Sura Niʼamoniʼö tenga ha buku si toʼölö. Ba daʼö so mene-mene moroi khö Zomböi yaʼita. (II Timoteo 3:16) Tola molua-lua ba waʼaurida mene-menenia andrö. Töra-töra, imane Sura Niʼamoniʼö, ”Sauri sa daromali Lowalangi andrö, ba sabölö.” (Heberaiʼo 4:12) Mofaʼabölö ia ba wamohouni faʼaurida ba zi dombua lala yaʼia daʼö ibeʼe wanuturu lala ba waʼaurida si ero maʼökhö ba itolo enaʼö faduhu dödöda khö Lowalangi hegöi ba mbuʼusa linia.​—I Timoteo 4:8; Yakobo 4:8.

Ibohouni waʼauriu iadaʼa. Tola tobali fanolo Zura Niʼamoniʼö ba woʼasiwai gabula dödö niha zamösana. Ibeʼe mene-mene si sökhi sanandrösa ba zimane daʼa.

•   Gamakhaitada ba niha böʼö. —Efeso 4:31, 32; 5:22, 25, 28, 33.

• Falöfökhö boto hegöi nirasoi dödö. —Zinunö 37:8; Gamaedola 17:22.

• Goi-goi gamuata.​—I Korindro 6:9, 10.

• Kesejahteraan ekonomi.​—Gamaedola 10:4; 28:19; Efeso 4:28. *

So sambua fongambatö sagawuyu-wuyu ba Asia, laʼameʼegö tödö sibai mene-mene Zura Niʼamoniʼö andrö. Simane zi bohou mangowalu tanö böʼö, laʼodödögö göi ba wofaudugö amuatara khö woʼomora ba lö labini-biniʼö nösi dödöra. Hizaʼi, labörötaigö lafalua hadia zi no labaso ba Zura Niʼamoniʼö. Hadia mbuania? Imane samösa foʼomo ira matua sotöi Vicent, ”Hadia ia nibasogu ba Zura Niʼamoniʼö zanolo yaʼo ba woʼasiwai fefu zi tobali abula dödö ba wangowaluma si fao faʼomasi. Mamaudugö faʼauri simane si so ba Zura Niʼamoniʼö zangaʼasogö faʼomuso dödö khöma.” Fao göi dödö woʼomonia ira alawe sotöi Annalou, imane, ”Duma-duma si so ba Zura Niʼamoniʼö zanolo yaʼaga. Ohau-hau dödögu iadaʼa, ba so khögu waʼahonö dödö ba wongambatö hegöi ohitö dödö ba waʼauri.”

Monönö waʼaboto ba dödö sanandrösa khö Lowalangi. Baero wodunö-dunönia sanandrösa ba wangowalura, imane nasa Vicent, ”Itugu ahatö ndraʼo khö Yehowa iadaʼa moroi ba zilalö, börö wombaso Sura Niʼamoniʼö.” Aboto ba dödö Vicent wa sabölö moguna yaʼia daʼö, itolo ndraʼugö Sura Niʼamoniʼö enaʼö aboto ba dödöu Lowalangi. Sindruhunia, tenga ha ötema mbua moroi ba mene-menenia, hizaʼi tola göi tobali si fahuwu khönia ndraʼugö. Ba tola öʼila hewisa wozaraininia wotutunö sanandrösa ba waʼohahau dödö ba zi so föna, si fao faʼomuso dödö tola öʼokhögö ”zindruhu faʼauri” sagötö faʼara. (I Timoteo 6:19) Lö hadöi ba mbuku tanö böʼö daʼa.

Na öbaso Zura Niʼamoniʼö ba lö mamalö öfalua daʼö, tola ötema mbua tanö böʼö yaʼia daʼö tola ibohouni waʼauriu iadaʼa ba monönö waʼaboto ba dödöu sanandrösa khö Lowalangi. Hizaʼi, na öbaso Zura Niʼamoniʼö tola oya wanofumö. Ba ginötö öfalua daʼö, törö tödöu duma-duma si sökhi moroi khö zalawa Gaitiofia sauri me 2.000 fakhe silalö. Oya sibai wanofunia sanandrösa ba Zura Niʼamoniʼö. Me lasofu khönia hadia aboto ba dödönia zi no ibaso, imane wangumaʼö, ”He uwisa sa, na lö samobawa lala khögu?” * Iʼanemaiʼö itema wanolo moroi khö zamahaʼö satua-tua ba Zura Niʼamoniʼö, yaʼia daʼö Filifo, si no tobali nifahaʼö Yesu. (Halöwö Zinenge 8:30, 31,34) Simanö göi na omasiʼö enaʼö oya aboto ba dödöu Zura Niʼamoniʼö, makaoni ndraʼugö ba wofoʼösi formulir online ba www.pr418.com/nia ba tola öfaoheʼö zurau ba mbanua sahatö si so ba majalah andre. Hubungi ndra Samaduhuʼö Yehowa sahatö ba tola göi öʼondrasi Balai Mbanua Lowalangi ba nahia sahatö ba zi toröi yaʼugö. Hadia mbörö wa tenga iʼotarai iadaʼa öfahaʼö ndraʼugö ba Zura Niʼamoniʼö, ba tehegö daʼö zi tobali fanuturu lala khöu enaʼö itugu sökhi waʼauriu?