Imane Rosie, ”Lö tebulö so khögu waʼaombö dödö börö me ukhalaigö na alua zi lö sökhi.” Hadia ayati Zura Niʼamoniʼö sanolo yaʼia? Simane niwaʼö ba Mataiʼo 6:34, ”Böi miʼabusi tödö zoguna mahemolu; mahemolu tesöndra lala zabu dödö mahemolu. Noa manö wamakao zi sara-sara ngaluo.” Imane Rosie wa möi fanolonia mene-mene Yesu andrö enaʼö lö ibusi tödö hadia zalua mahemolu. Inönö nasa wangumaʼö, ”No fahöna gabula dödögu ba lö omasido unönö. Lö ubusi dödögu ba zi lö nasa alua ba si lö tatu na alua.”

Lö tebulö so waʼaombö dödö göi khö Yasmine. ”Ba zi samigu, mato hauga kali meʼe ndraʼo. Itaria lö uʼila mörö ba zi bongi. Lö sökhi-sökhi dödögu börö me tenga satulö niʼera-eragu.” Hadia ayati sanolo yaʼia? Itötöi 1 Fetero 5:7, ”Mibeʼe balazi [Lowalangi], na so zabu dödömi, gofu hadia ia, so so sa dödönia ami.” Imane Yasmine, ”Lö tebulö mangandrödo khö Yehowa ba ifondrondrongo wangandrögu. Urasoi wa iʼonoro gabula dödögu. Hewaʼae itaria so nasa ba gera-eragu zi lö atulö, no uʼila hewisa wangasiwai yaʼia iadaʼa.”

So nono alawe sotöi Isabella sangumaʼö, ”Moloʼö yaʼo, fanaha ba walömamalua halöwö andrö no fökhö ngaʼötö, börö me simane daʼö göi bapagu. Hewaʼae moguna uʼasiwai halöwö andrö sindruhunia, asese imane tödögu dania manö. Arörö ndraʼo ba zi lö moguna, simane fanoto TV ba fedao-dao. Lö sökhi na toʼölö tafalua daʼö. Alangu dödöda ba lö sökhi wamaluada halöwöda.” Goi-goi sanolo yaʼia so ba 2 Timoteo 2:15, ”Forege wangalui, enaʼö sinangea khö Lowalangi ndraʼugö, sohalöwö si lö aiwö.” Imane Isabella, ”Lö omasido na aila Yehowa ba halöwögu, ha börö me utaha-taha wamalua yaʼia.” Iadaʼa, iʼangenanöi saʼae fefu daʼö.

Simanö göi Kelsey. Imane, ”Na so halöwögu, awena ubabaya na arakhagö ahori ginötö. Asese meʼe ndraʼo, ambö femörögu, ba aombö dödögu. Lö sökhi lua-luania khögu.” Ayati sanolo Kelsey yaʼia daʼö Gamaedola 13:16, ”Satua-tua ba motödö wolau hadia ia fefu, ba si lö tödö, ba ifalua waya-faya.” Itutunö wamahaʼö nisöndrania ba ayati daʼö, ”Moguna tahaogö taʼangeragö ba tafaʼanö ita. Iadaʼa, so mbuku ba mezagu ba wotatugöi inötögu wohalöwö. Toföfö ginötö niʼogunaʼögu, ba tenga awena ubabaya halöwögu na arakhagö ahori ginötö.

Imane Kirsten, ”Iröi ndraʼo foʼomogu ira matua, ba daöfa nonoma si fao khögu.” Hadia goi-goi Zura Niʼamoniʼö sanolo yaʼia? Imane ba Gamaedola 17:17, ”Sindruhu si fahuwu, ba no fadoro iʼomasiʼö nawönia; ba ba wamakao, ba tumbu ia si fatalifusö.” Iʼandrö wanolo Kirsten moroi khö ndra awönia samosumange Yehowa. Hadia mbuania? ”Oya lala niʼogunaʼöra ba wanolo yaʼo! So zamaʼoheʼö bunga hegöi ö, laröi föna mbawandruhö. So mato hadauga zanolo yaʼo hegöi iraonogu me findra ndraʼaga ba zi tölu kali. So samösa nawögu sanolo yaʼo wangalui halöwö. Lö irai laröi ndraʼo.”

Delphine, si no mutötöi ba wamobörö, irasoi göi wa hulö zi lö awö ia. Itörö tödönia me no hauga kali alua khönia gabula dödö, ”Asöndru dödögu na uʼila ohahau dödö niha böʼö. Lö urasoi waʼomuso dödö ba hulö zi lö awö-awögu.” Terou dödönia niwaʼö ba Zinunö 68:6, ”Lowalangi, samaigi omo ba zi lö omo.” Itutunö, ”Tatu tenga ha ba nomo simane niʼiagöda andre manandrösa ayati daʼa. Aboto ba dödögu wa ibeʼe khöda nomo ba wamati Lowalangi. Ba nahia daʼö tola tarasoi waʼahono dödö, ba sökhi wahuwusada ba gotalua niha sangomasiʼö Yehowa. Hizaʼi, uʼila wa moguna ahatö ndraʼo khö Yehowa ua, awena tola ahatödo khöra. Itolo ndraʼo ayati Zinunö 37:4, ʼBa omuso dödöu ba khö Yehowa, ba ibeʼe khöu zomasi dödöu.ʼ”

Ihalö rahu-rahu, ”Uʼila wa moguna abölö ahatö ndraʼo khö Yehowa. Ha yaʼia wondrege zi sökhi. Usura göi hadia manö zi tola ufalua ba ufaogö niha böʼö sangomasiʼö Yehowa enaʼö tola fahuwu ndraʼaga. Ufahaʼö ndraʼo wamaigi amuatara si sökhi ba lö utöngöni walömoʼahonoara.”

Tatu manö, lö moʼahonoa niha samosumange Lowalangi. Lö aröu faböʼö ndra Samaduhuʼö Yehowa moroi ba niha böʼö, so göi gabula dödöra. Hizaʼi, famahaʼö moroi ba Zura Niʼamoniʼö zamarou tödö niha ba wanolo awönia niha, ndrege zi tola lafalua. Sökhi na fahuwu ita ba niha simane daʼö. Na simanö, hadia tola itolo ita goi-goi Zura Niʼamoniʼö andrö ba wanaögö abula dödö si tebai teʼasiwai iadaʼa, simane fökhö ba faʼabu dödö?