöu sangila banua andrö. Aboto ba dödönia hezo nahia si so yaʼami ba hezo lala nitörömi. Tatu öʼandrö sibai saohagölö khönia börö me omasi fao ia khöu weʼamöi ba mbanua daʼö! Simanö göi Yehowa, omasi ia ba wanolo si fahuwu khönia. Sindruhu-ndruhu aboto ba dödönia hewisa waʼaurida andre ba zi so miföna. Börö daʼö, si fao fangide-ngideʼö taʼandrö wanolo moroi khö Yehowa  enaʼö tola aboto ba dödöda wamaʼeleʼö si so ba Zura Niʼamoniʼö.—Dan. 2:28; 2 Fe. 1:19, 20.

4. Hana wa isura wamaʼeleʼönia Yehowa ba Daromalinia? (Yeremia 29:11) (Faigi göi gambara.)

⁴ Simane satua si sökhi, omasi Yehowa na taʼokhögö dötönafö si sökhi ba zi so miföna. (Baso Yeremia 29:11.) Hizaʼi, tenga simane satua si so ba gulidanö, tola ifatunö khöda Yehowa hadia zalua ba zi so miföna, ba hasambalö itörö niwaʼönia andrö. So hadauga ndra matua nifili Yehowa ba wanura famaʼeleʼö ba Daromalinia irege tola taʼila hadia zalua sahöli-höli dödö hewaʼae lö salua ia nasa. (Yes. 46:10) Famaʼeleʼö si so ba Zura Niʼamoniʼö no buala faʼomasi moroi khö Namada si so ba zorugo. Hizaʼi, hewisa enaʼö tola itugu faduhu dödöu wa hasambalö alua fefu nifaʼeleʼö Zura Niʼamoniʼö?

5. Hadia wamahaʼö nihalö ndra si bohou ebua moroi ba zalua khö Max?

⁵ Ba zekola, ira talifusöda si bohou ebua, so ira ba gotalua niha sambö mamosumange mazui si lö moʼameʼegö tödö Sura Niʼamoniʼö. Itaria, tola mangiwa dödö ndra talifusöda andrö börö wehede hegöi nifalua ndra awö-awöra. Nehegö hadia zalua khö zi samösa talifusöda sotöi Max. Imane, ”Me sekola ndraʼo me no, no irai mangiwa dödögu ba zindruhu nifahaʼö ndra satuagu khögu, ba manofu-nofu dödögu hadia sindruhu-ndruhu moroi khö Lowalangi Zura Niʼamoniʼö andre.” Hadia nifalua zatuania? Imane, ”No lahaogö-haogö manö wehedera khögu, hewaʼae uʼila wa sindruhunia so khöra waʼaombö dödö.” Laʼogunaʼö Zura Niʼamoniʼö ira satuania ba wameʼe fanema li ba wanofu-nofu Max. So göi nifalua Max. Imane, ”Uʼogunaʼö wamaʼeleʼö si so ba Zura Niʼamoniʼö ba ginötö ufahaʼö ndraʼo samösa, ba udunö-dunö zi no aboto ba dödögu andrö khö ndra awögu tanö böʼö.” Hadia mbuania? Imane Max, ”Me no ufalua daʼö, awena sindruhu-ndruhu faduhu dödögu wa Sura Niʼamoniʼö andrö moroi khö Lowalangi!”

6. Hadia zinangea öfalua na mangiwa dödömö, ba hadia mbörö?

⁶ Böi aila ndraʼugö na örasoi simane nirasoi Max, na ibörögö mangiwa dödömö ba zindruhu si so ba Zura Niʼamoniʼö. Hizaʼi, moguna so nifaluamö. Fangiwa dödö andrö no amaedola howu. Na lö iʼanemaiʼö öheta ia, hasambalö ifakiko gama-gama sebua böli niʼokhögömö, hewaʼae lö iʼosamuzaigö. Ba woheta ”howu” si tola mamakiko famatimö, moguna ösofu khöu samösa, ’Hadia faduhu dödögu niwaʼö Zura Niʼamoniʼö sanandrösa ba zi so miföna?’ Na ambö faduhu dödömö, moguna öfahaʼö ndraʼugö ba wamaʼeleʼö si no alua si so ba Zura Niʼamoniʼö. Hewisa wamaluamö daʼö?

7. Hadia wamahaʼö nihalöda moroi ba duma-duma Danieli me ifahaʼö ia ba wamaʼeleʼö? (Danieli 12:10) (Faigi göi gambara.)

⁷ No duma-duma si sökhi Danieli ba ginötö tafahaʼö ita ba wamaʼeleʼö si so ba Zura Niʼamoniʼö. Hadia mbörö? Sökhi gohitö dödönia ba wamalua daʼö, ba omasi ia enaʼö aboto ba dödönia zindruhu. So göi khönia wangide-ngideʼö. Iʼila wa tola itolo ia Yehowa ba wangokhögö faʼaboto ba dödö sanandrösa ba  wamaʼeleʼö andrö na lö mamalö ahatö ia khö Yehowa ba so khönia woloʼö. (Dan. 2:27, 28; baso Danieli 12:10.) Iforomaʼö göi Danieli wangide-ngideʼö yaʼia me iʼodaligö wanolo moroi khö Yehowa. (Dan. 2:18) Ihaogö ifahaʼö ia Danieli. Iʼalui wanema li moroi ba gölu-gölu Zura si so me luo daʼö. (Yer. 25:11, 12; Dan. 9:2) Hewisa woloʼömö duma-duma Danieli?

8. Hadia gohitö dödö si fasala niʼokhögö niha ba ginötö ifahaʼö ia ba Zura Niʼamoniʼö, ba hewisa zinangeania gohitö dödöda?

⁸ Angeragö hadia gohitö dödöu ba ginötö öfahaʼö ndraʼugö. Na daʼö gohitö dödömö enaʼö aboto ba dödöu zindruhu, hasambalö itoloʼö Yehowa. (Yoh. 4:23, 24; 14:16, 17) Hizaʼi, so niha sangokhögö ohitö dödö si fasala ba ginötö ifahaʼö ia ba Zura Niʼamoniʼö. Duma-dumania, omasi ia ba wangalui tandra wa Sura Niʼamoniʼö andrö tenga niʼehehaini Lowalangi irege tola itatugöi samösa hadia zatulö mazui si fasala moloʼö somasi-masi dödönia. Moguna sökhi gohitö dödöda ba ginötö tafahaʼö ita. Baero daʼö, so gamuata tanö böʼö sinangea taʼokhögö na omasi ita aboto ba dödöda wamaʼeleʼö si so ba Zura Niʼamoniʼö.

9. Hadia gamuata si sökhi sinangea taʼokhögö enaʼö tola aboto ba dödöda wamaʼeleʼö Zura Niʼamoniʼö? Tutunö.

⁹ Okhögö wangide-ngideʼö. No ifabuʼu Yehowa wa hasambalö itolo niha si so fangide-ngideʼö. (Yak. 4:6) Börö daʼö, moguna taʼandrö wanolo moroi khönia enaʼö tola aboto ba dödöda wamaʼeleʼö si so ba Zura Niʼamoniʼö. Na so khöda wangide-ngideʼö, tatemaʼö göi wanolo moroi khö ndra sawuyu si lö faröi börö me yaʼira niʼogunaʼö Yehowa ba wohenaigö ö ba wamati ba ginötö si tefaudu. (Luk. 12:42) Yehowa andrö Lowalangi si toföfö. Börö daʼö, faduhu dödöda wa ha sambua lala niʼogunaʼö Yehowa ba wanolo yaʼita enaʼö aboto ba dödöda zindruhu si no tefaʼanö ba Daromalinia.—1 Ko. 14:33; Ef. 4:4-6.

10. Hadia wamahaʼö nihalömö moroi khö Ester?

¹⁰ Falua riset. Börögö wamahaʼö yaʼugö sanandrösa ba wamaʼeleʼö sadöni dödöu. Daʼö nifalua dalifusöda sotöi Ester. Adöni dödönia ba wamaʼeleʼö sanandrösa ba waʼatohare Mesia. Imane, ”Me 15 fakhe ndröfigu, ubörögö uʼalui dandra wa famaʼeleʼö andrö musura ia fatua lö tohare Yesu.” Faduhu dödönia me no aefa ibaso nisura ba Ngaʼölu Nasi si Mate. Imane, ”So ösa nitutunö ba daʼö, musura ia fatua lö si tohare Keriso. Tatu moroi khö Lowalangi wamaʼeleʼö daʼö. Ubaso ia mato hauga kali irege aboto ba dödögu.” Omuso dödönia ba wamorege si no ifalua. Me no aefa ifahaʼö ia ba zi hauga ngawua wamaʼeleʼö Zura Niʼamoniʼö, imane Ester, ”Iadaʼa, aboto ba dödögu wa atulö fefu nitutunö ba Zura Niʼamoniʼö!”

11. Hadia mbua nitemada na faduhu dödöda wa atulö fefu nitutunö ba Zura Niʼamoniʼö?

¹¹ Na no taʼila hewisa waʼalua wamaʼeleʼö si so ba Daromali Lowalangi, itugu aro waʼafaduhu dödöda khö Yehowa hegöi ba wanuturu lala nibeʼenia khöda. Baero daʼö, famaʼeleʼö ba Zura Niʼamoniʼö göi zanolo yaʼita ba wangokhögö fangera-ngera si sökhi sanandrösa ba wanötöna niʼokhögöda ba zi so miföna hewaʼae oya wamakao salua khöda. Börö daʼö, datatutunö zi dombua famaʼeleʼö nisura Danieli salua iadaʼa.  Tola tahalö gangetula si sökhi na aboto ba dödöda geluaha wamaʼeleʼö andrö.

12. Hadia zi no amaedola ’tete kahe siʼöli si no faruka tambu laʼuri’? (Danieli 2:41-43)

¹² Baso Danieli 2:41-43. Ba wangifi Razo Nebukanesa nifoʼeluaha Danieli, ahe nadu sebua niʼila razo, tefazökhi ia moroi ba ’ziʼöli si no faruka tambu laʼuri’. Na tafaehusi wamaʼeleʼö daʼa ba wamaʼeleʼö tanö böʼö ba mbuku Danieli hegöi Famaʼeleʼö, aboto ba dödöda wa tete kahe andrö no amaedola angorudua Inggris-Amerika, kuaso gulidanö fondrege zebua iadaʼa. Sanandrösa ba kuaso gulidanö daʼa, iwaʼö Danieli wa ’tebagi dania wamatörönia andrö matonga aro ba matonga zi lö aro’. Hana wa lö aro zi matonga? Börö me no amaedola dambu laʼuri nono mbanuania, daʼö wa tebai mamatörö ira simane faʼabeʼe ziʼöli. b

13. Hadia zindruhu si tohude niʼilada ba wamaʼeleʼö andre?

¹³ So zindruhu si tohude niʼilada moroi ba nadu sebua nitutunö Danieli, mendrua manö sanandrösa ba tete kahe nadu andrö. Si oföna, Kuaso Gulidanö Inggris-Amerika, no iforomaʼö waʼabölönia. Duma-dumania, tefarahu ira ba soi si möna sagötö Wasuwöta Gulidanö I hegöi Fasuwöta Gulidanö II. Hizaʼi, lö aro kuaso gulidanö andre börö me so waʼudusa ba gotalua nono mbanuania ba lalawa ndra samatörö. Si dua, daʼa kuaso gulidanö safuria fatua lö tohare Wamatörö Lowalangi ba wangohori fefu gamatöröwa niha gulidanö. Hewaʼae na itaria soi tanö böʼö laforege ba wolawa Kuaso Gulidanö Inggris-Amerika, hizaʼi tebai tekalaisi ia. Hezo taʼila daʼö? ”Kara” si no amaedola Famatörö Lowalangi, göna dania ia ba dete kahe andrö, yaʼia daʼö angorudua Inggris-Amerika.—Dan. 2:34, 35, 44, 45.

14. Hana wa tola tahalö gangetula si sökhi na aboto ba dödöda wamaʼeleʼö sanandrösa ba gahe siʼöli si no faruka tambu laʼuri?

¹⁴ Hadia faduhu dödöu wa atulö wamaʼeleʼö Danieli sanandrösa ba gahe siʼöli si no faruka tambu laʼuri? Na faduhu dödöu, tola molua-lua daʼö ba lala waʼaurimö. Daʼö zanolo yaʼugö enaʼö lö öʼosambuaʼö dödömö ba wangalui harato sebua börö me öʼila wa lö ara tö tedudugö gulidanö si lö sökhi andre. (Luk. 12:16-21; 1 Yo. 2:15-17) Daʼö göi zanolo yaʼugö enaʼö öʼila hawaʼamoguna wamalua halöwö fanuriaigö hegöi famahaʼö. (Mat. 6:33; 28:18-20) Na no aefa öfahaʼö ndraʼugö ba wamaʼeleʼö daʼa, sofu khöu samösa, ’Hadia oroma waʼafaduhu dödögu moroi ba gangetula nihalögu wa lö ara tö tohare Wamatörö Lowalangi ba wangohori fefu gamatöröwa niha gulidanö?’

15. Haniha zi tobali ”razo tanö raya” hegöi ”razo tanö yöu” iadaʼa? (Danieli 11:40)

¹⁵ Baso Danieli 11:40. Itutunö khöda ba Danieli faza 11 sanandrösa khö zi darua razo mazui samatörö sabölö si faoma fahindri. Na tafaedogö wamaʼeleʼö daʼa ba wamaʼeleʼö tanö böʼö si so ba Zura Niʼamoniʼö, tola taʼila wa ”razo tanö yöu” yaʼia daʼö Rusia hegöi soi si fao khönia, ba ”razo tanö raya” yaʼia daʼö Kuaso Gulidanö Inggris-Amerika. c

16. Hadia nifalua ”razo tanö yöu” ba nono mbanua Lowalangi?

¹⁶ Tefakao sibai nono mbanua Lowalangi si so barö wamatörö ”razo tanö yöu”. So ösa ndra Samaduhuʼö Yehowa nifakao ba nibeʼe ba gurunga börö wamatira. Hewaʼae simanö,  daʼö zangaʼaroʼö famati ndra talifusöda khö Yehowa hegöi ba Daromalinia. Hadia mbörö? Börö me aboto ba dödöra wa famakao salua khöra zangoromaʼö wa atulö wamaʼeleʼö nisura Danieli. d (Dan. 11:41) Daʼö göi zanolo yaʼita enaʼö itugu aro dötönaföda hegöi faʼalöfaröida khö Yehowa.

17. Hadia nifalua ”razo tanö raya” ba nono mbanua Lowalangi?

¹⁷ Ba zilalö, ”razo tanö raya” lafakao göi nono mbanua Yehowa. Duma-dumania, sagötö Wasuwöta Gulidanö I hegöi Fasuwöta Gulidanö II, ato ndra talifusöda nikuru börö me lö omasi ira fao ba wasuwöta, ba so ösa ndraono ndra Samaduhuʼö Yehowa niʼefasi moroi ba zekola börö me lö labeʼe yawa dangara ba mandrera. Sagötö zi hauga fakhe barö-barö daʼa, oya lala nifalua razo tanö raya ba wamakao ono mbanua Yehowa si lö faröi. Duma-dumania, sagötö pemilu, tetandraigö wamati niha Keriso ba wotuhini fazambua partai politik mazui niha sedöna mamatörö. Hewaʼae lö mamili ira, hizaʼi tola manö ebua zambuana dödöra. Börö daʼö, enaʼö lö ebua  dödö zambuana ita, moguna taʼangenanöi hadia nifaluada, nirasoida hegöi niʼera-erada!—Yoh. 15:18, 19; 18:36.

18. Hadia nifaluada na faʼudu ”razo tanö yöu” ba ”razo tanö raya”? (Faigi göi gambara.)

¹⁸ Tola manö so waʼaombö-aombö dödö sebua ba niha si lö mamati ba wamaʼeleʼö Zura Niʼamoniʼö ba ginötö laʼila ”razo tanö yöu” hegöi ”razo tanö raya” faoma ”lafatandru dandrura”. (Dan. 11:40, nis.) Razo si darua andre, fagölö so khöra bom nuklir si tola mangohori fefu niha gulidanö. Hizaʼi, taʼila wa lö itehegö Yehowa na alua zimane daʼö. (Yes. 45:18) Börö daʼö, böi taʼaombösi tödö zalua ba zi so miföna. Faʼudusa ba gotalua ”razo tanö yöu” hegöi ”razo tanö raya” möi fangaʼaro wamatida börö me daʼö zangoromaʼö wa no ahatö gamozua götö danö andre.

19. Hana wa moguna aboto ba dödöda sanandrösa ba wamaʼeleʼö si so ba Zura Niʼamoniʼö?

¹⁹ So ösa wamaʼeleʼö ba Zura Niʼamoniʼö si lö taʼila hewisa sibai waʼaluania. Simane daʼö zalua khö Danieli samaʼeleʼö. Lö ahori aboto ba dödönia geluaha nisurania. (Dan. 12:8, 9) Hizaʼi, na lö taʼila sibai hewisa waʼalua zi sambua famaʼeleʼö, tenga daʼö geluahania wa lö alua ia. Faduhu dödöda wa hasambalö itolo ita Yehowa enaʼö taʼokhögö waʼaboto ba dödö ba ginötö si tefaudu, simane si no ifalua ba zilalö.—Amo. 3:7.

20. Hadia wamaʼeleʼö Zura Niʼamoniʼö sadöni dödöda si lö ara tö alua, ba hadia zi lö tebulö tafalua?

²⁰ Lö ara tö lawaʼö niha, ”No atulö, no ahono!” (1 Te. 5:3) Aefa daʼö, fefu zamatörö ba gulidanö andre, lasuwö ba ladudugö agama sofaya. (Fam. 17:16, 17) Lasuwö göi nono mbanua Lowalangi. (Hez. 38:18, 19) Daʼö dania mbörö wa alua wasuwöta Hamagedo. (Fam. 16:14, 16) Faduhu dödöda wa lö ara tö alua daʼö. Gasa-gasa wombaloi faʼaluania, dataʼosambuaʼö dödöda ba wamaʼeleʼö Zura Niʼamoniʼö ba tatolo niha böʼö wamalua daʼö, irege tola taforomaʼö wangandrö saohagölö khö Namada sebua faʼomasi si so ba zorugo.