”Gofu hadia ia niʼandrömi khö Nama ba döigu, hasambalö ibeʼe khömi.”​—Yohane 16:23.

Moroi ba wehede Yesu taʼila wa omasi Yehowa na mangandrö ita khönia, tenga taʼodela nadu, niha niʼamoniʼö, malaʼika, mazui ba niha si no mate, hizaʼi ba döi Yesu Keriso. Ba ginötö mangandrö ita khö Lowalangi ba döi Yesu, no taforomaʼö wa aboto ba dödöda wa ifondrondrongo wangandröda Lowalangi börö nifalua Yesu khöda. Imane Yesu, ”Lö sondrugi Ama na lö itörö ndraʼo.”​—Yohane 14:6.

”Mibokai dödömi khönia.”​—Zinunö 62:9.

Ba ginötö mangandrö ita khö Yehowa, moguna fahuhuo ita simane khö zi samösa ama safönu faʼomasi. Moguna fahuhuo ita khönia si fao famosumange ba soroi ba dödö, tenga simane na mombaso buku mazui nitanö ba dödö.

”Ifondrondrongo gofu hadia ia niʼandröda si faudu ba zomasi ia.”​—1 Yohane 5:14.

Ba Zura Niʼamoniʼö, ifatunö khöda Lowalangi Yehowa hadia nifaluania khöda ba hadia zomasi ia tafalua khönia. Enaʼö ifondrondrongo wangandröda Lowalangi, moguna mangandrö ita ”si faudu ba zomasi ia”. Börö daʼö, moguna tafahaʼö ita ba Zura Niʼamoniʼö enaʼö taʼila hadia zomasi ia. Na tafalua daʼö, hasambalö fatema ba dödönia wangandröda.

Taʼangandröi Soguna Khöda. Tola taʼandrö khö Lowalangi soguna khöda sero maʼökhö simane ö, nukha, hegöi nahia waʼatoröi. Tola göi taʼandrö faʼatua-tua enaʼö tola tahalö gangetula si sökhi ba faʼanau gölö ba wanaögö abula dödöda. Mangandrö ita ba wangandrö famati, fangefa zala, ba fanolo moroi khö Lowalangi.​—Luka 11:3, 4, 13; Yakobo 1:5, 17.

Taʼangandröi Niha Böʼö. Satua si so faʼomasi, omuso dödönia na faoma laʼomasiʼö nawöra iraonora. Omasi göi Yehowa na iraononia si so ba gulidanö faoma laʼameʼegö tödö nawöra. Taʼohe ba wangandrö foʼomoda, iraonoda, ösi nomoda, hegöi si fahuwu khöda. Imane Yakobo, ”Faoma miʼangandrö salahi nawömi.”​—Yakobo 5:16.

Taʼandrö Saohagölö. Imane Sura Niʼamoniʼö sanandrösa ba Zomböi yaʼita, ”Ifalua zi sökhi yaʼia daʼö ibeʼe khömi deu hegöi baŵa wamasi, ba iʼabusoiʼö ami faoma ö si möi fangomuso dödömi.” (Halöwö Zinenge 14:17) Ba ginötö taʼangeragö fefu ngawalö zi no ifalua khöda Lowalangi, tefarou dödöda ba wangandrö saohagölö khönia ba wangandrö. Tatu manö, moguna göi taforomaʼö wangandrö saohagölö khö Lowalangi ba lala waʼaurida.​—Kolose 3:15.

Itaria abu dödöda börö me lö tefondrondrongo wangandrö si oroi dödöda. Hadia daʼö geluahania wa lö iʼameʼegö tödö ita Lowalangi? Tenga! Nehegö duma-duma zangoromaʼö wa moguna lö tebulö mangandrö ita.

Steve, nitutunö ba artikel si oföna, ifaduhuʼö, ”Na uböhöli wangandrö, tola taya fefu wanötönagu ba lö khögu faʼomuso dödö.” Hadia mbörö wa tebulö wangera-ngerania? Ibörögö ifahaʼö ia ba Zura Niʼamoniʼö ba ifahaʼö ia hewisa ba wangandrö, ba enaʼö lö tebulö ifalua daʼö. Imane Steve, ”Ulau mangandrö khö Lowalangi ba wangandrö saohagölö khönia börö waʼomasi nitemagu moroi khö ndra awögu niʼomasiʼö si no motuhini yaʼo. Iadaʼa itugu omuso dödögu moroi ba zilalö.”

Hewisa sanandrösa khö Jenny, sangumaʼö wa tenga sinangea ifondrondrongo wangandrönia Lowalangi? Imane, ”Ba ginötö urasoi wa tenga sinangea ndraʼo, uʼandrö wanolo moroi khö Lowalangi enaʼö uʼila hana wa urasoi wa tenga sinangea ndraʼo.” Hewisa wa möi fanolonia daʼö? ”Fahuhuo khö Lowalangi sanolo yaʼo ba wamaigi yaʼo samösa simane ba wamaiginia yaʼo, hewaʼae na ihuku ndraʼo tödögu hizaʼi lö ihuku ndraʼo Lowalangi. Daʼa zanolo yaʼo enaʼö lö awuwu.” Hadia mbuania? ”Fangandrö zanolo yaʼo ba wangiʼila wa sindruhu-ndruhu so Yehowa, sebua faʼomasi, Lowalangi soʼameʼegö tödö, Ama hegöi si Fahuwu, si lö tebulö manolo yaʼo ba ginötö uforege ba wamalua somasi ia.”

Nehegö göi duma-duma Isabel. Me manabina ia, ifatunö khönia doto wa no cacat nononia andrö bakha ba dalu. Abu sibai dödönia. So ösa zangumaʼö khönia enaʼö idudugö manö nononia. ”Hulö no amaedola mate ndraʼo börö gabula dödö nirasoigu.” Hadia nifaluania? Imane, ”Lö aetu ulau mangandrö khö Lowalangi enaʼö itolo ndraʼo.” Ba ginötö tumbu nononia ono matua sotöi Gerard, cacat nono andrö. Hadia irasoi Isabel wa ifondrondrongo wangandrönia Lowalangi? Irasoi! Hezo oroma daʼö? Imane Isabel, ”Iadaʼa 14 fakhe ndröfi nonogu, ba uʼila so khönia waʼomuso dödö hewaʼae na cacat ia. Aboto ba dödögu wa no fanema li zabölö sökhi ia ba wangandrögu, howu-howu sebua nibeʼe Yehowa khögu.”

Fehede soroi ba dödö samasugi ba dödöda wehede zanura sinunö, ”No öfondrondrongo wehulu dödö nifakao andrö, yaʼugö Yehowa, öʼabeʼeʼö dödöra, öfondrondrongo khöra.” (Zinunö 10:17) Daʼa no dane-dane si sökhi enaʼö lö mamalö mangandrö khö Lowalangi!

Oya wangandrö Yesu nisura ba Zura Niʼamoniʼö. Sabölö tehöngö yaʼia daʼö fangandrö si no ifahaʼö khö ndra nifahaʼönia. Hadia wamahaʼö si tola tahalö moroi ba daʼö?