Hewaʼae na tenga buku soʼamakhaita ba kesehatan Zura Niʼamoniʼö, hizaʼi tola ibeʼe mene-mene soguna khöda fefu, farahu ba daʼö niha sanaögö faʼafawuka wangera-ngera. Nehegö ösa duma-dumania.

”Tenga ba niha sabölö moguna doto, hizaʼi ba niha sofökhö.”—MATAIʼO 9:12.

Imane Sura Niʼamoniʼö wa moguna taʼalui wanolo khö ndra doto na mofökhö ita. Ato niha sanaögö faʼafawuka wangera-ngera, no itugu alö wökhöra börö me no latema wanolo moroi khö ndra doto, ba aboto ba dödöra hadia wökhöra.

”Moguna wamahaʼö boto andrö.”—1 TIMOTEO 4:8.

Na öforege wondrouʼö faʼabölö mbotomö, tola itugu alö waʼafawuka wangera-ngeramö. No tefarahu ba daʼö wamalua olahraga, femanga gö si sökhi, ba tebönökhi ginötö wemörö.

”Faʼomuso dödö andrö ba no dalu-dalu si sökhi, hizaʼi tobali sangohori faʼabölö waʼafatö dödö.”—AMAEDOLA 17:22.

Na öbaso waö-waö Zura Niʼamoniʼö si möi famarou dödö ba ötatugöi gohitö dödö si tola ökhamö, daʼa zanolo yaʼugö ba wanöndra faʼomuso dödö. Na öʼosambuaʼö dödöu ba ngawalö zi sökhi ba waʼaurimö ba faduhu  dödöu wa hasambalö itugu sökhi zalua ba zi so miföna, tola möi fanolou daʼö ba wanaögö faʼafawuka wangera-ngera.

”So waʼatua-tua ba niha sangide-ngideʼö.”—AMAEDOLA 11:2.

Tola manö örasoi wa tebai öfalua ngawalö hadia ia na dali waʼabölöu samösa. Börö daʼö, moguna öʼandrö wanolo ba niha böʼö. Tola manö omasi ndra si fahuwu khöu hegöi ösi nomou ba wanolo yaʼugö, hizaʼi lö laʼila hadia zinangea lafalua. Börö daʼö, fatunö khöra hadia wanolo soguna khöu. Hizaʼi, böi andrö khöra zi tebai lafalua, ba foromaʼö wangandrö saohagölö ba wanolo nibeʼera.

”Me urasoi wa hulö so zi faböʼö khögu, iʼanemaiʼö möido khö doto. Iʼila doto andrö hadia wökhögu. Daʼa zanolo yaʼo ba wangiʼila hadia zindruhunia zalua khögu ba hadia lala sinangea ufalua ba wamadöhö fökhögu andrö.”—Nicole, a si göna fökhö bipolar.

”Börö me lö tebulö fao ndraʼaga foʼomogu ba wombaso Sura Niʼamoniʼö ero sihulö wongi, tola maʼosambuaʼö dödöma ba ngawalö zi sökhi ba waʼaurima. Baero daʼö, asese usöndra wondrara dödö moroi ba ayati Zura Niʼamoniʼö na so gabula dödö salua ba zi maʼökhö daʼö.”—Peter, si göna depresi.

”Abua sibai khögu wamatunö ba niha böʼö hadia gabula dödö salua khögu, börö me aila sibai ndraʼo. Hizaʼi, so samösa zi fahuwu khögu somasi mamondrongo yaʼo ba iforege enaʼö aboto ba dödönia hadia nirasoigu. Sindruhu-ndruhu wa itolo ndraʼo ba wanöndra faʼahono dödö ba urasoi wa tenga ha yaʼo-yaʼo.”—Ji-yoo, si göna gangguan pola makan.

”No itolo ndraʼo Sura Niʼamoniʼö ba wangokhögö lala wangera-ngera si tefaudu, irege tola utatugöi hawaʼoya ginötögu wohalöwö hegöi ba wolombase. Mene-menenia zanolo yaʼo ba wanaögö faʼafawuka wangera-ngera si no ara göna khögu.”—Timothy, si göna gangguan obsesif kompulsif.