Me ifaʼoheʼö zurania Faulo ba niha Keriso Desalonika, imane khöra, ”Na so zi lö moloʼö fanuturu lala nibeʼema ba zura, töngöni niha simane daʼö.” (2 Te. 3:14) Ba zilalö, tawaʼö wa fehede daʼa mufanandrösa ia khö ndra satua sokubaloi. Na so zi lö tebulö mangosiwawöi goi-goi Zura Niʼamoniʼö hewaʼae no hauga kali labeʼe khönia mene-mene, tola manö lahalö gangetula ira satua sokubaloi ba wamaʼema si sambua huhuo enaʼö mangelama mbanua niha Keriso. Aefa daʼö, lahalö gangetula ira sanuriaigö enaʼö lö fariawö ira khönia.

Hizaʼi, moguna wamohouni. Iadaʼa aboto ba dödöda wa mene-mene Waulo andre mufanandrösa ia ba gangetula nihalö mbanua niha Keriso ero zamösana. Börö daʼö, lö moguna lafaʼema ira satua sokubaloi huhuo famangelama. Hana wa so wamohouni andre? Datafaigi hadia zalua me isura mene-mene daʼa Faulo.

Iʼila Faulo wa so ösa ndra talifusö ba mbanua niha Keriso andrö ”si lö moloʼö”. Laʼaohasi ba dödö mene-mene nibeʼenia moroi khö Lowalangi. No irai imane khöra me ifalukhaisi ira ba zilalö, ”Niha si lö mohalöwö, böi yamanga.” Hizaʼi, so nasa zi lö omasi mohalöwö ba wangalui soguna khöra hewaʼae abölö ira. Baero daʼö, laʼurusai zi tenga urusara. Hadia zinangea lafalua ira niha Keriso ba niha simane daʼö?—2 Te. 3:​6, 10-12.

Imane Faulo, ”Töngöni niha simane daʼö.” Na ba li Yunani eluahania tatandroi niha simane daʼö ba mangelama ita enaʼö lö idönisi dödöda. Ifaʼema mene-mene daʼa Faulo ba mbanua niha Keriso, tenga ha khö ndra satua sokubaloi. (2 Te. 1:1; 3:6) Börö daʼö, na laʼila ira niha Keriso wa so ndra talifusö si lö moloʼö goi-goi Zura Niʼamoniʼö, yaʼira samösa zangai angetula wa lö saʼae ’fariawö ira’ ba niha daʼö.

Hadia daʼö geluahania wa tabaliʼö ira simane niha niʼefasi mazui niheta ba gangowuloa? Löʼö. Imane Faulo, ”Böi böhöli wanegu yaʼia simane si fatalifusö.” Börö daʼö, fefu niha Keriso tola nasa fariawö ira ba gangowuloa hegöi ba wanuriaigö, hizaʼi yaʼira samösa zangai angetula hadia fariawö ira ba niha daʼö wamalua rekreasi. Hadia mbörö? Imane Faulo, ”Enaʼö aila ia”. Na lö saʼae fariawö ita khönia, tola manö aila ia ba nifaluania andrö. Daʼö göi zamarou yaʼia enaʼö ibulöʼö waʼaurinia.—2 Te. 3:​14, 15.

Hewisa wamalua niha Keriso iadaʼa mene-mene daʼö? Si oföna, moguna tatatugöi wa amuata zi samösa niha andrö sindruhu-ndruhu ”lö moloʼö” simane nitutunö Waulo. Eluahania, lö tawaʼö tödöda wa fasala nifalua zi samösa niha ha börö me lö fatema ia ba dödöda side-ide hewaʼae sindruhunia lö hadöi goi-goi Zura Niʼamoniʼö nisawönia. Lö göi tawaʼö wa fasala ia ha börö me faböʼö zomasi ia moroi ba zomasi ita mazui me afökhö dödöda ba nifaluania. Nitutunö Waulo yaʼia daʼö niha sangodödögö ba wolawa mene-mene nibeʼe khönia moroi ba Daromali Lowalangi.

Iadaʼa, na taʼila so niha Keriso si lö moloʼö mene-mene moroi ba Daromali Lowalangi, a tola tahalö gangetula enaʼö lö fariawö ita khönia ba wamalua rekreasi. Hizaʼi, börö me angetula samösa daʼa, tebai tadunö-dunö ia ba zi tenga ösi nomoda. Sindruhunia, tola nasa fariawö ita khönia ba gangowuloa hegöi ba wanuriaigö. Na ibulöʼö gamuatania hegöi lala wangera-ngerania, tola zui ifuli fariawö ita khönia simane si toʼölö.