SO ÖSA ZANGUMAʼÖ LÖʼÖ. So doto sangumaʼö, na taʼalui wanuturu lala ba Zura Niʼamoniʼö, hulö na taʼogunaʼö mbuku kimia nifazökhi me 1920-an ba wamahaʼö ba zekola. So göi zi lö faduhu tödö ba Zura Niʼamoniʼö, imane wa fagölö ira na muʼogunaʼö ba komputer si bohou mbuku fanuturu lala niʼogunaʼö ba komputer satua. Moloʼö niha sato, lö moguna Zura Niʼamoniʼö andrö iadaʼa.

Börö me tedou waʼatua-tua niha, hana wa muʼogunaʼö wanuturu lala si no ara andrö iadaʼa? Oya situs Web hegöi blog si lö tebulö mameʼe mene-mene ba fanuturu lala si bohou. So acara TV sogaoni ndra psikolog, sonekhe ba lala waʼauri, hegöi ira penulis si no toʼölö. Oya göi toko samawa buku wanuturu lala enaʼö tedou waʼaurida ba tasöndra hare mato hauga miliar dolar.

Börö me oya zameʼe fanuturu lala simane nitutunö moroi yawa, hana wa taʼalui ia nasa ba Zura Niʼamoniʼö nisura arakhagö 2.000 fakhe silalö? Na taʼalui wanuturu lala ba daʼö, hadia fagölö ira na muʼogunaʼö mbuku kimia ba wamahaʼö, mazui buku wanuturu lala moroi ba komputer satua? Sindruhunia, lö atulö daʼö. Alio tebulö ilmu pengetahuan awö teknologi, hizaʼi hadia tebulö göi zabölö moguna ba niha gulidanö? Omasi niha wangiʼila ohitö dödö ba waʼauri andre, larasoi waʼomuso dödö, faʼahono dödö, fahasara dödö ba nomo, ba lasöndra zindruhu si fahuwu.

Hewaʼae atua Zura Niʼamoniʼö, iʼombakhaʼö khöda hewisa enaʼö tebönökhi zoguna andrö ba waʼaurida ba tanö böʼönia. Itutunö göi wa ösinia andrö bua gera-era Zomböi yaʼita. Ibeʼe mene-mene soguna ba waʼauri ba itolo ita wanaögö abula dödö. (2 Timoteo 3:16, 17) Tefaudu mene-menenia andrö irugi zi lö aetu, lö irai muwaʼö ha ba niha me föna moguna ia! Imane Sura Niʼamoniʼö, ”Sauri sa daromali Lowalangi andrö.”​—Heberaiʼo 4:12.

Hadia sindruhu niwaʼö Zura Niʼamoniʼö andrö? Hadia no atua mbuku daʼö? Hadia ha buku daʼö zabölö moguna, mazui hadia tefaudu na muwaʼö wa sauri sa mbuku andrö? Buku Manuriaigö andre zanolo yaʼugö ba wanöndra fanema linia. Daʼa edisi siföföna moroi ba zi hauga ngawua edisi khusus dania.