ANAU noso Khenoki. Tola manö abua khöda wokhalaigö, hizaʼi faʼanau nosonia 365 fakhe, töra öfa kali moroi ba waʼanau noso niha zi toʼölönia iadaʼa! Hizaʼi ba götönia lö atua sibai ia. Töra 50 abad silalö, abölö anau noso niha ba götö daʼö moroi na iadaʼa. Töra önö ngaotu fakhe ndröfi Gadamo, niha si föföna, me tumbu Khenoki, ba auri Gadamo nasa irugi tölu abad! So ösa zi töra moroi ba daʼö waʼanau noso ngaʼötö Gadamo. Me 365 fakhe ndröfi Khenoki, lö atua sibai ia ba oya zi tola ifalua nasa. Hizaʼi tebai ifalua daʼö fefu.

So zi tobali famaʼala khö Khenoki. Khalaigö, ibiniʼö ia moroi ba niha si lö omasi manema turia nifaʼemania moroi khö Lowalangi. Oroma ba zikhala mbawara wa mofönu ira. Ba fatuwu ira khönia. Fatuwu ira ba duria nifaʼemania hegöi khö Lowalangi samatenge yaʼia. Lö laʼila lafaʼala Lowalangi Khenoki sotöi Yehowa, hizaʼi tola lafaʼala ia! Tola manö manofu-nofu Khenoki hadia tola nasa falukha ia khö zoroi yomonia. Hadia iʼangera-ngeraigö woʼomonia ba ononia alawe hegöi ononia matua, Metusala mazui maʼuwunia Lameki? (I Moze 5:21-23, 25) Hadia no amozuania fefu daʼa?

Niha sambö tehönge Khenoki ba Zura Niʼamoniʼö. Ha tölu mbuku si so ba Zura Niʼamoniʼö sanutunö waö-waönia. (I Moze 5:21-24; Heberaiʼo 11:5; Yuda 14, 15) Hewaʼae simanö, tola itutunö ayati andrö hewisa waʼebua wamatinia. Hadia samösa högö ndraʼugö yomo ba nomo? Hadia no irai ötema wanandraigö ba wangoʼawögö sindruhu andrö si no miʼila? Na simanö, oya zi tola mifahaʼö ami moroi ba wamati Khenoki.

No fondrege waʼalösökhi niha me tumbu Khenoki. Alua daʼö ba ngaʼötö Gadamo si mewitu. Ahatö nasa Niha ba götö daʼö ba woʼahonoa simane si no irai laʼokhögö ira Adamo ba Khawa. Daʼö mbörö wa tola simane daʼö waʼanau nosora. Hizaʼi, lö sökhi gamuatara ba lö khöra faʼalowalangi. No toʼölö alua waʼalösökhi. Faʼalö sökhi daʼa tebörögö ba ngaʼötö si mendrua, yaʼia daʼö me ibunu Kaʼino dalifusönia Habeli. Fasamösa moroi ba ngaʼötö Kaʼino zangokhögö fayawasa, faʼalösökhi hegöi fahöʼösania si töra moroi khö Kaʼino! Ba ngaʼötö si tölu, so waʼalösökhi sawena. Ibörötaigö laʼangöröfili döi Yehowa, hizaʼi tenga ba wamosumange yaʼia. Laʼogunaʼö döi Lowalangi ba wangelifi, lö khöra famosumange.​—I Moze 4:8, 23-26.

No toʼölö wamosumenge si lö sökhi me götö Khenoki. Me itugu ebua-bua Khenoki, moguna ihalö gangetula. Hadia ifaogö-faogö ia khöra? Mazui iʼalui Lowalangi sindruhu, sotöi Yehowa, samazökhi sorugo hegöi ulidanö? Tobali famarou dödönia me iʼangerönusi duma-duma Habeli si no mate börö wamosumangenia Yehowa. Ihalö gangetula Khenoki ba woloʼö Habeli. Imane ba  I Moze 5:22, ”Lö aefa-aefa khönia Lowalangi ba döröwania.” Ngawua wehede daʼö zangoromaʼö wa niha si sökhi Khenoki hewaʼae so ia ba gulidanö si lö sökhi. Yaʼia niha si oföna nitötöi Zura Niʼamoniʼö simane daʼö.

Ba ayati daʼö göi iwaʼö wa lö aefa-aefa ba döröwa Khenoki Yehowa hewaʼae no tobali ia ama khö Metusala. Tobali, mongambatö Khenoki me 65 fakhe ndröfinia. Lö nisura Zura Niʼamoniʼö haniha döi woʼomonia, hegöi hadauga fefu nononia ”ono matua ba ono alawe”. Na ifalua zomasi Lowalangi samösa ama, tatu manö wa irorogö zoroi yomonia moloʼö somasi Lowalangi. Aboto ba dödö Khenoki wa omasi Yehowa na lö faröi ia khö woʼomonia. (I Moze 2:24) Tatu manö ifalua zabölö sökhi ba wamahaʼö iraononia sanandrösa khö Lowalangi Yehowa. Hadia mbuania?

Lö izara-zara Sura Niʼamoniʼö wanutunö daʼö. Lö musura waö-waö nono Khenoki sotöi Metusala, fondrege zanau noso moloʼö Sura Niʼamoniʼö, simate me götö anönö danö idanö. Hizaʼi, so nono Metusala, töinia Lameki. Tola iʼila nasa Lameki tua Khenoki irugi töra otu fakhe. Tobali niha samati Lameki. Iʼogunaʼö ia Yehowa ba wamaʼeleʼö sanandrösa khö Noakhi, ono Lameki, ba alua daʼö. Lö aefa-aefa ba döröwa Noakhi Lowalangi simane tuania Khenoki. Lö irai falukha Noakhi khö Khenoki. Hizaʼi iröi gokhöta sebua böli Khenoki. Tola manö ifahaʼö ia Noakhi ba duma-duma si sökhi moroi khö namania Lameki, mazui moroi khö duania Metusala, mazui moroi khö Yaredi, ama Khenoki si mate me 366 fakhe ndröfi Noakhi.​—I Moze 5:25-29; 6:9; 9:1.

Faehu sibai ira Khenoki Gadamo. Hewaʼae moʼahonoa Gadamo, hizaʼi ifalua horö ba iröi gondröita folawa hegöi faʼabu dödö ba ngaʼötönia. Tobali, hewaʼae lö moʼahonoa Khenoki, itörö lala Lowalangi ba gondröitania yaʼia daʼö famati. Mate Gadamo me 308 fakhe ndröfi Khenoki. Hadia abu dödö zoroi yomonia me mate wurugö sangofönaiʼö fangalui tana khönia andrö? Lö taʼila. Gofu hadia ia zalua khö Khenoki ”lö saefa-aefa khönia Lowalangi ba lalania”.​—I Moze 5:24.

Angeraigö hadia zi tola mihalö famahaʼö moroi ba wamati Khenoki yaʼami si tobali högö yomo ba nomo. Hewaʼae moguna mibönökhi zoguna ba mboto khö zoroi yomomi, hizaʼi sabölö moguna yaʼia daʼö mibönökhi göi zoguna ba wamati. (I Timoteo 5:8) Tenga ha ba wehede, hizaʼi enaʼö oroma ia ba nifaluami. Na miʼoʼö Khenoki, mitehegö Daromali Lowalangi si tobali sanuturu lala khömi, no miröi göi gondröita duma-duma sebua böli si tola muʼoʼö.

Tatu manö so ba dödö Khenoki wa hulö zi ha samösa-mösa ia ba gulidanö si lö sökhi simane daʼö. Tobali, hadia iʼila Lowalangi Yehowa zalua khönia? Tatu manö. No inötönia fahuhuo Yehowa khö genoninia si lö faröi andre. Ibeʼe Lowalangi khö Khenoki duria si lö tola lö ifatunö ba niha ba götönia. Moloʼö Sura Niʼamoniʼö, Khenoki zi  föföna tobali samaʼeleʼö nituyu Lowalangi. Tola taʼila daʼa moroi khö Yuda, talifusö tiri Yesu, si no manema eheha ba wanura famaʼeleʼö Khenoki ngaotu fakhe aefa daʼö. *

Hadia nösi wamaʼeleʼö Khenoki? Yaʼia daʼö, ”Hiza, möi Zoʼaya, awö ngafulu ngahönö niʼamoniʼö andrö khönia, ba wanguhuku fefu, haniha ira, ba ba wangotuʼö fefu zi no mangerogö Lowalangi, ba khöra andrö, ba mbua-buara andrö fefu, falösökhi andrö, nifaʼuara, ba ba wehede safaito, fefu, nilau zanao horö andrö, si no mangerogö Lowalangi, khönia.” (Yuda 14, 15) Iadaʼa, si föföna sibai nehegö ua, tola manö bentuk lampau niʼogunaʼö Khenoki ba wahuhuosa, hulö zi no ifalua Lowalangi nifaʼeleʼö daʼö. Laʼoʼö duma-duma daʼö ira samaʼeleʼö tanö böʼö ba wamaʼema famaʼeleʼö. Rahu-rahunia: Fahuhuo zamaʼeleʼö sanandrösa ba ngawalö hadia ia si no tatu waʼalua irege alua simane daʼö!​—Yesaya 46:10.

Hadia nirasoi Khenoki me ifaʼema wehede daʼö khö ndra sedöna mamondro-ndrongo? Tola öʼila hewisa waʼabeʼe wamangelamania. Fehede ”mangerogö”, ”falösökhi”, ba ”safaito” muʼoguanaʼö ia ba wanegu niha sanandrösa ba nifaluara, hegöi hewisa wamaluara hadia ia. Famaʼeleʼö daʼö göi zameʼe famangelama ba niha fefu wa iʼotarai me lafofanö niha si föföna moroi ba Gedena, itugu lö sökhi gulidanö. Teʼasiwai daʼö fefu dania na tohare Yehowa awö ”ngafulu ngahönö niʼamoniʼö andrö khönia” yaʼia daʼö ira malaʼikania sagabölö. Lö faʼataʼu khö Khenoki ba wamaʼema famangelama daʼö hewaʼae na ha samösa-mösa ia! Tola manö inehe-nehegö ia Lameki sawuyu-wuyuna, ahöli dödönia me lö faʼataʼu khö duania andrö. Tobali, tola taʼila hadia mbörö wa lö hadöi khönia faʼataʼu.

Famati Khenoki zamarou tödöda ba wamaigi ulidanö andre simane wamaigi Lowalangi. Fanguhuku nifaʼema Khenoki si lö faʼataʼu moguna nasa ba gulidanö iadaʼa. Simane wamangelama nibeʼe Khenoki, Inönöi Danö Idanö Yehowa ba niha si lö sökhi me götö Noakhi. Fangohori daʼö tobali duma-duma ba wangohori sabölö ebua salua dania ba zi so föna. (Mataiʼo 24:38, 39; II Fetero 2:4-6) Iadaʼa, no ihenaigö ia Lowalangi awö ngahönö malaʼika niʼamoniʼö andrö khönia ba wanguhuku ulidanö si lö sökhi andre hulö simane nifaluania me föna. Moguna taʼameʼegö tödö wamangelama nibeʼe Khenoki ba tafatunö ba niha böʼö. Tola manö aröu khöda zi fahuwu khöda mazui talifusöda ba waʼaniha. Itaria hulö zi ha samösa-mösa ita. Hizaʼi lö niröi Yehowa Khenoki; lö göi iröi nono mbanuania si lö faröi iadaʼa!

Hewisa waʼamate Khenoki? Abölö manofu-nofu niha ba waʼamatenia moroi ba waö-waö waʼaurinia. Imane buku I Moze, ”Ba me no lö saefa-aefa khönia Lowalangi ba lalania, ba samuza maʼökhö, ba taya manö ia, noa sa iheta Lowalangi.” (I Moze 5:24) Hewisa woheta Lowalangi Khenoki? Imane sinenge sotöi Faulo, ”Moroi ba wamati, wa teheta Khenoki, fa lö iʼila waʼamate, ba lö lasöndra ia, me no iheta ia Lowalangi; föna wangeheta yaʼia saʼae tefaduhuʼö ia, wa no somasi Lowalangi ia.” (Heberaiʼo 11:5) Hadia geluaha ”teheta Khenoki, fa lö iʼila waʼamate”? So ösa famoʼeluaha Sura Niʼamoniʼö sangumaʼö wa muʼohe Khenoki ba zorugo. Tatu, lö duhu daʼö. Sura  Niʼamoniʼö zangumaʼö wa Yesu zi oföna nisusugi ba weʼamöi ba zorugo.​—Yohane 3:13.

Na simanö, hadia geluaha ”teheta” enaʼö lö ”iʼila waʼamate”? Ba zi lö iʼila Khenoki, tola manö iheta ia Yehowa moroi ba waʼauri tobali mate, enaʼö lö irasoi ha waʼafökhö waʼamate. Hizaʼi, si föföna sibai ua ”tefaduhuʼö ia, wa no somasi Lowalangi ia”. Hewisa lalania? Tola manö, fatua lö mate itema gangilata Khenoki, te sanandrösa ba waradaiso. Ba gangilata daʼö teforomaʼö wa iʼomasiʼö ia Lowalangi, ba mate Khenoki. Me isura Faulo sanandrösa khö Khenoki hegöi niha si lö faröi tanö böʼö, imane wangumaʼö, ”Ba waʼamate daʼö fefu, ba dali wamati.” (Heberaiʼo 11:13) Tola manö laʼalui mboto Khenoki me no mate ia ira nudunia ”ba lö lasöndra ia”, te no iheta Yehowa enaʼö lö laʼogunaʼö mbotonia ba zi lö tefaudu mazui ba wamazaewe famosumange sofaya. *

Moroi ba ayati daʼö, tola taʼangerönusi hadia zalua me aetu noso Khenoki. Tola manö daʼa wamakhala si tola takhalaigö. Ba wagohisa so Khenoki, marase ia. Lagohi ia ira udunia börö duria fanguhuku andrö khönia. Isöndra nahia mbini-bini ba molombase ia sabata, tobali iʼila wa alio ara hasambalö lasöndra ia. Ba mbalö doho so nosonia iadaʼa. Ba wolombasenia ilau mangandrö. Ba isöndra waʼahono dödö. Itema gangilata Khenoki ba hulö zi no so ia ba gangilata daʼö.

Khalaigö, so gulidanö si faböʼö föna duduma hörö Khenoki. Hulö waʼasökhi Kabu Faradaiso daʼö ba hörönia, ba lö hadöi kerubi zanaisi niha weʼamöi ba daʼö. Ato ndra matua hegöi ira alawe si lö fökhö ba sawuyu-wuyu zi so ba daʼö. Afönu faʼohau-hau dödö waʼaurira. Lö hadöi fatuwusa, ba lö tefakao niha samosumange Lowalangi simane yaʼia. Irasoi samösa Khenoki hewisa waʼaro mbuʼusa li, faʼomasi hegöi foʼameʼegö tödö Yehowa ia. Faduhu dödö Khenoki wa daʼa nahiania; hasambalö toröi ia ba daʼa. Börö me lö aetu-aetu irasoi waʼahono dödö, ifakifu hörönia Khenoki, ilau mörö ba lö fangifi.

Simörö ba waʼamate nasa Khenoki iadaʼa. Sambalö nitörö tödö Yehowa ia! Simane nifabuʼu Yesu wa so dania ginötö khöra nitörö tödö Yehowa andrö ba larongo li Yesu ba möi ira baero ba lewatö, ba hasambalö laʼila gulidanö si bohou si sökhi ba safönu faʼohau-hau dödö andrö.​—Yohane 5:28, 29.

Hadia omasi miʼiagö nahia andrö? Sambua faʼomuso dödö na tola falukha ita khö Khenoki. Angeraigö hadia manö waʼomuso dödö na öfahaʼö ndraʼugö khönia! Hasambalö ifatunö khöda hadia zalua me arakhagö mate ia. Hizaʼi, so zi tola tafahaʼö ita khönia iadaʼa. Me no aefa itutunö sanandrösa khö Khenoki, imane Faulo, ”Ba na lö famati, ba tebai iʼomasiʼö niha Lowalangi.” (Heberaiʼo 11:6) Sindruhu-ndruhu duma-duma si sökhi ba no sinangea muʼoʼö wamati hegöi falöʼataʼu Khenoki!