Imane Rose, ”No göna ndraʼo fökhö ngaʼötö ba asese urasoi waʼafökhö. Tefakao sibai ndraʼo.” Abu sibai dödönia börö me tebai iʼosambuaʼö dödönia na ifahaʼö ia ba Zura Niʼamoniʼö mazui na ifalua halöwö tanö böʼö soʼamakhaita ba wamosumange Lowalangi. Hizaʼi, terara dödönia ba wehede Yesu ba Mataiʼo 19:26, ”Ba Lowalangi, ba molala fefu hadia ia.” Iʼila Rose wa oya lala si tola muʼogunaʼö ba wamahaʼö. Börö me asese irasoi waʼafökhö, itaria abua khönia wombaso. Andrö, ibörögö ifondrondrongo rekaman fombaso Sura Niʼamoniʼö hegöi buku si teʼodane-dane ba Zura Niʼamoniʼö. * Imane, ”Na lö hadöi rekaman andrö, hulö na tebai urorogö wamatigu.”

Itaria abu dödö Rose börö me tebai ifalua zi tola ifalua ba zilalö. Hizaʼi, terara dödönia ba wehede nisura ba 2 Korindro 8:12, ”Na so waʼaohagölö sa, ba no niʼomasiʼö; dali zi so khönia, tenga dali zi löʼö.” Daʼa zamasugi ba dödönia wa omuso dödö Lowalangi ba zi no ifalua, börö me ifalua daʼö ndrege waʼabölönia.

Imane Delphine si no mututunö moroi furi, ”No 18 fakhe ndröfi nonogu alawe me mate ia, ba abu sibai dödögu. Hulö zi no mate göi ndraʼo. Tebulö fefu zalua khögu.” Hizaʼi, terara dödönia ba Zinunö 94:19. Imane sanura Zinunö andrö khö Lowalangi, ”Ba waʼoya ngawalö waʼabu dödögu andrö, ba iʼokafui dödögu fondrara tödö andrö khöu.” Imane, ”Mangandrö ndraʼo khö Yehowa enaʼö tola uʼalösi waʼabu dödögu.”

Oya ginötönia ba wohalöwö tobali sukarelawan. Ba gafuriata, ifagölösi ia ba fese gamba niʼogunaʼö ndraono side-ide. Hewaʼae afatö fese gamba andrö, tola nasa laʼogunaʼö ia. Simanö göi, hewaʼae na afatö dödönia, iʼila wa tola nasa itolo niha böʼö. Imane, ”Me uʼogunaʼö goi-goi Zura Niʼamoniʼö hegöi lala wangera-ngera si tefaudu ba Mbuku Niʼamoniʼö ba wondrara tödö niha nifahaʼögu, izumaigö uʼila wa daʼa lala niʼogunaʼö Yehowa ba wameʼe khögu faʼahono dödö hegöi fondrara dödö.” Isura haniha manö zi no irai manörö faʼabu dödö ba götö Zura Niʼamoniʼö. Ifahaʼö ia wa lö tebulö mangandrö ira fefu khö Yehowa. Aboto ba dödönia wa tola tataögö gabula dödö si fao faʼebolo dödö ha na tafahaʼö ita ba Zura Niʼamoniʼö.

Ifahaʼö göi ia ba Zura Niʼamoniʼö Delphine wa moguna iʼosambuaʼö dödönia ba zi so miföna, tenga ba zi no irai alua ba zilalö. Terara dödönia ba wanötöna nisura ba Halöwö Zinenge 24:15, ”So wemaoso zi mate, he satulö, ba he si lö atulö.” Hadia faduhu dödö Delphine wa hasambalö isusugi nononia Yehowa? Imane, ”Ukhalaigö wa so nonogu ba zi so föna. Hasambalö falukha zui ndraʼaga ba ginötö si no muhonogöi, moloʼö si no itatugöi Amagu, Yehowa. So ba duduma hörögu ia ba fao ndraʼaga ba kabu, hulö simane me uʼila ba uʼomasiʼö ia iʼotarai me tumbu.”