Iʼameʼegö Tödö Ndraʼugö Lowalangi
SURA Niʼamoniʼö zameʼe khöda fanuturu lala fondrege zi sökhi siʼotarai khö Lowalangi. Buku daʼa tenga nifazökhi ndra doto, hizaʼi tola itolo ita ba wanaögö faʼabasaki, faʼafawuka wangera-ngera, faʼabu dödö, hegöi fökhö mboto.
Sabölö tohude, ifaduhuʼö khöda Sura Niʼamoniʼö wa Somböi yaʼita sotöi Lowalangi Yehowa, a abölö aboto ba dödönia niʼera-erada hegöi nirasoida. Omasi sibai ia ba wanolo yaʼita ba wanaögö gofu hadia manö gabula dödö salua khöda. Nehegö duma-duma ba zi dombua ayati Sura Niʼamoniʼö andre si tola möi fondrara dödöda:
”Ahatö Yehowa ba niha sarasa tödö; iʼefaʼö niha si no ide-ide tödö.”—SINUNÖ 34:18.
”Börö me Yehowa Lowalangiu ndraʼo, ugogohe dangau kambölö ba umane khöu, ’Böi ataʼufi. Hasambalö utoloʼö.’”—YESAYA 41:13.
Hizaʼi, hewisa wanolo Yehowa yaʼita ba wanaögö faʼafawuka wangera-ngera? Simane niʼilamö ba artikel aefa daʼa, oya lala niʼogunaʼö Yehowa ba wanolo yaʼita ba wangoromaʼö wa iʼameʼegö tödö ita.
a Yehowa yaʼia daʼö töi Lowalangi.—Sinunö 83:18.
