KHALAIGÖ ATÖ: So ndraʼugö ba museum safönu patung si no arara, ba oya saʼae zi no agateu ba atua börö waʼaukhu zino mazui teu. So ösa ndroto-ndrotonia si no adudu. Hizaʼi, so sambua tö nasa zi baga, lö si tekiko. Ösofu khö zamasao yaʼugö, ”Hadia bohou patung daʼa?” Itema li, ”Löʼö. Abölö ara patung daʼa moroi ba danö böʼö, ba lö irai muʼehaogö ia.” Ösofu nasa khönia, ”Hadia larorogö sibai patung daʼa?” Itema li, ”Löʼö. Asese göna ia teu hegöi angi. Ba ato zedöna mamakiko yaʼia.” Te ahöli dödöu ba manofu-nofu ndraʼugö, ʼHezo moroi tefazökhi patung daʼa?ʼ

Simane daʼö göi Zura Niʼamoniʼö. Daʼa mbuku satua moroi ba mbuku tanö böʼö. Hewaʼae so mbuku tanö böʼö si no atua, hizaʼi so ösa zi tekiko simane patung si no arara no mege. Lö saʼae tefaudu nösinia ba zi bohou lafareso niha. Duma-dumania, buku soʼamakhaita ba ilmu pengetahuan. Tanö böʼönia, sanandrösa ba dalu-dalu, lö saʼae moguna iadaʼa wanuturu lala si so ba mbuku andrö, ba tola manö möi famaʼala. Aefa daʼö, oya faosatönia si no taya mazui tekiko.

Hizaʼi, tenga simane daʼö Zura Niʼamoniʼö. Hewaʼae musura ia töra 3.500 fakhe ba zilalö, lö tebulö nösinia. No ngaotu fakhe laforege niha ba wanunu Sura Niʼamoniʼö, lö latehegö wangogunaʼö yaʼia, ba laʼoʼaya, hizaʼi tola nasa labaso ia. Hewaʼae so waʼatua-tua si bohou ba gulidanö andre, lö irai tebulö nösi Zura Niʼamoniʼö ba itutunö khöda hadia zalua ba zi so miföna.​—Faigi kotak ”Hadia Ha Me Föna Moguna?”

Te manofu-nofu ndraʼugö, ʼHadia moguna nasa khöda wamahaʼö Zura Niʼamoniʼö?ʼ Enaʼö öʼila wanema linia, angeragö atö, ʼHadia gabula dödö sabölö-bölö nitaögö niha iadaʼa? Hezo zabölö muhokha mbuda?ʼ Te öʼangeragö zanandrösa ba wasuwöta, polusi, faʼalösökhi, mazui korupsi. Iadaʼa, fatimbaisi hadia goi-goi nifahaʼö Zura Niʼamoniʼö. Me öbaso goi-goi andrö, sofu khöu samösa, ’Na laʼoʼö goi-goi daʼa niha, hadia tola sökhi gulidanö andre?’

GOHI WAʼATULÖ

”Yaʼahowu zangatulöʼö niha, me yaʼira nifotöi ono Lowalangi dania.” (Mataiʼo 5:9) ”Na dali ami, ba yaʼatulö ami ba niha fefu.”​—Roma 12:18.

FAʼAHAKHÖ DÖDÖ, FANGEFAʼÖ SALA

”Yaʼahowu zahakhö tödö, me yaʼira nihakhösi tödö dania.” (Mataiʼo 5:7) ”Hewaʼae na so mbörö waʼabao dödömi, böi tebulö khömi waʼebolo dödö zamösana ba faoma miʼefaʼö zala nawömi soroi ba dödö. Simane fangefaʼö Yehowa * salami soroi ba dödö, mifalua göi zimane daʼö.”​—Kolose 3:13, Terjemahan Dunia Baru.

LÖ FAMABÖʼÖ-BÖʼÖNI MADO

No ifazökhi Lowalangi ”fefu soi niha ba gulidanö maʼasagörö, si ha sambua böröta”. (Halöwö Zinenge 17:26) ”Lö ifaigi mbawa niha Lowalangi, dozi sa, ha soi ira, sangataʼufi yaʼia, solau satulö, daʼö zomasi ia.”​—Halöwö Zinenge 10:34, 35.

BÖI TAFAKIKO GULIDANÖ

”Ba ihalö niha no mege Yehowa Lowalangi, ifaʼaso ba Kabu Edena andrö, ba wangehao ba ba wanaro.” (1 Moze 2:15) ʼIfakiko zamakiko ulidanö andröʼ Lowalangi.​—Famaʼeleʼö 11:18.

OGOROFI WANGISÖ ANAʼA BA AMUATA FOHORÖ

”Miʼangelamaisi waʼomasi ganaʼa fefu, alakha lö fahöna, faʼirugi aurifa si so andrö.” (Luka 12:15) ”Ba fohorö, ba hadia ia ngawalö waʼaraʼi-raʼiö fefu, ba faʼomasi ganaʼa, ba böi naʼi terongo ba khömi, simanö zoadu ba niʼamoniʼö.”​—Efeso 5:3.

LÖ FALIMO, OWÖLÖ-ÖLÖ WOHALÖWÖ

”Si sökhi manö zedöna matörö, fefu, hadia ia.” (Heberaiʼo 13:18) ”Si no managö-nagö, ba böi yamanagö-nagö saʼae, ba yamohalöwö.”​—Efeso 4:28.

TOLO ZINANGEA MUHAKHÖSI TÖDÖ

”Mirara dödö zabu tödö; mitolo zambö faʼabölö, mibologö dödömi khöra fefu.” (1 Tesalonika 5:14) ”Möi ita mutolo zi lö ama, si lö ina, awö zi no mate donga ba waʼabu dödöra.”​—Yakobo 1:27.

Tenga ha asala itutunö goi-goi andrö Sura Niʼamoniʼö. Ifahaʼö ita enaʼö taʼameʼegö tödö daʼö ba tafalua ia ba waʼaurida. Hasambalö alö gabula dödö ba gulidanö na laʼoʼö goi-goi andrö niha. Ba daʼa taʼila wa moguna sibai goi-goi Zura Niʼamoniʼö ba tefaudu ia ba ginötö andre! Hizaʼi, hadia so gunania khöu?

Imane samösa ira matua satua-tua, ”Tobali sa famuʼa ba hulu waʼatua-tua andrö nifazökhi dangania.” (Mataiʼo 11:19) Hadia fao dödöu ba wehede  andre? Awena faduhu dödöda wa atua-tua zi samösa niha na no taʼila mbua moroi ba nifaluania. Andrö, te ömane tödöu, ʼNa sindruhu-ndruhu moguna Zura Niʼamoniʼö, hasambalö tola iʼasogö zi sökhi ba waʼaurigu. Hewisa wanolonia yaʼo ba wanaögö abula dödö?ʼ Angeragö duma-duma daʼa.

Oya sibai halöwö Delphine * me föna, ba owua-wua dödönia. Hizaʼi, ba zi lö idöna-döna, alua khönia gabula dödö. Mate nononia alawe, fawuka wongambatöra, ba lö kefenia saʼae. Itörö tödönia, ”Börö me lö hadöi onogu, foʼomogu ira matua, hegöi omogu, hulö lö moguna waʼaurigu ba lö saʼae uʼila haniha ndraʼo. Lö faʼabölögu ba faʼaterou dödögu ba waʼauri.”

Awena aboto ba dödö Delphine wa atulö niwaʼö ayati daʼa, ”Faʼanau nosoma andrö, ba fitu ngafulu fakhe, ba na anau, ba walu ngafulu fakhe, ba si sökhinia, ba fangerege dödö ba famakao, si fulöi ia waʼanumalö, si hombo ndraʼaga.”​—Zinunö 90:10.

Me itaögö gabula dödö andrö Delphine, iʼalui wanolo ba Zura Niʼamoniʼö, ba mofozu daʼa. Simane nitutunö ba zi tölu ngawua duho aefa daʼa,  ato niha sanema bua me laʼoʼö mene-mene Zura Niʼamoniʼö irege tola lataögö gabula dödöra. Larasoi wa Sura Niʼamoniʼö andrö hulö patung nitutunö ba wamobörö duho andre, tenga simane buku tanö böʼö si lö muʼogunaʼö saʼae. Hadia simane daʼö Zura Niʼamoniʼö börö me faböʼö wamazökhi yaʼia? Hadia sindruhu wa bua gera-era Lowalangi nösi Zura Niʼamoniʼö andrö ba tenga bua gera-era niha gulidanö?​—1 Tesalonika 2:13.

Te örasoi göi wa ha sabata waʼauri andre ba afönu abula dödö. Na abua khöu wanaögö ngawalö gabula dödö, hezo so tola ösöndra wondrara dödö, fanolo, hegöi mene-mene si tefaudu?

Datatutunö tölu lala nibeʼe Zura Niʼamoniʼö ba wanolo yaʼugö. Tola itolo ndraʼugö Sura Niʼamoniʼö ba

1. wanimbagö abula dödö ndrege zi tola ita.

2. wangasiwai abula dödö salua.

3. wanaögö abula dödö sabua si fao faʼebolo dödö.

Mututunö zi tölu faosatö andre ba zi hauga ngawua duho miföna.