Aföli? Mazui tobali fangomuso dödö? Hewisa moloʼö yaʼugö wombaso Zura Niʼamoniʼö andrö? Teʼodaligö fefu daʼö moloʼö hewisa wombasou yaʼia. Datafaigi hewisa enaʼö itugu adöni dödöu hegöi waʼomasiu.

Fili wamoʼeluaha si tola muʼodaligö ba salio muʼila eluaha. Lö khöu faʼomuso dödö ba wombaso na lö aboto ba dödöu nibasou mazui na fehede me föna niʼogunaʼö si lö öʼila eluaha. Alui Zura Niʼamoniʼö zangogunaʼö ngawua wehede salio muʼila eluaha zi tola fagöna ba dödöu. Hewaʼae simanö, moguna ötatugöi enaʼö atulö ba tefaudu wamoʼeluaha yaʼia. *

Ogunaʼö teknologi. Iadaʼa tenga ha ba mbuku tercetak tehenaigö Zura Niʼamoniʼö hizaʼi so göi ia ba bentuk elektronik. So ösa Zura Niʼamoniʼö si tola mubaso ba Internet mazui mu-download ba komputer, tablet, mazui ba HP enaʼö tola öbaso samösa. So göi aplikasi tanö böʼö si tola manolo yaʼugö, enaʼö tola alio ösöndra ayati Zura Niʼamoniʼö tanö böʼö ba duho si fagölö mazui tobali fanolo khöu ba wofatimbaisi famoʼeluaha tanö böʼö. Na abölö omasi ndraʼugö wamondro-ndrongo moroi ba wombaso, tehenaigö göi Zura Niʼamoniʼö si no larekam. Ato niha sabölö omasi mamondro-ndrongo na ba wofanö-fanö, manasa, mazui na lahalöwögöigö hadia ia zi tola mameʼe aoha khöra ba wamondro-ndrongo. Hana wa lö ötandraigö lala sabölö tefaudu öʼogunaʼö?

Ogunaʼö ngawalö fakake ba wamahaʼö Zura Niʼamoniʼö. Fakake ba wamahaʼö ba Zura Niʼamoniʼö tola tobali fanolo khöu enaʼö tola ösöndra wamahaʼö  moroi ba nibasou andrö. So peta danö Zura Niʼamoniʼö, si tola manolo yaʼugö enaʼö öʼila hezo so gamaudu alua nibasou andrö ba ökhalaigö hadia zalua. Artikel simane si so ba majalah andre mazui ba faosatö ”Ajaran Alkitab” si so ba situs Web jw.org/id, tola tobali fanolo khöu enaʼö aboto ba dödöu nösi Zura Niʼamoniʼö.

Faböʼö-böʼöni lala niʼogunaʼöu. Na abua khöu wombaso Sura Niʼamoniʼö iʼotarai ba wamobörö irugi awai, hana wa lö öʼalui zi tola mameʼe khöu faʼadöni dödö simane na öʼalui duho-tuho zomasiʼö? Na omasiʼö oya öʼila niha si tehöngö ba Zura Niʼamoniʼö, tola ötandraigö öbaso ia. So duma-duma si so ba kotak ” Douʼö ba Wangiʼila Niha si So ba Zura Niʼamoniʼö”. Mazui tola öbaso Zura Niʼamoniʼö moloʼö tuho hegöi waö-waö salua. Hana wa lö ötandraigö öfalua fasambua moroi ba zi so ba kotak andrö?