LALA BA WOLAWA FATIUSA
2 | Böi Sulöni zi Lö Sökhi Awönia si Lö Sökhi
Famahaʼö Zura Niʼamoniʼö:
”Böi misulöni zi lö sökhi awönia si lö sökhi. . . . Na tola, migohi waʼatulö ba niha fefu. Böi milau mbalömi . . . börö me so ba zura, ’”Khögu wolau balö, yaʼo zanulöni,” iwaʼö Yehowa.’”—ROMA 12:17-19.
Eluahania:
Hewaʼae no sinangea mofönu ita na lafalua khöda zi lö sökhi, lö fao dödö Lowalangi na talau mbalöda. Hizaʼi, iʼandrö khöda enaʼö tabaloi ia börö me lö ara tö iheta fefu walöʼatulö salua ba gulidanö andre.—Sinunö 37:7, 10.
Si Tola Öfalua:
Na lalau mbalöra niha, no fao ira ba wangaʼasogö fatiusa. Börö daʼö, böi lau mbalöu na so zangafökhöiʼö tödöu mazui samalua khöu si lö sökhi. Tandraigö haogö wameʼe fanema li ba taha dödöu. Itaria, abölö ohahau dödöu na öʼolifugö manö zalua andrö. (Amaedola 19:11) Hizaʼi na moguna, tola manö abölö sökhi na öfatunö zalua andrö. Duma-dumania, na so niha samalua khöu si lö sökhi, tola öhalö gangetula ba wamatunö khö ndra folisi mazui khö ndra samatörö.
Yaʼita samösa zi rugi na talau mbalöda
Hewisa na lö hadöi lala ba wangasiwai salua andrö si fao faʼatulö? Mazui, hewisa na no öforege wangalui lala ba wangasiwai salua andrö si fao faʼatulö? Böi sulöni zi lö sökhi awönia si lö sökhi. Tola manö itugu lö sökhi zalua na ölau mbalöu. Hizaʼi, forege ba wangeheta fatiusa. Fahaʼö ndraʼugö ba wamaduhusi tödö mene-mene Lowalangi ba faigi hewisa lalania wanolo yaʼugö ba wangasiwai salua andrö. Imane Sura Niʼamoniʼö, ”Odaligö ia ba yaʼia zamaigi lala khöu.”—Sinunö 37:3-5.
Te Göi Adöni Dödöu
SURA NI’AMONI’Ö ZOMBULÖ’Ö FA’AURI
Hawa’ara So Wemöna Fa’ebua Dödö moroi ba Wa’afatuwu?
Abua ba wanimbagö fanahö-nahö tödö. Faigi hewisa zi samösa niha Yahudi hegöi si samösa niha Palestina ena’ö lö khöra fanahö-nahö tödö.
