Tola tarasoi waʼabu dödö na so zi fahuwu khöda si fawuka fangera-ngera. Hizaʼi, tola taforomaʼö wa taʼameʼegö tödö zi fahuwu khöda andrö na tatolo ia ba wanaögö faʼafawuka wangera-ngera. Hewisa wamaluada daʼö?

”Yamuʼalioʼö wamondrongo.”—YAKOBO 1:19.

Sambua lala sabölö sökhi ba wanolo si fahuwu khömö yaʼia daʼö na öfondrondrongo ba ginötö fahuhuo ia. Böi waʼö tödöu wa moguna öbeʼe wanema li ba ngawalö hadia ia niwaʼönia. Foromaʼö khönia wa sindruhu-ndruhu öfondrondrongo wehedenia ba öʼameʼegö tödö ia. Forege enaʼö aboto ba dödöu hadia nirasoinia, ba böi alio manö öhalö rahu-rahu mazui öhuku ia. Böi olifu ndraʼugö wa tola manö iwaʼö wehede si lö fakhamö iʼangeragö, irege maniasa ia ba gafuriata.—Yobi 6:2, 3.

”Mirara dödö niha sabu tödö.”—1 TESALONIKA 5:14.

Tola manö so waʼaombö dödö khö zi fahuwu khömö andrö mazui iwaʼö tödönia wa si lö eluaha waʼaurinia. Na öforomaʼö wa öʼameʼegö tödö ia, tola öbeʼe khönia wondrara dödö ba famarou dödö hewaʼae na lö öʼila hadia zinangea öwaʼö.

”Sindruhu si fahuwu lö tebulö waʼomasinia ero inötö.”—AMAEDOLA 17:17.

Beʼe khönia wanolo. Moroi na öʼosangila, abölö sökhi na ösofu khönia hadia zinangea öfalua.  Na abua khö zi fahuwu khömö andrö wanutunö hadia zoguna khönia, tandraigö waʼö khönia enaʼö fao ami wanörö tanö mazui tanö böʼönia. Tola göi ötolo ia weʼamöi mowöli, mamöfögö omo, mazui ba wamalua halöwö tanö böʼö.—Galatia 6:2.

”Mibologö dödömi.”—1 TESALONIKA 5:14.

Tola manö lö omasi fahuhuo zi fahuwu khömö andrö. Hewaʼae simanö, faduhuʼö khönia wa omasiʼö öfondrondrongo na so zomasi ia itutunö khömö. Börö wökhö nitaögönia, tola manö iwaʼö mazui ifalua zi möi fangafökhö dödömö. Te lö aʼozu ifalua zi no ifabuʼu mazui agalio mofönu ia. Foromaʼö waʼebolo dödö hegöi faʼaboto ba dödö ba zalua khönia andrö ba böi böhöli wanolo yaʼia.—Amaedola 18:24.

”Utatugöi enaʼö tobali ndraʼo si fahuwu si tola muʼodaligö. Hewaʼae na lö uʼila uʼasiwai gabula dödö salua khönia, lö tebulö ufondrondrongo hadia nitutunönia. Itaria tola irasoi waʼahono dödö na so samösa niha somasi mamondrondrongo yaʼia.”—Farrah, a si fahuwu khö zi samösa ira alawe si göna faʼaombö-aombö dödö, gangguan pola makan hegöi depresi.

”So samösa zi fahuwu khögu si sökhi tödö ba sameʼe famarou dödö. Ikaoni ndraʼo weʼamöi manga ba nomonia. Börö waʼomasi niforomaʼönia, itugu aoha khögu wanutunö hadia nirasoigu. Sindruhu-ndruhu wa möi famarou dödögu nifaluania!”—Ha-eun, si göna depresi.

”Moguna sibai waʼebolo dödö andrö. Na ibörögö mofönu ndraʼo ba nifalua woʼomogu, utörö tödögu wa tenga iʼodödögö wamalua daʼö, hizaʼi börö wökhö si göna yaʼia. Daʼa zanolo yaʼo enaʼö lö mofönu khönia ba uforomaʼö khönia waʼahakhö dödö.”—Jacob, foʼomo zi samösa ira alawe si göna depresi.

”Sindruhu-ndruhu wa itolo ndraʼo foʼomogu ba ibeʼe khögu waʼahono dödö. Na urasoi waʼaombö dödö sabölö-bölö, lö irai ifaso ndraʼo wamalua si lö omasido ufalua. Lua-luania, itaria tebai ifalua ngawalö zomasi dödönia. Tohude sibai ba dödögu waʼaohagölö hegöi faʼoböwö niforomaʼönia.”—Enrico, si göna faʼaombö dödö sabölö-bölö.