”Na mangandrö ami, böi mifuli mitötöi wehede si no mitötöi mege.”​—Mataiʼo 6:7.

Lö omasi Yehowa fangandrö nitanö ba dödö mazui nibaso moroi ba mbuku wangandrö. Hizaʼi, omasi ia na mangandrö ita soroi ba dödö. Angeragö hewisa dödöu na so samösa zi fahuwu khöu, ha daʼö-daʼö manö niwaʼönia khöu ero maʼökhö. Si fahuwu si sökhi lö khönia famini tödö ba ifalua gofu hadia ia soroi ba dödö. Na mangandrö ita khö Namada si so ba zorugo faoma fehededa samösa, daʼö zangoromaʼö wa yaʼia si fahuwu khöda.

”Me miʼandrö ba lö mitema börö me lö sökhi niʼera-erami.”​—Yakobo 4:3.

Aboto ba dödöda wa lö omasi Lowalangi wamondrondrongo fangandröda, na taʼila wa niʼandröda andrö lö tefaudu ba zomasi ia. Duma-dumania, na so samösa niha si famai ba mangandrö ia khö Lowalangi enaʼö moharazaki ba möna ia, hadia ifondrondrongo wangandrönia Yehowa? No ihaogö wamatunö khöda enaʼö böi so khöda fakhögusa, ba böi faduhu dödöda ba ngawalö si lö oroma, simane solohe harazaki. (Yesaya 65:11; Luka 12:15) Tatu manö, lö tatötöna enaʼö ifondrondrongo wangandrö simane daʼö Yehowa! Enaʼö ifondrondrongo wangandröda Lowalangi, moguna taʼandrö si faudu ba niwaʼönia si so ba Zura Niʼamoniʼö.

 ”Si lö mameʼe börö dalingania ba wamondrondrongo oroisa, ba niʼogorifi naʼi wangandrönia.”​—Gamaedola 28:9.

Ba götö Zura Niʼamoniʼö, lö omasi Lowalangi wamondrongo fangandrö niha si lö omasi moloʼö oroisania satulö. (Yesaya 1:15, 16) Lö si tebulö Lowalangi. (Maleakhi 3:6) Na omasi ita ifondrondrongo wangandröda Lowalangi moguna taʼoʼö goroisania. Hewisa na no tafalua zala ba zilalö? Hadia daʼö geluahania wa lö saʼae ifondrondrongo wangandröda Yehowa? Tatu manö tenga! Si fao faʼomasi iʼefaʼö zalada Lowalangi na taforomaʼö wa sindruhu-ndruhu tafalalini gera-erada ba tafalua zi sökhi fönania.​—Halöwö Zinenge 3:19.