Hadia no irai tumbu ba dödöu wombaso Sura Niʼamoniʼö, hizaʼi ötaha-taha börö me örasoi simane nirasoira? Ba niha sato, abua sibai khöra ba wombaso Sura Niʼamoniʼö andrö. Hizaʼi, hewisa na öʼila wa sindruhunia tola itolo ndraʼugö Sura Niʼamoniʼö ba wangokhögö faʼowua-wua dödö hegöi faʼahono dödö ba waʼauri? Ba hewisa na öʼila so zi tola manolo yaʼugö irege tola adöni dödömö ba wombaso yaʼia? Hadia omasi öʼila hadia nihenaigö Zura Niʼamoniʼö khöu?

Angeraigö hadia mbua si no latema niha samörögö fombaso Sura Niʼamoniʼö.

Imane Ezekiel, arakhagö 20 fakhe ndröfinia, ”Me föna, urasoi hulö zolohe moto ndraʼo si lö tatu hezo numalö. Hizaʼi, fombaso Sura Niʼamoniʼö zanolo yaʼo ba wangokhögö faʼauri si so lua-lua. Ba daʼö, oya mene-mene si tola uʼogunaʼö ba waʼaurigu si ero maʼökhö.”

Itutunö Frieda, 20 fakhe ndröfinia, ”Alio sibai mofönu ndraʼo. Hizaʼi börö me ubaso Zura Niʼamoniʼö, tola so khögu wanaha tödö. Daʼa mbörö wa tola aoha khögu wariawösa, ba iadaʼa ato nawögu.”

Imane samösa ira alawe sotöi Eunice, 50 fakhe ndröfinia, sanandrösa ba Zura Niʼamoniʼö, ”Daʼa zi tobali fanolo khögu ba wombulöʼö amuata si lö sökhi irege tobali niha si sökhi ndraʼo.”

Simane yaʼira hegöi niha si töra zuta faʼato, no lafahaʼö ira wa tola möi fanolo göi khöu wombaso Sura Niʼamoniʼö ba wangokhögö faʼauri si sökhi. (Yesaya 48:17, 18) Duma-dumania, tola itolo ndraʼugö (1) wangaʼi angetula si sökhi, (2) wangokhögö fahuwusa si sökhi, (3) lala ba wangasiwai abula dödö, ba (4) sabölö moguna yaʼia daʼö, tola öfahaʼö ndraʼugö ba zindruhu sanandrösa khö Lowalangi. Moroi khö Lowalangi mene-mene Zura Niʼamoniʼö, ba lö irai fasala na öʼoʼö ia. Lö irai ibeʼe khöu mene-mene si lö sökhi Lowalangi.

Sabölö moguna yaʼia daʼö famörögö. Hadia lala si tola manolo yaʼugö enaʼö tola aoha khöu ba wamörögö yaʼia ba omuso dödöu ba wamalua daʼö?