”Samondrondrongo fangandrö ndraʼugö; dozi niha mangondrasi yaʼugö.”​—Zinunö 65:3.

So ösa niha sangandrö börö me lamane larasoi waʼahono dödö na mangandrö ira, hewaʼae na lö faduhu dödöra wa so zamondrongo. Hizaʼi fangandrö tenga ha ibeʼe khöda waʼahono dödö tola itolo ita göi ba wanaögö abula dödöda. Ifaduhuʼö khöda Sura Niʼamoniʼö wa ”no ahatö Yehowa, * ba zi angaröfi li yaʼia, fefu, ba zi angaröfi li yaʼia soroi ba dödö. . . . Ifondrondrongo weʼaora”.​—Zinunö 145:18, 19.

Börö daʼö, faduhu dödöda wa ifondrondrongo wangandrö niha samosumange yaʼia Lowalangi Yehowa. Si fao faʼomasi imane, ”Awena dania miʼangaröfi li ndraʼo, möi ami mangandrö khögu, ba ufondrondrongo khömi.”​—Yeremia 29:12.

”Böi mifamalö-malö wangandrö.”​—Roma 12:12.

Ba Zura Niʼamoniʼö, iʼoʼou ita enaʼö böi taböhöli wangandrö ba tafalua ia ero inötö. Ba daʼa oroma wa omasi Lowalangi Yehowa na mangandrö ita khönia.​—Mataiʼo 26:41; Efeso 6:18.

Hana wa omasi Lowalangi na mangandrö ita khönia? Angeragö daʼa: Haniha zatua si lö omasi na imane ononia side-ide, ”Hadia tola ötolodo ba Pa”? Tatu manö, iʼila zi samösa ama hadia zoguna mazui nirasoi nononia, hizaʼi me irongo wehede simane daʼö, daʼö zangoromaʼö wa ifaduhusi tödö ia nononia ba ahatö khönia. Simane daʼö göi ba ginötö mangandrö ita khö Lowalangi Yehowa, no taforomaʼö wa tafaduhusi tödö ia ba omasi ita ahatö khönia.​—Gamaedola 15:8; Yakobo 4:8.

”Mitouʼö ba dangania na so zabu dödömi gofu hadia ia, so so sa dödönia ami.”​—1 Fetero 5:7.

Omasi Lowalangi na mangandrö ita khönia börö me iʼomasiʼö ba iʼameʼegö tödö ita. Iʼila fefu gabula dödö ba faʼaombö dödöda, ba omasi ia itolo ita.

Sagötö waʼaurinia, lö tebulö mangandrö Razo Dawido khö Lowalangi Yehowa ba wangandrö fanolo ba itutunö niʼera-era hegöi nirasoinia. (Zinunö 23:1-6) Hewisa dödö Lowalangi khö Dawido? Iʼomasiʼö Dawido Lowalangi ba ifondrondrongo wangandrönia. (Halöwö Zinenge 13:22) Simane daʼö göi, ifondrondrongo wangandröda Lowalangi börö me iʼameʼegö tödö ita.

Daʼö wehede samösa zanura mbuku zinunö ba Zura Niʼamoniʼö. Faduhu dödönia wa ifondrondrongo wangandrönia Lowalangi, ba daʼö zanolo yaʼia. Irasoi wa itugu ahatö ia khö Lowalangi ba so khönia waʼabölö ba wanaögö faʼatosasa hegöi fangabu dödö ba waʼaurinia.​—Zinunö 116:1-9.

Na faduhu dödöda wa ifondrondrongo wangandröda Lowalangi, lö tebulö mangandrö ita khönia. Nehegö zalua khö Pedro, moroi ba Spanyol tanö yöu. Mate nononia ono matua si 19 fakhe ba kecelakaan lalu lintas. Ba waʼabu dödönia andre, itutunö nösi dödönia khö Lowalangi ba hauga kali ilau mangandrö enaʼö itema wondrara dödö hegöi fotuhini. Hadia zalua? Imane Pedro, ”Ifondrondrongo wangandrögu Yehowa, iʼodela woʼomogu awö ndra talifusöma niha Keriso ba wameʼe fondrara dödö hegöi ba wotuhini yaʼo.”

Hewaʼae na lö ifuli auri nononia, fangandrö no tobali fanolo khö Pedro hegöi ösi nomonia. Imane foʼomonia sotöi María Carmen, ”Fangandrö zanolo yaʼo ba wanaögö abula dödögu. Uʼila wa aboto ba dödö Lowalangi Yehowa ndraʼo, börö me ba ginötö mangandrödo khönia urasoi waʼohahau dödö ba faʼahono dödö.”

Sura Niʼamoniʼö hegöi salua ba niha sangoromaʼö wa sindruhu-ndruhu ifondrondrongo wangandrö Lowalangi. Hizaʼi, ifaduhuʼö göi khöda wa lö fefu ifondrondrongo wangandrö Lowalangi. Hana wa so ösa wangandrö nifondrondrongo Lowalangi ba so göi zi löʼö?