Irasoi Delphine, si no mututunö moroi furi, wa faʼaombö-aombö dödö andrö zangoʼou yaʼia enaʼö lö iböhöli wamadu tuo. Lö niʼelifi Zura Niʼamoniʼö wamadu tuo. Hizaʼi, moguna taʼangenanöi. Imane, ”Böi orudu ndraʼugö ba zamadu-madu tuo.” (Gamaedola 23:20) Na talafo oya tabadu duo, tola mofökhö ita, fawuka ba tekiko wahuwusada ba niha, ba zuta zalio mate ero röfi. Na laʼoʼö niha mene-mene Zura Niʼamoniʼö, tola telumöʼö ira moroi ba gabula dödö andrö.

Iʼoʼö daʼö Delphine. Imane, ”Aboto ba dödögu wa lö taya waʼaombö-aombö dödögu na ubadu duo. Uʼoʼö mene-mene ba Wilifi 4:6, 7, ’Böi mibusi tödö hadia ia, ba . . . mibokai khö Lowalangi, ba wangandrö.’ Ero bongi, mangandrö ndraʼo khö Yehowa na itugu fawuka gera-eragu ba na aombö dödögu. Ututunö khönia nösi dödögu, simane na mofönu ndraʼo, na afatö dödögu, mazui na aetu wanötönagu. Uʼandrö khönia wanolo ba woʼangeragö si sökhi. Ba zi hulö wongi, ufareso hadia sindruhu-ndruhu no taya niʼera-eragu andrö. Fangandrö zanolo yaʼo wangosambuaʼö tödögu ba ngawalö niʼokhögögu, tenga ba zi lö niʼokhögögu. Lö omasido ubadu duo saʼae, börö me ebua sibai mböli waʼahono dödö nirasoigu andrö, ba lö omasido na taya ia.”

Daʼa zangaʼasogö faʼabu dödö ba famakao. Hizaʼi, itolo ita goi-goi Zura Niʼamoniʼö wanimbagö abula dödö andre. Iʼombakhaʼö hadia mbörö wa alua ia, duma-dumania börö pornografi ba na tahokhaini ndra alawe mazui ira matua. Imane ono matua sotöi Samuel, ”Aoha wamalua hokha. Itaria, lö tumbu ba dödögu waʼomasi ba zi samösa niha. Hizaʼi, börö me omasi ia khögu, andrö wa ugadu-gadu ia.” Asese lafobahulu Samuel wa mohokha ia ba ndra alawe hewaʼae tenga simane daʼö niʼera-erania. Ba gafuriata, iʼodödögö wohokhaini ira alawe. Hizaʼi, abu dödönia. Imane, ”So deʼalania na mohokha ita, tola idönisi dödöda ba wakhögusa.”

So sambua duho nibaso Samuel ba situs Web jw.org nifazökhi ba zi bohou ebua. Iʼangerönusi niwaʼö ba Gamaedola 20:11, ”Suʼa nono matua saʼae, ba oroma ba mbua-buania, na sohau-hau ba na sadölö dödönia.” Hewisa wa möi fanolonia ayati daʼa? Aboto ba dödönia wa fasala na mohokha ba ndra alawe ba no amuata si raʼiö daʼö. Imane, ”Uʼila wa lö owua-wua dödöda ba wongambatö na mohokha ita. Uʼangeragö hewisa dödö woʼomogu dania na iʼila ugadu-gadu ndra alawe böʼö. Awena aboto ba dödögu wa mosikho gamuata daʼö.” Ibulöʼö gera-erania Samuel. Börö me lö mohokha ia saʼae, andrö wa telumöʼö ia moroi ba gamuata wohorö.

Börö me asese sibai ifaigi pornografi Antonio, alio tedönisi ia wamalua amuata wohorö. Hewaʼae no mangowalu ia khö ndra alawe niʼomasiʼönia, tebai iröi zi toʼölö ifalua andrö. Imane wa tetolo ia me iʼangeragö niwaʼö ba 1 Fetero 5:8, ”Böi mabu-mabu ami, ba böi mörö-mörö, itörö sa danö si faʼudu khömi andrö, Afökha andrö, hulö zingo sindröndrö-ndröndrö, iʼalu-alui, haniha niʼania.” Imane Antonio, ”Gofu hezo manö, so gambara zohorö-horö, ba tola tetanögö ia ba wangera-ngerada. Ayati andre zanolo yaʼo woʼangeragö hezo moroi wondrönisi dödö andrö. Moguna alio aboto ba dödögu wa moroi khö Gafökha gambara zohorö-horö daʼö. Iadaʼa, uʼila wa ha Yehowa zanolo yaʼo faböi ʼmabu-mabu mazui mörö-möröʼ, enaʼö tola ulawa wangera-ngera hegöi tödö si fasala, ba samakiko fongambatögu.” Itema wanolo nibeʼe khönia Antonio, irege tola iböhöli zi toʼölö ifalua andrö. Ba gafuriata, tola itimbagö gamuata wohorö.

Sindruhu-ndruhu wa so mene-mene si tefaudu ba Zura Niʼamoniʼö sanolo yaʼita wanimbagö abula dödö. Hizaʼi, hewisa na so gabula dödö sabölö-bölö ba abua wanayaigö yaʼia? Datatutunö hewisa wanolo Daromali Lowalangi ita ba wangasiwai yaʼia.