1-2. (a) Hadia horö andrö, ba hewisa enaʼö möna ita wolawa daʼö? (Faigi göi ”Geluaha Ngawua Wehede”.) (b) Hadia nitutunöda ba artikel daʼa hegöi ba artikel tanö böʼö si so ba majalah daʼa? (Faigi göi ”Oroisa ba Zombaso” ba majalah daʼa.)

 HAWAʼEBUA waʼomasi Yehowa khöu? Enaʼö öʼila wanema linia, fahaʼö ndraʼugö ba zi no ifalua ba wangefaʼö yaʼugö moroi ba horö hegöi ba waʼamate. Horö a andre udu sabölö, si tebai talawa na taʼodaligö waʼabölöda samösa. Fefu ita oi dozi samalua horö ba daʼö mbörö wa göna ita faʼamate. (Rom. 5:12) Hizaʼi so duria somuso dödö: Börö wanolo moroi khö Yehowa, tola möna ita ba wolawa horö!

² Mato 6.000 fakhe silalö, lö tebulö itolo niha gulidanö Yehowa ba wolawa horö. Hadia mbörö? Börö me iʼomasiʼö ita. Iʼomasiʼö niha gulidanö Yehowa iʼotarai me iwöwöi ira, ba daʼö mbörö wa iforege wanolo yaʼira. Iʼila Lowalangi wa lua-lua horö andre faʼamate, ba lö omasi ia na mate ita. Omasi ia na fefu ita, farahu ndraʼugö ba daʼö, tasöndra waʼauri sagötö faʼara. (Rom. 6:23) Ba artikel daʼa, tatutunö dania tölu ngawua wanofu: (1) Hadia dötönafö nibeʼe Yehowa ba niha safönu horö? (2) Hadia nifalua niha si lö moʼahonoa ba götö Zura Niʼamoniʼö ba wangomusoiʼö tödö Yehowa? (3) Hadia nifalua Yesu ba wangefaʼö niha moroi ba horö hegöi faʼamate?

 HADIA DÖTÖNAFÖ NIBEʼE YEHOWA BA NIHA SAFÖNU HORÖ?

3. Hadia mbörö wa lafalua horö ira Adamo hegöi Khawa?

³ Me awena iwöwöi ndra matua hegöi ira alawe siföföna Lowalangi Yehowa, omasi ia na lasöndra waʼohahau dödö. Ibeʼe khöra nahia waʼatoröi si sökhi, halöwö si sökhi, ba ifangowalu ira. Ibeʼe khöra halöwö enaʼö mongaʼötö ira ba lafönui gulidanö, labaliʼö göi faradaiso zi sagörö ulidanö andre, simane Kabu Edena. Ha sambua goroisania khöra, ba sindruhunia aoha sibai wamalua daʼö. Ibeʼe khöra wamangelama wa hasambalö mate ira na laʼodödögö ba wanawö oroisa andrö. Hadia zalua aefa daʼö? So samösa malaʼika, si lö mangomasiʼö niha hegöi Lowalangi, idönisi dödöra wamalua horö. Alimagö sibai börö me tedönisi dödöra. Lö lafaduhusi tödö Namara sebua faʼomasi, mamadaö ira ba lua-luania aekhu ira ba horö. Simane si no taʼila, alua hadia zi no iwaʼö Yehowa. Iʼotarai daʼö, lataögö lua-lua horö nifaluara: atua, mofökhö, ba gafuriata mate ira.—1 Mo. 1:​28, 29; 2:​8, 9, 16-18; 3:​1-6, 17-19, 24; 5:5.

4. Hana wa fatuwu sibai Yehowa ba horö ba omasi ia itolo ita ba wolawa daʼö? (Roma 8:​20, 21)

⁴ No itatugöi Yehowa enaʼö tesura zalua andre ba Zura Niʼamoniʼö. Ifalua daʼö enaʼö taʼila hadia mbörö wa fatuwu sibai ia ba horö. Horö andre zamabali fahuwusada khö Namada, ba solohe yaʼita ba waʼamate. (Yes. 59:2) Fatuwu sibai Zatana khö Yehowa hegöi ba niha. Daʼö mbörö wa idönisi dödö Gadamo hegöi Khawa ba wamalua horö, ba lö tebulö ifalua daʼö irugi maʼökhö. Me no lafalua horö ira Adamo hegöi Khawa, te iwaʼö tödönia Satana wa no mofozu ia ba wanaisi ohitö dödö Lowalangi. Hizaʼi, lö aboto ba dödönia wa ebua sibai waʼomasi Yehowa. Lö tebulö gohitö dödö Yehowa ba ngaʼötö Gadamo ba Khawa. Ebua sibai waʼomasinia ba niha, ba iʼanemaiʼö ibeʼe khöra dötönafö. (Baso Roma 8:​20, 21.) Iʼila Yehowa wa so dania ngaʼötöra zangai angetula ba wangomasiʼö hegöi ba woloʼö niwaʼönia. Börö me yaʼia andrö Ama ba Somböi fefu hadia ia, iʼalui lala enaʼö teʼefaʼö ira moroi ba horö ba ifuli ahatö ira khönia. Hadia nifalua Yehowa?

5. Hamega zi oföna sibai ibeʼe dötönafö Yehowa ba niha saekhu ba horö? Tutunö. (1 Moze 3:15)

⁵ Baso 1 Moze 3:15. Me no aekhu ba horö Gadamo hegöi Khawa, iʼanemaiʼö ibeʼe dötönafö Yehowa yaʼia me ifaʼeleʼö zalua khö Zatana. Ifatunö Yehowa wa so dania ”maʼuwu” sangefaʼö niha gulidanö. ”Maʼuwu” daʼa dania zangohori Satana ba sangeheta abula dödö salua iʼotarai ba Gedena. (1 Yo. 3:8) Hizaʼi fatua lö alua daʼö, tefakao ”maʼuwu” nifabuʼu andre. ’Idou mbörö sisinia’ mazui ifakao ia Satana irege mate. Sindruhu-ndruhu wa afökhö sibai dödö Yehowa ba zalua andre. Hewaʼae simanö, itaögö fefu waʼafökhö andrö Yehowa enaʼö tola iʼefaʼö niha gulidanö moroi ba horö ba faʼamate!

NIFALUA NIHA SI LÖ MOʼAHONOA BA GÖTÖ ZURA NIʼAMONIʼÖ BA WANGOMUSOIʼÖ TÖDÖ YEHOWA

6. Hadia nifalua Habeli, Noakhi hegöi niha samati tanö böʼö enaʼö tobali ira si fahuwu khö Yehowa?

⁶ Mato hauga abad aefa daʼö, izara-zara wanutunö Yehowa hewisa lala enaʼö ifuli ahatö khönia niha si no aekhu ba horö. Habeli, ono numero dua khö Gadamo ba Khawa, yaʼia niha siföföna samati khö Yehowa iʼotarai me alua wamadaö ba Gedena. Börö me iʼomasiʼö Yehowa, andrö wa iforege Habeli ba wangomusoiʼö tödö Yehowa ba tobali si fahuwu khönia. Habeli andre samösa kubalo, andrö wa ihalö mato hauga ngaʼeu nono mbiri-birinia ba ibeʼe daʼö tobali sumange khö Yehowa.  Hewisa dödö Yehowa? ”Omuso dödö Yehowa khö Habeli awö zumange nibeʼenia.” (1 Mo. 4:4) Omuso göi dödö Yehowa ba zumange nibeʼe Noakhi hegöi niha samati tanö böʼö sangomasiʼö yaʼia. (1 Mo. 8:​20, 21) Me itema zumange simane daʼö Yehowa, ifaduhuʼö khöda wa tola laʼomusoiʼö dödönia niha si no aekhu ba horö, ba tola tobali ira si fahuwu khönia. b

7. Hadia wamahaʼö nihalöda moroi ba waʼaoha gölö Gaberahamo me ibeʼe nononia tobali sumange?

⁷ Iʼandrö Yehowa khö Gaberahamo, ira matua sangoromaʼö famati sebua, enaʼö ibeʼe nononia Izaʼaki tobali sumange. Sindruhu-ndruhu wa abua sibai wamalua daʼö. Hizaʼi, ifalua daʼö Aberahamo si fao faʼaoha gölö. Ba gafuriata, itaha ia Lowalangi enaʼö lö ifalua daʼö. Moroi ba daʼa, so sambua wamahaʼö si tola lahalö ira niha samati: Simane faʼaoha gölö Gaberahamo ba wameʼe Izaʼaki tobali sumange, simane daʼö waʼaoha gölö Yehowa ba wameʼe Ononia tobali sumange. Ba daʼa taʼila wa sindruhu-ndruhu iʼomasiʼö sibai niha gulidanö Yehowa.—1 Mo. 22:​1-18.

8. Hadia geluaha ngawalö zumange nihonogöi ba Goroisa Moze? (3 Moze 4:​27-29; 17:11)

⁸ Ngaotu fakhe aefa daʼö, ibeʼe Goroisa Moze ba ndraono Gizaraʼeli Yehowa. Ba Goroisa andrö, iʼandrö khöra enaʼö oya labeʼe gurifö si tobali sumange ba wameta horöra. (Baso 3 Moze 4:​27-29; 17:11.) Fefu zumange andrö sindruhunia khili-khili moroi ba zi sambua zumange sabölö ebua si tola mangefaʼö niha moroi ba horö. Iʼogunaʼö ndra samaʼeleʼö khönia ba wanutunö wa ngaʼötö nifabuʼu andrö, Ono Lowalangi si ha sambua, hasambalö itörö wamakao ba faʼamate. Tobali ia simane biri-biri nibeʼe sumange. (Yes. 53:​1-12) Khalaigö atö, ifazökhi Yehowa gamakhoita ba wameʼe Ono niʼomasiʼönia tobali sumange ba wangefaʼö niha gulidanö moroi ba horö hegöi faʼamate, farahu ndraʼugö ba daʼö!

HADIA NIFALUA YESU BA WANGEFAʼÖ NIHA?

9. Hadia niwaʼö Yohane Samayagö Idanö sanandrösa khö Yesu? (Heberaiʼo 9:22; 10:​1-4, 12)

⁹ Me abad siföföna, ibeʼe gehehania Lowalangi khö Yohane Samayagö Idanö ba wangumaʼö fehede daʼa sanandrösa khö Yesu moroi ba Nazareta, ”Hiza, yaʼia Nono Mbiri-biri andrö khö Lowalangi, sangeheta horö gulidanö!” (Yoh. 1:29) Ngawua wehede daʼa zangoromaʼö wa Yesu andrö ngaʼötö nifabuʼu si no ara mufaʼeleʼö. Simane si no mufabuʼu, itehegö waʼaurinia tobali sumange. Iʼotarai daʼö, itugu aro dötönafö niha gulidanö wa tola teʼefaʼö ira moroi ba horö.—Baso Heberaiʼo 9:22; 10:​1-4, 12.

10. Hadia zangoromaʼö wa tohare Yesu ba ”wogaoni” niha samalua horö?

¹⁰ Me so Yesu ba gulidanö, iʼosambuaʼö dödönia ba wanolo niha sabu tödö börö me no raʼiö ira ba horö, ba ikaoni ira tobali soloʼö khönia. Iʼila wa horö andre zi tobali börö wa tefakao niha gulidanö. Andrö wa iforege ba wanolo niha sabu tödö ba horö si no lafalua. Imane Yesu, ”Tenga ba niha sabölö moguna doto, hizaʼi ba niha sofökhö. . . . Tenga ba wogaoni niha satulö möi ndraʼo, hizaʼi ba wogaoni niha sebua horö.” (Mat. 9:​12, 13) Ifalua daʼö Yesu. Me so samösa ndra alawe sanasai ahenia faoma tawa hörö, si fao faʼasökhi dödö iwaʼö khönia Yesu wa no teʼefaʼö horönia. (Luk. 7:​37-50) Ifaʼema göi zindruhu khö ndra alawe Zamaria ba zinga mbaʼa nidanö, hewaʼae iʼila wa toröi ndra alawe daʼö khö ndra matua si tenga foʼomonia. (Yoh. 4:​7, 17-19, 25, 26) Tebeʼe göi khö Yesu waʼabölö ba wokalaisi faʼamate, si tobali lua-lua moroi ba horö. Tola isusugi  niha si no mate, he ira alawe, ira matua, iraono hegöi satua.—Mat. 11:5.

11. Hadia mbörö wa laʼondrasi Yesu ira niha si no raʼiö ba horö?

¹¹ Hana wa lö ataʼu ba lö alawö ndra niha sebua horö ba wangondrasi Yesu? Börö me aboto ba dödönia hadia nirasoira. (Luk. 15:​1, 2) Isuno göi ira Yesu börö me mamati ira, ba iforomaʼö khöra waʼasökhi dödö. (Luk. 19:​1-10) Moʼahonoa woloʼönia faʼahakhö dödö Namania. (Yoh. 14:9) Moroi ba wehede hegöi nifaluania, ifaduhuʼö wa iʼomasiʼö sibai niha gulidanö Amania ba omasi ia itolo ira enaʼö tola möna ba wolawa horö. Iforege göi ba wanolo niha samalua horö enaʼö lafalalini gera-erara ba tobali ira soloʼö khönia.—Luk. 5:​27, 28.

12. Hadia nifahaʼö Yesu sanandrösa ba waʼamatenia?

¹² Iʼila Yesu hadia zalua khönia ba zi lö ara tö. No hauga kali ifatunö khö ndra nifahaʼönia wa so dania zi manga mbölinia, ba labunu ia ba döla geu. (Mat. 17:22; 20:​18, 19) Iʼila wa faʼamatenia zi tola mangeheta horö gulidanö, simane nitutunö Yohane hegöi niwaʼö ndra samaʼeleʼö. Ifatunö göi wa hasambalö ’idönisi fefu niha moroi ba ngawalö soi’ khönia na no aefa ibeʼe waʼaurinia tobali sumange. (Yoh. 12:32) Fefu niha samalua horö, tola laʼomusoiʼö dödö Yehowa na mamati ira khö Yesu ba latara lahenia. Na lafalua daʼö, awena ’teʼefaʼö ira ba horö’. (Rom. 6:​14, 18, 22; Yoh. 8:32) Börö daʼö, enaʼö tola iʼefaʼö ita Yesu, si fao faʼabarani ba faʼaoha gölö itaögö waʼamate safökhö sibai.—Yoh. 10:​17, 18.

13. Hewisa lala waʼamate Yesu, ba hadia wamahaʼö nihalöda ba daʼö sanandrösa khö Lowalangi Yehowa? (Faigi göi gambara.)

 ¹³ Laʼa mböli Yesu, laraʼu ia, laʼailasi, laböbögö khönia zi lö duhu, lafakao ba lahuku. Aefa daʼö, laʼohe ia ira saradadu ba naha wamunu yaʼia, ba laʼosö ia ba döla geu. Itaögö fefu waʼafökhö andrö ba lö faröi ia. Hizaʼi, so nasa zabölö morasoi faʼafökhö, yaʼia daʼö Lowalangi Yehowa. Iʼomasiʼö sibai Yesu, ba tola menaʼö iʼogunaʼö waʼabölönia si lö ola ba wolumöʼö Ononia andrö. Hizaʼi, itaha dödönia Yehowa. Hadia mbörö? Börö waʼomasinia ba niha gulidanö. Imane Yesu, ”Simanö sa waʼomasi Lowalangi nösi gulidanö, itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu.”—Yoh. 3:16.

14. Hadia zoroma moroi ba höli nibeʼe Yesu?

¹⁴ Höli nibeʼe Yesu, daʼö zi tobali tandra wa ebua sibai waʼomasi Yehowa ba ngaʼötö Gadamo hegöi Khawa. Iʼomasiʼö sibai ndraʼugö Yehowa. Oya sibai zi no itehegö, farahu ba daʼö waʼafökhö sebua nirasoinia me ibeʼe Nononia ba wangefaʼö yaʼugö moroi ba horö hegöi faʼamate. (1 Yo. 4:​9, 10) Omasi ia itolo ita ero zamösana enaʼö möna ba wolawa horö!

15. Hadia zinangea tafalua enaʼö tatema mbua moroi höli nibeʼe Yesu?

¹⁵ No ibeʼe Nononia si ha sambua Yehowa tobali höli salahida irege tola teʼefaʼö horöda. Hizaʼi, hadia zinangea tafalua enaʼö tatema wangefa? Ibeʼe khöda wanema linia Yohane Samayagö Idanö hegöi Yesu Keriso ba gafuriata. Lamane, ”Mifalalini gera-erami, börö me no ahatö Wamatörö Lowalangi ba zorugo.” (Mat. 3:​1, 2; 4:17) Tobali, na omasi ita möna ba wolawa horö ba tobali ita si fahuwu khö Namada safönu faʼomasi, moguna tafalalini gera-erada. Hadia geluahania wamalalini era-era, ba hewisa wa möi fanoloda daʼö ba wolawa falömoʼahonoada? Tasöndra wanema linia ba artikel aefa daʼa.