1-2. (a) Hewisa dödö Yehowa ba niha samalua horö sebua si lö mamalalini era-era? (b) Hadia nitötöna Yehowa ba niha samalua horö?

 YEHOWA andrö tenga Lowalangi somasi si lö sökhi, fatuwu sibai ia ba horö. (Si. 5:​4-6) Itötöna khöda Yehowa enaʼö taʼoʼö goroisania si so ba Zura Niʼamoniʼö. Tatu manö, aboto ba dödö Yehowa wa lö moʼahonoa ita, ba lö itötöna enaʼö moʼahonoa woloʼöda oroisania. (Si. 130:​3, 4) Hewaʼae simanö, lö omasi ia ba ’niha si lö mamosumange Lowalangi, sangogunaʼö faʼasökhi dödönia sebua ba wamalua amuata si lö faʼaila’. (Yud. 4) Ifatunö khöda Sura Niʼamoniʼö wa hasambalö ’tehori niha si lö mamosumange Lowalangi’ ba wasuwöta Hamagedo.—2 Fe. 3:7; Fam. 16:16.

² Sindruhunia, lö omasi Yehowa na so niha nihori. Simane nitutunöda ba artikel si no numalö ba majalah daʼa, iwaʼö Sura Niʼamoniʼö wa ’omasi Yehowa enaʼö dozi niha lafalalini gera-erara’. (2 Fe. 3:9) Ira satua sokubaloi laforege ba woloʼö amuata Yehowa, yaʼia me si fao faʼebolo dödö latolo niha samalua sala enaʼö ifalalini gera-erania ba ifuli ia khö Yehowa. Hizaʼi, lö fefu niha samalua sala omasi ira latema wanolo.  (Yes. 6:9) Hewaʼae no laforege ira satua sokubaloi ba wanolo niha si no mamalua horö, hizaʼi so nasa ba gotaluara zi lö mamöhöli mamalua daʼö. Na simanö, hadia zinangea lafalua ira satua sokubaloi?

”MIHETA BA GOTALUAMI NIHA SI LÖ SÖKHI ANDRÖ”

3. (a) Hadia niwaʼö Zura Niʼamoniʼö sanandrösa ba niha si lö mamalalini era-era? (b) Na so niha si lö mamalalini era-era, hana wa tola tawaʼö iʼodödögö enaʼö aheta ia ba mbanua niha Keriso?

³ Na lö ifalalini gera-erania niha samalua horö, lahalö gangetula ira satua sokubaloi ba wamalua fanuturu lala si so ba 1 Korindro 5:13: ”Miheta ba gotaluami niha si lö sökhi andrö.” Ibasi hadia zi no itaru. (Gal. 6:7) Yaʼia samösa zamili enaʼö aheta ia moroi ba mbanua niha Keriso. Hadia mbörö wa tawaʼö zimanö? Börö me lö omasi ia itemaʼö wanolo si no laforege ira satua sokubaloi enaʼö ifalalini gera-erania. (2 Ra. 17:​12-15) Nifaluania andrö zangoromaʼö wa lö omasi ia iʼoʼö niwaʼö Yehowa ba iʼodödögö wamalua daʼö.—5 Mo. 30:​19, 20.

4. Hana wa labeʼe gangombakhata wa no laheta ba mbanua niha Keriso zi samösa niha?

⁴ Na muheta niha si lö mamalalini era-era moroi ba gangowuloa, mubeʼe gangombakhata ba mbanua niha Keriso enaʼö laʼila wa tenga saʼae Samaduhuʼö Yehowa niha daʼö. a Mufalua daʼö tenga ba wangailasi yaʼia. Sindruhunia, daʼö zanolo ira talifusöda ba woloʼö mene-mene Zura Niʼamoniʼö ”enaʼö lö fariawö” ba ”böi naʼi orudu manga” ira khönia. (1 Ko. 5:​9-11) So gohitö dödö si sökhi wa mufalua daʼö. Imane Faulo, ”Ha maʼifu ragi tola kamba hamo darigu ibeʼe.” (1 Ko. 5:6) Na lö muheta ba mbanua niha Keriso niha si lö mamalalini era-era, tola manö lawaʼö tödöra ira talifusö tanö böʼö wa lö moguna laforege woloʼö oroisa Yehowa.—Amd. 13:20; 1 Ko. 15:33.

5. Hewisa zinangeania wamaigida niha si no muheta ba gangowuloa, ba hadia mbörö?

⁵ Na simanö, hewisa zinangeania wamaigida niha si no muheta ba gangowuloa? Hewaʼae lö fariawö ita khöra, hizaʼi böi irai so ba dödöda wa tebai saʼae mangawuli ira. Moguna tatörö tödöda wa yaʼira andrö biri-biri si taya. Tola nasa mangawuli mbiri-biri si taya ba ngawawania. Böi olifu ita wa no lalulu waʼaurira khö Yehowa mböröta. Sindruhu sa wa lö mofozu ira wondrorogö buʼusa lira khö Yehowa iadaʼa, ba daʼö mbörö wa tola manö taya khöra dötönafö faʼauri si lö aetu. (Hez. 18:31) Hewaʼae simanö, sagötö so nasa waʼahakhö dödö Yehowa, so dötönafö khöra ba wangawuli. Hadia zinangea lafalua ira satua sokubaloi ba wanolo niha si no muheta ba gangowuloa?

NIFALUA NDRA SATUA SOKUBALOI BA WANOLO NIHA NIHETA BA GANGOWULOA

6. Hadia manö nifalua ndra satua sokubaloi ba wanolo niha si no muheta ba gangowuloa?

⁶ Na no muheta zi samösa niha ba gangowuloa, hadia laböhöli ira satua sokubaloi ba wanolo yaʼia enaʼö ifuli ia khö Yehowa? Tatu manö löʼö! Ba ginötö lafatunö khönia ira panitia wa laheta ia ba mbanua niha Keriso, lafatunö göi khönia hadia zinangea ifalua na omasi ia mangawuli ba gangowuloa. Hizaʼi, tenga ha daʼö nifalua zatua sokubaloi. Sasesenia, lafatunö göi khö niha daʼö wa omasi ira falukha khönia mato hauga waŵa tö ba wamaigi hadia no ifalalini gera-erania. Na omasi ia falukha khöra ba zi hauga waŵa aefa daʼö, si fao faʼomasi  lafarou dödönia ira satua sokubaloi andrö enaʼö ifalalini gera-erania ba ifuli ia khö Yehowa. Hewaʼae lö si tebulö dödönia ba ginötö daʼö, lö laböhöli ira satua sokubaloi ba wamalukhaisi yaʼia mangawuli hegöi ba wamarou tödönia enaʼö ifalalini gera-erania.

7. Ba ginötö muheta zi samösa niha ba gangowuloa, hewisa ndra satua sokubaloi ba woloʼö faʼahakhö dödö Yehowa? (Yeremia 3:12)

⁷ Laforege ira satua sokubaloi ba woloʼö faʼahakhö dödö Yehowa ba niha si no muheta ba gangowuloa. Duma-dumania, me föna, lö ibalo-baloi Yehowa balazi lafalalini gera-erara iraono Gizaraʼeli awena itolo ira. Hizaʼi, ifatenge ndra samaʼeleʼönia khöra hewaʼae lö nasa niforomaʼöra famalalini era-era. Simane nitutunöda ba artikel si dua ba majalah daʼa, itutunö Yehowa wa faʼahakhö dödönia andrö simane me iwaʼö khö Hosea enaʼö ifuli ihalö mangawuli woʼomonia si lö tebulö mamalua horö nasa me luo daʼö. (Hos. 3:1; Mal. 3:7) Na laʼoʼö Yehowa ira satua sokubaloi, sindruhu-ndruhu omasi ira mangawuli niha samalua horö andrö khö Yehowa, ba lö laʼalu-alui zi tobali taha-taha.—Baso Yeremia 3:12.

8. Moroi ba gamaedola Yesu sanandrösa ba nono si taya, hadia wamahaʼö nihalöda ba lala wangera-ngera Yehowa ba niha si no mondröi yaʼia? (Luka 15:7)

⁸ Moroi ba gamaedola nono si taya, nehegö atö hadia nifalua namania. Me iʼila moroi ba zaröu nononia, ”fagohi namania, italagui ba ihaogö woʼuma”. (Luk. 15:20) Lö ibalo-baloi amania balazi mangalulu nononia ba wangandrö faʼebolo dödö. Hizaʼi, fagohi namania andrö ba wotemaʼö ononia börö waʼomasinia. Daʼa zangoromaʼö hewisa dödö Yehowa ba niha sondröi yaʼia. Moguna göi laforege ira satua sokubaloi ba woloʼö nifalua Yehowa. Omasi ira na mangawuli khö Yehowa mbiri-biri si taya andrö. (Luk. 15:​22-24, 32) Na mangawuli niha samalua horö, omuso dödö Yehowa, Yesu, hegöi ira malaʼika, ba simanö göi mbanua niha Keriso!—Baso Luka 15:7.

9. Hadia niʼandrö Yehowa ba niha si no mamalua horö?

⁹ Moroi ba zi no tatutunö andre, aboto ba dödöda wa lö omasi Yehowa so ba mbanua niha Keriso niha samalua horö si lö mamalalini era-era. Hizaʼi, lö iböhöli wanolo yaʼira. Itötöna enaʼö mangawuli ira. Nehegö hewisa dödö Yehowa ba niha samalalini era-era. Imane ba Hosea 14:​4, ”Ufuli dania ufadöhö nono mbanuagu moroi ba gamuatara si faröi. Uʼomasiʼö ira soroi ba dödögu, börö me lö saʼae mofönudo khöra.” Börö me no laʼila hewisa dödö Yehowa ira satua sokubaloi, tatu laforege ba wamaigi tandra-tandra niforomaʼö zi samösa niha ba wamalalini era-erania. Daʼa göi zamarou tödö niha si no mondröi Yehowa enaʼö lö itaha-taha wangawuli khö Yehowa.

10-11. Hadia nifalua ndra satua sokubaloi ba wanolo niha si no muheta ba gangowuloa ba zi hauga fakhe silalö?

¹⁰ Hewisa wanolo ndra satua sokubaloi niha si no muheta ba gangowuloa, te mato hauga fakhe silalö? Tola manö, no ara iböhöli wamalua horö si tobali börö wa laʼefasi ia. So göi ba gotaluara zolifu hadia mbörö wa muheta ira mböröta. Gofu hauga fakhe no muheta zi samösa niha ba gangowuloa, moguna laforege ira satua sokubaloi ba wangalui hegöi ba wangondrasi yaʼia. Na no falukha ira, tola mangandrö ira khönia ba lafarou dödönia enaʼö ifuli ia ba mbanua niha Keriso. Tatu na no hauga fakhe iröi mbanua niha Keriso si samösa niha, te moguna ifuli ifahaʼö ia sanandrösa khö Yehowa hegöi sindruhu moroi ba Zura Niʼamoniʼö. Börö daʼö, na ifatunö wa omasi ia mangawuli, moguna lafili ira satua sokubaloi samösa dalifusöda samahaʼö yaʼia ba  Zura Niʼamoniʼö. Tola mufalua daʼö fatua lö mutema ia mangawuli. Hizaʼi, böi olifu ita, ha ira satua sokubaloi zi tola mamili ira talifusöda sangai khönia famahaʼö ba Zura Niʼamoniʼö.

¹¹ Börö me laʼoʼö waʼahakhö dödö Yehowa ira satua sokubaloi, andrö wa laforege wangalui niha si no mondröi Yehowa ba lafarou dödöra enaʼö mangawuli ira. Na iforomaʼö wa no ifalalini gera-erania si samösa niha ba iböhöli wamalua horö, tola ifuli mutema ia ba mbanua niha Keriso.—2 Ko. 2:​6-8.

12. (a) Hadia zalua sinangea laʼangelamaisi ira satua sokubaloi? (b) Na so niha samalua horö simane nitutunö ba gahe zura, hadia mbörö wa böi so ba dödöda wa tebai itema waʼahakhö dödö Yehowa?

¹² Itaria, moguna göi mangelama ndra satua sokubaloi fatua lö lahalö gangetula ba  wotema mangawuli zi samösa niha. Duma-dumania, niha sohoröni mazui samakao iraono, niha sondröi sindruhu mazui niha sangodödögö ba wondröi foʼomonia. Na daʼa horö nifalua zi samösa niha andrö, moguna laʼila ira satua sokubaloi hadia sindruhu-ndruhu no ifalalini gera-erania. (Mal. 2:14; 2 Ti. 3:6) Moguna lalumöʼö mbiri-biri sato. Hizaʼi, ba ginötö daʼö göi, datatörö tödöda wa omasi Yehowa wanemaʼö mangawuli niha samalalini era-erania soroi ba dödö ba samöhöli wamalua horö. Hewaʼae mangelama ndra satua sokubaloi ba wamaigi hadia sindruhu-ndruhu no ifalalini gera-erania niha samalua horö sangafökhöiʼö tödö niha böʼö, hizaʼi tebai lawaʼö tödöra wa tenga sinangea itema waʼahakhö dödö Yehowa niha daʼö. b—1 Fe. 2:10.

NIFALUA MBANUA NIHA KERISO

13. Hadia gamaehuta nifaluada ba niha si no göna degu-degu faoma ba niha niheta ba gangowuloa?

¹³ Simane nitutunöda ba wamahaʼö silalö, itaria so gangombakhata wa no mubeʼe degu-tegu khö zi samösa niha. Na alua daʼö, tola nasa fariawö ita khönia börö me taʼila wa no ifalalini gera-erania ba no iröi horö nifaluania. (1 Ti. 5:20) Lö tebulö wa talifusöda ba wamatida ia ba moguna tabeʼe khönia wamarou dödö enaʼö ifalua zatulö. (Heb. 10:​24, 25) Hizaʼi, faböʼö nifaluada ba niha si no muheta ba mbanua niha Keriso. ”Lö fariawö” ba ”böi naʼi orudu manga” ita khönia.—1 Ko. 5:11.

14. Hewisa wangogunaʼö niha Keriso dödöra side-ide si no tefomaha ba Zura Niʼamoniʼö sanandrösa ba niha niheta ba mbanua niha Keriso? (Faigi göi gambara.)

¹⁴ Hadia daʼö geluahania wa sindruhu-ndruhu tebai fahuhuo ita ba niha si no muheta ba gangowuloa? Tenga daʼö geluahania. Sinduruhu sa wa tebai fariawö ita khönia. Hizaʼi, tola taʼogunaʼö dödöda side-ide si no tefomaha ba Zura Niʼamoniʼö ba wangai angetula hadia takaoni ia weʼamöi ba gangowuloa. Tola manö, yaʼia andrö si fahuwu khöda mazui si faʼila khöda ba zilalö. Hewisa na itemaʼö wogaoni andrö? Ba zilalö, tebai taʼowai mazui tatabe ira. Hizaʼi, iadaʼa moguna taʼogunaʼö  dödöda side-ide si no tefomaha ba Zura Niʼamoniʼö ba wangai angetula sanandrösa ba daʼö. So zangai angetula ba wangowai mazui ba wotabe yaʼia. Hizaʼi, moguna mangelama ita enaʼö böi anau sibai huhuoda mazui tahorigö ginötöda fariawö khönia.

15. Hadia horö nifalua zi samösa niha nitutunö ba 2 Yohane 9-11? (Faigi göi kotak ” Hadia Fagölö Horö Nitutunö Yohane hegöi Faulo?”)

¹⁵ Tola manö so zangumaʼö, ’Hadia tenga no iwaʼö Sura Niʼamoniʼö wa niha sangowai yaʼira eluahania no fao ia ba waʼalösökhira?’ (Baso 2 Yohane 9-11.) Na tahaogö taʼosisiʼö ayati daʼö, aboto ba dödöda wa sindruhunia moguna mene-mene daʼö ba niha sondröi sindruhu mazui sondrönisi niha böʼö ba wamalua amuata si fasala. (Fam. 2:20) Börö daʼö, na so niha samazaewe famahaʼö faya mazui amuata si fasala, lö laʼondrasi ia ira satua sokubaloi. Tatu manö, tebeʼe ginötö ba niha simane daʼö enaʼö ifalalini gera-erania. Hizaʼi, na lö nasa ifalalini gera-erania, tebai taʼowai mazui takaoni ia weʼamöi ba gangowuloa.

OʼÖ WAʼAHAKHÖ DÖDÖ YEHOWA

16-17. (a) Hadia niʼandrö Yehowa ba niha samalua horö? (Hezekieli 18:32) (b) Hewisa wangoromaʼö ndra satua sokubaloi wa falulu fohalöwö ira khö Yehowa ba ginötö latolo niha samalua horö?

¹⁶ Hadia zi no tatutunö ba zi lima artikel si so ba majalah daʼa? Lö omasi Yehowa na tehori niha fazamösa! (Baso Hezekieli 18:32.) Omasi ia na ifuli fahuwu khönia niha si no mamalua horö. (2 Ko. 5:20) Daʼö mbörö wa lö tebulö itolo nono mbanuania si no mondröi yaʼia enaʼö lafalalini gera-erara ba lafuli ira khönia. Tebeʼe döi si sökhi khö ndra satua sokubaloi me tola falulu fohalöwö ira khö Yehowa ba wanolo niha samalua horö sebua enaʼö ifalalini gera-erania.—Rom. 2:4; 1 Ko. 3:9.

¹⁷ Khalaigö hawaʼomuso dödö zorugo na so niha samalalini era-era! Omuso sibai dödö Yehowa ero na so mbiri-birinia si no taya sangawuli ba mbanua niha Keriso. Tatu itugu tedou waʼomasida khö Yehowa na lö tebulö taʼangerönusi waʼahakhö dödönia hegöi faʼasökhi dödönia sebua.—Luk. 1:78.