Haniha Lowalangi?
Ato niha sangumaʼö wa faduhu dödöra khö Lowalangi. Hizaʼi, na lasofu khöra haniha Lowalangi, no faböʼö-böʼö wanema li nibeʼera. So zangumaʼö wa Lowalangi andrö sanguhuku si lö sökhi, omasi sibai ia ihuku niha samalua sala. Tanö böʼö lamane wa yaʼia andrö sebua faʼomasi ba iʼefaʼö zalara gofu hadia nifaluara. So goi zi faduhu tödö wa no aröu sibai Lowalangi moroi khöda ba lö iʼameʼegö tödö ita. No faböʼö-böʼö mbua gera-era niha irege ato zangumaʼö wa tebai laʼokhögö waʼaboto ba dödö sanandrösa khö Lowalangi.
Hadia moguna aboto ba dödöu Lowalangi? Moguna. Na aboto ba dödöu Lowalangi, so lua-lua waʼauriu ba öʼokhögö gohitö dödö. (Halöwö Zinenge 17:26-28) Na itugu ahatö ndraʼugö khö Lowalangi, itugu iʼomasiʼö ba itolo ndraʼugö. (Yakobo 4:8) Tatu manö, na öʼokhögö waʼaboto ba dödö sindruhu sanandrösa khö Lowalangi, ösöndra waʼauri si lö aetu.—Yohane 17:3.
Hewisa enaʼö aboto ba dödöu Lowalangi? Angeragö niha sahatö khöu, duma-dumania niha si fahuwu khöu. Hewisa enaʼö aro wahuwusami? Moguna öʼila döinia, amuatania, somasi ia hegöi si lö omasi ia, hadia zi no ifalua, hadia gohitö dödönia ba tanö böʼönia. Na omasiʼö ahatö ba zi samösa niha, moguna öfahaʼö ndraʼugö sanandrösa khönia.
Simanö göi, tola aboto ba dödöda Lowalangi na taʼangeragö wanofu-nofu daʼa:
Mufazökhi majalah daʼa enaʼö ösöndra wanema li si teʼodane-dane ba Zura Niʼamoniʼö sanandrösa ba wanofu-nofu andre. Artikel daʼa zanolo yaʼugö enaʼö öʼokhögö wahuwusa si sökhi khö Lowalangi irege ötema mbua, tenga ha asala öʼila haniha ia.
