Ibeʼe khöda wondrara dödö Sura Niʼamoniʼö enaʼö so khöda waʼabölö ba anau gölöda ba wolawa fangera-ngera sambö tefaudu. Ibeʼe göi khöda dötönafö Sura Niʼamoniʼö wa lö ara tö aheta nifotöi fökhö wangera-ngera.

Fefu ita, itaria tarasoi waʼafawuka wangera-ngera. Hizaʼi, yaʼira si göna fökhö depresi mazui faʼaombö dödö, lö aetu-aetu lalawa wökhö wangera-ngera ero maʼökhö. Hewisa wa tola möi fanolo Zura Niʼamoniʼö?

• Ibeʼe khöda wangera-ngera si sökhi Sura Niʼamoniʼö ba wolawa fangera-ngera sambö tefaudu. (Filifi 4:8) Sindruhu-ndruhu wa tola möi fanoloda daʼö ba wanöndra fondrara dödö hegöi faʼahono dödö, irege daʼö zanolo yaʼita ba wanaha fönuda.—Sinunö 94:18, 19.

• Itolo ita Sura Niʼamoniʼö enaʼö böi so ba wangera-ngerada wa si lö eluaha waʼaurida andre.—Luka 12:6, 7.

• Oya waö-waö ba Zura Niʼamoniʼö samaduhuʼö ba dödöda wa tenga zi lö awö-awö ita, ba aboto ba dödö Lowalangi Somböi yaʼita hadia nirasoida.—Sinunö 34:18; 1 Yohane 3:19, 20.

• Ifabuʼu Sura Niʼamoniʼö wa lö saʼae itörö tödöda waʼafökhö nirasoida ba zilalö. (Yesaya 65:17; Famaʼeleʼö 21:4) Na fawuka wangera-ngerada, buʼusa li daʼa zanolo yaʼita enaʼö anau gölöda.