Hadia zinangea öfalua enaʼö tola öʼomasiʼö wombaso Sura Niʼamoniʼö andrö ba ötema mbua moroi ba daʼö? Osisiʼö lima wanuturu lala sasese laʼogunaʼö niha sato.

Fili nahia hegöi inötö si tefaudu. Alui nahia sahono. Angelamaisi ngawalö hadia ia zi tola möi famangoloi dödöu enaʼö tola öʼosambuaʼö gera-erau ba nibasou. Haga hegöi angi si sökhi tola möi fanolo khöu enaʼö ösöndra mbua si sökhi moroi ba nibasou.

Okhögö lala wangera-ngera satulö. Börö me moroi khö Namada ba zorugo Zura Niʼamoniʼö, tola oya ösöndra mbua na tobali ndraʼugö simane iraono somasi tefahaʼö moroi ba zatua sebua faʼomasi. Na so khöu wangera-ngera si lö baga sanandrösa ba Zura Niʼamoniʼö, aröuʼö ia enaʼö tola ifahaʼö ndraʼugö Lowalangi.​—Zinunö 25:4.

Angandrö fatua lö öbaso. Fangera-ngera Lowalangi nösi Zura Niʼamoniʼö andrö, daʼö mbörö wa no sinangea moguna khöda wanolo enaʼö tola aboto ba dödöda ia. No ifabuʼu khöda Lowalangi wa ibeʼe ”geheha niʼamoniʼö ba zangandrö khönia”. (Luka 11:13) Tola itolo ndraʼugö eheha niʼamoniʼö enaʼö aboto ba dödöu wangera-ngera Lowalangi. Arara manö tola aboto ba dödöu ”waʼabakha Lowalangi andrö”.​—I Korindro 2:10.

Baso enaʼö aboto ba dödöu. Böi ha asala öbaso manö. Moguna öʼangeraigö hadia zi no öbaso. Sofu khöu samösa wanofu andre: ’Hadia mbua-bua si sökhi niʼilagu moroi ba waö-waö niha nibasogu andre? Hewisa enaʼö tola ufalua ia ba waʼaurigu?’

Tatugöi gohitö dödöu. Enaʼö tola ösöndra mbua moroi ba wombaso Sura Niʼamoniʼö, moguna öʼodödögö ba wamahaʼö yaʼugö sanandrösa ba ngawalö hadia ia zameʼe khöu faʼowua-wua dödö. Tola manö öfalua gohitö dödö simane daʼa, ’Omasido abölö oya ufahaʼö ndraʼo sanandrösa khö Lowalangi.’ ’Omasido enaʼö tobali niha si sökhi ndraʼo, foʼomo ira matua mazui ira alawe si sökhi.’ Aefa daʼö, fili faosatö ba Zura Niʼamoniʼö si tola manolo yaʼugö ba wamalua ohitö dödöu andrö. *

Daʼa zi lima wanuturu lala si tola manolo yaʼugö ba wamörögö yaʼia. Hizaʼi, hadia zinangea öfalua enaʼö so khöu waʼomuso dödö ba wombaso? Ba artikel aefa daʼa itutunö wanuturu lala tanö böʼö.