Aheta Dania Watiusa Irugi zi Lö Aetu!
Hewaʼae na no taheta watiusa moroi ba dödöda, hizaʼi tebai tatatugöi gamuata hegöi nifalua niha böʼö. Lö tebulö alua gabula dödö ba niha si sökhi börö watiusa. Na simanö, haniha zi tola mangeheta fatiusa sagötö faʼara?
Ha Lowalangi Yehowa zi tola mangeheta fatiusa ba götöda andre irugi zi lö aetu. No ifabuʼu Sura Niʼamoniʼö wa hasambalö ifalua daʼö.—Amaedola 20:22.
LOWALANGI DANIA ZANGEHETA SANGAʼASOGÖ FATIUSA
-
1. SATANA. Satana andrö malaʼika samadaö khö Lowalangi, ba yaʼia zangaʼasogö fatiusa si so ba ginötöda andre. Hasambalö ihori Zatana andrö Lowalangi, ba simanö göi niha si fatiu tödö khö nawönia.—Sinunö 37:38; Roma 16:20.
-
2. ULIDANÖ SAFÖNU FATIUSA. Hasambalö iheta fefu ngawalö zi lö sökhi ba gulidanö andre Lowalangi, tefarahu ba daʼö ndra sondröniaʼö ba politik hegöi ira sondröniaʼö ba agama, samarou tödö niha enaʼö fatiu ira khö nawöra. Hasambalö göi iheta lala wogale safönu fakhögusa, falimosa, ba sangakali awöra niha.—2 Fetero 3:13.
-
3. FALÖMOʼAHONOA NIHA GULIDANÖ. Ifatunö khöda Sura Niʼamoniʼö wa lö moʼahonoa fefu niha gulidanö, irege asese fasala lala wangera-ngerara, nirasoira, hegöi nifaluara. (Roma 5:12) Daʼö sambua mbörö wa tola so ba niha watiusa. Hasambalö itolo niha gulidanö Lowalangi ba wangeheta aoloma dödöra si lö moʼahonoa, irege tola aheta watiusa sagötö faʼara.—Yesaya 54:13.
NO IFABUʼU SURA NIʼAMONIʼÖ GULIDANÖ SI LÖ FATIUSA
-
1. LÖ HADÖI SAʼAE NIHA SANAÖGÖ FALÖʼATULÖ. Famatörö Lowalangi dania zamatörö ba gulidanö andre. Mamatörö ia moroi ba zorugo ba hasambalö iʼasogö waʼatulö sagötö faʼara. (Danieli 2:44) Lö hadöi saʼae fanahö-nahö tödö hegöi famaigi bawa. Hasambalö iheta Lowalangi walöʼatulö salua ba niha gulidanö iadaʼa.—Luka 18:7.
-
2. OHAHAU DÖDÖ NIHA FEFU. Lö hadöi saʼae niha sanaögö abula dödö börö waʼalösökhi mazui fasuwöta. (Sinunö 46:9) Ohahau dödö niha dania toröi ba gulidanö andre börö me ha niha sangomasiʼö faʼatulö zi toröi ba daʼö.—Sinunö 72:7.
-
3. MOʼAHONOA WAʼAURI NIHA FEFU IRUGI ZI LÖ AETU. Fefu niha sauri ba gulidanö, faoma laʼomasiʼö nawöra soroi ba dödö. (Mataiʼo 22:39) Lö hadöi saʼae niha si göna abula dödö börö wangera-ngera si fasala mazui si lö sökhi si no irai alua khöra ba zilalö. (Yesaya 65:17) Ba ginötö daʼö, lö saʼae fatiusa ba niha gulidanö, ba ”owua-wua dödöra börö me fahöna waʼatulö”.—Sinunö 37:11.
Hadia omasiʼö toröi ba gulidanö simane daʼö? Ba götöda andre, ato niha si no mofozu ba wolawa fatiusa börö me lafalua goi-goi Zura Niʼamoniʼö. (Sinunö 37:8) Daʼö zalua khö ndra Samaduhuʼö Yehowa si zuta faʼato ba zi sagörö ulidanö. Hewaʼae no faböʼö-böʼö zi toʼölö lafalua hegöi waö-waö waʼaurira ba zilalö, tola teʼosambuaʼö ira ba faoma laʼomasiʼö nawöra amaedola zi sambua omo.—Yesaya 2:2-4.
Omasi ndra Samaduhuʼö Yehowa ba wamatunö ba niha hewisa lala ba wanaögö falöʼatulö hegöi famaigi bawa. Na öfahaʼö ndraʼugö, tola möi fanolomö daʼö ba wangeheta fatiusa ba öʼokhögö waʼomasi. Tola aboto ba dödöu hewisa zinangeania gamuatau ba niha fefu, hewaʼae na lö laʼila mangandrö saohagölö mazui fatiu dödöra khöu. Buania, tola örasoi waʼomuso dödö iadaʼa ba itugu sökhi wahuwusamö ba niha böʼö. Sabölö moguna, tola aboto ba dödöu hewisa enaʼö auri ndraʼugö barö Wamatörö Lowalangi ba ginötö tehori dania watiusa irugi zi lö aetu.—Sinunö 37:29.
^ par. 15 Tehenaigö ia ha ba zi hauga ngawalö li.
Te Göi Adöni Dödöu
MANURIAIGÖ
Hadia Nifalua Wamatörö Lowalangi Dania?
Aboto ba dödö Yesu wa ha Famatörö Lowalangi zi tola mangeheta gabula dödö si so ba gulidanö. Hadia zi no ifalua Wamatörö andrö irege so khöda waʼafaduhu dödö?
