Na göna ndraʼugö abula dödö, tatu ötötöna wa itolo ndraʼugö si fahuwu khöu. Ato niha sangumaʼö wa tenga si fahuwu khöra Lowalangi börö me lö itolo ira ba zalua khöra. Sindruhunia, oya sibai zi no ifalua Lowalangi salahida. Ba zi so miföna hasambalö iheta fefu gabula dödö hegöi famakao nitaögöda iadaʼa. Hadia dania nifaluania?

Ihori dania ngawalö waʼalösökhi Lowalangi hegöi samobörö si lö sökhi. Ifatunö Sura Niʼamoniʼö hadia mbörö wa alua waʼalösökhi, ”Satana zamatörö ulidanö andre.” (1 Yohane 5:19) Iwaʼö göi Yesu wa Satana ”zamatörö ulidanö andre”. (Yohane 12:31) Fondröni dödö nibeʼe Zatana ba gulidanö andre, daʼö mbörö wa alua waʼalösökhi iadaʼa. Hadia nifalua Lowalangi ba zi so miföna?

Lö ara tö, iʼogunaʼö Nononia Yesu Keriso Lowalangi Yehowa ba ’wangeheta Afökha sangaʼasogö faʼamate’. (Heberaiʼo 2:14; 1 Yohane 3:8) Sindruhunia, ifatunö khöda Sura Niʼamoniʼö wa no iʼila Afökha wa ”lö ara tö ginötö nitehe khönia”. (Famaʼeleʼö 12:12) Ihori fefu waʼalösökhi Lowalangi hegöi niha samalua daʼö.—Sinunö 37:9; Amaedola 2:22.

Na no aefa ihori fefu waʼalösökhi salua ba gulidanö andre, hasambalö ifalua gohitö dödönia Somböi yaʼita. Ohitö dödönia yaʼia daʼö omasi ia na fefu niha soʼahonoa laʼiagö gulidanö faradaiso. Hadia manö dania nirasoida?

Faʼahono dödö ba faʼatulö irugi zi lö aetu. ”Niha si so fangide-ngideʼö zokhö tanö dania, ba owua-wua dödöra börö me fahöna waʼatulö.”—Sinunö 37:11.

Fahöna gö si sökhi. ”Ba oya sibai dania mbua zinanö ba danö; fahöna dania daʼö ba zuzu hili.”—Sinunö 72:16.

Omo si sökhi ba halöwö sangowua-wuaʼö tödö. ”Lalau nomo ba toröi ira ba daʼö; lafazökhi kabu nagu, ba laʼa mbuania. . . . Latema mbua waʼerege dödöra niha nifiligu.”—Yesaya 65:21, 22.

Hadia omasiʼö örasoi waʼauri simane daʼö? Ba zi lö ara tö, tola larasoi niha waʼauri simane daʼö ero maʼökhö.

Iadaʼa, fefu niha göna ira fökhö ba faʼamate. Hizaʼi, ba zi lö ara tö, tebulö zalua. Börö höli nibeʼe Yesu Keriso, andrö wa ”lö tekiko dozi samati khönia, ba lasöndra waʼauri si lö aetu”. (Yohane 3:16) Hadia manö mbuania khöda?

Lö hadöi saʼae niha sofökhö. ”Samösa lö ba mbanua sangumaʼö: ’Mofökhö ndraʼo.’ Niha si so ba mbanua andrö, falukha ira wangefa horö.”—Yesaya 33:24.

Lö hadöi saʼae faʼamate. ”Iheta waʼamate sagötö faʼara, iʼosi dawa hörö ba mbawa niha fefu Lowalangi Yehowa Fondrege Zalawa.”—Yesaya 25:8.

Tasöndra waʼauri si lö aetu. ”Buala faʼebua dödö Lowalangi andrö yaʼia daʼö faʼauri si lö aetu ba khö Keriso Yesu Soʼaya yaʼita.”—Roma 6:23.

Mususugi niha si no mate. ”So wanusugi niha si no mate, he satulö he si lö atulö.” (Halöwö Zinenge 24:15) Latema göi mbua moroi ba höli si no mubeʼe.

Hewisa wamalua Lowalangi fefu daʼö?

Börö me no tefasindro wamatörö Lowalangi ba zorugo, ifalua gohitö dödönia ba niha hegöi ba gulidanö. No ifataro Yesu Keriso tobali Samatörö. (Sinunö 110:1, 2) Daʼa wamatörö niwaʼö Yesu khö ndra nifahaʼönia enaʼö laʼangandröi, ”He Ama khöma si so ba zorugo, . . . yatohare Wamatörömö.”—Mataiʼo 6:9, 10.

Alua dania Wamatörö Lowalangi ba gulidanö ba ihori ngawalö wamakao hegöi fangabu dödö. Daʼa wamatörö sabölö sökhi. Daʼö mbörö wa iforege sibai Yesu ba wanuriaigö ’turia somuso dödö sanandrösa ba Wamatörö Lowalangi’. Iʼandrö göi enaʼö lafalua daʼö ira nifahaʼönia.—Mataiʼo 4:23; 24:14.

Börö me iʼomasiʼö sibai niha gulidanö, ifabuʼu khöra Yehowa Lowalangi wa hasambalö ibeʼe khöra zahöli-höli dödö andrö. Me no öʼila daʼö, hadia lö omasiʼö na itugu monönö waʼaboto ba dödöu ba itugu ahatö ndraʼugö khö Lowalangi? Hadia manö mbua nitemamö na öfalua daʼö? So wanema linia ba duho aefa daʼa.