Fangandrö no buala si tohude khö María, Raúl, Arne, hegöi ba niha sato. Lamane tödöra wa tola fahuhuo ira khö Lowalangi ba laʼandrö saohagölö hegöi fanolo moroi khönia ba wangandrö. Sindruhu-ndruhu faduhu dödöra ba niwaʼö Zura Niʼamoniʼö sanandrösa ba wangandrö khö Lowalangi, ”Daʼa zi faduhu dödöda: Ifondrondrongo gofu hadia ia niʼandröda si faudu ba zomasi ia.”​—1 Yohane 5:14.

Tanö böʼönia, ato niha abua khöra ba wanemaʼö niwaʼö Zura Niʼamoniʼö sanandrösa ba wangandrö. Itutunö Steve hewisa dödönia sanandrösa ba wangandrö, ”Me 17 fakhe ndröfigu, datölu zi fahuwu khögu zi mate. Samösa zi fatandru ba moto, ba si darua sahöndrö ba nasi.” Hadia nifalua Steve? ”Ulau mangandrö khö  Lowalangi enaʼö ibeʼe wanema li hana wa tola alua fefu daʼö, hizaʼi lö nitemagu wanema linia. Andrö usofu khögu samösa, ’Hana wa mangandrö?’” Fangandrö si lö tefondrondrongo zameʼe ba dödö niha waʼaombö dödö hadia sindruhu-ndruhu so gunania mangandrö.

So göi dane-dane tanö böʼö wa lamane tödöra lö möi fanolora wangandrö. So ösa zangumaʼö no iʼila Lowalangi fefu hadia ia, iʼila hadia zoguna khöda mazui abula dödöda, andrö lö moguna saʼae tatutunö khönia fefu daʼö.

Tanö böʼönia faduhu dödöra wa lö ifondrondrongo wangandröra Lowalangi börö zala si no lafalua ba zilalö. Imane Jenny, ”Abula dödögu sebua yaʼia daʼö urasoi wa lö eluaha ndraʼo. No ufalua ngawalö zameʼe khögu faniasa, andrö umane tödögu wa tenga sinangea na ifondrondrongo ndraʼo Lowalangi.”

Hadia nirasoimö sanandrösa ba wangandrö? Na no irai örasoi simane daʼö mazui so khömö waʼaombö dödö sanandrösa ba wangandrö, tola terara dödömö moroi ba wanema li si tefaudu ba Zura Niʼamoniʼö. Tola tafaduhusi tödö niwaʼö Zura Niʼamoniʼö sanandrösa ba wangandrö; * itolo ndraʼugö ba wanöndra fanema li moroi ba wanofu-nofu:

• Hadia sindruhu-ndruhu ifondrondrongo wangandröda Lowalangi?

• Hana wa so ösa wangandrö si lö tefondrondrongo?

• Hewisa enaʼö ifondrondrongo wangandröu Lowalangi?

• Hadia mbua nitemau na mangandrö ndraʼugö?