Tumbu ndraʼo ba Paddington, sambua banua sato niha ba London, Inggris. Toröi ndraʼo khö mamagu ba tölu gaʼagu ira alawe. Tohare ba mofanö bapagu ba waʼaurima börö me no tobali ia niha si mabu-mabu.

Me iraono, ifahaʼö ndraʼo mamagu ba wangandrö ero bongi. So khögu Zura Niʼamoniʼö side-ide, ösinia ha sura Zinunö ba ufazökhi zinunö ba uʼanunöisi. Lö olifu ndraʼo no irai ubaso ngawua wehede si so ba zi sambua mbuku ba lö aefa-aefa moroi ba wangera-ngeragu, sangumaʼö, ”Samuza inötö lö hadöi luo mahemolu.” Börö ngawua wehede daʼö, andrö wa itaria tokea ndraʼo ba zi bongi ba woʼangeraigö si so föna. Umane tödögu, ’Hasambalö so waʼauri sabölö sökhi. Hana wa ba daʼa so ndraʼo?’ Lö omasido mate!

Adöni dödögu ba ngawalö hadia ia zoʼamakhaita ba waetasa. Utandraigö fahuhuo ba niha si no mate, möiga ba lewatö ira awögu sekola ba mafaigi filem mbekhu. Ba ginötö mafalua daʼö so khöma waʼadöni dödö hegöi faʼataʼu.

Ibörötaigö afaito ndraʼo me fulu fakhe ndröfigu. Uʼoroko mbago, ba sandru ndraʼo ba zi ha sabata. Ibörötaigö göi uhofo ganja. Ba me 11 fakhe ndröfigu, ibörötaigö uʼogunaʼö alkohol. Hewaʼae lö omasido rasonia, hizaʼi omasido na iʼasogö khögu waʼamabu. Omasido göi musik hegöi fazoge. Möi ndraʼo ba klub malam ero so ginötö. Ubini-biniʼö ndraʼo wofanö hegöi ba wangawuli fatua lö tumbu luo ba zihulö wongi. Na marase ndraʼo mahemolunia, ba zi lö iʼila satuagu lö möido sekola. Na inötö möido sekola, asese ubadu alkohol ba ginötö lafaʼema famahaʼö.

Usöndra nilai side-ide ba gafuriata ndröfi zekolagu. Tokea dödö mamagu me iʼila wa afaito sibai ndraʼo, irege afatö dödö mamagu ba mofönu ia. Faʼudu ndraʼaga ba moloi ndraʼo moroi ba nomo. Toroi ua ndraʼodo gasa-gasa ba nomo kawagu, Toni, samösa Rastafari. Asese fao ia ba wamalua amuata si lö sökhi ba iʼamawa dalu-dalu nitegu famareta ba afönu faʼalösökhi waʼaurinia. Lö ara aefa daʼö motabina ndraʼo, ba me 16 fakhe ndröfigu tumbu khöma ndraono ono matua.

Awena siʼai falukha ndraʼo khö Zamaduhuʼö Yehowa me toröi ndraʼo ba asrama nahia ndra ina-ina si lö sangowalu hegöi onora ono sawuyu. Lafonaha ndraʼodo ba daʼö ira samatörö ba mbanua andrö. So darua ndra alawe Samaduhuʼö zasese mamalukhaisi ina-ina tanö böʼö. Samuza inötö ufaogö ndraʼo fahuhuo khöra, omasido uforomaʼö wa fasala ndra Samaduhuʼö andrö. Lahaogö labeʼe wanemali moroi ba zinofugu ba laʼogunaʼö Zura Niʼamoniʼö. Sökhi sibai ira ba no lahaogö-haogö manö, daʼö börö wa adöni dödögu khöra. Andrö wa fao dödögu ba wamamahaʼö yaʼo ba Zura Niʼamoniʼö.

So sambua wamahaʼö moroi ba Zura Niʼamoniʼö si möi fombulöʼö waʼaurigu. Iʼotarai me awuyu-wuyudo ataʼudo mate. Hizaʼi, iadaʼa usöndra wamahaʼö Yesu sanandrösa ba wanusugi! (Yohane 5:28, 29) Ufahaʼö göi ndraʼo wa iʼameʼegö tödö ndraʼo Lowalangi. (I Fetero 5:7) Fagöna sibai ba dödögu ngawua wehede ba Yeremia 29:11, sangumaʼö, ”Uʼila sa, hewisa dödögu khömi—iwaʼö Yehowa—tödö ba wangorifi ba tenga ba wamakiko, ba wamaigi faʼohahau dödö khömi, ba götö dania!” Ibörötaigö faduhu dödögu wa so khögu dötönafö faʼauri ba gulidanö Faradaiso sagötö faʼara.​—Zinunö 37:29.

Laforomaʼö khögu waʼomasi soroi ba dödö ira Samaduhuʼö Yehowa. Me awena sibai möido ba gangowuloara, so waʼomasi ba latemaʼö ndraʼo soroi ba dödö, fahuwu fefu niha! (Yohane 13:34, 35) Faehu sibai moroi ba nitemagu ba gereja si so ba mbanua daʼö. Latemaʼö ndraʼo ira Samaduhuʼö, hewaʼae na laʼila hewisa zindruhunia gamuatagu. Labeʼe ginötöra khögu, laʼameʼegö tödö ndraʼo, laʼomasiʼö ndraʼo, ba oya wanolo tanö böʼö nasa. Hulö zi so ba gotalua nösi nomo sato niha, safönu faʼomasi so ndraʼo worasoigu.

Moroi ba wamahaʼögu ba Zura Niʼamoniʼö, aboto ba dödögu wa moguna ubulöʼö waʼaurigu si tefaudu ba goi-goi Lowalangi sanandrösa ba gamuata. Uʼila sa wa abua khögu wamöhöli foroko bago. Ba ba ginötö daʼö göi uʼila wa so musik zi tola mondrönisi tödögu ba wangogunaʼö ganja, tobali ufaböʼöni musik nifondro-ndrongogu. Aboto göi ba dödögu wa moguna uböhöli weʼamöi ba klub malam si tola möi fondrönisigu ba wemabu. Ba uʼalui nawögu si bohou si tola molohe lua-lua si sökhi khögu ba wanolo yaʼo ba lala waʼaurigu si bohou andrö.​—Gamaedola 13:20.

Ifahaʼö göi ia Tony ba Zura Niʼamoniʼö khö ndra Samaduhuʼö Yehowa. Börö me lafodane-dane ba Zura Niʼamoniʼö wameʼe fanema li moroi ba zinofunia ira Samaduhuʼö, faduhu dödönia wa si no ifahaʼö yaʼia andrö ba no sindruhu. Oya nibulöʼönia ba waʼaurinia: iheta ia moroi ba gangorodua niha si lö sökhi, iböhöli wamalua si lö sökhi, ba iböhöli wohofo ganja. Ba wangomusoiʼö tödö Yehowa, moguna göi mafaudugö gamuatama hegöi ba wameʼe nahia si sökhi ba ndraonoma. Mangowalu ndraʼaga me döfi 1982.

Itörö-törö tödögu zi no irai uʼalui ba artikel si so ba majalah Manuriaigö hegöi Sadarlah! * sanandrösa ba waö-waö waʼauri niha si no aʼozu mamulöʼö faʼaurira, ba omasido göi ufalua zimane daʼö. Tefarou dödögu ba duma-dumara! Teʼaroʼö ndraʼo enaʼö so khögu wangodödögö ba lö awuwu. Lö aetu-aetu mangandrödo khö Yehowa enaʼö lö iröi ndraʼo. Tebayagö idanö ndraʼo hegöi Tony tobali Samaduhuʼö Yehowa me baŵa si Fitu 1982.

Mondrouʼö fahuwusa khö Yehowa zi möi fangorifi nosogu. No marasoi samösa hewisa wanolo Yehowa yaʼaga ba wolalöi inötö si basaki. Mafahaʼö ndraʼaga ba wangodaligö Yehowa ba ginötö si basaki, ba lö aetu-aetu marasoi samösa hewisa wanolonia yaʼaga hegöi ösi nomoma.​—Zinunö 55:23.

Sambua faʼomuso dödö khögu ba wanolo iraonoma enaʼö so khöra waʼaboto ba dödö sanandrösa khö Yehowa simane nifaluagu. Omuso sibai dödögu iadaʼa me itugu monönö waʼaboto ba dödö ndraonogu khö Lowalangi.

Lö saʼae tokea ndraʼo ba zi bongi ba woʼabusi tödö si so föna mazui faʼamate. Maʼogunaʼö ginötöma ba wamalukhaisi banua niha Keriso Zamaduhuʼö Yehowa ero migu ba wangaroʼö yaʼira. Mafaogö ndraʼaga khöra ba wamahaʼö niha böʼö, na mamati ira khö Yesu tola lasöndra waʼauri si lö aetu.