1. Hadia so dötönafö ba niha samalua horö sebua?

 BA ARTIKEL silalö, no taʼila hewisa wangasiwai Waulo abula dödö me so zamalua horö sebua ba mbanua niha Keriso ba Gorindro. Me lö ifalalini gera-erania niha samalua horö andrö, muheta ia moroi ba mbanua niha Keriso. Hizaʼi, simane tuho ayati ba artikel daʼa, so ösa niha samalua horö sebua si tola mutolo enaʼö lafalalini gera-erara. (Rom. 2:4) Hewisa ndra satua sokubaloi ba wanolo yaʼira?

2-3. Hadia zinangea tafalua na taʼila so dalifusöda si sara lala wamati samalua horö sebua, ba hadia mbörö?

² Enaʼö tola labeʼe wanolo ira satua sokubaloi, moguna aboto ba dödöra hadia zalua. Börö daʼö, hadia zinangea tafalua na taʼila so dalifusöda si sara lala wamati samalua horö sebua, si tola tobali börö wa muheta ia ba mbanua niha Keriso? Moguna tafatunö khönia enaʼö iʼandrö wanolo khö ndra satua sokubaloi.—Yes. 1:18; Hal. 20:28; 1 Fe. 5:2.

³ Hizaʼi, hewisa na lö omasi ia fahuhuo khö ndra satua sokubaloi? Na simanö, yaʼita zamatunö khö ndra satua sokubaloi enaʼö tola labeʼe khönia wanolo si tefaudu. Tandra waʼomasida daʼö, börö me lö omasi ita na taya dalifusöda andrö. Na lö iböhöli wamalua horö, tola manö itugu tekiko wahuwusania khö Yehowa. Tola göi iʼobousi döi si sökhi niʼokhögö mbanua niha Keriso. Tobali, na taʼomasiʼö Yehowa hegöi talifusöda andrö, lö khöda faʼataʼu ba wamalua daʼö.—Si. 27:14.

 NIFALUA NDRA SATUA SOKUBALOI BA WANOLO NIHA SAMALUA HORÖ SEBUA

4. Hadia gohitö dödö ndra satua sokubaloi na lafalukhaisi niha si no mamalua horö sebua?

⁴ Na so zamalua horö sebua ba mbanua niha Keriso, lafili ira boto satua sokubaloi datölu ndra talifusöda sinangea tobali panitia. a Moguna so khöra wangide-ngideʼö ba tebai fayawa ira. Hewaʼae na laforege wanolo niha samalua horö andrö enaʼö ifalalini gera-erania, aboto ba dödöra wa tebai lafaso enaʼö tebulö zi samösa niha. (5 Mo. 30:19) Laʼila wa lö fefu niha si no mamalua horö, labulöʼö lala wangera-ngerara simane nifalua Razo Dawido, ba latemaʼö mene-mene nibeʼe khöra. (2 Sa. 12:13) Te so zangositengagö mene-mene nibeʼe Yehowa. (1 Mo. 4:​6-8) Hewaʼae simanö, ohitö dödö ndra satua sokubaloi yaʼia daʼö laforege ba wanolo niha si no mamalua hörö enaʼö ifalalini gera-erania. Hadia goi-goi sinangea laʼoʼö ba ginötö lafalukhaisi niha si no mamalua horö?

5. Hadia goi-goi si tebai laʼolifugö ira satua sokubaloi na lafalukhaisi niha si no mamalua horö? (2 Timoteo 2:​24-26) (Faigi göi gambara.)

⁵ Moguna latörö tödöra ira satua sokubaloi wa niha si no mamalua horö andrö amaedola mbiri-biri si taya sebua böli khö Yehowa. (Luk. 15:​4, 6) Börö daʼö na lafalukhaisi ia, moguna lahaogö-haogö khönia wehede si fao faʼomasi. Ohitö dödöra tenga ha ba woloʼö si no mufakhoi. Moguna laforomaʼö mbua-bua nitutunö ba 2 Timoteo 2:​24-26. (Baso.) Laforege enaʼö sökhi lagu wahuhuosara ba lö labeʼe zafökhö ba dödönia börö me omasi ira wanolo yaʼia ba wombulöʼö fangera-ngerania.

6. Hewisa ndra satua sokubaloi wamaʼanöra tödöra fatua lö lafalukhaisi niha si no mamalua horö? (Roma 2:4)

⁶ Ira satua sokubaloi lafaʼanö dödöra samösa. Laforege woloʼö amuata Yehowa ba ginötö lafalukhaisi niha si no mamalua horö. Lö olifu ira wehede Waulo me imane, ”Si fao faʼasökhi dödö itolo ami Lowalangi enaʼö mifalalini gera-erami.” (Baso Roma 2:4.) Tebai olifu ira wa halöwöra yaʼia daʼö tobali kubalo, soloʼö fanuturu lala nibeʼe Keriso. (Yes. 11:​3, 4; Mat. 18:​18-20) Fatua lö lafalukhaisi niha samalua horö, mangandrö ndra panitia andrö ba lahaogö laʼangeragö hadia gohitö dödöra, yaʼia daʼö ba wanolo enaʼö ifalalini gera-erania. Lahaogö wangalui ayati Zura Niʼamoniʼö hegöi publikasi si tefaudu. Mangandrö göi ira enaʼö tola aboto ba dödöra sanandrösa ba niha daʼö hegöi salua khönia. Ba laʼangeragö hadia zinangea laʼila sanandrösa ba waö-waö waʼaurinia ba zilalö, si tola mondrönisi lala wangera-ngera, amuata, hegöi nifaluania.—Amd. 20:5.

7-8. Hewisa ndra satua sokubaloi woloʼö faʼebolo dödö Yehowa ba ginötö lafalukhaisi niha samalua horö?

 ⁷ Ira satua sokubaloi laʼoʼö waʼebolo dödö Yehowa. Itörö tödöra hadia nifalua Yehowa ba wanolo niha si no mamalua horö ba götö föna. Duma-dumania, fahuhuo Yehowa khö Gaʼino si fao faʼebolo dödö. Ifangelama ia Yehowa sanandrösa ba lua-lua horö, ba ifatunö khönia wa hasambalö itema howu-howu na ifalua zatulö. (1 Mo. 4:​6, 7) Baero daʼö, ifatenge Natano samaʼeleʼö Lowalangi Yehowa ba wameʼe mene-mene khö Dawido, ba tofakha sibai ba dödö Dawido duma-duma nibeʼe Natano. (2 Sa. 12:​1-7) ”Lö aetu” ifatenge göi ndra samaʼeleʼö khönia Yehowa ba wamangelama iraono Gizaraʼeli si no elungu. (Yer. 7:​24, 25) Lö ibaloi-baloi manö balazi lafalalini gera-erara ono mbanuania. Hizaʼi, iʼalui lala ba wanolo yaʼira enaʼö lafalalini gera-erara hewaʼae lö nasa laböhöli wamalua horö.

⁸ Laforege ira satua sokubaloi ba woloʼö duma-duma Yehowa ba ginötö latolo niha samalua horö sebua. Simane si no tesura ba 2 Timoteo 4:​2, ”si fao faʼebolo dödö” lahaogö-haogö khö dalifusöda si no mamalua horö andrö. Eluahania moguna lataha dödöra ba si fao faʼebolo dödö lafarou niha daʼö ba wamalua satulö. Na mofönu ndra satua sokubaloi mazui abao dödöra, tola manö ifandröndröu ia niha daʼö mazui tobali börö wangala khönia.

9-10. Hewisa ndra satua sokubaloi wanolo si samösa niha enaʼö aboto ba dödönia zala nifaluania?

⁹ Laʼalui ira satua sokubaloi hadia mbörö wa ifalua horö si samösa niha andrö. Duma-dumania, hadia awuwu ia ba wamati börö me lö saʼae ifalua wamahaʼö samösa mazui fanuriaigö? Hadia lö saʼae asese mangandrö ia khö Yehowa, mazui fangandrönia asala noa manö? Hadia itehegö mowaʼa ba dödönia gisö-isö si fasala irege tedönisi ia wamalua daʼö? Haniha zi fariawö khönia mazui hadia hiburan nifilinia? Hadia lua-lua gangetulania andrö ba dödönia side-ide? Hadia aboto ba dödönia wa angetula hegöi nifaluania tobali fangafökhö dödö Namania, Yehowa?

¹⁰ Tola labeʼe wanofu-nofu si tefaudu ira satua sokubaloi ba wangila ösi dödönia ba latolo ia enaʼö aboto ba dödönia wa fasala nifaluania barö daʼa irege ifalua horö. (Amd. 20:5) Lafalua daʼa si fao faʼasökhi dödö ba lö lasekhegö ia wanofu ba zi tenga sinangea laʼila. Baero daʼö, tola göi laʼogunaʼö duma-duma enaʼö mangera-ngera niha daʼö ba iʼila wa fasala nifaluania, simane nifalua Natano khö Dawido. Me awena falukha ira, te no ibörögö iforomaʼö waniasa niha daʼö ba zala hegöi nifaluania ba zilalö. Mazui, tola manö no ifalalini gera-erania.

11. Hadia nifalua Yesu ba niha si no mamalua horö?

¹¹ Laforege ira satua sokubaloi ba woloʼö duma-duma Yesu. Me no tesusugi Yesu, ibeʼe wanofu si sökhi khö Zaulo moroi ba Dareso imane, ”He Saulo, he Saulo, hana wa öfakao ndraʼo?” Fanofu Yesu andrö zanolo Saulo enaʼö aboto ba dödönia wa fasala nifaluania ba zilalö. (Hal. 9:​3-6) Me fahuhuo göi ia sanandrösa khö ”ndra alawe si hulö Gizebela”, imane Yesu, ”No ubeʼe khönia ginötö ba wamalalini era-erania.”—Fam. 2:​20, 21.

12-13. Hewisa ndra satua sokubaloi wameʼe inötö khö zi samösa niha enaʼö ifalalini gera-erania? (Faigi göi gambara.)

¹² Simane Yesu, lö aösö-aösö ndra satua sokubaloi ba wangai angetula wa lö saʼae ifalalini gera-erania niha samalua horö andrö. Sindruhu sa wa so zamalalini era-erania me awena falukha ia khö ndra panitia. So göi zara awena tebulö wangera-ngerania. Börö daʼö, tola manö tenga ha sakali falukha ndra satua sokubaloi  ba niha si no mamalua horö. Me falukha ira ba ziföföna, te awena ibörögö mangera-ngera niha daʼö sanandrösa ba nifaʼema ndra satua sokubaloi khönia ba mangandrö ia khö Yehowa si fao fangide-ngideʼö. (Si. 32:5; 38:18) Tola manö, tebulö gamuatania na falukha ira aefa daʼö.

¹³ Börö me omasi ndra satua sokubaloi na ifalalini gera-erania niha si no mamalua horö, andrö wa latöfaigö ba dödöra hadia zalua khönia ba laforomaʼö waʼasökhi dödö. Latötöna ba mangandrö ira khö Yehowa enaʼö ifahowuʼö nifaluara irege mangesa ba ifalalini gera-erania niha Keriso si no mamalua sala andrö.—2 Ti. 2:​25, 26.

14. Haniha sindruhunia zanolo si samösa niha enaʼö ifalalini gera-erania, ba hana wa tawaʼö zimanö?

¹⁴ Na ifalalini gera-erania si samösa niha, tatu manö no faʼomuso dödö sebua daʼö! (Luk. 15:​7, 10) Haniha sindruhunia zanolo yaʼia? Hadia ira satua sokubaloi? Datatörö tödöda nisura Waulo sanandrösa ba niha si no mamalua horö imane, ”Maʼatö itehegö Lowalangi lafalalini gera-erara.” (2 Ti. 2:25) Börö daʼö, sanolo si samösa niha enaʼö ifalalini gera-erania hegöi amuatania yaʼia daʼö Yehowa, tenga niha. Yaʼia zanolo niha Keriso si no elungu andrö enaʼö ibulöʼö lala waʼaurinia. Aefa daʼö, ifatunö Faulo hadia mbua si sökhi moroi ba wamalalini era-era: Niha si no mamalalini era-era andrö laʼokhögö dania waʼaboto ba dödö sabölö tefaudu sanandrösa ba zindruhu, mangesa dödöra, ba tola laheta ira moroi ba dandrawa Zatana.—2 Ti. 2:26.

15. Hadia nifalua ndra satua sokubaloi ba wanolo niha samalalini era-era?

¹⁵ Ba ginötö ifalalini gera-erania si samösa niha, lö laböhöli ira satua sokubaloi ba wameʼe fanolo soguna khönia. Ira panitia si möi khönia, lafuli latatugöi ginötö ba wokubaloi yaʼia enaʼö tola ilawa dandrawa Zatana ba lö tebulö adölö lala waʼaurinia. (Heb. 12:​12, 13) Tatu manö, lö ladunö-dunö ira boto satua sokubaloi ba niha böʼö hadia zala nifalua niha daʼö. Hizaʼi, hadia zi tola manö lafatunö ba mbanua niha Keriso?

 ”MITEGU FÖNA NIHA SATO”

16. Hadia geluaha wehede Waulo ba 1 Timoteo 5:20?

¹⁶ Baso 1 Timoteo 5:20. Ifaʼoheʼö zurania Faulo khö nawönia satua sokubaloi sotöi Timoteo. Itutunö wa moguna ’mutegu föna niha sato zi lö mamöhöli mamalua horö’. Hadia geluahania? Hadia moguna mufatunö ba mbanua niha Keriso sanandrösa ba degu-tegu andrö? Lö ero-ero. ”Niha sato” nitötöi Waulo yaʼia daʼö si no mangila horö nifalua zi samösa niha andrö. Te no laʼila samösa mazui larongo daʼö moroi ba niha samalua horö andrö. Ha khöra lafatunö ira satua sokubaloi wa no muʼasiwai horö nifaluania.

17. Hadia zalua irege tola manö mufaʼema gangombakhata ba mbanua niha Keriso wa no mutegu zi samösa niha, ba hadia mbörö?

¹⁷ Na ato zangila horö nifalua niha daʼö mazui tola manö larongo dania ira talifusöda ba mbanua niha Keriso maʼafefu, moguna mubeʼe gangombakhata ba mbanua niha Keriso. So samösa zatua sokubaloi samaʼema angombakhata ba mbanua niha Keriso wa talifusöda andrö no labeʼe khönia degu-tegu. Hadia mbörö? Iwaʼö Faulo wa daʼö ”si tobali famangelama ba danö böʼö göi” enaʼö lö aekhu ira ba horö.

18. Hadia nifalua ndra satua sokubaloi na samalua horö andrö iraono si no tebayagö idanö? (Faigi göi gambara.)

¹⁸ Hewisa na samalua horö andrö iraono si no tebayagö idanö si lö nasa ikhamö 18 fakhe? Latatugöi ira satua sokubaloi enaʼö so darua zatua sokubaloi si möi mamalukhaisi ono daʼö hegöi satuania si no tobali Samaduhuʼö Yehowa. b Moguna laʼalui ira satua sokubaloi hadia manö wamorege si no lafalua ira satuania ba  wanolo iraonora andrö enaʼö ifalalini gera-erania. Na sökhi gamuata nono daʼö ba itemaʼö mene-mene nibeʼe zatuania, tola manö lahalö gangetula ira satua sokubaloi wa tobönö ndrege daʼö zinangea lafalua. Sindruhunia, satua zabölö mangonorogö tödö ba wameʼe fotu khö ndraonora si fao faʼomasi. (5 Mo. 6:​6, 7; Amd. 6:20; 22:6; Ef. 6:​2-4) Hizaʼi, itaria lasofu ira satua sokubaloi khö zatua nono daʼö enaʼö laʼila hadia no itema wanolo si tefaudu ba zoguna khönia. Hewisa na lö iböhöli ono daʼö wamalua horö ba lö ifalalini gera-erania? Na simane daʼö zalua, datölu ndra satua sokubaloi si tobali panitia, lafalukhaisi nono daʼö hegöi satuania si no tobali Samaduhuʼö Yehowa.

”SAFÖNU FAʼOMASI YEHOWA BA SAHAKHÖ TÖDÖ”

19. Hewisa ndra satua sokubaloi woloʼö duma-duma Yehowa na lafalukhaisi niha si no mamalua horö?

¹⁹ Ira satua sokubaloi si fao ba panitia andrö zangonorogö tödö föna Yehowa ba wondrorogö banua niha Keriso faböi taʼunö. (1 Ko. 5:7) Hizaʼi, laforege göi wanolo niha si no mamalua horö andrö enaʼö ifalalini gera-erania. Börö daʼö, moguna laʼokhögö wangera-ngera satulö ira satua sokubaloi ba lö aetu dötönaföra. Laʼoʼö gamuata Yehowa safönu faʼomasi ba sahakhö tödö. (Yak. 5:11) Simane daʼö göi nirasoi zinenge sotöi Yohane. Imane, ”He iraonogu, usura daʼa fefu enaʼö lö mifalua horö. Na so zamalua horö, so zanolo yaʼita si fao khö Nama, yaʼia daʼö Yesu Keriso samalua satulö.”—1 Yo. 2:1.

20. Hadia nitutunöda ba artikel safuria ba majalah daʼa?

²⁰ Alimagö sibai, so ösa niha Keriso si lö mamalalini era-erania irege laheta ia ba mbanua niha Keriso. Hadia nifalua ndra satua sokubaloi na alua zimane daʼö? Tatutunö wanema linia ba artikel safuria ba majalah daʼa.