1. Hadia geluahania famalalini era-era?

 BA GINÖTÖ tafalua zala, moguna tafalalini gera-erada. Moloʼö Sura Niʼamoniʼö, niha samalalini era-era yaʼia daʼö niha saniasa ba zi lö sökhi si no ifalua, iböhöli wamalua daʼö, ba ihalö gangetula enaʼö lö ifuli ifalua.—Faigi Geluaha Ngawua Wehede, ”Famalalini Era-Era”.

2. Hana wa moguna tafahaʼö ita sanandrösa ba wamalalini era-era? (Nehemia 8:​9-11)

² Fefu niha sauri ba gulidanö, moguna lafahaʼö ira sanandrösa ba wamalalini era-era. Hadia mbörö? Börö me ero maʼökhö tafalua zala. Baero daʼö, börö me fefu ita no ngaʼötö Gadamo ba Khawa, tatema gondröita horö hegöi faʼamate. (Rom. 3:23; 5:12) Samösa lö soʼahonoa ba gotaluada. Niha samati manö, simane sinenge sotöi Faulo, iforege göi wolawa horö. (Rom. 7:​21-24) Hadia daʼö geluahania wa lö irai tasöndra waʼomuso dödö börö horöda? Tenga. Yehowa andrö Lowalangi sebua faʼahakhö dödö, ba omasi ia na tasöndra waʼomuso dödö. Nehegö duma-duma ndra niha Yahudi me götö Nehemia. (Baso Nehemia 8:​9-11.) Lö omasi Yehowa na talafo laʼabusi tödö horö nifaluara ba zilalö. Omasi ia na larasoi waʼomuso dödö ba wamosumangera yaʼia. Iʼila Yehowa wa tobali fangomuso dödöra na lafalalini gera-erara. Daʼö mbörö wa ifahaʼö göi ita sanandrösa ba wamalalini era-era andre. Na tafalalini gera-erada, tola faduhu dödöda wa iʼefaʼö horöda Amada sebua faʼomasi.

3. Hadia nitutunöda ba artikel daʼa?

³ Datatutunö nasa sanandrösa ba wamalalini era-era. Ba artikel daʼa, so tölu faosatö nitutunöda. Si oföna, hadia nifahaʼö Yehowa ba ndraono Gizaraʼeli sanandrösa ba wamalalini  era-era? Si dua, hadia nifalua Yehowa ba wanolo niha enaʼö lafalalini gera-erara? Si tölu, hadia wamahaʼö nihalö ndra nifahaʼö Yesu sanandrösa ba wamalalini era-era?

NIFAHAʼÖ YEHOWA BA NDRAONO GIZARAʼELI SANANDRÖSA BA WAMALALINI ERA-ERA

4. Hadia nifahaʼö Yehowa ba ndraono Gizaraʼeli sanandrösa ba wamalalini era-era?

⁴ Me ibaliʼö sambua soi ndraono Gizaraʼeli Yehowa, fawuʼu li ia khöra. Na laʼoʼö goroisania, hasambalö ilumöʼö ba ifahowuʼö ira. Imane khöra sanandrösa ba goroisania andrö, ”Lö abua sibai goroisa nifaʼemagu khömi maʼökhö mazui si tebai mikhamö.” (5 Mo. 30:​11, 16) Hizaʼi, na mamadaö ira ba lafosumange nadu, lö saʼae ifahowuʼö ira Yehowa, ba hasambalö latörö waʼatosasa. Hewaʼae simanö, tenga daʼö galuahania wa sindruhu-ndruhu iröi ira Yehowa. Tola ’lafuli ira khö Yehowa Lowalangira ba lafondrondrongo wehedenia’. (5 Mo. 30:​1-3, 17-20) Eluahania, tola nasa lafalalini gera-erara. Na lafalua daʼö, ihatöʼö ia khöra Yehowa ba ifuli ifahowuʼö ira.

5. Hadia zangoromaʼö wa lö tebulö iforege Yehowa ba wanolo ono mbanuania enaʼö lafalalini gera-erara? (2 Razo 17:​13, 14)

⁵ No hauga kali mamadaö ndraono Gizaraʼeli ba wolawa Yehowa. Tenga ha lafosumange nadu, hizaʼi lafalua göi gamuata tanö böʼö sogoro ia. Lua-luania, tefakao ira. Hewaʼae simanö, lö iröi ira Yehowa. Iforege wanolo yaʼira enaʼö lafalalini gera-erara. Asese ifatenge ndra samaʼeleʼö khönia ba wamarou tödöra enaʼö lafuli ira khönia.—Baso 2 Razo 17:​13, 14.

6. Hewisa wangogunaʼö Yehowa ndra samaʼeleʼö khönia ba wamahaʼö ono mbanuania wa moguna lafalalini gera-erara? (Faigi göi gambara.)

⁶ Asese ifatenge ndra samaʼeleʼö khönia Yehowa ba wameʼe famangelama hegöi fotu ba nono mbanuania. Duma-dumania, iʼogunaʼö Yeremia ba wangumaʼö khöra, ”He yaʼami Izaraʼeli si no mondröi sindruhu, mifuli ami khögu . . . Lö saʼae mofönudo khömi, börö me lö faröi ndraʼo . . . Tenga sagötö faʼara wönugu. Hizaʼi, moguna öfaduhuʼö zala si no öfalua börö me no mamadaö ndraʼugö khö Lowalangiu Yehowa.” (Yer. 3:​12, 13) Iʼogunaʼö  göi Yoeli ba wangombakha khöra, ”Mifuli ami khögu soroi ba dödö.” (Yoe. 2:​12, 13) Ifatenge göi Yesaya ba wangumaʼö, ”Misasai ba miʼamoniʼö ami; Miheta waʼalösökhimi föna duduma hörögu; Mibato wamalua si lö sökhi.” (Yes. 1:​16-19) Iʼogunaʼö göi Hezekieli ba wangumaʼö khöra, ”Hadia omuso dödögu na mate niha si lö sökhi? Abölö omuso dödögu na ifalalini gera-erania ba lö tebulö auri ia. . . . Lö omuso dödögu na mate niha . . . Börö daʼö, mifalalini gera-erami enaʼö auri ami.” (Hez. 18:​23, 32) Omuso dödö Yehowa na so niha samalalini era-erania börö me omasi ia na auri ira sagötö faʼara! Iʼofönaiʼö ia Yehowa ba wanolo niha samalua horö, lö ibalo-baloi balazi lafalalini gera-erara awena ibeʼe khöra wanolo. Datafaigi duma-dumania.

7. Moroi ba duma-duma Hosea samaʼeleʼö hegöi foʼomonia, hadia wamahaʼö nifaʼema Yehowa ba nono mbanuania?

⁷ Nehegö hadia nifahaʼö Yehowa ba nono mbanuania moroi ba duma-duma Hosea samaʼeleʼö hegöi foʼomonia Gomeri. Mohorö Gomeri khö ndra matua tanö böʼö ba iröi Hosea. Hadia tola ifuli mutema mangawuli Gomeri? Yehowa, si tola mombaso ösi dödö, imane khö Hosea, ”Fuli halö woʼomomö niʼomasiʼö ndra matua böʼö andrö, ba omasiʼö ia hewaʼae no mohorö ia, simane fangomasiʼö Yehowa ndraono Gizaraʼeli si no mamosumange lowalangi böʼö.” (Hos. 3:1; Amd. 16:2) Nehegö atö, ifalua nasa horö sebua foʼomo Hosea me luo daʼö. Hizaʼi iʼandrö Yehowa khö Hosea enaʼö iʼefaʼö zala woʼomonia ba ifuli ihalö tobali foʼomonia. a Simane daʼö göi, lö itimbagö ba lö iröi manö nono mbanuania sabeʼe högö andrö Yehowa. Hewaʼae lafalua nasa horö, hizaʼi lö tebulö iʼomasiʼö ira. Ifatenge ndra samaʼeleʼö khönia ba wanolo yaʼira enaʼö lafalalini gera-erara ba labulöʼö lala waʼaurira. Duma-duma daʼa zamahaʼö yaʼita wa Yehowa, ’samareso tödö niha’, no iʼofönaiʼö ia ba wameʼe fanolo enaʼö ifalalini gera-erania si samösa niha andrö hewaʼae lö nasa niböhölinia wamalua horö sebua. (Amd. 17:3) Datatutunö hewisa wamalua Yehowa daʼö.

NIFALUA YEHOWA ENAʼÖ LAFALALINI GERA-ERARA NIHA

8. Hadia nifalua Yehowa ba wanolo Kaʼino enaʼö ifalalini gera-erania? (1 Moze 4:​3-7) (Faigi göi gambara.)

⁸ Ono matua siaʼa khö Gadamo ba Khawa sotöi Kaʼino, itema göi horö ondröita moroi khö zatuania irege aolo dödönia wamalua horö. Baero daʼö, imane Sura Niʼamoniʼö sanandrösa khönia, ”Lö sökhi gamuatania.” (1 Yo. 3:12) Te daʼö mbörö wa ”lö omuso dödö [Yehowa] khö Gaʼino awö zumange nibeʼenia”. Hadia ifalalini gera-erania Kaʼino? Löʼö. ”Mofönu sibai [ia] ba afatö dödönia.” (Baso 1 Moze 4:​3-7.) Hadia nifalua Yehowa? Ihaogö wahuhuosa khö Gaʼino. Ifatunö khönia Yehowa wa hasambalö tefahowuʼö ia na ifalua zatulö ba ifangelama ia enaʼö lö aekhu ia ba horö. Hizaʼi, lö omasi ifondrondrongo Kaʼino mene-mene hegöi fanolo nibeʼe Yehowa enaʼö ifalalini gera-erania. Börö me ifalua daʼö Kaʼino, hadia lö omasi saʼae Yehowa ba wanolo niha tanö böʼö enaʼö lafalalini gera-erara? Tatu manö löʼö!

9. Hadia nifalua Yehowa ba wanolo Dawido enaʼö ifalalini gera-erania?

⁹ Iʼomasiʼö sibai Razo Dawido Lowalangi Yehowa. Iwaʼö Yehowa wa yaʼia andre niha ’sangomusoiʼö tödögu’. (Hal. 13:22) Hizaʼi, so horö sebua nifalua Dawido, ihoröni ndronga niha böʼö ba ibunu niha. Moloʼö Oroisa  Moze, sinangea na mubunu ia. (3 Mo. 20:10; 4 Mo. 35:31) Hewaʼae simanö, si fao faʼasökhi dödö itolo ia Yehowa enaʼö ifalalini gera-erania. b Ifatenge Natano samaʼeleʼö ba wamalukhaisi Dawido hewaʼae lö hadöi tandra-tandra wa ifalalini gera-erania Dawido. Iʼogunaʼö Natano duma-duma si tefaudu ba dödö Dawido. Ba gafuriata, iʼila hadia zalania Dawido ba ifalalini gera-erania. (2 Sa. 12:​1-14) Isura sambua zinunö sangoromaʼö wa sindruhu-ndruhu no ifalalini gera-erania. (Si. 51, superskripsi) Ato niha si no mamalua horö zanöndra fondrara dödö me labaso zinunö daʼö, ba tefarou dödöra ba wamalalini era-era. Omuso sibai dödöda börö me si fao faʼomasi itolo Dawido andre Yehowa enaʼö ifalalini gera-erania.

10. Hewisa dödöu ba waʼebolo dödö hegöi fangefaʼö sala nibeʼe Yehowa?

¹⁰ Iʼila Yehowa wa fefu ita niha samalua horö, ba fatuwu sibai ia ba horö. (Si. 5:​4, 5) Hewaʼae simanö, börö me iʼomasiʼö ita, itolo ita ba wolawa horö. Iforege wanolo niha enaʼö lafalalini gera-erara ba fahuwu ira khönia hewaʼae ebua sibai horö nifaluara. Sindruhu-ndruhu wa möi fondrara dödöda daʼö! Na taʼangerönusi waʼebolo dödö Yehowa hegöi fangefaʼö sala nibeʼenia, tatu tefarou dödöda enaʼö lö faröi ita khönia ba iʼanemaiʼö tafalalini gera-erada na no tafalua horö. Iadaʼa, datatutunö hadia nifahaʼö Yesu khö ndra nifahaʼönia sanandrösa ba wamalalini era-era.

FAMAHAʼÖ NIHALÖ NDRA NIFAHAʼÖ YESU SANANDRÖSA BA WAMALALINI ERA-ERA

11-12. Hadia gamaedola niʼogunaʼö Yesu ba wamahaʼö yaʼita sanandrösa ba wangefaʼö sala nibeʼe Namania? (Faigi gambara.)

¹¹ Me abad siföföna, tohare Mesia si no mufabuʼu. Simane si no tatutunö ba artikel silalö, iʼogunaʼö Yohane Samayagö Idanö hegöi Yesu Keriso Yehowa ba wamahaʼö niha enaʼö aboto ba dödöra wa moguna sibai wamalalini era-era.—Mat. 3:​1, 2; 4:17.

¹² Me so Yesu ba gulidanö, asese ifahaʼö niha wa omasi sibai Namania ba wangefaʼö sala. Duma-dumania, itutunö Yesu gamaedola sanandrösa khö nono selungu. Ono daʼö zangai angetula ba wondröi omo hegöi ba wanörö  lala si lö sökhi. Hizaʼi ”ba gafuriata maniasa ia”, ba mangawuli ia ba nomo. Hadia nifalua namania? Imane Yesu, ”Me iʼila ia amania moroi ba zaröu, tumbu khönia waʼahakhö dödö. Fagohi namania, italagui ba ihaogö woʼuma.” Sindruhunia, omasi nono daʼö iʼandrö khö namania enaʼö tobali ia sangai halöwö ba nomonia. Hizaʼi, ikaoni ia amania andre ’onogu’ ba omasi ia ifuli itemaʼö nononia andrö. Imane amania, ”No taya hizaʼi ifuli tesöndra.” (Luk. 15:​11-32) Me so Yesu ba zorugo fatua lö möi ia ba gulidanö, no asese iʼila hewisa wangoromaʼö Yehowa faʼahakhö dödö ba niha samalalini era-era. Amaedola daʼa zondrara tödöda ba samaduhuʼö khöda wa sindruhu-ndruhu ebua sibai waʼahakhö dödö niʼokhögö Namada Yehowa!

13-14. Hadia wamahaʼö nihalö Wetero sanandrösa ba wamalalini era-era, ba hadia nifahaʼönia ba niha böʼö sanandrösa ba daʼö? (Faigi göi gambara.)

¹³ Oya wamahaʼö si tohude nihalö Wetero moroi khö Yesu sanandrösa ba wamalalini era-era hegöi fangefaʼö sala. Oya sibai zala nifalua Wetero, hizaʼi iʼefaʼö zalania Yesu soroi ba dödö. Duma-dumania, me no aefa iʼosilöʼögö Yesu ba zi tölu kali, afatö sibai dödö Wetero ba horö nifaluania andrö. (Mat. 26:​34, 35, 69-75) Hizaʼi, me no aefa tesusugi Yesu, möi ia ifalukhaisi Wetero, te ha ba zi darua ira. (Luk. 24:​33, 34; 1 Ko. 15:​3-5) Iʼila Yesu wa no ifalalini gera-erania Fetero. Tobali me luo daʼö, tatu si fao faʼomasi ifaduhuʼö khö Wetero wa no teʼefaʼö zalania.—Faigi Mareko 16:7 hegöi keterangan tambahan ”dan Petrus”.

¹⁴ Me no irasoi samösa daʼö Fetero, iadaʼa tola ifahaʼö niha böʼö sanandrösa ba wamalalini era-era hegöi fangefaʼö sala. Lö ara me no aefa Gowasa Fendrakose, ifaʼema huhuo föna ndra niha Yahudi si lö faduhu tödö. Ifatunö khöra wa yaʼira zamunu Mesia. Hewaʼae simanö, si fao faʼomasi imane khöra, ”Mifalalini gera-erami ba mifuli ami khö Lowalangi enaʼö  teʼefaʼö horömi ba ohahau dödömi ibeʼe Yehowa.” (Hal. 3:​14, 15, 17, 19) Itutunö Fetero wa niha somasi mamalalini era-era lö tola löʼö ’lafuli ira furi’. Eluahania moguna labulöʼö lala wangera-ngerara si fasala, laböhöli wamalua si lö sökhi ba labörögö wamalua ngawalö zi möi fangomuso dödö Lowalangi. Iforomaʼö khöra Fetero wa hasambalö afönu wangeheta Yehowa horöra. Hauga wulu fakhe aefa daʼö, ifaduhuʼö Fetero khö ndra niha Keriso, ”Yehowa . . . ebolo dödönia khömi börö me lö omasi ia na tekiko fazamösa. Omasi ia enaʼö dozi lafalalini gera-erara.” (2 Fe. 3:9) Tatu manö, fefu ita taʼandrö sibai saohagölö börö me taʼila wa tola teʼefaʼö horöda, hewaʼae horö sebua daʼö!

15-16. (a) Hadia wamahaʼö nihalö Waulo sanandrösa ba wangefaʼö sala? (1 Timoteo 1:​12-15) (b) Hadia nitutunöda ba artikel aefa daʼa?

¹⁵ Oya sibai horö sebua nifalua Zaulo moroi ba Dareso. Igohi-gohi ba ifakao ndra soloʼö khö Keriso. Ato ndra niha Keriso sangumaʼö wa tebai saʼae ifalalini gera-erania Saulo. Hizaʼi, tenga simane daʼö lala wangera-ngera Yesu si no tesusugi. Iʼila wa tola tebulö gamuata Zaulo ba ifalalini gera-erania. Nifaigi-faiginia hegöi Amania yaʼia daʼö amuata si sökhi niʼokhögö Zaulo. Imane Yesu, ”No ufili ia.” (Hal. 9:15) Ifalua dandra sahöli-höli dödö Yesu ba wanolo Saulo enaʼö ifalalini gera-erania. (Hal. 7:58–8:3; 9:​1-9, 17-20) Me no tobali ia niha Keriso, Saulo nifotöi sinenge sotöi Faulo ba gafuriata, asese ifaehagö wangandrönia saohagölö ba waʼasökhi dödö hegöi faʼahakhö dödö nitemania. (Baso 1 Timoteo 1:​12-15.) Ifahaʼö göi ndra talifusönia, ”Si fao faʼasökhi dödö itolo ami Lowalangi enaʼö mifalalini gera-erami.”—Rom. 2:4.

¹⁶ Me irongo Faulo wa so samösa ndra matua si no mamalua fohorö nitehegö so ba mbanua niha Keriso, hadia nifaluania? Moroi ba wehedenia, hadia wamahaʼö nihalöda sanandrösa ba wotu safönu faʼomasi nibeʼe Yehowa hegöi hawaʼamoguna waʼahakhö dödö? Tatutunö dania daʼö ba artikel aefa daʼa.