So samösa nono alawe sangila simbo si kalua moroi ba cerobong pabrik ba mangebua zimbo andrö mane lawuo. Ihalö gangetula wa pabrik daʼö zamazökhi lawuo. Möi famaʼikida waʼaboto ba dödö si fasala khö nono andrö. Hizaʼi, so waʼaboto ba dödö si fasala tanö böʼö si tola möi famaelungu. Duma-dumania, na fasala wombaso lala wangogunaʼö dalu-dalu tola möi famakiko.

Faʼaboto ba dödö si fasala sanandrösa ba wamati, tola möi famakiko. Duma-dumania, so ösa niha sambö aboto ba dödö wamahaʼö Yesu. (Yohane 6:48-68) Moroi na laʼalui hadia zindruhunia, latimbagö fefu wamahaʼö Yesu. Sambua faʼateʼala!

Hadia öbaso Zura Niʼamoniʼö ba wangalui fanuturu lala? Baga sibai daʼö. Hadia so deʼalania na fasala wamotokhiu ba dödöu hadia ia nibasomö? Ato niha si no morasoi simanö. Nehegö tölu ngawalö waʼaboto ba dödö si fasala si no toʼölö alua.

• So ösa niha, fasala ba wamotokhira ba dödöra eluaha goroisa ”ataʼufi Lowalangi”. Lawalinga si möi famohokha mbu na mutötöi döi Lowalangi. (Zangombakha 12:13) Hizaʼi, lö omasi Lowalangi na simane daʼö dödöda khönia. Imane wangumaʼö, ”Böi busi dödöu; löʼö sa aefado khöu? Böi tokeaʼö, Lowalangiu sa ndraʼodo: uʼabeʼeʼö ndraʼugö, ba utoloʼö, ugogohe ndraʼugö na tangagu kambölö andre, samalua satulö.” (Yesaya 41:10) Fangataʼufi Lowalangi eluahania so khöda waʼahöli-höli dödö ba tafosumange ia.

• So göi ösa niha si lö aboto ba dödö geluaha ayati, ”Fefu hadia ia, ba so ginötö, . . . so mbaŵa waʼatumbu ba so mbaŵa waʼamate.” Lawalinga no itatugöi Lowalangi luo waʼamate zi samösa-mösa niha. (Zangombakha 3:1, 2) Sindruhunia sa, itutunö ayati daʼö hewisa siklus waʼauri ba wa no si toʼölö nifotöi faʼamate. Taromali Lowalangi göi zangumaʼö wa moʼamakhaita waʼanau nosoda ba gangetula nihalöda. Duma-dumania, tabaso, ”Fangataʼufi Yehowa, ba iʼanauʼö noso.” (Gamaedola 10:27; Zinunö 90:10; Yesaya 55:3) Hana wa tola? Duma-dumania, börö me taʼameʼegö tödö Zura Niʼamoniʼö andrö wa taʼaröuʼö ita moroi ba ngawalö hadia ia zi tola möi famaʼala simane femabu hegöi amuata fohorö.​—I Korindro 6:9, 10.

• So zoʼanemaiʼö mamaduhusi tödö ngawua wehede sorugo ba ulidanö ’mutenagö ba wamatörö ba galitö’, ba lahalö gangetula wa ifakiko gulidanö daʼa Lowalangi. (II Fetero 3:7) Hizaʼi, no ifabuʼu Lowalangi wa lö ifakiko gulidanö daʼa. ’No ilata danö daya-dayania andrö Lowalangi, faböi mangiwa ia, irugi zi lö aetu.’ (Zinunö 104:5; Yesaya 45:18) Tenga ulidanö daʼa nifakiko, börö me no muhonogöigö ia irugi gamozua, hizaʼi amatöröwa niha gulidanö zi hulö nikhozi ba galitö. Tobali, banua si yawa mazui sorugo eluahania yaʼia daʼö nahia Lowalangi. Lö tefakiko fefu daʼö.

Simane duma-duma megeno, asese fasala niha ba wamotokhi ba dödöra Sura Niʼamoniʼö ba ginötö labaso ia. Hizaʼi, hadia mbörö wa itehegö alua daʼö Lowalangi? Tola manö so zangumaʼö, ’Na sindruhu so waʼatulö khö Lowalangi ba iʼila hadia ia fefu, tola manö ihenaigö mbuku salio aboto ba dödöda. Hana wa lö ifalua daʼö?’ Nehegö tölu mbörö wa tola so waʼaboto ba dödö si fasala sanandrösa ba Zura Niʼamoniʼö.

1.   Mufazökhi Zura Niʼamoniʼö enaʼö aboto ba dödö niha sangide-ngideʼö ba somasi tefahaʼö. Imane Yesu khö Yehowa, ”Usuno ndraʼugö, Ama, Soʼaya sorugo awö danö, me no öbiniʼö daʼö ba zatua-tua ba ba zonekhe, ba me no öʼoromaʼö ia ba ndraono.” (Luka 10:21) Musura Zura Niʼamoniʼö enaʼö tola aboto ba dödö niha sangobua-bua satulö. Niha si fayawa si toʼölönia yaʼia daʼö ’satua-tua ba sonekhe’, sasese fasala ba wamotokhira ba dödöra Sura Niʼamoniʼö. Hizaʼi, niha sombaso ba sangobua-bua si hulö ”ndraono”, si so fangide-ngideʼö ba omasi nifahaʼö, mubeʼe howu-howu faʼaboto ba dödö si sökhi. Sökhi sibai wamaʼanö Lowalangi Sura Niʼamoniʼö andre!

2. Mubeʼe Zura Niʼamoniʼö ba niha somasi manema fanolo moroi khö Lowalangi ba waʼaboto ba dödö. Moloʼö Yesu, moguna wanolo ba niha enaʼö tola aboto ba dödöra wamahaʼönia. Lalania? Imane Yesu, ”Ba sanolo andrö, eheha niʼamoniʼö, nifatenge Namagu dania ba döigu, daʼö zamahaʼö yaʼami, ba daʼö fefu.” (Yohane 14:26) No ihenaigö Lowalangi geheha niʼamoniʼö, mazui faʼabölö, ba wanolo niha enaʼö tola aboto ba dödöra Zura Niʼamoniʼö. Hizaʼi, lö ibeʼe gehehania Lowalangi ba niha si lö omasi nitolo, irege ambö aboto ba dödöra Zura Niʼamoniʼö. Eheha Niʼamoniʼö zamarou tödö niha si so faʼaboto ba dödö ba Zura Niʼamoniʼö ba wanolo niha sangalui ba somasi aboto ba dödö Zura Niʼamoniʼö.​—Halöwö Zinenge 8:26-35.

3. So ösa faosatö Zura Niʼamoniʼö si ha tola muʼila eluaha ba ginötönia. Duma-dumania, tebeʼe geheha khö zamaʼeleʼö Danieli ba wanura salua ba zi so föna. Imane samösa malaʼika, ”Ba yaʼugö Danieli, ba böi ombakhaʼö huhuoda andre ba fotandro zura, irugi ba götö safuria.” Ngaotu fakhe faʼara, ato niha si lö mangila eluaha nösi mbuku Danieli nibasora ba Zura Niʼamoniʼö. Lö göi aboto ba dödö Danieli ösa hadia ia nisurania. Si fao fangide-ngideʼö imane wangumaʼö, ”Urongo sa, ba lö aboto ba dödögu.” Tola aboto ba dödö niha wamaʼeleʼö daʼö, ha ba ginötö si no itatugöi Lowalangi. Ifatunö malaʼika, ”Fuliʼö, yaʼugö Danieli! Irege götö safuria andrö, ba tenga sa niʼombakhaʼö huhuo andre, nifotandro.” Haniha zi tola aboto ba dödö geluaha wehede Lowalangi? ”Dozi sebua horö, ba dörö-dörö lö faʼaboto ba dödö; ba ba zatua-tua, ba so waʼaboto ba dödö.” (Danieli 12:4, 8-10) Tobali, ifatunö geluahania Lowalangi na ba ginötönia.

Hadia no irai fasala Zamaduhuʼö Yehowa ba wamotokhira ba dödöra Sura Niʼamoniʼö? Noa. Hizaʼi, ba ginötö ifatunö khöra Lowalangi, latehegö lafaudugö lala wangera-ngerara. Faduhu dödöra wa moguna laʼoʼö ndra nifahaʼö Yesu sangokhögö fangide-ngideʼö me inötö iʼehao lala wangera-ngerara Yesu.​—Halöwö Zinenge 1:6, 7.

Faʼaboto ba dödö nono alawe side-ide andrö sanandrösa ba lawuo tola manö niʼaohasi ba dödö. Hizaʼi, hadia ia nifahaʼö Zura Niʼamoniʼö moguna sibai ia khöu. Moguna sibai duria si so ba Zura Niʼamoniʼö andrö ba niha somasi mangokhögö faʼaboto ba dödö na labaso samösa ia. Tobali, andrö wanolo enaʼö tola aboto ba dödöu hadia ia nibasou. Alui niha si no mamahaʼö yaʼia ba Zura Niʼamoniʼö si fao fangide-ngideʼö, sangodaligö eheha Lowalangi enaʼö aboto ba dödö Zura niʼamoniʼö, ba si faduhu tödö wa no inötönia iadaʼa omasi Lowalangi na aboto ba dödöda Zura Niʼamoniʼö. Böi aombö dödöu fahuhuo khö ndra Samaduhuʼö Yehowa mazui ba wombaso riset si no lafaʼanö ba situs Web jw.org/nia. Ifabuʼu Sura Niʼamoniʼö, ”Na ökaoni waʼaboto ba dödö . . . , awena ösöndra wa öʼila watahögö Lowalangi.”​—Gamaedola 2:3-5.